Published:Updated:

மியூச்சுவல் ஃபண்ட்... எப்படி முதலீடு செய்வது?

மியூச்சுவல் ஃபண்ட்
பிரீமியம் ஸ்டோரி
மியூச்சுவல் ஃபண்ட்

முதலீட்டு எல்.கே.ஜி! - 5

மியூச்சுவல் ஃபண்ட்... எப்படி முதலீடு செய்வது?

முதலீட்டு எல்.கே.ஜி! - 5

Published:Updated:
மியூச்சுவல் ஃபண்ட்
பிரீமியம் ஸ்டோரி
மியூச்சுவல் ஃபண்ட்

மியூச்சுவல் ஃபண்ட் முதலீடு - இன்றைக்கு விவரம் தெரிந்தவர்கள் தேடிச் செல்லும் ஒரு முதலீடாக இருக்கிறது. குறிப்பாக, 30 வயதுக்கு உட்பட்டவர்கள் இந்த முதலீட்டை மிகவும் விரும்புகிறார்கள். ஆனால், மியூச்சுவல் ஃபண்ட் முதலீடு பற்றிய அடிப்படைகள் பற்றி பலருக்கும் தெரியாமல் இருப்பதால், அது ஒரு ரிஸ்க்கான முதலீடு என்று நினைக்கிறார்கள். மியூச்சுவல் ஃபண்ட் முதலீடு எப்படிப்பட்டது என்பதைத் தெரிந்துகொண்டால், அதில் உள்ள சாதகமான மற்றும் பாதகமான விஷயங் களை நம்மால் சரியாகப் புரிந்துகொண்டு, முடிவெடுக்க முடியும்.

ஹசன் அலி 
ஆலோசகர், 
Siptiger.com
ஹசன் அலி ஆலோசகர், Siptiger.com

முதலீட்டு சூப்பர் மார்க்கெட்...

மியூச்சுவல் ஃபண்ட் முதலீட்டை ஒரு சூப்பர் மார்க்கெட் கடையோடு ஒப்பிடலாம். சூப்பர் மார்க்கெட்டில் நம் வீட்டுக்குத் தேவையான பலவிதமான பொருள்கள் கிடைக்கிற மாதிரி, முதலீடு செய்யத் தேவையான பலவகையான திட்டங்கள் மியூச்சுவல் ஃபண்டில் இருக்கின்றன.

முதலீட்டாளர்கள் மியூச்சுவல் ஃபண்ட் முதலீட்டில் எந்தத் திட்டத்திலும் வருமானத்துக்கு உத்தரவாதம் (கேரன்டி) இல்லை என்பதைப் புரிந்து முதலீட்டை மேற்கொள்ள வேண்டும். அதே நேரத்தில், இதர உத்தரவாதத் திட்டங்களைவிட, நீண்ட காலத்தில் அதிக வருமானம் கொடுக்க அதிக வாய்ப்பு உண்டு என்பதையும் புரிந்துகொள்ள வேண்டும்.

இப்போது தபால் அலுவலகச் சேமிப்புத் திட்டங்களிலும்கூட மூன்று மாதத்துக்கு ஒருமுறை வட்டி விகிதம் மாற்றி அமைக்கப் படுகிறது. அந்த வகையில், இந்தியாவில் எந்த முதலீடு மூலமும் நிலையான வருமானம் பெறும் வாய்ப்பு குறைவாகவே இருக்கிறது.

மியூச்சுவல் ஃபண்ட்... எப்படி முதலீடு செய்வது?

மியூச்சுவல் ஃபண்ட் என்றால் என்ன?

மியூச்சுவல் ஃபண்ட் முதலீட்டு நிறுவனம், ஒரே நோக்கம் கொண்ட பல ஆயிரக்கணக்கான, பல லட்சக்கணக்கான முதலீட்டாளர்களிடமிருந்து பணத்தைத் திரட்டுகிறது. அதை அந்த ஃபண்டின் நோக்கம் எதுவோ (தொடர் வருமானம்/ நீண்ட காலத்தில் முதலீட்டுப் பெருக்கம்), அதற்கேற்ப அந்தத் தொகையைக் கடன் பத்திரங்கள்/ நிறுவனப் பங்குகளில் அல்லது இரண்டிலும் கலந்து முதலீடு செய்து, முதலீட்டைப் பெருக்குகிறது. லாபத்தின் சிறு பகுதியைச் சேவைக் கட்டணமாகத்தான் எடுத்துக்கொண்டு மீதியை முதலீட்டாளர்களுக்குப் பிரித்து வழங்குவதுதான் மியூச்சுவல் ஃபண்ட் முதலீட்டின் அடிப்படையாகும். முதலீட்டாளர், மியூச்சுவல் ஃபண்ட் நிறுவனம் ஆகிய இருதரப்பினரும் பரஸ்பரம் லாபம் அடைவதால்தான் இதை ‘மியூச்சுவல் ஃபண்ட்’ என்கிறோம். அதே நேரத்தில், மியூச்சுவல் ஃபண்ட் முதலீடு மூலமான ஆதாயம் / இழப்பு முதலீட்டாளரைத்தான் சேரும்.

யூனிட் என்றால் என்ன?

மியூச்சுவல் ஃபண்ட் திட்டத்தில் முதலீட்டுத் தொகைக்கேற்ப யூனிட்டுகள் ஒதுக்கப்படும். புதிதாக ஒரு முதலீட்டுத் திட்டத்தை அறிமுகப்படுத்துவதை ‘நியூ ஃபண்ட் ஆஃபர்’ (NFO- New Fund Offer) என்பார்கள். அதாவது, புதிய ஃபண்ட் வெளியிட்டு முதலீட்டைத் திரட்டுவதாகும். அப்போது ரூ.10 முக மதிப்பு (Face Value) கொண்ட யூனிட்டுகளை முதலீட் டாளர்களுக்கு அளிப்பார்கள்.

இந்த ரூ.10 என்பது பின்னர் முதலீட்டின் மதிப்பின் ஏற்ற இறக்கத்துக்கேற்ப, அதிகரிக்கும் அல்லது இறங்கும். இந்த யூனிட்டின் மதிப்பை நிகர சொத்து மதிப்பு (Net Asset Value - NAV) என்பார்கள். இந்த என்.ஏ.வி தொடர்ந்து அதிகரித்தால், அந்த ஃபண்ட் லாபத்தில் இருக்கிறது. இறங்கினால் இழப்பில் இருக்கிறது என்று அர்த்தம்.

மியூச்சுவல் ஃபண்ட்... எப்படி முதலீடு செய்வது?

ஐந்து அமைப்புகளின் பங்கேற்பு

மியூச்சுவல் ஃபண்ட் என்பது ஸ்பான்சர், டிரஸ்ட், ஆர்.டி.ஏ, ஏ.எம்.சி, கஸ்டோடியன் ஆகிய ஐந்து அமைப்புகள் பங்கேற்கும் ஓர் அமைப்பாகும். இந்த ஐந்து அமைப்புகள் பற்றி சுருக்கமாகப் பார்ப்போம்.

ஸ்பான்சர்கள் மற்றும் டிரஸ்டிகள்

வங்கிகள், உள்நாட்டு, வெளிநாட்டு நிதி நிறுவனங்கள் உள்ளிட்டவை பணம் போட்டு மியூச்சுவல் ஃபண்ட் நிறுவனங்களை நடத்தும். இந்த நிறுவனங்களை ஸ்பான்சர் என்பார்கள். இந்த ஸ்பான்சர் என்பவர் ஒரு நிறுவனத்தை நடத்தும் நிறுவனர் போன்றவர் ஆவார். ஸ்பான்சர் நிறுவனம், டிரஸ்ட் (Trust) அமைப்பை ஏற்படுத்தும். முதலீட்டுத் திட்டங்களின்கீழ் திரட்டப்படும் பணம் மற்றும் சொத்துகள் அனைத்தும் இந்த டிரஸ்ட் அமைப்பின் பொறுப்பில் வரும். பண விஷயத்தில் குளறுபடி நடக்காமல் மேற்பார்வை செய்வது டிரஸ்ட்டின் வேலையாகும்.

அஸெட் மேனேஜ்மென்ட் கம்பெனி...

முதலீட்டாளர்களிடமிருந்து திரட்டிய பணத்தை முதலீடு செய்யும் திட்டங்களை உருவாக்குவது, புதிய ஃபண்டுகளை அறிமுகப்படுத்துவது, திட்டத்தின் விதிமுறைப்படி முதலீடு செய்வது, தினசரி நிர்வாகத்தைக் கவனித்துக் கொள்வது ஆகியவை அஸெட் மேனேஜ்மென்ட் கம்பெனியின் (AMC - Asset Management Company) வேலை ஆகும். ஃபண்டுகளின் நிகர சொத்து மதிப்பை, அதே நாள் இரவு 8 மணிக்குள் ஆம்ஃபி (Association of Mutual Funds in India -AMFI)-யின் இணையதளத்தில் வெளியிடுவது ஏ.எம்.சி-யின் முக்கியமான பணியாகும்.

மியூச்சுவல் ஃபண்ட் நிறுவனம்...

ஸ்பான்சர், டிரஸ்டி, ஏ.எம்.சி இணைந்து மியூச்சுவல் ஃபண்ட் நிறுவனத்தை உருவாக்கும். இதன் மூலம்தான் முதலீட்டாளர்கள் முதலீடு செய்ய வேண்டும். மியூச்சுவல் ஃபண்ட் நிறுவனங்கள் பல ஃபண்ட் திட்டங்களைக் கொண்டிருக்கும். ஒவ்வொரு திட்டத்துக்கும் தனியாக ஒரு ஃபண்ட் மேனேஜர் இருப்பார். ஏ.எம்.சி-யால் நியமிக்கப்படும் இவர்தான் அந்தக் குறிப்பிட்ட ஃபண்டின் முதலீடு, செயல் பாடுகளைக் கவனிப்பார். இந்த ஃபண்ட் மேனேஜர்களுக்கு தலைவர் என்பவர் முதன்மை முதலீட்டு அதிகாரி ஆவார்.

கஸ்டோடியன்...

முதலீட்டாளர்களிடமிருந்து திரட்டிய பணத்தில் முதலீடு செய்யும் நிறுவனப் பங்குகள், கடன் பத்திரங்களைப் பராமரிக்க வேண்டிய பொறுப்பு ஃபண்ட் மேனேஜர்களுக்கு இல்லை. அந்த வேலையைச் செய்வது கஸ்டோடியன் (Custodian). அதாவது, கஸ்டோடியனிடம் முதலீட்டுத் தொகை இருக்கும். அதை எதில் முதலீடு செய்ய வேண்டும், எப்போது விற்க வேண்டும் என ஃபண்ட் மேனேஜர் சொல்வார்.

ரிஜிஸ்ட்ரார் & ட்ரான்ஸ்ஃபர் ஏஜென்ட்

முதலீட்டாளர்களுக்கு யூனிட்டுகளை ஒதுக்கிக் கொடுப்பது, முதலீட்டாளர்கள் யூனிட்டுகளை விற்கும்போது பணம் கொடுப்பது போன்ற வேலைகளை செய்ய ரிஜிஸ்ட்ரார் & டிரான்ஸ்ஃபர் ஏஜென்ட் (RTA - Registrar and Transfer Agent) இருப்பார். இந்த ஆர்.டி.ஏ-யை ஒரு மியூச்சுவல் ஃபண்ட் தன்னிடம் வைத்துக் கொள்ள லாம் அல்லது கேம்ஸ் போன்ற வெளி நிறுவனத்திடம் ஒப்பந்த முறையில் தந்துவிடலாம். தன்னிடம் வைத்துக்கொண்டால் அதற்கென தனி நிறுவனம் உருவாக்கப்படும். திட்டங்களின் செயல்பாடு குறித்த தகவல்கள், ஆண்டு அறிக்கை உள்ளிட்ட வற்றை ஆர்.டி.ஏ முதலீட்டாளர் களுக்கு அனுப்பி வைக்கும்!

(வளரும்)