Published:Updated:

மியூச்சுவல் ஃபண்ட் முதலீடு... அதிக லாபம் ஈட்ட 5 தங்க விதிமுறைகள்..!

மியூச்சுவல் ஃபண்ட்

பிரீமியம் ஸ்டோரி

அனைவரும் மிக எளிமையாக முதலீடு செய்து லாபம் ஈட்டக்கூடிய திட்டங் களில் முதல் இடத்தைப் பிடிப்பது மியூச்சுவல் ஃபண்ட். இந்த மியூச்சுவல் ஃபண்ட் மூலம் சிலர் ஆண்டுக்கு 12% - 18% என லாபம் சம்பாதித்துவரும் வேளையில், சிலர் 6% - 8% லாபத்தை மட்டுமே பெறுகிறார்கள். இதற்கு என்ன காரணம், ஃபண்ட் திட்டங்கள் தரும் லாபத்தில் ஏன் இந்த வித்தியாசம்?

எம்.சதீஷ் குமார் 
நிறுவனர், 
http://sathishspeaks.com/
எம்.சதீஷ் குமார் நிறுவனர், http://sathishspeaks.com/

பொதுவாக, மியூச்சுவல் ஃபண்ட் முதலீட்டில் ஐந்து தங்க விதிமுறைகளைப் (Golden Rules) பின்பற்றினால் அதிக வருமானத்தைப் பெற வாய்ப்பு உண்டு. அந்த ஐந்து தங்கள் விதிமுறைகள் என்னென்ன?

1. எப்போதும் குரோத் ஆப்ஷனைத் தேர்வு செய்யுங்கள்...

மியூச்சுவல் ஃபண்ட் முதலீட்டில் முதலீட்டாளர்களுக்கு இரண்டு வகைகளில் வருமானம் கிடைக்கிறது. ஒன்று, குரோத் என்கிற வளர்ச்சி. மற்றது, லாபத் தொகை என்கிற டிவிடெண்ட். மியூச்சுவல் ஃபண்ட் முதலீட்டைத் தேர்வுச் செய்யும்போது இந்த இரு ஆப்ஷன்களில் ஏதாவது ஒன்றை முதலீட்டாளர்கள் தேர்வு செய்ய வேண்டும். முதலீட்டாளர் எந்த ஆப்ஷனையும் தேர்வு செய்யவில்லை எனில், மியூச்சுவல் ஃபண்ட் நிறுவனமே குரோத் ஆப்ஷனைத் தேர்வு செய்துகொள்ளும்.

சில முதலீட்டாளர்கள் குறிப்பாக, இடையிடையே செலவுக்குப் பணம் தேவைப்படுவர்கள் மற்றும் பணி ஓய்வு பெற்ற மூத்தக் குடிமக்கள் டிவிடெண்ட் ஆப்ஷனைத் தேர்வு செய்கிறார்கள். மொத்தத் தொகையை ஏதாவது ஒரு ஃபண்டில் முதலீடு செய்துவிட்டு, டிவிடெண்ட் ஆப்ஷனைத் தேர்வு செய்கிறார்கள். அந்த ஃபண்டில் குறிப்பிட்ட இடைவெளியில் கொடுக்கும் டிவிடெண்டைச் செலவுக்குப் பயன்படுத்தி வருகிறார்கள். இந்த டிவிடெண்ட் ஆப்ஷன் முதலீட்டின் லாபத்தைக் குறைப்பதாகவே இருக்கிறது. தவிர, மியூச்சுவல் ஃபண்ட் முதலீட்டின்மூலம் கிடைக்கும் டிவிடெண்டுக்கு முதலீட்டாளர்கள் அவரின் அடிப்படை வருமான வரி வரம்புக்கு (பழைய முறையில் 5%, 20% மற்றும் 30%) வரி கட்ட வேண்டும்.

உதாரணமாக, ஒரு ஃபண்ட் முதலீடு மூலம் ரூ.10,000 டிவிடெண்ட் கிடைக்கிறது எனில், 5%, 20% மற்றும் 30% வரி வரம்பில் உள்ளவர்கள் முறையே சுமார் ரூ.500, ரூ.2,000 மற்றும் ரூ.3,000 வரி கட்ட வேண்டும். இதற்குப் பதில், குரோத் ஆப்ஷனைத் தேர்வு செய்து கடன் ஃபண்டுகளில் மூன்று ஆண்டுகளுக்குப் பிறகும், ஈக்விட்டி ஃபண்டுகளில் ஓராண்டுக்குப் பிறகும் யூனிட்டுகளை விற்றுப் பணமாக்கும் போது குறைவான வரியைக் கட்டினால் போதும். கடன் ஃபண்டுகளில் பணவீக்க விகித சரிகட்டலுக்குப் பிறகு 20% வரி. ஈக்விட்டி ஃபண்டுகளில் நிதி ஆண்டில் ரூ.1 லட்சத்துக்கு வரி கிடையாது. அதற்கு மேற்படும் மூலதன ஆதாயத்துக்கு 10% வரியைக் கட்டினால் போதும்.

மியூச்சுவல் ஃபண்ட் முதலீடு... அதிக லாபம் ஈட்ட 5 தங்க விதிமுறைகள்..!

2. எஸ்.ஐ.பி முதலீட்டை எப்போதும் நிறுத்தாதீர்கள்...

சிஸ்டமேட்டிக் இன்வெஸ்ட்மென்ட் பிளான் (எஸ்.ஐ.பி) முறையின் சிறப்பு அம்சமே முதலீடு செய்ய நேரம் காலம் பார்க்கத் தேவையில்லை; பங்குச் சந்தை மற்றும் கடன் சந்தையின் போக்கைக் கவனிக்கத் தேவை யில்லை என்பதே. ஆனால், நம்மில் பலர் சந்தை இறங்கினால், சந்தை இன்னும் இறங்கினால் இழப்புக் கூடிவிடுமே எனப் பயந்து, பதற்றமாகி எஸ்.ஐ.பி முதலீட்டை நிறுத்திவிடு கிறார்கள். இது தவறான அணுகுமுறை. 2020 மார்ச் மற்றும் ஏப்ரல் மாத இறக்கத்தில் எஸ்.ஐ.பி முதலீட்டைத் தொடர்ந்தவர்கள், புதிதாக ஈக்விட்டி ஃபண்டுகளில் முதலீடு செய்தவர்கள் இப்போது நல்ல லாபத்தில் இருக்கிறார்கள். காரணம், அப்போது பல நல்ல ஃபண்டுகளின் என்.ஏ.வி 40% - 50% வரை வீழ்ச்சி கண்டன. அந்த இறக்கத்திலிருந்து பல ஃபண்டுகள் 100 - 120% என ஏற்றம் கண்டிருக்கின்றன.

சந்தை இறங்கினால் குறைந்த என்.ஏ.வி-யில் அதிக யூனிட்டுகள் கிடைக்கும் என்பதால், அந்த நேரத்தில் எஸ்.ஐ.பி-யை நிறுத்தாமல், முடிந்தால் கூடுதலாக முதலீடு செய்வது மிகவும் லாபகரமாக பின்னர் மாறும். இந்த முதலீட்டு அணுகு முறை யைக் கடைப்பிடிப்பவர்கள் அதிகமான லாபத்தையே பெறுபவர்களாக இருக்கிறார்கள்.

3. ஈக்விட்டி ஃபண்டுகளில் நீண்ட கால முதலீடு...

பங்குச் சந்தை சார்ந்த ஃபண்டு களைப் பொறுத்தவரை, குறுகிய காலத்தில் அதாவது, 3 மாதம், 6 மாதம், 12 மாதக் காலத்துக்கு மட்டும் முதலீடு செய்தால் மிக அதிக ரிஸ்க் ஆகும். இந்த ரிஸ்க் என்பது மூன்று, நான்கு ஆண்டுகள் வரைகூட தொடர வாய்ப்புண்டு. இந்தக் காலகட்டத்தில் முதலீடானது 50% - 60% வரை குறையவும் வாய்ப்புண்டு. ஆனால், நீண்ட காலத்தில் குறைந்தது 5 ஆண்டுகளுக்குமேல் அது பணவீக்க விகிதத்தைத் தாண்டி நல்ல வருமானம் தரும் முதலீடாக எப்போதும் இருந்துவருகிறது.

4. முதலீட்டைப் பிரித்து செய்யுங்கள்...

முதலீட்டை எப்போதும் பல்வேறு வகையான சொத்துப் பிரிவுகளில் பிரித்துச் செய்யுங்கள். இதை ஆங்கிலத்தில் ‘அஸெட் அலொகேஷன்’ என்பார்கள். இதன் மூலம் ரிஸ்க் குறைவதுடன், அதிக வருமானம் கிடைக்கவும் வாய்ப்பிருக்கிறது. குறுகிய காலத் தேவைகளுக்குக் கடன் ஃபண்டுகளிலும் நடுத்தரக் காலத்துக்கு ஹைபிரிட் ஃபண்டுகளிலும் நீண்ட காலத்துக்கு ஈக்விட்டி ஃபண்டுகளிலும் பிரித்து முதலீடு செய்வதுகூட ‘அஸெட் அலொகேஷன்’தான்.

ஈக்விட்டி ஃபண்ட் முதலீடு என்கிறபோது அதை லார்ஜ்கேப் ஃபண்ட், மல்ட்டிகேப் ஃபண்ட், ஃபிளெக்ஸி கேப் ஃபண்ட், மிட்கேப் ஃபண்ட், லார்ஜ் & மிட்கேப் ஃபண்ட், ஸ்மால்கேப் ஃபண்ட் என்பது போக ரிஸ்க் எடுக்கும் திறன் மற்றும் முதலீட்டுக் காலத்துக்கு ஏற்ப பிரித்து முதலீடு செய்ய வேண்டும். உதாரணமாக, ஒரு முதலீட்டாளரால் அதிக ரிஸ்க் எடுக்க முடியும்; 10 ஆண்டுகளுக்கு மேற்பட்ட மிக நீண்ட கால முதலீடு செய்ய முடியும் என்கிறபோது மிட்கேப் ஃபண்ட் மற்றும் ஸ்மால்கேப் ஃபண்டுகளில் பிரித்து முதலீடு செய்வது மூலம் அதிக வருமானம் பெறமுடியும். அதே நேரத்தில், முதலீட்டுக் காலம் சுமார் ஐந்து ஆண்டுகள்தான்; அதிக ரிஸ்க் எடுக்க முடியாது எனில், லார்ஜ்கேப் ஃபண்ட், மல்ட்டி கேப் ஃபண்ட், ஃபிளெக்ஸி கேப் ஃபண்டுகளில் பிரித்து முதலீடு செய்வது லாபகரமாக இருக்கும். இப்படிப் பிரித்து முதலீடு செய்யும்பட்சத்தில் சராசரியாக ஆண்டுக்கு சராசரி 12% - 15% வருமானம் எடுக்க முடியும்.

5. சரியான ஃபண்டைத் தேர்வு செய்யுங்கள்...

நம் நாட்டைப் பொறுத்தவரை, 42 மியூச்சுவல் ஃபண்ட் நிறுவனங்களில் செபி அமைப்பின் ஃபண்ட் வகைப்படுத்தல்படி, 37 ஃபண்ட் வகைகள் (ஈக்விட்டி ஃபண்டுகள் - 11, கடன் ஃபண்டுகள் - 16, ஹைபிரிட் ஃபண்டுகள் - 6, தீர்வு சார்ந்த ஃபண்டுகள் - 2, இதர திட்டங்கள் - 2) உள்ளன. மொத்த ஃபண்டுகளின் எண்ணிக்கை என்கிறபோது சுமார் 1,580-ஆக உள்ளன. இவற்றில் உங்களுக்கு ஏற்ற சரியான திட்டம் எது என்பதைத் தேர்வு செய்யுங்கள். உங்களின் நிதி இலக்குகளுடன் முதலீடுகளை இணையுங்கள். உதாரணமாக, இந்த மியூச்சுவல் ஃபண்ட் முதலீடு மூத்த மகனின் உயர்கல்விச் செலவுக்கு என முடிவு செய்து முதலீட்டை ஆரம்பித் தால், அந்த முதலீட்டை இடையில் நிறுத்த மாட்டீர்கள். மேலும், அந்த ஃபண்டின் பணத்தை எடுத்து வேறு செலவுகளுக்குப் பயன்படுத்த மாட்டீர்கள்.

உங்களுக்கு சரியான ஃபண்டைத் தேர்வு செய்வதில் ஏதாவது, உதவி தேவைப்பட்டால் ஆம்ஃபி மற்றும் செபி அமைப்பில் பதிவு பெற்ற மியூச்சுவல் ஃபண்ட் விநியோகஸ்தர்கள் மற்றும் நிதி ஆலோசகர்களின் உதவியை நாடத் தயங்காதீர்கள். மியூச் சுவல் ஃபண்ட் முதலீட்டின்மூலம் இனி அதிக லாபம் காண வாழ்த்துகள்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு