Published:Updated:

ஃபண்ட் நிறுவனங்கள் இணைப்பு... முதலீட்டில் லாபம் குறையுமா?

ஃபண்ட் நிறுவனங்கள் இணைப்பு...
பிரீமியம் ஸ்டோரி
ஃபண்ட் நிறுவனங்கள் இணைப்பு...

கவர் ஸ்டோரி

ஃபண்ட் நிறுவனங்கள் இணைப்பு... முதலீட்டில் லாபம் குறையுமா?

கவர் ஸ்டோரி

Published:Updated:
ஃபண்ட் நிறுவனங்கள் இணைப்பு...
பிரீமியம் ஸ்டோரி
ஃபண்ட் நிறுவனங்கள் இணைப்பு...

சமீபத்தில் மியூச்சுவல் ஃபண்ட் முதலீட்டாளர்கள் அனைவரையும் திரும்பிப் பார்க்க வைத்திருக்கிறது ஃபண்ட் நிறுவனங்களின் விற்பனை அல்லது இணைப்பு தொடர்பான செய்திகள். இதுபோன்ற நிறுவன விற்பனை அல்லது நிறுவன இணைப்பு உள்ளிட்ட நடவடிக்கைகள் அனைத்துத் துறைகளிலும் அடிக்கடி நடப்பவைதான்.

என்றாலும், சமீபகாலத்தில் பல லட்சம் புதிய முதலீட்டாளர்கள் மியூச்சுவல் ஃபண்டில் முதலீடு செய்யத் தொடங்கியிருக்கிறார்கள். ஃபண்ட் நிறுவனங்கள் வேறொரு நிறுவனத்துடன் இணைக்கப்படும்போது இந்தப் புதிய முதலீட்டாளர்களுக்குப் பலவிதமான கேள்விகள் எழவே செய்கின்றன.

ஃபண்ட் நிறுவனங்கள் இணைப்பு... முதலீட்டில் லாபம் குறையுமா?

இணைப்புக்குள்ளான ஐந்து ஃபண்ட் நிறுவனங்கள்...

கடந்த ஓராண்டுக் காலத்தில் ஐந்துக்கும் மேற்பட்ட மியூச்சுவல் ஃபண்ட் நிறுவனங்கள் இணைப்புக்கு உள்ளாகியுள்ளன. சுந்தரம் மியூச்சுவல் ஃபண்ட் நிறுவனம் பிரின்சிபல் மியூச்சுவல் ஃபண்ட் நிறுவனத்தை வாங்கியிருக் கிறது.

ஹெச்.எஸ்.பி.சி மியூச்சுவல் ஃபண்ட் நிறுவனமானது எல் அண்ட் டி மியூச்சுவல் ஃபண்ட் நிறுவனத்தை ரூ.3,200 கோடிக்கும் அதிகமாகத் தந்து வாங்கியிருக்கிறது.

பந்தன் வங்கியின் தலைமையிலுள்ள குழு ஐ.டி.எஃப்.சி மியூச்சுவல் ஃபண்டை ரூ.4,500 கோடிக்கு வாங்கியிருக்கிறது.

குரோ (Groww) குழுமம் இந்தியாபுல்ஸ் மியூச்சுவல் ஃபண்டை ரூ.175 கோடிக்கு வாங்கியிருக்கிறது.

நவி (Navi) மியூச்சுவல் ஃபண்ட் நிறுவனம் எஸ்ஸெல் (Essel) மியூச்சுவல் ஃபண்டை வாங்கியிருக்கிறது.

கேள்வி எழுப்பும் முதலீட்டாளர்கள்...

மியூச்சுவல் ஃபண்ட் நிறுவனங்கள் இணைப்புக்கு உள்ளாகி இருப்பதால் இந்த ஃபண்ட் நிறுவனங்களில் முதலீடு செய்துள்ள முதலீட்டாளர்களின் முதலீட்டுக்கு பாதிப்பு ஏதாவது ஏற்படுமா, அவ்வாறு இணைக்கப்பட்ட ஃபண்ட் நிறுவனங்களில் முதலீடு செய்துள்ள முதலீட்டாளர்கள் என்னென்ன விஷயங் களைக் கவனத்தில்கொள்ள வேண்டும், இணைப்புக்குப் பிறகு, தங்களுடைய முதலீடு களில் என்ன மாதிரியான முடிவுகளை மேற்கொள்ள வேண்டும் என்ற கேள்விகள் எழுவது இயல்பானதே.

இந்தக் கேள்விகளுடன் மியூச்சுவல் ஃபண்ட் நிபுணர், ப்ரகலா வெல்த் மேனேஜ்மென்ட் நிறுவனத்தின் தலைவர் சொக்கலிங்கம் பழனியப்பனை சந்தித்துப் பேசினோம். அவர் ஃபண்ட் நிறுவனங்களின் இணைப்பு பற்றியும், அதற்குப் பிறகு ஃபண்டுகளின் செயல்பாடு எப்படி இருக்கும் என்பது பற்றியும், குறிப்பாக முதலீட்டாளர்கள் கவனிக்க வேண்டிய அம்சங்களையும் விரிவாக எடுத்துச் சொன்னார்.

சொக்கலிங்கம் பழனியப்பன்
சொக்கலிங்கம் பழனியப்பன்

முதலீட்டாளர்களுக்குத் தெரிவித்த பின்பே இணைப்பு...

‘‘ஃபண்ட் நிறுவனங்களின் இணைப்பு நடவடிக்கைகள் குறித்து பல காலமாகவே நிறுவனங்கள் ஆலோசித்து வந்தன. கொரோனாவுக்குப் பிறகு, இந்த முடிவுகளைத் தற்போது எடுத்துள்ளன. சந்தைக் காரணிகளாலும் இதுபோன்ற நிகழ்வுகள் நடக்கலாம். ஃபண்ட் நிறுவனங்களைப் பொறுத்த வரை, இது ஒரு முக்கியமான முடிவு. எனவே, எந்த ஃபண்ட் நிறுவனமும் இதை, போகிறபோக்கில் எடுத்துவிட முடியாது.

ஃபண்ட் நிறுவனங்கள் இப்படிப்பட்ட ஒரு முடிவை எடுக்கும்போது டிரஸ்ட்டிகளின் ஒப்புதல் பெற்றபிறகு செபி ஒப்புதலுக்கு அனுப்பி வைக்கப்படுவது வழக்கம். இந்த இணைப்பு தொடர்பான தகவல்கள் அந்த நிறுவனத்தின் ஃபண்ட் திட்டங்களில் முதலீடு செய்துள்ள யூனிட் ஹோல்டர்களுக்கு அனுப்பி வைக்கப்படும்.

முதலீட்டைத் தொடர்ந்து வைத்திருப்பதா, இல்லை வேறு நிறுவனத்துக்கு மாற்றிவிடுவதா என்பது குறித்து முடிவு செய்ய யூனிட் ஹோல்டர்களுக்கு ஒரு மாத கால அவகாசம் தரப்படும்.

இந்த இணைப்பு நடவடிக்கையில் விருப்பம் இல்லாதவர்கள் ஒரு மாதத்துக் குள் தங்களிடம் உள்ள ஃபண்ட் யூனிட்டுகளை வெளியேறும் கட்டணம் இல்லாமல் விற்று விட்டு வெளியேறலாம். மேலும், இணைப்பு நடவடிக்கை எப்படி செயல்படுத்தப்படும், இணைப் புக்குப் பின் செயல்பாடு எப்படி இருக்கும், நிர்வாகம் தொடர்பான முடிவுகள் என்பதெல்லாம் முன்கூட்டியே திட்டமிடப்படும். ஃபண்ட் நிறுவனங்கள் இணைவதால் முதலீட்டாளர் களுக்கு நன்மை கிடைக்கவே வாய்ப்புகள் அதிகம்.

இணைப்புக்கான காரணங்கள்...

ஃபண்ட் நிறுவனங்கள் விற்கப் படுவதற்கும் இன்னொரு நிறுவனத்துடன் இணைக்கப்படுவதற்கும் பொதுவாகவே பல காரணங்கள் இருக்கும். உலக அளவில் பல்வேறு தொழில்களில் ஈடுபட்டு வரும் நிறுவனங்கள் தங்களின் சில தொழில்களில்/ சில நாடுகளில் லாப வளர்ச்சி குறைவாக இருக்கும்பட்சத்தில், அதிலிருந்து வெளியேறுவதற் கான முடிவை எடுக்கும். லாபம் குறைவாக இருக்கும்போது எதற்காக முதலீடுகளையும், மனித வளத்தையும் விரயமாக்க வேண்டும் என்பதற்காக எடுக்கப் படும் முடிவாகவே இது இருக்கும். அதே போல, குறிப்பிட்ட துறையில் முன்னணி 5 இடங் களுக்குள் இருக்க வேண்டும் என்பது நிறுவனங்களின் லட்சியமாக இருக்கும். அந்த லட்சியத்தை எட்டுவதற்கான சாத்தியங்கள் இல்லாதபட்சத்தில் அந்த பிசினஸிலிருந்து வெளியேறும் முடிவை நிறுவனங்கள் எடுக்கும். குறிப்பிட்ட துறைகளில் மட்டும் தங்களின் முழு கவனத்தையும் செலுத்துவதற்கான கொள்கையைக் கொண்டிருக்கும். சில சமயங்களில் துறைசார்ந்த ஒழுங்குமுறை அமைப்புகளின் கடுமையான விதிமுறைகள் உள்ளிட்ட காரணங்களுக்காகவும் வெளியேறும் சாத்தியங்கள் உண்டு.

ஃபண்ட் நிறுவனங்கள் இணைப்பு... முதலீட்டில் லாபம் குறையுமா?

முதலீட்டாளர்கள் கவனிக்க வேண்டியது...

ஃபண்டுகள் இணைக்கப்படும்போது அந்த இணைப்பு குறித்து முதலீட்டாளர் கள் அனைவருக்கும் மின்னஞ்சல் அனுப்பப்படும். மின்னஞ்சல் முகவரி தராதவர்களுக்கு தபால் மூலமாகத் தெரிவிக்கப்படும்.

செபியின் விதிமுறைப்படி, ஒரு ஃபண்ட் நிறுவனம் ஒரு கேட்டகிரியில் ஒரு ஃபண்ட் திட்டத்தை மட்டுமே வைத்திருக்க வேண்டும். இதன் காரணமாக இணைப்பின் மூலம் சேர்க்கப்படும் நிறுவனத்தின் ஃபண்ட் திட்டத்தை அந்த நிறுவனம் ஏற்கெனவே நடத்திவரும் ஃபண்ட் திட்டத்துடன் இணைக்க வேண்டி வரலாம்.

உங்களுடைய முதலீடு உள்ள ஃபண்ட் திட்டத்துடன் வேறொரு ஃபண்ட் திட்டம் இணைந்திருந்தால் கவலை இல்லை. உங்களுடைய ஃபண்ட் வேறொரு ஃபண்டில் இணைக்கப்பட்டிருந்தால், அந்த ஃபண்டின் செயல்பாடு குறித்து பார்க்க வேண்டும்.

மியூச்சுவல் ஃபண்ட் நிறுவனங்கள் இணைப்புக்குப் பிறகு, அந்த ஃபண்ட் திட்டத்தை நிர்வகிக்கும் ஃபண்ட் மேனேஜர்கள், மேனேஜ்மென்ட் குழு ஆகியவற்றில் பெரிய அளவில் மாற்றங்கள் நடக்கிறதா என்பதைக் கவனிக்க வேண்டும். இணைப்புக்குப் பிறகு, அவர்களின் செயல்பாடு எந்தளவுக்கு மாறும் என்பதைத் தெரிந்துகொள்ள வேண்டும்.

ஃபண்டுகளிலிருந்து வெளியேறுவதற்கு முன் நீங்கள் முதலீடு செய்துள்ள ஃபண்ட் திட்டத்தின் செயல்பாடு கடந்த மூன்று காலாண்டுகளில் எப்படி இருக்கிறது என்று பாருங்கள். அதே போல, ஃபண்ட் நிறுவனம் இணைக்கப்பட்ட பிறகு, அந்த ஃபண்டின் செயல்பாடு எப்படி இருக்கிறது என்பதையும் பார்த்து முடிவெடுப்பதே சரியாக இருக்குமே அன்றி, நிறுவனத்தின் நிர்வாகம் மாறிவிட்டது என்கிற ஒரே காரணத்துக்காக இணைக்கப்பட்ட ஃபண்ட் திட்டத்திலிருந்து வெளியேறத் தேவையில்லை.

ஃபண்ட் நிறுவனங்களின் இணைப்பால் நீங்கள் குறிப் பிட்ட ஃபண்டில் செய்துள்ள முதலீடானது எங்கும் காணாமல் போய்விடாது. எனவே, இணைப்பு குறித்து பதற்றப்பட வேண்டியதில்லை. ஃபண்ட் பெயர் மட்டும்தான் மாற்றம் அடையும்.

புதிய நிர்வாகம் உங்களுடைய நிதி இலக்குகளை எட்டுவதற்கான சாத்தியங்களுடன் இருக்கிறது எனில், அதை அப்படியே தொடரலாம். எனவே, ஃபண்ட் நிறுவனங்களின் இணைப்பால் முதலீட்டாளர்கள் அவசரப் பட்டு எந்த முடிவுகளையும் எடுக்க வேண்டாம். பொறுமை யாக இருந்து ஃபண்ட் திட்டத் தின் செயல்பாட்டைப் பார்த்து முதலீட்டு முடிவை எடுப்பதே சரியாக இருக்கும் என்பதில் சந்தேகம் இல்லை.

சில பிரச்னைகள்... உஷார்!

ஃபண்ட் திட்டங்களை நிர்வகிக்கும்போது பயன்படுத்தப்படும் ரிப்போர்ட்டிங் சாஃப்ட்வேரில் இணைப்புக்குப் பிறகு, உங்களுடைய முதலீட்டு மதிப்பு Cost Price என்று காட்டும். அதாவது, புதிதாக அந்த முதலீட்டைத் தொடங்குவது போல காட்டும்.

உதாரணமாக, நீங்கள் ஒரு ஃபண்ட் திட்டத்தில் ரூ.1,000 முதலீடு செய்துள்ளீர்கள். அது ரூ.2000 ஆக வளர்ச்சி அடைந்தி ருக்கிறது. வேறொரு ஃபண்டுடன் இணைக்கப்பட்ட பிறகு சாஃப்ட் வேரில் Cost Price ரூ.2,000 எனக் காட்டும். திட்டம் முழுமையாக இன்னொரு திட்டத் துடன் சேர்க்கப்படும் வரை இப்படியே காட்டும். இதைப் பார்த்து முதலீட்டாளர்கள் குழம்பத் தேவையில்லை.

ஃபண்ட் திட்டம் இணைக்கப்பட்ட பிறகு, முதலீட்டு மதிப்பானது Cost Price ரூ.2,000 என்று காட்டுவதால், வரிக் கணக்கீட்டில் முதலீடு ரூ.2,000 எனக் கணக்கிடப்படாது. முதலீடு ரூ.1,000 ஆகவே கணக்கிடப்படும். எனவே, கவலைப்பட வேண்டியதில்லை.

ஃபண்டுகள் இணைக்கப்படும்போது யூனிட்டுகளின் எண்ணிக்கை மாறுமே தவிர, முதலீட்டு மதிப்பு மாறாது. ஃபண்ட் மாற்றத் துக்குப் பிறகு, யூனிட்டுகளின் விலை ஏற்றம் இறக்கம் பொறுத்து முதலீட்டு மதிப்பானது மாறும். இது வழக்கமான நிகழ்வுதான். இணைப்பால்தான் ஃபண்ட் திட்டத்தின் மதிப்பு குறைந்துவிட்டது என்று நினைக்கக் கூடாது.

நம்முடைய நிதி இலக்கு சார்ந்தும், ஃபண்டு களின் செயல்பாடு சார்ந்தும்தான் ஃபண்டு களைத் தேர்வுசெய்து முதலீடு செய்கிறோம். திடீரென்று நாம் முதலீடு செய்த ஃபண்ட் திட்டம் வேறு ஃபண்டுடன் இணைக்கப்படும் போது உள்ளாகும் மாற்றங்கள் நம் நிதி இலக்கு பயணத்திலும், ஃபண்டின் செயல்பாட்டிலும் சில மாற்றங்களை உண்டாக்கலாம். பொறுமையாக இருந்து, ஃபண்டின் செயல்பாடு எப்படி இருக்கிறது என்று பார்த்து, முடிவெடுப்பதே சரி’’ என்றார்.

ஆக, ஃபண்ட் நிறுவனங்கள் இணைவதால் மட்டுமே நாம் அவசரப்பட்டு முதலீட்டை விற்கத் தேவையில்லை என்பதை முதலீட்டாளர்கள் அவசியம் புரிந்துகொள்ள வேண்டும்!

ஃபண்ட் நிறுவனங்கள் இணைப்பு... அடிக்கடி நடக்கும் நிகழ்வுதான்!

தொடர்ந்து மியூச்சுவல் ஃபண்ட் துறை மாற்றங்களுக்குள்ளாகி வந்திருக்கிறது. கடந்த பத்து ஆண்டு களில் மியூச்சுவல் ஃபண்ட் துறையில் நடந்த மாற்றங்கள் மிகப் பெரிய தாக்கத்தை உண்டாக்கின. குறிப்பாக, யு.டி.ஐ நிறுவனம் முதல் அரசுசார் மியூச்சுவல் ஃபண்ட் நிறுவனமாக உருவானது. இந்தியாவில் தற்போது 44 மியூச்சுவல் ஃபண்ட் நிறுவனங்கள் உள்ளன. மொத்தம் ரூ.38 லட்சம் கோடி மதிப்புள்ள முதலீடுகளை நிர்வகித்து வருகின்றன. பல நிறுவனங்கள் வந்த வேகத்தில் காணாமல் போயின. அல்லது வேறு நிறுவனத்துடன் இணைத்துக்கொண்டோ, விற்றுவிட்டோ வெளியேறின. அவற்றில் சிலவற்றைப் பார்க்கலாம்.

2000-ம் ஆண்டில் பிர்லா மியூச்சுவல் ஃபண்ட் நிறுவனம் ஆப்பிள் மியூச்சுவல் ஃபண்டை வாங்கியதன் மூலம் நாட்டின் இரண்டாவது பெரிய ஏ.எம்.சி-யாக உருவெடுத்தது. 2002-ல் ஃப்ராங்க்ளின் டெம்பிள்டன் மியூச்சுவல் ஃபண்ட் நிறுவனம் கோத்தாரி பயனீர் மியூச்சுவல் ஃபண்டை வாங்கியது. முன்னணி ஃபண்டாக இருந்த பயனீர் புளூசிப் மியூச்சுவல் ஃபண்ட் பிற்பாடு ஃப்ராங்க்ளின் டெம்பிள்டன் புளூசிப் ஃபண்டாகப் பெயர் மாற்றம் அடைந்தது. இது முன்னணி லார்ஜ் கேப் ஃபண்டுகளில் சிறப்பாகச் செயல்படும் ஃபண்டாக இருந்துவருகிறது.

2003-ல் ஜூரிச் மியூச்சுவல் ஃபண்ட் நிறுவனத்தை ஹெச்.டி.எஃப்.சி மியூச்சுவல் ஃபண்ட் நிறுவனம் கைப்பற்றியது. இன்று ஹெச்.டி.எஃப்.சி மியூச்சுவல் ஃபண்டில் சிறப்பாகச் செயல்படும் பல ஃபண்ட் திட்டங்கள் ஜூரிச் மியூச்சுவல் ஃபண்ட் நடத்தி வந்தவையே.

2005-ல் அலையன்ஸ் மியூச்சுவல் ஃபண்ட் நிறுவனத்தை பிர்லா மியூச்சுவல் ஃபண்ட் வாங்கியது. அதன் சில ஃபண்டுகள் இன்று முன்னணி ஃபண்டுகளாக உள்ளன. 2008-ல் ஸ்டாண்டர்டு சார்ட்டர்ட் ஏ.எம்.சி நிறுவனத்தைக் கைப்பற்றிதான் ஐ.டி.எஃப்.சி மியூச்சுவல் ஃபண்ட் தனது ஃபண்ட் மேனேஜ்மென்ட் பிசினஸைத் தொடங்கியது. 2010-ல் டி.பி.எஸ் சோழ மண்டலம் நிறுவனத்தைக் கைப்பற்றி எல் அண்ட் டி மியூச்சுவல் ஃபண்ட் தனது பிசினஸைத் தொடங்கியது. பின்னர், ஃபிடெலிட்டி மியூச்சுவல் ஃபண்டையும் வாங்கியது.

2004 - 2008 காலகட்டத்தில் பல மியூச்சுவல் ஃபண்ட் நிறுவனங்கள் தொடங்கப்பட்டன. அப்போது விநியோகஸ்தர்கள், முதலீட்டாளர்கள் செலுத்தும் நுழைவுக் கட்டணம் (Entry load) மூலம் கமிஷன் பெற்றனர். இதனால் அதிதீவிரமாக மியூச்சுவல் ஃபண்ட் திட்டங்களை விற்பனை செய்தனர். ஆனால், 2009 ஆகஸ்ட்டில் நுழைவுக் கட்டணம் வாங்க செபி தடை விதித்தது. இதனால் விநியோகஸ்தர்களின் மியூச்சுவல் ஃபண்ட் விற்பனை குறைந்தது. இதைச் சரிசெய்ய மியூச்சுவல் ஃபண்ட் நிறுவனங்களே முன்வந்து தங்களுடைய வருமானத்தில் இருந்து விநியோகஸ்தர்களுக்கு கமிஷன் வழங்கின. விநியோகஸ்தர்களுக்கு கமிஷன் வழங்குவதன் மூலமும் கணிசமான வருவாய் இழப்பு மியூச்சுவல் ஃபண்ட் நிறுவனங்களுக்கு உண்டானது.

2008 நெருக்கடிக்குப் பிறகு, உலக அளவில் மியூச்சுவல் ஃபண்ட் துறையில் சிக்கல்கள் உண்டாயின. ஸ்பான்சர் நிறுவனங்கள் சிறப்பாகச் செயல்படாததால், பெரும்பாலான நிறுவனங்களில் ஆட்குறைப்புகள் நடந்தன. மேலும், இந்தியப் பங்குச் சந்தையின் செயல்பாடும் மெதுவாக இருந்ததால், மியூச்சுவல் ஃபண்ட் முதலீடுகள் கணிசமாக சரிய ஆரம்பித்தது. இதுபோன்ற பல்வேறு காரணங்களால் மியூச்சுவல் ஃபண்ட் நிறுவனங்கள் பிசினஸிலிருந்து வெளியேறுவதற்கு முடிவெடுத்தன.

ஆனால், இன்றைக்கு மியூச்சுவல் ஃபண்ட் துறை வெகுவாக மாறியுள்ளது. 2016-ம் ஆண்டு பணமதிப்பு நீக்க நடவடிக்கைக்குப் பிறகு, அரசு அங்கீகாரம் பெற்ற முதலீட்டுத் திட்டங்களில் முதலீடு செய்யவே மக்கள் விரும்புகிறார்கள். 2014-க்குப் பிறகு, பங்குச் சந்தை தொடர்ந்து ஏற்றப் போக்கில் இருப்பதால், மியூச்சுவல் ஃபண்ட் திட்டங்கள் நல்ல லாபம் தந்து வருகின்றன. இதைத் தொடர்ந்து, பல புதிய ஃபண்ட் நிறுவனங்கள் தொடங்கப்பட்டிருப்பது குறிப்பிடத்தக்கது!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism