Published:Updated:

ஹெல்த் இன்ஷூரன்ஸ் பாலிசி... புதுப்பிக்கத் தவறினால் என்ன பாதிப்பு..?

கேள்வி - பதில்
பிரீமியம் ஸ்டோரி
கேள்வி - பதில்

கேள்வி - பதில்

ஹெல்த் இன்ஷூரன்ஸ் பாலிசி... புதுப்பிக்கத் தவறினால் என்ன பாதிப்பு..?

கேள்வி - பதில்

Published:Updated:
கேள்வி - பதில்
பிரீமியம் ஸ்டோரி
கேள்வி - பதில்

நிர்மல் குமார், கன்னியாகுமரி.

ஹெல்த் இன்ஷூரன்ஸ் பாலிசிகளில் சரியான தேதியில் பாலிசியைப் புதுப்பிக்கவில்லை எனில், என்ன பாதிப்பு ஏற்படும்?

வெங்கடேசன் பிரம்மநாயகம், மருத்துவக் காப்பீட்டு ஆலோசகர்.

“பொதுவாக, மருத்துவக் காப்பீட்டுக்கான பிரீமியம் ஆண்டுத் தவணை முறையில் கணக்கிட்டு, ஆண்டுக்கு ஒருமுறை அல்லது ஆறு மாதத்துக்கு ஒருமுறை, மூன்று மாதத்துக்கு ஒருமுறை மற்றும் மாதம் ஒருமுறை எனப் பெறப்படுகிறது. உதாரணமாக, நீங்கள் ஆண்டுத் தவணை முறையில் பிரீமியம் செலுத்தி யிருப்பதாக எடுத்துக்கொண்டால், அவ்வாறு செலுத்தப்படும் பிரீமியம், செலுத்திய நாளிலிருந்து 365 நாள்களுக்கு மட்டுமே உங்கள் பாலிசியில் குறிப்பிட்டுள்ள மருத்துவச் செலவினங்களுக்குப் பயன்படும்; பொதுவாக, பாலிசி முடியும் நாள் முன்பே பாலிசியைப் புதுப்பிக்க வேண்டும், அவ்வாறு புதுப்பிக்க வில்லை எனில், பாலிசியின் எந்த பயனையும் பெற முடியாது. இன்ஷூரன்ஸ் பாலிசியைப் புதுப்பிப்பது பாலிசிதாரரின் பொறுப்பு. ‘பிரீமியம் கட்டும் தேதியை மறந்துவிட்டேன், ஊருக்குச் சென்றுவிட்டேன், இன்ஷூரன்ஸ் நிறுவனத்திடமிருந்து தகவல் வரவில்லை, ஏஜென்ட் தகவல் தரவில்லை’ என்ற எந்தக் காரணமும் ஏற்றுக்கொள்ளப்பட மாட்டாது.”

ஹெல்த் இன்ஷூரன்ஸ் பாலிசி...
புதுப்பிக்கத் தவறினால் என்ன பாதிப்பு..?

க.பாஸ்கரன், உடுமலைப்பேட்டை.

தனிநபர் ஒருவர் விவசாய நிலத்தை வாங்கி சில ஆண்டுகள் கழித்து லாபத்துக்கு விற்பனை செய்யும் போது மூலதன ஆதாய வரி கட்ட வேண்டுமா? அரசு வழிகாட்டி மதிப்பு மட்டும் நிலக்கிரயத்துக்கு கணக்கில் காட்டப்படுவதால், சந்தை விலைக்கு வரியைச் செலுத்தும்போது எவ்வாறு கணக்கிட வேண்டும்?

கே.ஆர்.சத்தியநாராயணன், ஆடிட்டர்.

“வருமான வரிச் சட்டத்தின்படி, விவசாய நிலமாகக் கருதப்படும் நிலத்தை விற்பது மூலம் கிடைக்கும் லாபத்துக்கு வருமான வரியிலிருந்து விலக்கு அளிக்கப்படுகிறது. அதே நேரத்தில், வழிகாட்டி மதிப்பு மற்றும் சந்தை மதிப்பு (Guideline Value and Market Value) ஆகியவற்றுக்கு இடையே வேறுபாடு இருந்தால் அதாவது, வழிகாட்டி மதிப்பைவிட, சந்தை மதிப்பு அதிகமாக இருந்தால், அதிகமான தொகை ஒருவரின் இதர வருமானமாகக் கருதப்படும். அந்தத் தொகைக்கு ஒருவர் எந்த வருமான வரம்பில் வருகிறாரோ, அதற்கேற்ப வரியைக் கட்ட வேண்டும்.

பழைய வரி முறையில் 5%, 20% மற்றும் 30% வரி விதிக்கப்படும். புதிய வரி முறையில் 5%, 10%, 15%, 20%, 25% மற்றும் 30% வரி விதிக்கப்படும். அதே நேரத்தில், சந்தை விலையைவிட அரசு வழிகாட்டி மதிப்பு குறைவாக இருந்தால், அரசு வழிகாட்டி மதிப்பின்படி வரி கணக்கிடப்படும்.’’

ஹெல்த் இன்ஷூரன்ஸ் பாலிசி...
புதுப்பிக்கத் தவறினால் என்ன பாதிப்பு..?

மதிவாணன், திருவாரூர்.

நான் மியூச்சுவல் ஃபண்டுக்குப் புதியவன். நான் எப்படி அந்த முதலீட்டைத் தொடங்குவது, என்னென்ன ஆவணங்கள் தேவை, முதலீட்டை ஆரம்பிக்க எவ்வளவு பணம் வேண்டும்?

எஸ்.சீனிவாசன், நிதித் திட்டங்கள் விநியோகஸ்தர், www.moneykare.com

“முதலில், நீங்கள் மியூச்சுவல் ஃபண்டுகளுக்குப் புதியவர்; அது அதிகம் தெரியாது என்பதால், நீங்கள் மியூச்சுவல் ஃபண்ட் ஆலோசகரின் உதவியை நாட வேண்டும். ஏனெனில், புதிய முதலீட்டாளர்களுக்கு அவர் களின் முதலீட்டுப் பயணத்தின் ஆரம்ப ஆண்டுகளில் நிறைய சிறப்பு ஆலோசனை தேவைப்படுகிறது. பல புதிய முதலீட்டாளர்கள் சந்தை ஏற்ற இறக்கங்கள் காரணமாக பீதியடைந்து தங்கள் முதலீட்டைப் பெரிய நஷ்டத் துடன் நிறுத்திவிடுகிறார்கள்.

உங்கள் நிதி இலக்குகளை நீங்கள் கண்டறிந்து, அவற்றை அடைய முதலீடு செய்யத் தொடங்க வேண்டும். ஈக்விட்டி மியூச்சுவல் ஃபண்டுகளில் முதலீடு செய்வது நீண்ட கால நோக்கங்களுக்காக மட்டுமே செய்யப் பட வேண்டும், குறுகிய காலத்துக்கு அல்ல. புதிய முதலீட்டாளர்கள் ஆரம்பகட்டங்களில் லார்ஜ்கேப் ஃபண்டுகளில் முதலீடு செய்வது நல்லது. ஏனெனில், இது பங்குச் சந்தையின் ஏற்ற இறக்கங்களை நன்கு புரிந்துகொள்ள உதவுகிறது.

மியூச்சுவல் ஃபண்டுகளில் முதலீடு செய்ய, முதலீட் டாளர் கே.ஒய்.சி (KYC - உங்கள் வாடிக்கையாளரை அறிந்துகொள்ளுங்கள்) படிவத்தைப் பூர்த்தி செய்து, பான் (PAN) மற்றும் முகவரிச் சான்று ஆகியவற்றின் சுய சான்றளிக்கப்பட்ட நகல்களை இணைக்க வேண்டும். ஒரு சாதாரண மியூச்சுவல் ஃபண்ட் திட்டத்துக்கான குறைந்தபட்ச மொத்த முதலீட்டுத் தொகை ரூ.5,000 மற்றும் இது வரி சேமிப்புத் திட்டமாக இருந்தால், குறைந்தபட்ச மொத்தத் தொகை ரூ.500. எஸ்.ஐ.பி (SIP) முறையில் குறைந்தபட்சத் தொகை ரூ.250-க்கும் குறைவு.’’

தளவாய், தேரிக்குடியிருப்பு

நான் முதலீடு செய்துவரும் பங்குத் தரகு நிறுவனம் மூடப்பட்டால் என் முதலீடுகள் என்ன ஆகும்?

ஜெகதீஸ்வரன், பங்குச் சந்தை பயிற்சியாளர், www.letaedu.com

“எந்தவொரு பங்குத் தரகு நிறுவனமும் முதலீட்டாளர், வர்த்தகருக்காக டிரேடிங் கணக்கு மற்றும் டீமேட் கணக்கைத் தொடங்கும். டிரேடிங் கணக்கைப் பங்கு தரகு நிறுவனமே நேரடியாகப் பராமரிக்கும். இதில், முதலீட்டாளர்/ டிரேடரின் பணம் நேரடியாக வரவு வைக்கப்படும். டீமேட் கணக்கை சி.டி.எஸ்.எல் அல்லது என்.எஸ்.டி.எல் நிறுவனம் பராமரிக்கும். இந்தக் கணக்கில் முதலீட்டாளரின் பங்குகள் சேமிக்கப் பட்டிருக்கும். பங்குத் தரகு நிறுவனம் மூடப்பட்டாலும் உங்களின் பங்குகள் டீமேட் வடிவில் சி.டி.எஸ்.எல் அல்லது என்.எஸ்.டி.எல் நிறுவனத்தின் பராமரிப்பில் இருக்கும்.

நீங்கள் பவர் ஆஃப் அட்டர்னி தந்திருக்கும்பட்சத்தில், பங்குத் தரகு நிறுவனத்தால் உங்கள் பங்குகளை அடமானம் வைக்க முடியும். ஆனால், இது மிக அரிதாக நடக்க வாய்ப்பு இருக்கிறது. அப்போது சி.டி.எஸ்.எல் அல்லது என்.எஸ்.டி.எல் கணக்கிலிருப்பது உங்களுக்குத் தெரியவராது. எனவே, உங்கள் டீமேட் கணக்கில் பங்குகள் சரியாக இருக்கிறதா என்பதை அடிக்கடி பார்ப்பது நல்லது. தற்போது செபி அமைப்பின் நடவடிக்கையால் பங்குகளை விற்ற பணம் ஓரிரு தினங்களில் பங்குத் தரகு நிறுவனத்தால் உங்கள் வங்கிக் கணக்கு மாற்றப்படுகிறது. எனவே, கவலை வேண்டாம்.’’

பிரபு, சென்னை

5 வீடு கொண்ட அடுக்குமாடிக் குடியிருப்பில் வசிக்கிறேன். இதில் 2 பேர் மட்டுமே பராமரிப்புத் தொகை தருகிறார்கள். மற்றவர்களிடம் எப்படி தொகையை வாங்குவது?

பு.பா.சுரேஷ்பாபு, வழக்கறிஞர், சென்னை உயர் நீதிமன்றம்.

“இந்தப் பிரச்னையில் காவல் துறை தலையிட உரிமை இல்லை. இது குறித்து நீங்கள் சிவில் நீதிமன்றத்தில் (Civil Court) வழக்கு தொடரலாம். அவர்கள் பாக்கி யுள்ள பராமரிப்புக் கட்டணத்தை வசூலிக்க உதவுவார்கள்.”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism