Published:Updated:

கான்ட்ரா ஃபண்ட் மற்றும் வேல்யூ ஃபண்ட்... இரண்டுக்கும் என்ன வித்தியாசம்?

கேள்வி பதில்
பிரீமியம் ஸ்டோரி
News
கேள்வி பதில்

கேள்வி பதில்

பாலசங்கர், வரகூர், கள்ளக்குறிச்சி மாவட்டம்.

கான்ட்ரா ஃபண்ட் மற்றும் வேல்யூ ஃபண்ட் (Value fund) இரண்டுக்கும் என்ன வித்தியாசம், இந்த ஃபண்டுகளில் யார் முதலீடு செய்ய வேண்டும் என்பதை விளக்கிச் சொல்ல முடியுமா?

எஸ்.ஶ்ரீதரன், நிதி ஆலோசகர், Wealthladder.co.in

“கான்ட்ரா ஃபண்ட் (Contra Fund) என்பது எதிர்திசையில் செயல் படுகிறது என்பதை அதன் பெயரே விளக்குகிறது. அதாவது, பெரும் பாலானவர்கள் வாங்கத் தயங்குகிற அல்லது தவிர்க்கக்கூடிய நிறுவனப் பங்குகளாகப் பார்த்து இந்த ஃபண்ட் திட்டம் முதலீடு செய்யும். சரியான சூழ்நிலை வரும்போது இந்தப் பங்கு விலை நல்ல ஏற்றம் காணும் என்பதுதான் இந்த ஃபண்டின் முக்கிய நோக்கம்.

இதுவே, வேல்யூ ஃபண்ட் என்பது, தற்போதைய காலகட்டத்தில் எந்த நிறுவனப் பங்குகளின் மதிப்பீடு குறைந்து காணப்படுகிறதோ, அந்தப் பங்குகளில் முதலீடு செய்யும் முறை ஆகும்.

மேற்கூறிய இரண்டு வகை ஃபண்டுகளிலும், சற்று ரிஸ்க் எடுக்கக்கூடிய மற்றும் குறைந்தபட்சம் ஐந்து வருடங்களுக்கு முதலீட்டைத் தொடர நினைப்பவர்கள் முதலீடு செய்யலாம்.”

ஏ.பழனியம்மாள், நாமக்கல்.

என் பாட்டனாரின் சொத்தில் அவருக்கு உரிய பாகத்தை என் அப்பா பாகப்பிரிவினை மூலம் பெற்றார். என் அப்பா அதை என் அண்ணனுக்கு உயில் எழுதி வைத்தார். என் அண்ணன் பட்டா பெற்று அந்தச் சொத்தை அனுபவித்து வருகிறார். இப்போது என் அப்பா, அம்மா உயிருடன் இல்லை. இந்து வாரிசு உரிமைச் சட்டம் மற்றும் 21.08.2020-ல் உச்ச நீதிமன்றத் தீர்ப்பின்படி, என் அண்ணனிடம் இருக்கும் சொத்தில் நான் பாகப் பிரிவினை கேட்க முடியுமா? முடியும் எனில், எந்த நீதிமன்றத்தில் வழக்கு தொடர வேண்டும்?

டி.ஜீவா, வழக்கறிஞர், சென்னை.

“உங்கள் தகப்பனாருக்கு பாகப் பிரிவினை மூலம் கிடைத்த சொத்து அவருக்கே உரிமையானது. அவர் உயில் மூலம் பிறருக்குப் பிரித்துக் கொடுக்க (பராதீனம்) முழு உரிமை உண்டு. உங்கள் தகப்பனார் எழுதிய உயிலைப் படித்தால் மட்டுமே சரியான ஆலோசனை வழங்க இயலும். எனவே, அந்த உயிலை வழக்கறிஞர்களிடம் காண்பித்து தக்க ஆலோசனையைப் பெறவும்.”

கான்ட்ரா ஃபண்ட் மற்றும் வேல்யூ ஃபண்ட்... இரண்டுக்கும் என்ன வித்தியாசம்?

மோனிகா, கோயமுத்தூர்.

நான் நிறுவனப் பங்குகள் மற்றும் மியூச்சுவல் ஃபண்டுகளில் முதலீடு செய்திருக்கிறேன். இவற்றின் மூலம் கிடைக்கும் டிவிடெண்ட் வரி வருமானத்துக்கு வருமான வரி கட்ட வேண்டுமா?

கோபால் கிருஷ்ண ராஜு, ஆடிட்டர்.

“கட்டாயம் கட்ட வேண்டும். நிறுவனப் பங்குகள் மற்றும் மியூச்சுவல் ஃபண்டுகள் (கடன் ஃபண்டுகள், ஹைபிரிட் ஃபண்டு கள், ஈக்விட்டி ஃபண்டுகள் அனைத்தும்) மூலம் பெறும் டிவிடெண்ட் வருமானத்துக்கு வரி உண்டு.

இந்த வரி ஒருவரின் அடிப்படை வருமான வரி வரம்புக்கேற்ப (பழைய வரி முறையில் 5%, 20% மற்றும் 30%, புதிய வரிமுறையில் 5%, 10%, 15%, 20%, 25% மற்றும் 30%) கட்ட வேண்டும்.”

மோனிகா, கள்ளக்குறிச்சி.

நான் 2020 ஆரம்பத்தில் ஒரு ஃபண்டில் எஸ்.ஐ.பி முறையில் முதலீடு செய்து வந்தேன். இடையில் கோவிட் பாதிப்பு காரணமாக முதலீட்டை நிறுத்தினேன். மீண்டும் அந்த ஃபண்டின் போலியோ எண்ணில் முதலீட்டை ஆரம்பிக்க முடியுமா?

ஆர்.வெங்கடேஷ், நிறுவனர், www.gururamfinancialservices.com

“நிறுத்தப்பட்ட எஸ்.ஐ.பி ஃபண்டின் ஃபோலியோ எண்ணைக் குறிப்பிட்டு அதே கணக்கில் மீண்டும் பழைய ஃபண்டில் எஸ்.ஐ.பி முதலீட்டை ஆரம்பித்து தொடர்ந்து முதலீடு செய்து வரலாம்.

இப்படிச் செய்யும்போது நிறைய ஃபோலியோ எண்களைக் குறித்து வைக்கத் தேவையில்லை; நிறைய முதலீட்டு ஆவணங்களை யும் சேர்த்து வைக்கத் தேவையில்லை.”

காஜா முகைதீன், கடையநல்லூர்.

என் வயது 50. நான் மாதம் ரூ.15,000 முதலீடு செய்ய விரும்பு கிறேன். இந்தப் பணம் எனக்கு என் பணி ஓய்வு, அதாவது 60 வயதில் தேவை. நான் எந்த மியூச்சுவல் திட்டங் களில் எவ்வளவு முதலீடு செய்ய வேண்டும் எனச் சொல்ல முடியுமா?

வி.ஶ்ரீனிவாசன், மியூச்சுவல் ஃபண்ட் விநியோகஸ்தர், சீனு இன்வெஸ்ட்மென்ட்ஸ், திருவாரூர்.

“தங்களுடைய வயது 50. மாதம் ரூபாய் 15,000 முதலீடு செய்ய விரும்புகிறீர்கள். ரிஸ்க் எடுக்கக் கூடியவர்கள் ஃபிளெக்ஸிகேப் ஃபண்ட், லார்ஜ் அண்ட் மிட் கேப் ஃபண்ட் மற்றும் மிட்கேப் ஃபண்டுகளில் மாதம் தலா ரூ.5,000 முதலீடு செய்துவரலாம்.

இப்படிச் செய்யும்போது தங்களுடைய 60-வது வயதில் இந்த ஃபண்டுகள் மூலம் பணவீக்க விகிதத்தை அதிக வருமானம் பெற்று அதிக தொகுப்பு நிதி வைத்திருப்பீர்கள். பணி ஓய்வுக்கு ஓராண்டுக்கு முன் தொகுப்பு நிதியை அதிக ரிஸ்க் இல்லாத கடன் ஃபண்டுகளுக்கு மாற்றி வைத்துக்கொள்வது நல்லதாகும்.

நீங்கள் முதலீட்டில் ரிஸ்க் எடுக்க விரும்பவில்லை எனில், பேலன்ஸ்ட் அட்வான்டேஜ் ஃபண்டுகள், ஹைபிரிட் ஃபண்டுகளில் பிரித்து முதலீடு செய்து வரலாம்.”

எஸ்.ஶ்ரீதரன், டி.ஜீவா, கோபால் 
கிருஷ்ண ராஜு, ஆர்.வெங்கடேஷ், வி.ஶ்ரீனிவாசன், ஶ்ரீகாந்த் மீனாட்சி
எஸ்.ஶ்ரீதரன், டி.ஜீவா, கோபால் கிருஷ்ண ராஜு, ஆர்.வெங்கடேஷ், வி.ஶ்ரீனிவாசன், ஶ்ரீகாந்த் மீனாட்சி

ஏ.தாம்சன், மெயில் மூலம்.

நான் ரூபாய் ஐந்து லட்சத்தை ஐந்து வருடங்களுக்கு இன்ஃராஸ்ட்ரக்சர் மியூச்சுவல் ஃபண்ட் ஒன்றில் முதலீடு செய்ய இருக்கிறேன். ஐந்து லட்சத்தை மொத்தமாகப் போடுவது லாபமாக இருக்குமா அல்லது வங்கியில் ஃபிக்ஸட் டெபாசிட் செய்து அதில் கிடைக்கும் மாத வட்டியில் எஸ்.ஐ.பி முறையில் மாதம்தோறும் போடுவது லாபமாக இருக்குமா?

ஶ்ரீகாந்த் மீனாட்சி, இணை நிறுவனர், Primeinvestor.in

“உள்கட்டமைப்புத் துறை மியூச்சுவல் ஃபண்டுகள் (இன்ஃப்ரா ஃபண்ட்) சமீபத்தில் நல்ல லாபம் தந்திருக்கின்றன. இவற்றில் அடுத்த ஐந்து ஆண்டுகளுக்கு முதலீடு செய்வதில் ரிஸ்க் அதிகம்.

எனவே, உங்கள் மொத்த முதலீடுகளின் கூட்டுத் தொகையில் 5 - 10 சதவிகிதத்துக்கு மிகாமல் பார்த்துக் கொள்ளவும். அப்படியிருக்கும்பட்சத்தில், இதில் மொத்த முதலீடாகப் போடுவதிலும் தவறில்லை.

மாறாக, இது உங்கள் மொத்த முதலீடுகளில் அதிக சதவிகிதமாக இருக்குமென்றால், இந்தத் தொகையைக் குறைக்கவும். அல்லது குறைந்தபட்சம், முதலீட்டை ஆறு பாகங்களாக அடுத்த ஆறு மாதங்களில் பிரித்து முதலீடு செய்யவும்.

நீங்கள் எந்த மியூச்சுவல் ஃபண்ட் நிறுவனத்தின் இன்ஃப்ரா ஃபண்டில் முதலீடு செய்ய விரும்புகிறீர்களோ, அந்த நிறுவனத்தின் கடன் சந்தை சார்ந்த லிக்விட் ஃபண்டில் மொத்தத் தொகையை முதலில் முதலீடு செய்து விட்டு, அதிலிருந்து குறிப்பிட்ட இடைவெளியில் இன்ஃப்ரா ஃபண்டுக்கு மாற்றுவது நல்லது. இப்படி நீங்கள் முதலீடு செய்வதன் மூலம் பங்குச் சந்தை இறக்கத்தால் ஏற்படும் அதிக பாதிப்பைத் தவிர்க்க முடியும்.”