Published:Updated:

மருத்துவச் செலவுக்கான சேமிப்பு Vs மருத்துவக் காப்பீடு... எது பெஸ்ட்..?

கேள்வி - பதில்
பிரீமியம் ஸ்டோரி
கேள்வி - பதில்

கேள்வி - பதில்

மருத்துவச் செலவுக்கான சேமிப்பு Vs மருத்துவக் காப்பீடு... எது பெஸ்ட்..?

கேள்வி - பதில்

Published:Updated:
கேள்வி - பதில்
பிரீமியம் ஸ்டோரி
கேள்வி - பதில்

எஸ்.எல்.நரசிம்மன், இ-மெயில் மூலம்.

நிறுவனப் பங்குகள் விற்பனை அல்லது மியூச்சுவல் ஃபண்ட் விற்பனையில் குறுகிய மற்றும் நீண்ட கால ஆதாயம் கிடைக்கும். இதற்கான வரிக் கணக்கீடு மற்றும் வருமான வரி செலுத்தும் பொறுப்பு முதலீட்டாளரைச் சேருமா அல்லது பங்கு / ஃபண்ட் நிறுவனத்தைச் சேருமா? ஆதாயம் முதலீட்டாளருக்குக் கிடைத்தவுடன் வரி செலுத்த வேண்டுமா அல்லது வருமான வரித் தாக்கல் செய்யும் ஜூலை மாதம் செய்ய வேண்டுமா?

லலிதா ஜெயபாலன், நிதி ஆலோசகர், http://moneyvedam.com

“நிறுவனப் பங்குகள், மியூச்சுவல் ஃபண்டுகள், இ.டி.எஃப்கள், கோல்டு ஃபண்டுகள் ஆகிய வற்றை விற்கும்போது முதலீட்டுக் காலத்தைப் பொறுத்து குறுகிய கால மூலதன ஆதாயம் அல்லது நீண்ட கால மூலதன ஆதாயம் கிடைக்கும். இந்த மூலதன ஆதாயத் துக்கு வரி கட்ட வேண்டியது முதலீட்டாளரின் பொறுப்பு ஆகும்.

நிறுவனப் பங்குகள், இ.டி.எஃப் மூலதன ஆதாயத்துக்கான விவர அறிக்கையை தொடர்புடைய பங்குத் தரகு நிறுவனம் அளிக்கும். மியூச்சுவல் ஃபண்ட் முதலீட்டுக்கு கேம்ஸ் (CAMS), கேஃபின் டெக் (KFintech), மியூச்சுவல் ஃபண்ட் முதலீடு செய்ய உதவும் பங்குth தரகு நிறுவனம் மூலதன ஆதாயத்துக் கான விவர அறிக்கையை முதலீட்டாளருக்கு அளிக்கும்.

எந்தக் காலாண்டில் முதலீட்டாளர் மூலதன ஆதாயம் பெறுகிறாரோ, அந்தக் காலாண்டிலேயே வரி பாக்கியாக இருக்கிறது. ஆனால், பெரும்பாலான முதலீட்டாளர்கள் ஜூலை மாதத்தில் வரிக் கணக்குத் தாக்கல் செய்யும்போதுதான் செட்டில் செய்து வரியைக் கட்டுகிறார்கள். 234B & 234C பிரிவின்கீழ் வருமான வரி துறை விதிக்கும் 1% அபராதத்தைத் தவிர்க்க முன்கூட்டிய வரி (Advance tax) செலுத்திவிடுவது மிகவும் நல்லது.’’

மருத்துவச் செலவுக்கான சேமிப்பு Vs மருத்துவக் காப்பீடு... எது பெஸ்ட்..?

வி.ஏழுமலை, செஞ்சி

நான் ஆயுள் காப்பீட்டு பாலிசி எடுத்து ஐந்தாண்டு களாக பிரீமியம் கட்டி வருகிறேன். பிரீமியம் மாற்ற மில்லாமல் இருக்கிறது. எனக்கு அண்மையில் திருமணம் ஆனது. எனக்கும் மனைவிக்கும் மருத்துவக் காப்பீடு எடுக்கத் திட்டமிட்டுள்ளேன்.

என் நண்பர் ஒருவர் மருத்துவக் காப்பீட்டில் பிரீமியம் ஆண்டுக்கு ஆண்டு அதிகரித்து வரும். அது கட்டுப்படியாகாது. மருத்துவச் செலவுக்குப் பணத்தைச் சேர்த்து வைத்துக் கொள். பாலிசி எடுக்காதே என்கிறார். அவர் சொல்வது சரியா?

வெங்கடேசன் பிரம்மநாயகம், மருத்துவக் காப்பீட்டு ஆலோசகர்.

“ஆயுள் காப்பீடு என்பது நீண்டகால ஒப்பந்தம் ஆகும். நீங்கள் ஆண்டுதோறும் தொடர்ந்து பிரீமியம் கட்டி வந்தாலும், அதன் பலனை ஒருமுறை மட்டுமே பெற முடியும். பாலிசி முதிர்வடையும்போது அல்லது இடைப்பட்ட காலத்தில் இறப்பு அல்லது நிரந்தர உடல் ஊனம் ஏற்படும்போது மட்டுமே இழப்பீடு கிடைக்கும்.

உதாரணமாக, ரூ.10 லட்சம் காப்பீட்டுத் தொகையை 10 வருடத்துக்கு எடுத்திருந்து, 10 வருடம் தொடர்ந்து பிரீமியம் கட்டினாலும் அல்லது இடைப்பட்ட காலத்தில் இறப்பு அல்லது நிரந்தர உடல் ஊனம் ஏற்பட்டாலும் அதிக பட்சமாக ரூ.10 லட்சம் மற்றும் போனஸ் தொகை இருந்தால் சேர்த்து கொடுக்கப்படும்.

மருத்துவக் காப்பீடு என்பது ஒரு வருடத்துக் கான ஒப்பந்தம் ஆகும். இதில் ஒவ்வொரு வருடத்துக்கும் உங்களுக்குக் கொடுக்கப்பட்ட காப்பீட்டுத் தொகையை முழுவதுமாக மருத்துவப் பயன்பாட்டுக்காக வரைமுறைக்கு உட்பட்டு பயன்படுத்திக்கொள்ளலாம். உதாரணமாக, ஒரு வருடத்தில் ரூ.10 லட்சத்துக்கு பிரீமியம் கட்டும்போது அந்த வருடத்தில் ரூ.10 லட்சம் வரை க்ளெய்ம் பெறலாம். மீண்டும் அடுத்த வருடம் பிரீமியம் கட்டும்போது மீண்டும் ரூ.10 லட்சம் வரை க்ளெய்ம் பெறலாம்.

அடுத்து, காப்பீட்டு பிரீமியம் ஆண்டுக்கு ஆண்டு அதிகரிப்பது அனைத்து வகை காப்பீட்டுக்கும் பொதுவானதே. ஆயுள் காப்பீட்டிலும் உங்கள் வயது, பாலிசியின் காலம் மற்றும் கொடுக்க வேண்டிய இழப்பீட்டுத் தொகைகேற்ப பிரீமியம் முன்னமே கணக்கிடப்பட்டு தவணை முறையில் பெறப் படுகிறது. அதனால் உங்களுக்கு வித்தியாசம் தெரிவதில்லை. ஆனால், மருத்துவக் காப்பீட்டில் நீங்கள் ஆண்டுதோறும் பிரீமியம் கட்டுவதால், உங்களுக்கு அந்த வித்தியாசம் தெரிகிறது,

அடுத்ததாக, நீங்கள் பிரீமியம் கட்டி பாலிசி எடுப்பதற்கும், சேமித்து வைத்து அதை மருத்து வச் செலவுக்குப் பயன்படுத்து வதற்கும் உள்ள வித்தியாசத்தைப் பார்ப்போம். உதாரணமாக, வருடம் ரூ.10,000 சேமித்திருந்தால் 10 வருடத்தில் தோராயமாக (ஆண்டுக்கு 5% - 7% வட்டி) ரூ1.20 லட்சம் கிடைக்கலாம்.

ஆனால், வருடத்துக்கு ரூ.10 லட்சம் காப்பீட்டுத் தொகைக்கு 10 வருடத்தில், வயதுக்கு தகுந்தாற் போல ரூ.10,000 முதல் ரூ.15,000 வரை பிரீமியம் கட்டுவதாக எடுத்துக்கொண்டால், 10 வருடத்தில் அதிகபட்சமாக ரூ.1.50 லட்சம் கட்டியிருப்பீர்கள். ஒருவேளை, இடைப்பட்ட 10 வருடத்தில் ஏதேனும் ஒரு க்ளெய்ம் செய்யும் சூழ்நிலை ஏற்பட்டால், ரூ.10 லட்சம் வரை க்ளெய்ம் கிடைக்கும்.

க்ளெய்ம் வராதவரை மருத்துவக் காப்பீடு பிரீமியம் செலவுபோல தெரியும். க்ளெய்ம் என்று வரும் போதுதான் அதன் அருமை புரியும். மேலும், அதிகரித்து வரும் மருத்துவச் செலவினங்களை வைத்துப் பார்க்கும்போது, மருத்துவத்துக்காக சேமித்து வைப்பதைவிட மருத்துவக் காப்பீடு எடுப்பதே சிறந்தது. எனவே, நீங்கள் திட்டமிட்டதுபோல உங்கள் குடும்பத்துக்கு உடனடியாக மருத்துவக் காப்பீடு எடுத்து பயன் பெறுவீர்.”

மருத்துவச் செலவுக்கான சேமிப்பு Vs மருத்துவக் காப்பீடு... எது பெஸ்ட்..?

அ.வினோத், திட்டக்குடி.

என் மகள் வயது 2. அவளுடைய உயர்கல்விக்காக எந்த மியூச்சுவல் ஃபண்டில் சிஸ்டமேட்டிக் இன்வெஸ்ட் மென்ட் பிளான் முறையில் முதலீடு செய்ய வேண்டும்?

சி.குமார், மியூச்சுவல் ஃபண்ட் விநியோகஸ்தர், நாமக்கல்.

“இரண்டு வயது மகளின் கல்விக்கு இப்போதே மியூச்சுவல் ஃபண்டில் சிஸ்ட்டமேட்டிக் இன்வெஸ்ட்மென்ட் பிளான் (எஸ்.ஐ.பி) முறையில் முதலீடு செய்யத் திட்டமிட்டுள்ளது பாராட்டத்தக்கது. உயர்கல்விக்கு இன்னும் 15 ஆண்டு களுக்குமேல் இருப்பதால், நீங்கள் நன்கு செயல்படும் ஸ்மால்கேப், மிட்கேப் மற்றும் ஃபிளெக்ஸிகேப் ஃபண்டு களில் முதலீடு செய்வது லாபகரமாக இருக்க வாய்ப்புள்ளது.

உங்கள் வசதிக்கேற்ற சில திட்டங்களைத் தேர்ந்தெடுத்து முதலீட்டை ஆரம்பிக்கவும். ஆண்டுக்கு ஒருமுறை முதலீட்டைப் பரிசீலனை செய்வதும், தேவைப்படும் மாற்றங்களைச் செய்வதும் அவசியம். நீங்கள் முதலீட்டுக்குப் புதியவர் எனில், ஓர் ஆலோசகரின் துணையுடன் முதலீட்டை மேற்கொள்ளவும்.”

மருத்துவச் செலவுக்கான சேமிப்பு Vs மருத்துவக் காப்பீடு... எது பெஸ்ட்..?

காமாட்சி குமார், மதுரை.

என் வயது 19. நான் மியூச்சுவல் ஃபண்ட் அல்லது சிஸ்ட்டமேட்டிக் இன்வெஸ்ட்மென்ட் பிளானில் நேரடியாக முதலீடு செய்ய உள்ளேன். இது சரியா?

வி.கோபாலகிருஷ்ணன், நிறுவனர், www.moneyavenues.in

“உங்களுக்கு இள வயதிலேயே முதலீட்டு விழிப்புணர்வு வந்திருப்பது மகிழ்ச்சி. மியூச்சுவல் ஃபண்ட் திட்டங்களில் எஸ்.ஐ.பி மூலமாக முதலீடு செய்வது மிகவும் சிறப்பு. தங்களின் இளவயதைக் கருத்தில் கொண்டு மிக நீண்ட கால அடிப்படையில் குறிப்பாக, ஈக்விட்டி சார்ந்த திட்டங்களில் சரியாகப் பிரித்து எஸ்.ஐ.பி மூலமாக முதலீடு செய்துவந்தால் செல்வம் சேர்ப்பது என்பது எளிதாகக் கைகூடும்.

உங்களுக்குப் போதிய முதலீட்டு அனுபவம் மற்றும் நிதி சார்ந்த அறிவு இல்லை எனில், ஒரு நல்ல நிதி ஆலோசகரின் தகுந்த ஆலோசனை யின் அடிப்படையில் முதலீடுகளை மேற்கொண்டு, அவற்றை அவ்வப்போது கண்காணித்து தேவையான மாற்றங்களைச் செய்து வந்தால் நல்ல பலன் கிடைக்கும்.”