Published:Updated:

கோல்டு இ.டி.எஃப் Vs கோல்டு சாவரின் பாண்ட் எது சிறந்த முதலீடு..?

கேள்வி - பதில்
பிரீமியம் ஸ்டோரி
கேள்வி - பதில்

கேள்வி - பதில்

கோல்டு இ.டி.எஃப் Vs கோல்டு சாவரின் பாண்ட் எது சிறந்த முதலீடு..?

கேள்வி - பதில்

Published:Updated:
கேள்வி - பதில்
பிரீமியம் ஸ்டோரி
கேள்வி - பதில்

கே.செந்தில்குமரன், பழனி.

அடுத்த 10 முதல் 15 ஆண்டுகளில் மல்ட்டி கேப் ஃபண்ட், ஃப்ளெக்ஸிகேப் ஃபண்ட் இதில் எது அதிக வருமானத்தைக் கொடுக்கும்? ஒருவரின் போர்ட்ஃபோலியோவில் மல்ட்டிகேப் ஃபண்ட், ஃப்ளெக்ஸிகேப் ஃபண்ட் முதலீடு எத்தனை சதவிகிதம் இருக்க வேண்டும்?

சுரேஷ் பார்த்தசாரதி, நிதி ஆலோசகர், Myassetsconsolidation.com

“சில ஆண்டுகளுக்கு முன்பு நிறைய ஃப்ளெக்ஸிகேப் ஃபண்டுகள் இருந்தன. பின்பு செபி அமைப்பின் விதிமுறை காரணமாக அவை மல்ட்டி கேப் ஃபண்டுகளாக அவதாரம் எடுத்தன. இருப்பினும், அதில் ஏற்பட்ட சில சிக்கல்களுக்காக மறுபடியும் ஃப்ளெக்ஸிகேப் ஃபண்ட் சிற்சில மாற்றங்களுடன் அறிமுகம் செய்யப்பட்டிருக்கிறது.

மல்ட்டிகேப் ஃபண்ட் அதிகபட்சம் 75% பங்குச் சந்தையில் முதலீடு செய்ய வேண்டும்; ஆனால், ஃப்ளெக்ஸிகேப் ஃபண்டில் 65% முதலீடு செய்தாலே போதும். அதேபோல், மல்ட்டி கேப் ஃபண்டில் தலா 25% லார்ஜ்கேப், மிட்கேப் மற்றும் ஸ்மால்கேப் நிறுவனத்தில் முதலீடு செய்ய வேண்டும். ஃப்ளெக்ஸிகேப் ஃபண்டில் இந்த விதிமுறைகள் இல்லை. ஆகையால், ஃபளெக்ஸிகேப் ஃபண்டுகளில் பங்குச் சந்தையின் ஏற்ற இறக்கத்துக்கேற்ப, லார்ஜ்கேப், மிட்கேப், ஸ்மால்கேப் நிறுவனப் பங்குகளில் முதலீடு செய்ய முடியும். அதனால், ஃப்ளெக்ஸி கேப் ஃபண்டில் அதிக வருமானம் கிடைப்பதற்கு வாய்ப்பிருக்கிறது.

முதலீடு செய்வதற்கு ஃப்ளெக்ஸிகேப் ஃபண்ட் அனைத்து முதலீட்டாளர்களுக்கும் ஏற்றது. சராசரியாக ஒருவர் 30-லிருந்து 40 வயதுக்குள் இருந்தால், அவர்கள் 35% - 40% வரை அவர்களுடைய போர்ட்ஃபோலியோ வில் ஃப்ளெக்ஸிகேப் ஃபண்டில் முதலீடு செய்யலாம்.”

கோல்டு இ.டி.எஃப் Vs கோல்டு சாவரின் பாண்ட் எது சிறந்த முதலீடு..?

சாந்தி ராஜபாண்டியன், இ-மெயில் மூலம்

நான் நடுத்தர வருமானப் பிரிவைச் சேர்ந்தவன். எங்களுக்கு இரண்டு பெண் குழந்தைகள் உள்ளனர். அவர்களின் எதிர்கால தங்கத் தேவைக்காக, கோல்டு இ.டி.எஃப் அல்லது கோல்டு சாவரின் பாண்ட், இதில் எது சிறந்த முதலீடாக இருக்கும்?

லலிதா ஜெயபாலன், நிதி ஆலோசகர், MoneyVedam.com

“தங்கம் சேர்ப்பதற்கு சிறந்த முதலீடு எனில், கோல்டு சாவரின் பாண்டைக் குறிப்பிடலாம். இதில் தங்கத்தின் விலை ஏற்றத்துடன், ஆண்டுக்கு கூடுதலாக 2.5% வட்டி வருமானம் கிடைக்கும். இந்தப் பத்திரத்தின் முதிர்வுக் காலம் எட்டு ஆண்டுக் காலம் ஆகும். அதன் பிறகு பணத்தை எடுத்தால் நீண்டகால மூலதன ஆதாயத்துக்கு வரி எதுவும் கிடையாது. கோல்டு பாண்டில் உள்ள ஓர் அசெளகரியம் என்ன வெனில், இதில் நினைத்த நேரத்தில் முதலீடு செய்ய முடியாது. ஆர்.பி.ஐ வெளியிடும் நேரத்தில்தான் வாங்க வேண்டும். ஏற்கெனவே வெளியிடப் பட்டுள்ள கோல்டு பாண்டுகள் பங்குச் சந்தையில் வர்த்தகமாகி வருகின்றன. இவற்றின் மீது வர்த்தகம் மிக சொற்ப அளவில் நடப்பதால், லிக்விட்டி குறைவாக இருக்கிறது. நினைத்த நேரத்தில் வாங்கவோ, விற்கவோ முடியாது.

கோல்டு பாண்டை ஆர்.பி.ஐ வெளியிடும்போது வாங்கியதுபோக, இன்னும் முதலீடு செய்ய வேண்டும் எனில், கோல்டு இ.டி.எஃப் திட்டத்தில் முதலீடு செய்யலாம். இதில், முதலீடு செய்ய டீமேட் கணக்கு தேவை. இந்த இரண்டு முறைகளிலும் தங்கமாகத் தர மாட்டார்கள். நாம்தான் கிடைக்கும் பணத்தைக் கொண்டு தங்கம் வாங்கிக்கொள்ள வேண்டும்.”

சுரேஷ் பார்த்தசாரதி, லலிதா ஜெயபாலன், வி.ஶ்ரீனிவாசன், வி.கோபாலகிருஷ்ணன்
சுரேஷ் பார்த்தசாரதி, லலிதா ஜெயபாலன், வி.ஶ்ரீனிவாசன், வி.கோபாலகிருஷ்ணன்

தமிழ்செல்வி, இ-மெயில் மூலம்

என்னிடம் ரூ.10 லட்சம் இருக்கிறது. இரண்டு ஆண்டு கழித்து என் மகள் திருமணத்துக்கு இந்தத் தொகை தேவை. எனவே, ரிஸ்க் எடுக்க முடியாது. இதை எதில் முதலீடு செய்வது?

வி.ஶ்ரீனிவாசன், மியூச்சுவல் ஃபண்ட் விநியோகஸ்தர், சீனு இன்வெஸ்ட்மென்ட்ஸ், திருவாரூர்.

“மகளின் திருமணத் தேவை என்பதால், மியூச்சுவல் ஃபண்டில் அல்ட்ரா ஷார்ட் டேர்ம் பாண்ட் ஃபண்டில் முதலீடு செய்யலாம். நீங்கள் கொஞ்சம் ரிஸ்க் எடுப்பதாக இருந்தால், பேலன்ஸ்டு அட்வான்டேஜ் ஃபண்டில் முதலீடு செய்யலாம்.”

வி.பாலன், ஆத்தூர்.

எங்கள் வீட்டில் சுமார் 25 பவுன் தங்க நகைகள் யாரும் பயன்படுத்தாமல் பல ஆண்டுகளாக சும்மா இருக்கிறது. இந்தத் தங்க நகையைப் பொதுத்துறை வங்கியில் குறைந்த வட்டிக்கு அடமானம் வைத்து, அந்தத் தொகையைக் கொண்டு புதிய பங்கு வெளியீடுகளில் (ஐ.பி.ஓ-க்கள்) முதலீடு செய்து லாபம் பார்க்க திட்டமிடுவது நல்ல முடிவா?

வி.கோபாலகிருஷ்ணன், நிறுவனர், www.moneyavenues.in

“இப்போது பங்குச் சந்தைகள் மற்றும் புதிய பங்கு வெளியீடுகளின் சூழல் நல்ல நிலையில் இருக்கிறது என்கிற காரணத்தால் தனிநபர் கடன் வாங்கியோ, சொத்து, நகை போன்றவற்றை அடமானம் வைத்தோ பங்குகளில் முதலீடு செய்வது சரியான வழிமுறையாகாது. ரிஸ்க் கருதி நமது ஒட்டுமொத்த சேமிப்பில் ஒரு குறிப்பிட்ட பகுதியை மட்டுமே பங்கு சந்தைகளில் முதலீடு செய்ய வேண்டும். ஆகையால், தங்கத்தை அடமானம் வைத்து பங்குகளிலோ, ஐ.பி.ஓ-க்களிலோ முதலீடு செய்வதைத் தவிர்க்கவும். அடமானக் கடன் வாங்கினால், அதற்கு வட்டி கட்டுவது ஒருபக்கம், முதலீட்டின் மதிப்பு இறங்கினால் அந்த நஷ்டத்தைத் தாங்க வேண்டிய நிலை இன்னொரு பக்கம் என இரட்டை இழப்பைச் சந்திக்க வேண்டும். எனவே, வேண்டாம்!”

எம்.இளங்கோவன், சூலூர் பேட்டை.

நான் தனியார் நிறுவனப் பணிகளில் கடந்த மூன்று ஆண்டுகளாக இருக்கிறேன். அவசரத் தேவைக்கு பணம் தேவைப்படுகிறது. மாதச் சம்பளம் எவ்வளவு இருந்தால் தனிநபர் கடன் தருவார்கள், குறைந்த பட்ச வட்டி எவ்வளவு இருக்கும், இந்தக் கடனை அதிகபட்சம் எத்தனை ஆண்டுகளுக்குள் திரும்பக் கட்ட அனுமதிப்பார்கள்?

வி.தியாகராஜன், ஆடிட்டர், www.bizlane.in

“தனிநபர் கடனுக்கான வட்டி விகிதம் என்பது 11 சதவிகிதத்திலிருந்து 30% வரைக்கும் உள்ளது. கடன் தொகை மற்றும் வட்டி விகிதம், நீங்கள் வேலை பார்க்கும் நிறுவனம், வாங்கும் மாத நிகர சம்பளம், தற்போது செலுத்தும் மாதத் தவணைகள், சிபில் ஸ்கோர் ஆகியவற்றைக் கொண்டு நிர்ணயிக்கப்படுகிறது. பொதுவாக, மாதச் சம்பளம் ரூ.30,000-க்குமேல் இருந்தால் தனிநபர் கடன் பெறலாம். ஆனால், இப்போது சில வங்கி சாரா நிதி நிறுவனங்கள் ரூ.15,000 மாத சம்பளம் பெறுபவருக்கும் தனிநபர் கடன் தருகின்றன.

கடனைத் திரும்பச் செலுத்தும் காலம் என்பது தங்களின் தற்போதைய வயது மற்றும் ஓய்வுபெறும் வயது ஆகிய வற்றைக் கொண்டு நிர்ணயிக்கப் படுகிறது. அதிகபட்சமாக 7 வருடங்கள் வரை தனிநபர் கடன் வழங்கப்படுகிறது. தனிநபர் கடன் வாங்குவதற்கு உங்கள் மாதச் சம்பளம் உங்களது வங்கிக் கணக்கில் கிரெடிட் ஆக வேண்டும் என்பது பொதுவான விதிமுறையாக இருக்கிறது.”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism