Published:Updated:

தங்கத்தில் அதிக லாபம்... என்ன வழி..?

தங்கத்தில் முதலீடு
பிரீமியம் ஸ்டோரி
தங்கத்தில் முதலீடு

கேள்வி - பதில்

தங்கத்தில் அதிக லாபம்... என்ன வழி..?

கேள்வி - பதில்

Published:Updated:
தங்கத்தில் முதலீடு
பிரீமியம் ஸ்டோரி
தங்கத்தில் முதலீடு

வீ.அமரன், திருநெல்வேலி.

நேஷனல் பென்ஷன் சிஸ்டத்தில் (என்.பி.எஸ்) செய்யும் முதலீட்டுக்கு ஒருவர் ரூ.2 லட்சம் வரைக்கும் வரிச்சலுகை பெற முடியுமா?

எஸ்.சரவணன், சர்டிஃபைட் ஃபைனான்ஷியல் பிளானர், Purplepond.in

“ஒரு நிதி ஆண்டில் ரூ.1.5 லட்சம் வரை என்.பி.எஸ் திட்டத்தில் முதலீடு செய்தால் வருமான வரி பிரிவு 80ccd 1-ன்கீழ் கார்ப்பரேட் மாடலில் வரிச்சலுகை பெற முடியும். இந்தச் சலுகை அனைத்து மாதச் சம்பளம் வாங்குவோருக்கும் தொழில்முனைவோருக்கும் பொருந்தும். ஒருவர் அவரின் மாத அடிப்படை சம்பளத்தில் 10% மட்டுமே என்.பி.எஸ் திட்டத்தில் முதலீடு செய்ய முடியும். இந்தத் திட்டத்தில் பணியாளர் மட்டும்தான் முதலீடு செய்ய முடியும். அது உங்களின் 80C உச்சவரம்பான ரூ.1,50,000-க்கு உட்பட்டது.

முதலில் சொன்ன பிரிவு அல்லாமல் 80ccd 1b-இன்கீழ் இந்தியக் குடிமகன் யாராக இருந்தாலும், நிதி ஆண்டில் ரூ.50,000 வரை இந்தத் திட்டத்தில் முதலீடு செய்து வருமான வரிச் சலுகை பெற முடியும். எந்தத் திட்டத்திலும் இப்படித் தனியான வருமான வரிச்சலுகை கிடையாது என்பது குறிப்பிடத் தக்கது. மேற்கூறிய இரு பிரிவுகளின் கீழ் நீங்கள் ரூ. 2 லட்சம் வரை வருமான வரிச் சலுகை பெற முடியும். ஒருவரின் மாதாந்தர அடிப்படை சம்பளத்தில் 10 சதவிகிதத்தை என்.பி.எஸ் திட்டத்தில் நிறுவனம், பணியாளர் பெயரில் முதலீடு செய்தால், வருமான வரி பிரிவு 80ccd 2 கீழ் இந்தத் தொகைக்கு வருமான வரிச் சலுகை பெறலாம். இந்தத் தொகைக்குக் கிடைக்கும் வரிச் சலுகைக்கு உச்சவரம்பு எதுவும் கிடையாது.”

தங்கத்தில் அதிக லாபம்... என்ன வழி..?

பாபு சுந்தரம், பரூகூர்.

தங்கத்தின் விலை குறையும் என்பதை எப்படி முன்கூட்டியே கண்டுபிடிப்பது, அதிக லாபம் ஈட்ட தங்கத்தில் முதலீடு செய்வது எப்படி?

ஷியாம் சுந்தர், கமாடிட்டி நிபுணர்.

“எந்த நேரத்தில் தங்கத்தின் விலை குறையும் என்பதையோ, அதிகரிக்கும் என்பதையோ யாராலும் மிகச் சரியாக முன்கூட்டி கணிக்க இயலாது. ஆனாலும், தங்கத்தின் விலையை நிர்ணயம் செய்யும் முக்கிய காரணிகளைத் தொடர்ந்து கண்காணிக்கும்பட்சத்தில், விலை ஏறப்போகிறதா அல்லது குறைய வாய்ப்புகள் இருக்கின்றனவா என்பதை அறிந்துகொள்ள இயலும்.

வளர்ந்த நாடுகளின் பணவீக்கம், வட்டி விகிதங்களின் போக்கு, உற்பத்தி அளவு, பொருளாதாரத்தில் ஏற்படுகிற தேக்கநிலை, நாடுகளுக்கிடையே பதற்றமான சூழ்நிலை நிலவுவது, மத்திய வங்கிகள் தங்கத்தில் முதலீட்டை அதிகரித்து வருவது, விழாக் கால தேவை, தனிநபர் வருமானம் அதிகரிப்பு போன்ற செய்திகளை உன்னிப்பாகக் கவனிக்க வேண்டும்.

தங்கத்தில் அதிக லாபம் பார்க்க வேண்டும் எனில், முதலீட்டுத் தொகையை 4 அல்லது 5 ஆகப் பிரித்து, விலை இறங்கும் சமயத்தில், இன்னும் இறங்கும் என்று காத்திருக்காமல், நீண்ட கால இலக்கில் தொடர்ந்து முதலீடு செய்ய வேண்டும். அல்லது குறிப்பிட்ட இடைவெளியில் தங்கப் பத்திரங்கள், கோல்டு இ.டி.எஃப், கோல்டு சேவிங்ஸ் ஃபண்ட் போன்ற டிஜிட்டல் தங்கத்தில் தொடர்ந்து முதலீடு செய்து வந்தால் லாபம் ஈட்ட முடியும்.”

எஸ்.சரவணன், ஷியாம் சுந்தர், த.ராஜன், எல்.அர்ஜுன்
எஸ்.சரவணன், ஷியாம் சுந்தர், த.ராஜன், எல்.அர்ஜுன்

நிவேதா சேகர், மதுரை.

வங்கி எஃப்.டி-கள் பாதுகாப்பானவை என்பதால், என் மொத்த முதலீட்டையும் அதில் போடலாமா?

த.ராஜன், நிதி ஆலோசகர், Holisticinvestment.in

“வங்கி மற்றும் கம்பெனி ஃபிக்ஸட் டெபா சிட்டுகளில் முதலீடு செய்வதில் தவறில்லை. அவை பாதுகாப்பானவை; நிலையான வட்டி வருமானம் தருபவைதான். ஆனால், உங்களின் மொத்தப் பணத்தையும் எஃப்.டி.யில் முதலீடு செய்வதில் அர்த்தம் இல்லை. எஃப்.டி-யின் மூலம் கிடைக்கும் வட்டி வருமானம், பெரும்பாலும் வருமான வரிக்குப் பிந்தைய நிலையில் பணவீக்க விகிதத்தைவிட குறைவாகவே இருக்கும். உதாரணமாக, பணவீக்க விகிதம் 5%. எப்ஃ.டி-க்கு ஆண்டுக்கு 6% வட்டி கிடைக்கிறது எனில், இந்த வட்டி வருமானத்துக்கு ஒருவர் எந்த வருமான வரி வரம்பில் வருகிறாரோ, அதற்கேற்ப வரி கட்ட வேண்டும். இந்த 6% வருமானம் என்பது, 5%, 20% மற்றும் 30% வரி வரம்பில் இருப்பவர் களுக்கு முறையை வரிக்குப் பிந்தைய நிலையில் சுமார் 5.7%, 4.8% மற்றும் 4.2 சதவிகிதமாகக் குறைந்துவிடும். 20% மற்றும் 30% வரி வரம்பில் உள்ளவர்களுக்குப் பணவீக்க விகிதத்தைவிட குறைவான வருமானமே இதில் கிடைப்பதால், பணமானது வாங்கும் சக்தியை இழக்கும்.

எஃப்.டி-யில் குறுகிய காலத் தேவைக்கு மட்டுமே முதலீடு செய்ய வேண்டும். உதாரணமாக, இன்னும் 3 மாதம் முதல் 6 மாதக் காலத்தில் பிள்ளையின் மேற்படிப்புக்குப் பணம் தேவை அல்லது பிள்ளையின் கல்யாணம் இருக்கிறது எனில், அந்தத் தொகையைப் பாதுகாப்பாக எஃப்.டியில் போட்டு வைக்கலாம். மற்றபடி, நீண்ட கால நிதித் தேவைக்கு நிறுவனப் பங்குகள், ஹைபிரிட் மற்றும் ஈக்விட்டி மியூச்சுவல் ஃபண்டுகள் உகந்தவையாக இருக்கும்.”

குப்புசாமி, முகப்பேர், சென்னை.

மல்ட்டிபேக்கர் பங்குகளைக் எப்படிக் கண்டுபிடிப்பது?

எல்.அர்ஜுன், செபி பதிவு பெற்ற முதலீட்டு ஆலோசகர், வனவாசி, சேலம்.

“பங்குச் சந்தையில் குறுகிய காலம் மற்றும் நீண்ட காலம் முதலீடு செய்ய விரும்புபவர்கள் மல்ட்டி பேக்கர் பங்கைத் தேடுவார்கள். பல மடங்கு லாபத்தைத் தரக்கூடிய பங்கை மல்ட்டி பேக்கர் பங்கு என்கிறோம். உதாரணமாக, ஒருவர் ஒரு பங்கை 100 ரூபாய் என்ற கணக்கில் வாங்கி, ஓரிரு வருடங்கள் கழித்து அந்தப் பங்கின் விலை ரூ.1,000-க்கு உயர்ந் தால், அது மல்ட்டி பேக்கர் பங்காகும்.

இதற்கு ஒரு நிறுவனம் நல்ல வருவாய் ஈட்டக்கூடிய நிறுவனமாக, கடன் இல்லாத நிறுவனமாக இருக்க வேண்டும் ஒருவேளை, கடன் இருந்தாலும் குறைந்த அளவு கடன் இருக்கும் நிறுவனமாக இருந்தால், அதன் பங்குகள் மல்ட்டி பேக்கர் பங்குகளாக மாற அதிக வாய்ப்பு இருக்கிறது. இதுபோன்ற பங்குகளைத் தேர்வு செய்யும்போது அந்த நிறுவனத்தின் கடந்த கால நிதிநிலை அறிக்கையைக் குறைந்தபட்சம் மூன்று வருடங்களுக்கு ஆராய வேண்டும்.

இந்தப் பங்குகளில் முதலீடு செய்ய விரும்பினால் மாதம்தோறும் கொஞ்சம் கொஞ்சமாக முதலீடு செய்ய லாம். அல்லது பங்குச் சந்தை அதிக வீழ்ச்சியில் இருக்கும் போது முதலீடு செய்யலாம்.

உதாரணமாக, கொரோனா காலகட்டத்தில் மார்ச் 2020-ல் சந்தை 40 சதவிகிதத்துக்குமேல் இறங்கியது அப்போது முதலீடு செய்திருந்தால், 10 மடங்கு 15 மடங்கு லாபம் பார்த்திருக்க முடியும். சந்தை இறக்கத்தை முதலீட்டுக்கான வாய்ப்பாகப் பயன்படுத்திக்கொள்ளுங்கள்.’’

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism