Published:Updated:

ஒரு குடும்பத்துக்கு ஒரே ஒரு பென்ஷன்... சாத்தியம் ஆவதற்கு வாய்ப்புள்ளதா?

பென்ஷன்
பிரீமியம் ஸ்டோரி
பென்ஷன்

பென்ஷன்

ஒரு குடும்பத்துக்கு ஒரே ஒரு பென்ஷன்... சாத்தியம் ஆவதற்கு வாய்ப்புள்ளதா?

பென்ஷன்

Published:Updated:
பென்ஷன்
பிரீமியம் ஸ்டோரி
பென்ஷன்

கணவன் - மனைவி இருவரும் அரசுப் பணி செய்தாலும் ஒரே ஒரு பென்ஷன் மட்டுமே பெறுவார்கள்’ என சமீபத்தில் நாளிதழில் வந்த செய்தி ஒன்றைப் படித்துவிட்டு, கதிகலங்கிப் போயிருக்கிறார்கள் அரசு ஊழியர்கள்.

இது சாத்தியம்தானா என்கிற கேள்விக்குப் பதில் தெரிந்துகொள்ளும் முன், ஒருவர் ஒன்றுக்கு மேற்பட்ட பென்ஷன் பெறலாமா, ஒருவர் எத்தனை பென்ஷன் வரை பெறலாம், அப்படிப் பெறுவதற்கு என்ன நிபந்தனை என்கிற கேள்விகளுக்கான பதிலைப் பார்ப்போம்.

ப.முகைதீன் சேக் தாவூது
ப.முகைதீன் சேக் தாவூது

இரண்டு வகை பென்ஷன்...

மத்திய - மாநில அரசுகள், ரயில்வே, அஞ்சல்துறை, பொதுத்துறை வங்கிகள் முதலானவற்றில் பணியாற்றி ஓய்வு பெற்றவர் களுக்கு பென்ஷன் தரப்படுகிறது. இவற்றுக்கான பென்ஷன் விதிகளும் (ஒரு சில மாற்றங்களுடன்) ஒரே மாதிரியாகவே உள்ளன.

நிர்ணயிக்கப்பட்டுள்ள 60 வயது முடிந்து ஓய்வு பெறுதல், 20 ஆண்டு பணி நிறைவுக்குப் பின் விருப்ப ஓய்வு பெறுதல், பணியில் இருக்கும்போதே ஏற்படும் விபத்து அல்லது நோய் காரணமாகப் பணியில் தொடர முடியாமல் ஓய்வு பெறுதல், பணியில் சேர்ந்த ஒருவர் எந்தப் பணிக்குத் தேர்வு செய்யப் பட்டாரோ, அந்தப் பணியிடம் (Post) கைவிடப்பட்டதால் பணியில் தொடர முடியாமல் ஓய்வு பெறுதல், கட்டாய ஓய்வு காரணமாக ஓய்வு பெறுதல் என ஐந்து முறைகளில் பணியிலிருந்து ஓய்வு பெற்றால் மாதம்தோறும் தரப்படுவது பென்ஷன். சர்வீஸ் பென்ஷன் (Service pension) என அழைக்கப்படும் இது, முதல் வகை பென்ஷன் ஆகும்.

ஒரு குடும்பத்துக்கு ஒரே ஒரு பென்ஷன்... சாத்தியம் ஆவதற்கு வாய்ப்புள்ளதா?

ஃபேமிலி பென்ஷன்

மேற்சொன்ன ஐந்து முறைகளில் ஓய்வு பெறுவதன் மூலம் யாரெல்லாம் பென்ஷன் பெறத் தகுதி பெற்றவர்களோ, அவர்கள் ஓய்வு பெற்று இறந்துபோனாலும், பணியில் இருக்கும்போதே இறந்துபோனாலும், அவருடைய குடும்பத்தினர் பெறத் தகுதியானதுதான் ஃபேமிலி பென்ஷன். இது இரண்டாவது வகை.

இரண்டு சர்வீஸ் பென்ஷன் பெற முடியாது

ஒரு குடும்பத்தில் கணவன் - மனைவி இருவருமே பணியிலிருந்து ஓய்வு பெற்று, இருவரும் ஆளுக்கொரு சர்வீஸ் பென்ஷன் பெறலாம். ஒருவரே ஒன்றுக்கு மேற்பட்ட சர்வீஸ் பென்ஷன் பெற முடியாது. ஆனால், ஒருவர் ராணுவப் பணியில் இருந்து ஓய்வு பெற்ற பிறகு, மீண்டும் குடிமைப் பணியில் (Civil service) சேர்ந்து ஓய்வு பெற்றால், குடிமைப் பணியில் ஒரு சர்வீஸ் பென்ஷனும், முந்தைய ராணுவப் பணிக்கான சர்வீஸ் பென்ஷனுமாக இரண்டு பென்ஷன் பெறலாம். வேறு எவரும் இரண்டு சர்வீஸ் பென்ஷன் பெற முடியாது.

இரண்டு ஃபேமிலி பென்ஷன்

ஒரு பென்ஷன்தாரர் இறந்து போனால் அவரின் கணவர் அல்லது மனைவிக்கு ஒரு ஃபேமிலி பென்ஷன் மட்டுமே கிடைக்கும். ஆனால், ஏற்கெனவே சொன்னபடி, ராணுவ வீரர் ஒருவர் ராணுவப் பணிக்காக ஒரு பென்ஷனும், குடிமைப் பணிக்காக மற்றொரு பென்ஷனும் பெற்றுவந்த நிலையில், அவர் இறந்து விட்டால் அவரின் மனைவிக்கு ராணுவ ஃபேமிலி பென்ஷன் மற்றும் குடிமை ஃபேமிலி பென்ஷன் என இரண்டு ஃபேமிலி பென்ஷன் கிடைக்கும். (இது சமீபத்திய விதி ஆகும்)

இரண்டு ஃபேமிலி பென்ஷன் + 1 பென்ஷன்

ராணுவப் பணியும், குடிமைப் பணியும் முடித்து இரண்டு பென்ஷன் பெற்றுவந்தவர் இறந்துவிட்டால் அவரின் மனைவி இரண்டு ஃபேமிலி பென்ஷன் பெறலாம். அதே சமயம், அவரும் (மனைவியும்) குடிமைப் பணியில் இருந்து ஓய்வு பெற்றால், இரண்டு ஃபேமிலி பென்ஷனுடன் தனக் கான சர்வீஸ் பென்ஷனையும் பெறலாம்.

சர்வீஸ் பென்ஷன் + ஃபேமிலி பென்ஷன்...

கணவன் - மனைவி இருவரும் ஓய்வு பெற்று சர்வீஸ் பென்ஷன் பெற்றுவரும் நிலையில், இருவரில் ஒருவர் இறந்துவிட்டால், உயிருடன் இருப்பவர் தனக்கான பென்ஷனுடன் தனது வாழ்க்கைத் துணைக்கான ஃபேமிலி பென்ஷனையும் பெறலாம்.

வேலை + ஃபேமிலி பென்ஷன்...

கணவர் - மனைவி இருவரும் பணியில் உள்ள நிலையில் கணவர் அல்லது மனைவி இறந்துவிட்டால் உயிருடன் உள்ள கணவர் அல்லது மனைவி தனது சம்பளத்துடன் ஃபேமிலி பென்ஷனும் பெறலாம்.

இதேபோல், ராணுவ வீரரின் மனைவி குடிமைப் பணியில் இருந் தால், தனது பணிக்கான சம்பளத் துடன் கணவரின் ராணுவ ஃபேமிலி பென்ஷன் மற்றும் குடிமை ஃபேமிலி பென்ஷனை யும் பெற்றுக்கொள்ளலாம்.

பிள்ளைகளுக்கு நிபந்தனையுடன் கூடிய ஃபேமிலி பென்ஷன்...

கணவர் அல்லது மனைவி என இருவரில் ஒருவர் பென்ஷன் வாங்கி வரும்போதே இறந்து விட்டால், உயிருடன் உள்ள கணவர் அல்லது மனைவி ஃபேமிலி பென்ஷன் பெறுவார். அவரும் இறந்துவிட்டால் இவருடைய ஆண் - பெண் பிள்ளைகளுக்கு 25 வயது வரை ஃபேமிலி பென்ஷன் தரப்படுகிறது. பெண் பிள்ளைக்கு 25 வயதுக்கு முன்பே திருமணம் ஆகிவிட்டால் கிடைக்காது.

மேலும், ஆண் - பெண் இருவருக்கும் வாழ்வாதாரத்துக்குப் போதுமான வருமானம் உள்ளது எனில், ஃபேமிலி பென்ஷன் கிடைக்காது. அதாவது, தொழில் அல்லது வணிகம் மூலமான வருமானம், சம்பளம், பென்ஷன், அன்யூட்டி மூலம் கிடைக்கும் தொகை குறைந்தபட்ச பென்ஷனைவிட கூடுதலாக இருப்பின் ஃபேமிலி பென்ஷன் பெற முடியாது.

குறைந்தபட்ச பென்ஷன் என்பது தமிழக அரசில் ரூ.7,850, மத்திய அரசு, ரயில்வே, அஞ்சல் துறைகளில் ரூ.9,000. இத்துடன் அகவிலைப்படி சேர்த்துக்கொள்ள வேண்டும். (ஆனால், பொதுத்துறை வங்கி ஊழியர்களுக்கு வேறு விதிமுறைகள் உள்ளன).

பிள்ளைக்கு 2 ஃபேமிலி பென்ஷன்...

அரசுத் துறை, ரயில்வே முதலானவற்றில் ஒரு பிள்ளையின் தாய் - தந்தை இருவருமே பணிபுரிந்து, பென்ஷன் பெற்றுவந்த நிலையில் இறந்துவிட்டாலோ, தகுதியுள்ள ஆண் - பெண் பிள்ளைக்கு இரண்டு ஃபேமிலி பென்ஷன் கிடைக்கும். எப்படித் தெரியுமா?

ஃபேமிலி பென்ஷன் தொகையை ‘வருமானம்’ என்று கணக்கிடுவது இல்லை. எனவே, தந்தை அல்லது தாய் இறந்த பிறகு, முதலில் கிடைக்கும் ஃபேமிலி பென்ஷன் 50,000 ரூபாய் என்றாலும், அடுத்து ஒரு ஃபேமிலி பென்ஷன் 50,000 ரூபாயோ அதற்கு அதிகமாகவோ (உச்சவரம்புக்கு உட்பட்டு) என இரண்டு ஃபேமிலி பென்ஷன் பெறலாம்.

பாதி பேமிலி பென்ஷன்...

ஒருவருக்கு இரண்டு மனைவியர் இருப்பின் இருவருக்கும் 50% பேமிலி பென்ஷன் கிடைக்கும். ஒரு மனைவி மற்றும் முன்னதாக இறந்துபோன அல்லது விவாகரத்தான மனைவிக்கு பிள்ளை இருந்தாலும் 50% - 50% ஃபேமிலி பென்ஷன்தான் கிடைக்கும்.

நான்காவது பென்ஷன்

அரசுத்துறை அல்லது ரயில்வே, மின் வாரியங்கள், அஞ்சல் துறை போன்றவற்றில் பணியாற்றி ஓய்வு பெற்று சர்வீஸ் பென்ஷன் வாங்கிவரும் ராணுவ வீரர் ஒருவரின் மனைவி, இறந்துபோன தன் கணவர் மூலம் ராணுவ ஃபேமிலி பென்ஷன் மற்றும் கணவரின் குடிமை ஃபேமிலி பென்ஷனையும் பெறலாம். ஆக, மொத்தம் மூன்று பென்ஷன். இத்துடன்கூட மைனராக உள்ள ஒருவருக்கோ, மனநலம் பாதித்த ஒருவருக்கோ கார்டியன் என்ற முறையில் மற்றொரு ஃபேமிலி பென்ஷனும் பெறலாம்.

ஒரே பென்ஷன் சாத்தியமா?

ஒரு குடும்பத்தில் இருவர் அரசுப் பணியில் இருந்தாலும் ஒரே ஒரு பென்ஷன் என அரசுத் தரப்பில் சொல்ல வாய்ப்பில்லை. காரணம், பென்ஷன் என்பது ஊழியர் ஆற்றிய பணிக்குத் தரப்படுவதே. எத்தகைய நிலையிலும் பென்ஷன் தருவதை நிறுத்தக் கூடாது என உச்ச நீதிமன்றம் ஏற்கெனவே சொல்லி இருக்கிறது. எனவே, ஒரு குடும்பத்துக்கு ஒரே ஒரு பென்ஷன்தான் என சட்டத் திருத்தம் செய்யப்பட்டால் ஒழிய, அப்படி நடக்க வாய்ப்பில்லை!

என்.பி.எஸ்

தமிழக அரசு ஊழியர்கள் தனது பென்ஷனுடன் என்.பி.எஸ் திட்டத்தில் சேர்ந்து மேற்கண்ட பென்ஷனுடன் என்.பி.எஸ் பென்ஷனும் பெறலாம்.

கூடாது...

அரசு, வாரியம், பொதுத்துறை வங்கிகளில் இருந்து ஓய்வுபெற்று பென்ஷன் பெறுபவர்கள் முதியோர் பென்ஷன், விதவை பென்ஷன், கணவரால் கைவிடப்பட்டவருக்கான பென்ஷன் முதலானவற்றைப் பெற விண்ணப்பிக்கக் கூடாது.

முக்கிய குறிப்பு...

பென்ஷன் உள்ள பணியில் இருக்கையில் ஓராண்டு பணி செய்த பின்பு, ஒருவர் இறந்துபோனாலும் ஃபேமிலி பென்ஷன் உண்டு.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism