Published:Updated:

ஈக்விட்டி ஃபண்ட்... நிகர எஸ்.ஐ.பி முதலீடு 50% குறைவு..! காரணம் என்ன?

ஈக்விட்டி ஃபண்ட்
பிரீமியம் ஸ்டோரி
News
ஈக்விட்டி ஃபண்ட்

M U T U A L F U N D

பங்குச் சந்தை சார்ந்த மியூச்சுவல் ஃபண்டுகளில் சிஸ்டமேட்டிக் இன்வெஸ்ட் மென்ட் பிளான் (எஸ்.ஐ.பி) முறையில் செய்யப்படும் முதலீடு அண்மைக் காலத்தில் கணிசமாகக் குறைந்திருக்கிறது. இது மியூச்சுவல் ஃபண்ட் நிறுவனங்கள், மியூச்சுவல் ஃபண்ட் துறையை நெறிப்படுத்தும் செபி அமைப்பை அதிர்ச்சியடைய வைத்திருக்கிறது.

ஹசன் அலி
ஆலோசகர், 
Siptiger.com
ஹசன் அலி ஆலோசகர், Siptiger.com

2019-20-ம் ஆண்டு பங்கு சார்ந்த மியூச்சுவல் ஃபண்டுகளில் மாதம் தோறும் எஸ்.ஐ.பி முறையில் செய்யப் படும் முதலீடு சராசரியாக ரூ.5,600 கோடியாக இருந்தது. இது 2020 ஏப்ரல் முதல் மே வரையிலான காலகட்டத்தில் ரூ.6,200 – ரூ.6,400 கோடியாக அதிகரித்துள்ளது. அதன் பிறகு, ஈக்விட்டி ஃபண்டுகளில் எஸ்.ஐ.பி முறையில் முதலீடு செய்வது படிப்படியாகக் குறைந்து வந்திருக் கிறது.

2020 நவம்பர் முதல் 2021 ஜனவரி வரையிலான காலகட்டத்தில் ஈக்விட்டி ஃபண்ட் எஸ்.ஐ.பி நிகர முதலீடு ரூ.3,000 கோடிக்கும் கீழே குறைந்துள்ளது. இது கிட்டத்தட்ட 50 சதவிகித வீழ்ச்சியாகும்.

2021 பிப்ரவரி மாத ஆரம்பத்தில் எஸ்.ஐ.பி கணக்குகளின் எண்ணிக்கை 3,55,90,736. பிப்ரவரி மாதத்தில் புதிய எஸ்.ஐ.பி-க்கள் பதிவு 14,90,237. பிப்ரவரி மாதத்தில் முதிர்வடைந்த மற்றும் நிறுத்தப்பப்ட்ட எஸ்.ஐ.பி கணக்குகள் 7,88,960. பிப்ரவரி மாதக் கடைசியில் எஸ்.ஐ.பி கணக்குகளின் எண்ணிக்கை 3,62,92,013. ஆக உள்ளது

இதற்கு முன்னால் தனிப்பட்ட முதலீட்டாளர்கள், மியூச்சுவல் ஃபண்ட் எஸ்.ஐ.பி முறையில் பிரதானமாக முதலீடு செய்து வந்திருக்கிறார்கள். கொரோனா வைரஸ் பரவலால் போடப்பட்ட ஊரடங்கு முதலீட்டாளர்களை மாற்றி இருக்கிறது. அவர்கள் ஊரடங்கு காலத்தில் முதலீடு தொடர்பான பல்வேறு அம்சங்களை அலசி ஆராய்ந்திருக்கிறார்கள். நேரடிப் பங்கு முதலீட்டில் முதலீடு செய்யத் தொடங்கியிருக்கிறார்கள்.

ஈக்விட்டி ஃபண்ட்
ஈக்விட்டி ஃபண்ட்

ரியல் எஸ்டேட் விலை கணிசமாகக் குறைந்திருப்பதுடன், வீட்டுக் கடனுக்கான வீழ்ச்சி 6.7% அளவுக்கு வீழ்ச்சிக் கண்டிருப்பதால், வீடு வாங்கத் திட்டமிட்டிருக்கிறார்கள். முதலீட்டில் ரிஸ்க்கைக் குறைக்கும் நோக்கத்தோடு கடன் சந்தை சார்ந்த திட்டங்களான ஃபிக்ஸட் டெபாசிட், கடன் ஃபண்டுகளில் முதலீடு செய்ய ஆரம்பித்திருக்கிறார்கள். இது போன்ற காரணங்களால் அவர்கள் ஈக்விட்டி ஃபண்டுகளில் முதலீட்டைக் குறைத் திருக்கலாம்.

அடுத்து, சந்தை மிகவும் உச்சத்திலிருப்ப தால், அதிக என்.ஏ.வி-யில் முதலீடு செய்ய வேண்டியிருக்கிறது. சந்தை இறங்கினால் குறைந்த என்.ஏ.வி மதிப்பில் முதலீடு செய்யலாம் என்ற நோக்கில் பலர் முதலீட்டை விற்றுப் பணமாக வைத்திருக்கிறார்கள்.

எஸ்.ஐ.பி கணக்கீடு..!
எஸ்.ஐ.பி கணக்கீடு..!

சிறு முதலீட்டாளர்கள் தரப்பில் இன்னொரு பிரச்னையும் இன்னும் தீர்க்கப்படாமல் இருக்கிறது. நடுத்தர வருமானப் பிரிவினர் அதிகம் பேர் மியூச்சுவல் ஃபண்டில் முதலீடு செய்து வருகிறார்கள். கொரோனா பாதிப்பால் பலருக்கு வேலை இழப்பு, சம்பளக் குறைப்பு நடந்திருக்கிறது. அது இன்னும் சரியாகவில்லை என்பதால், எஸ்.ஐ.பி முதலீட்டைத் தொடர முடியாமல் இருப்பதும் இதற்கு ஒரு முக்கியமான காரணமாகப் பார்க்கப்படுகிறது. குறைக்கப் பட்ட சம்பளம் முழுமையாக உயர்த்தப்பட்டு, சம்பள உயர்வு கொடுக்கப்பட்டால் முன்புபோல் எஸ்.ஐ.பி முதலீடு வேகம் எடுக்க வாய்ப்பிருக்கிறது.

எது எப்படி இருந்தாலும் சிறு முதலீட்டாளர்கள் எஸ்.ஐ.பி முதலீட்டை நிறுத்தி வைப்பது அவ்வளவு லாபகரமாக இருக்காது. காரணம், சந்தையில் நேரம் பார்த்து முதலீடு செய்பவர் களைவிட, நேரம் காலம் பார்க்காமல் இருப்பவர்களே அதிக வருமானம் ஈட்டுகிறார்கள் என்பதை யாரும் மறுக்க முடியாது. எனவே, எஸ்.ஐ.பி முதலீட்டைத் தொடர்ந்து, நீண்டகாலத்தில் செல்வத்தை உருவாக்குவதே சரியான விஷயமாக இருக்கும் என்பதே நிபுணர்களின் கருத்தாக இருக்கிறது.

எஸ்.ஐ.பி புள்ளிவிவரம்: ஆஃம்பி Vs செபி..!

2020 நவம்பர் மற்றும் 2021 ஜனவரி வரையிலான காலகட்டத்தில் எஸ்.ஐ.பி முறையில் சராசரியாக ரூ.7,900 கோடி இருப்பதாக ஆஃம்பி தெரிவித்துள்ளது. இதை ஆஃம்பி மொத்த எஸ்.ஐ.பி முதலீடு (Gross SIP Inflow) எனத் தெரிவிக்கிறது. இதே காலகட்டத்தில், எஸ்.ஐ.பி சராசரி முதலீடு ரூ.3,000 கோடிக்கும் கீழே வந்துள்ளது எனத் தெரிவித்துள்ளது. இதை செபியானது, மாத சராசரி நிகர முதலீடு (Average Monthly SIP) எனக் குறிப்பிடுகிறது. சுருக்கமாக, ஆஃம்பி புதிய எஸ்.ஐ.பி முதலீட்டையும், செபி அமைப்பு நிறுத்தப்பட்ட எஸ்.ஐ.பி தொகையையும் கணக்கில் எடுத்துக்கொள்கிறது.