Published:Updated:

காலாண்டு முடிவு அலசல்...

முதலீட்டுக்கு ஏற்ற பங்குகள்..!

காலாண்டு முடிவு அலசல்...

முதலீட்டுக்கு ஏற்ற பங்குகள்..!

Published:Updated:
##~##

நடப்பு 2013-14 முதல் காலாண்டில் பெரும்பாலான இந்திய நிறுவனங்களின் செயல்பாடு சொல்லிக்கொள்ளும்படி இல்லை. டாலருக்கு நிகரான ரூபாய் மதிப்பு வீழ்ச்சி, ஒட்டுமொத்த பொருளாதார மந்தநிலை, அதிக வட்டி விகிதம் போன்றவை நிறுவனங்களின் செயல்பாட்டை பாதித்துள்ளது.

இந்நிலையில் வரும் காலாண்டில் இந்திய நிறுவனங்களின் செயல்பாடு எப்படி இருக்கும் என்கிற கேள்வியுடன் இந்தியா நிவேஷ் செக்யூரிட்டீஸ் நிறுவனத்தின் உதவி துணைத் தலைவர் விக்னேஷிடம் கேட்டோம். முடிந்த காலாண்டில் கம்பெனிகளின் செயல்பாடு எப்படி இருந்தது? வரும் காலாண்டில் எப்படி இருக்கும் என்பது குறித்து இந்தியா நிவேஷ் ரிசர்ச் டீம் மேற்கொண்ட ஆய்வு முடிவுகளை துறை வாரியாக விரிவாக விளக்கினார். அதன் விவரம் வருமாறு:

ஒட்டுமொத்த விகடனுக்கும் ஒரே ஷார்ட்கட்!

‑வாகனத் துறை..!

இந்திய வாகனத் துறை அண்மை ஆண்டு களில் வேகமிழந்திருக்கிறது. பொருளாதார மந்தநிலை, நுகர்வோர் மற்றும் பிசினஸ் சென்டிமென்ட் பலவீனமாக இருப்பதால் ஒட்டுமொத்த வாகனத் துறையில் தேவை கணிசமாக குறைந்துள்ளது.

காலாண்டு முடிவு அலசல்...

இருசக்கர வாகனப் பிரிவில் பஜாஜ் ஆட்டோ, ஹீரோ மோட்டோ கார்ப் நிறுவனங்களின் லாபம் கூடி இருக்கிறது. இதற்கு காரணம், மூலப்பொருட்களின் விலை குறைவு, ரூபாய் மதிப்பு வீழ்ச்சி ஆகிய இரு அம்சங்களே... டாடா மோட்டார்ஸ், மாருதி சுசூகி விற்பனை எதிர்பார்ப்பைவிட குறைந்துபோனது. டிராக்டர் விற்பனை அதிகரிப்பால் எம். அண்ட் எம் நிலை சற்று மேம்பட்டிருக்கிறது. பருவமழை நன்றாக இருந்தால் ஹீரோ மோட்டோ கார்ப், எம் அண்ட் எம் நிறுவனங் கள் லாபம் அடையக்கூடும். இரண்டாம் காலாண்டில் வாகன விற்பனை வேகம் எடுக்கும் என சொல்வதற்கில்லை.

பரிந்துரை: (வாங்குவதற்கு)
ஹீரோ மோட்டோ கார்ப், எம் அண்ட் எம்

 வங்கி மற்றும் நிதிச் சேவை!

முதல் காலாண்டில் வழங்கப்பட்ட கடனில் பொதுத் துறை வங்கிகளைவிட தனியார் வங்கிகள் அதிக வளர்ச்சி கண்டிருக்கின்றன. அதேநேரத்தில், டெபாசிட் வளர்ச்சியில் பொதுத் துறை மற்றும் தனியார் வங்கிகளின் நிலை ஒன்றுபோல் இருக்கின்றன. இந்திய வங்கிகளின் கடன் வளர்ச்சி 15% ஆகவும், டெபாசிட் வளர்ச்சி 14% ஆகவும் இருக்கிறது. இன்ஃப்ரா, பவர், டெலிகாம், டெக்ஸ்டைல் நிறுவனங்களுக்கு வழங்கப்பட்ட கடன் குறைந்துள்ளது. நடப்பு கணக்கு, சேமிப்பு கணக்கு மூலமான தொகை விகிதம் 32.4% என்கிற அளவில் நிலையாக இருக்கிறது. நிகர வட்டி வரம்பு தனியார் வங்கி களில் 3.8% ஆகவும் பொதுத் துறை வங்கிகளில் 3.2% ஆகவும் உள்ளது.  நிகர வாராக்கடன் பொதுத் துறை மற்றும் தனியார் துறை வங்கிகளில் முறையே 0.56% மற்றும் 0.16% ஆக உள்ளது. ஒட்டுமொத்தமாகப் பார்க்கும்போது பொதுத் துறை வங்கிகளைவிட தனியார் வங்கிகளின் செயல்பாடு சிறப்பாக இருக்கிறது.

பரிந்துரை: (வாங்குவதற்கு)

எஸ்.பி.ஐ., பஞ்சாப் நேஷனல் பேங்க்,
பேங்க் ஆஃப் பரோடா, ஐ.சி.ஐ.சி.ஐ. வங்கி

 எஃப்.எம்.சி.ஜி!

கடந்த மூன்று மாதங்களாக சென்செக்ஸ் வருமானத்தைவிட எஃப்.எம்.சி.ஜி பங்குகள் அதிக வருமானம் தந்துள்ளது. மாரிகோ மற்றும் டாபர் நிறுவனங்களின் விற்பனை அளவு குறைந்துள்ளது. பஜாஜ் கார்ப், கோத்ரெஜ் கன்ஸ்யூமர் புராடக்ட் நிறுவனங்களின் விற்பனை அதிகரித்துள்ளது.

பரிந்துரை: (வாங்குவதற்கு)
பஜாஜ் கார்ப்., டாடா குளோபல்

 ஐ.டி. துறை!

டாலர் மதிப்பு அதிகரிப்பால் இந்திய ஐ.டி. நிறுவனங்களில் பல லாபத்தில் இருக்கின்றன. சர்வதேச பொருளாதார மேம்பாடு, ஆர்டர் அதிகரிப்பு போன்றவை இத்துறைக்கு சாதகமான அம்சம். புதிய பிரிவுகளில் சேவை அளித்தல், நிறுவனங்களைக் கையகப்படுத்துதல் மூலம் பல ஐ.டி. நிறுவனங்கள் வேகமான வளர்ச்சி கண்டு வருகின்றன.

பரிந்துரை: (வாங்குவதற்கு)
ஹெச்.சி.எல்., என்.ஐ.ஐ.டி. டெக், டெக் மஹிந்திரா  

ஆயில் அண்ட் கேஸ்!

உற்பத்தி குறைவால் இத்துறை நிறுவனங் களின் லாபம் குறைந்துள்ளது. ரூபாய் மதிப்பு வீழ்ச்சி ஆயில் அண்ட் கேஸ் துறையை மிகவும் பாதித்துள்ளது. முதல் காலாண்டில் ஓ.என்.சி.ஜி., ஆயில் இந்தியா நிறுவனங்களின் விற்பனை சந்தை எதிர்பார்ப்பைவிட குறைந் துள்ளது. வருமான பகிர்வில் அரசுக்கு அதிக பங்கு சென்றதால் கெய்ர்ன் இந்தியாவின் லாபம் குறைந்துள்ளது. டீசல் விலை உயர்வு, இயற்கை எரிவாயு விலை அதிகரிக்கும் திட்டம் போன்றவை இத்துறைக்கு சாதகமான அம்சங்கள்.

பரிந்துரை: (வாங்குவதற்கு)
ரிலையன்ஸ், ஓ.என்.சி.ஜி., கெயில், கெய்ர்ன் இந்தியா, ஆயில் இந்தியா  

 பார்மா!

முதல் காலாண்டில் அரோபிந்தோ, ஐ.பி.சி.ஏ. லேப்ஸ், சன் பார்மா, டோரன்ட் நிறுவனங்களின் செயல்பாடு நன்கு இருந்தது. ரூபாய் ஏற்ற இறக்கம், மருந்து தயாரிப்புக்கான ஒப்புதல் தாமதம், ஆராய்ச்சி மற்றும் மேம்பாடு  முயற்சி தோல்வி அடைவது இத்துறைக்கு பாதகம்.  

பரிந்துரை: (வாங்குவதற்கு)
சன் பார்மா, அரோபிந்தோ, ஐ.பி.சி.ஏ. லேப்ஸ், கிளென்மார்க்ஸ்

 பவர்!

பொதுத் துறையைச் சேர்ந்த என்.டி.பி.சி., என்.ஹெச்.பி.சி., பவர் கிரீட் மற்றும் டாடா பவர் நிதிநிலை முடிவுகள் குறிப்பிட்டு சொல்லும்படி அமைந்திருந்தன. சர்வதேச சந்தையில் நிலக்கரி விலை குறைவு, விரிவாக்கத் திட்டங்கள், மின் கட்டணம் அதிகரிப்பு போன்றவை இத்துறைக்கு சாதகம் என்றாலும்  ரூபாய் மதிப்பு வீழ்ச்சி, அதிக வட்டிச் செலவு போன்றவை பாதகமான அம்சங்கள்.

பரிந்துரை: (வாங்குவதற்கு)
என்.டி.பி.சி., கோல் இந்தியா, டாடா பவர்

டெலிகாம்!

பார்தி ஏர்டெல் நிறுவனத்தின் வருமான அதிகரிப்பு, முதல் காலாண்டில் அனலிஸ்ட் களின் எதிர்பார்ப்பின்படி இருந்தது. ஐடியா செல்லுலார் நிறுவனத்தின் லாப உயர்வு எதிர்பார்ப்புகளைவிட அதிகமாக இருந்தது. அதேநேரத்தில் ரிலையன்ஸ் கம்யூனிகேஷனின் வருமானம் சந்தை எதிர்பார்ப்பைவிட குறைவாக இருந்தது.

பரிந்துரை: வாங்க: பார்தி ஏர்டெல்

கேப்பிட்டல் கூட்ஸ்!

காலாண்டு முடிவு அலசல்...

பொருளாதார மந்தநிலை, விரிவாக்கத் திட்டங்கள் தள்ளிவைப்பு போன்றவற்றால் தள்ளாடிக்கொண்டிருக்கிறது. கிரீவ்ஸ் காட்டன், கிராம்ப்டன் கிரீவ்ஸ் தவிர இதர நிறுவனங்களின் நிகர லாபம் முதல் காலாண்டில் குறைந்துள்ளது. பி.ஹெச்.இ.எல், வோல்டாஸ் நிறுவனங்களின் ஆர்டர்கள் தொடர்ந்து குறைந்து வருகிறது.

இன்ஃப்ரா!

இன்ஃப்ரா நிறுவனங்களின் நிதிநிலை மிகவும் மோசமாக இருப்பதால் இத்துறை நிறுவனப் பங்குகளின் விலை கணிசமாக குறைந்திருக்கிறது. ஐ.ஆர்.பி., ஆர்.இன்ஃப்ரா, ஜே.பி. அசோசியேட்ஸ், இன்ஜினீயர்ஸ் இந்தியா உள்ளிட்ட நிறுவனங்களின் ஆர்டர் குறைந்துள்ளது. எல் அண்ட் டி, ஐ.டி.என்.எல். நிறுவனங்களின் ஆர்டர் அதிகரித்துள்ளது. 2014-ல் பொதுத் தேர்தல் வரவிருப்பதால், மத்திய அரசு பல்வேறு சீர்திருத்தங்களைக் கொண்டுவரும் என எதிர்பார்க்கப்படுகிறது. இது இத்துறைக்கு சாதகம்.  

சிமென்ட் துறை!

கடந்த மூன்று மாதங்களாக ஏ.சி.சி., அம்புஜா சிமென்ட், அல்ட்ராடெக் நிறுவனங்களின் விற்பனை குறைந்துள்ளது. இதனால் இந்நிறுவனப் பங்குகளின் விலை 12 - 15% வரை குறைந்துள்ளது. பருவமழை முந்தியது,  பொருளாதாரச் சீர்திருத்த அறிவிப்புகள் தாமதமாவது போன்றவை இத்துறைக்கு பாதகம். சிமென்ட் நிறுவனப் பங்குகளில் இருந்து சற்று விலகி இருப்பது நல்லது.

ரியல் எஸ்டேட்!

இத்துறையைச் சேர்ந்த பல நிறுவன பங்குகளின் விலை கடந்த 3 - 12 மாதங்களில் அதிக வீழ்ச்சியைச் சந்தித்துள்ளன. ரியல் எஸ்டேட் ஒழுங்குமுறை ஆணைய மசோதா சட்டமானால் பல ரியல் எஸ்டேட் நிறுவனங் களின் செலவு அதிகரிக்கும். அந்தவகையில் காத்திருந்து முதலீடு செய்வது நல்லது.

தொகுப்பு: சி.சரவணன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism