Published:Updated:

சரியாக முதலீடு செய்ய உதவும் 5 வாளி வழிமுறைகள்..!

முதலீடு
பிரீமியம் ஸ்டோரி
முதலீடு

முதலீடு

சரியாக முதலீடு செய்ய உதவும் 5 வாளி வழிமுறைகள்..!

முதலீடு

Published:Updated:
முதலீடு
பிரீமியம் ஸ்டோரி
முதலீடு

முதலீட்டை எளிமையாகவும் சரியாகவும் மேற்கொள்ள வாளி (Bucket) வழிமுறை மிகவும் உதவிகரமாக இருக்கிறது. ஒருவர் அவரின் முதலீடுகளை ஐந்து வாளிகளாக பிரித்துக்கொள்ள வேண்டும். இவை பற்றி தனித்தனியாக விரிவாகப் பார்ப்போம்.

சிவகாசி மணிகண்டன்  
நிதி ஆலோசகர், 
Aismoney.com
சிவகாசி மணிகண்டன் நிதி ஆலோசகர், Aismoney.com

வாளி 1: மிகக் குறுகிய கால இலக்குகள்...

ஒரு நாள் தொடங்கி ஆறு மாதத்துக்கு உட்பட்ட மிகக் குறுகிய கால இலக்குகளை நிறைவேற்றக்கூடிய முதலீடுகளை இந்த வாளிக்குள் கொண்டுவர வேண்டும். அன்றாடத் தேவை, வாரத் தேவை, மாதத் தேவை மற்றும் அவசரத் தேவைக்குத் தேவையான தொகை இந்த பக்கெட்டில் இடம்பெற்றிருக்க வேண்டும்.

இந்த முதலீடுகள் கொஞ்சம்கூட ரிஸ்க் கொண்டவையாக இருக்கக்கூடாது. எனவே, இந்தத் தேவைக்கான பணத்தை வங்கிச் சேமிப்புக் கணக்கு, மியூச்சுவல் ஃபண்டில் லிக்விட் ஃபண்ட் ஆகியவற்றில் போட்டு வைக்க வேண்டும். இவற்றின் மூலமான வருமானம் முக்கியமில்லை. அவசரத் தேவைக்குப் பணம் கிடைப்பதுதான் மிக அவசியமாகும்.

வாளி 2: குறுகிய கால இலக்குகள்...

ஆறு மாதம் முதல் இரண்டு ஆண்டுகளுக்கு உட்பட்ட இலக்குகளை நிறைவேற்றுவதற்கான முதலீடு மற்றும் பணத்தை இந்த இரண்டாவது வாளியில் வைத்திருக்க வேண்டும். பிள்ளை களின் பள்ளிக்கூடக் கட்டணம், ஆயுள் காப்பீடு, மருத்துவக் காப்பீடு ஆகியவற்றுக்கான பிரீமியம் கட்டும் தொகை ஆகியவற்றை இந்த பக்கெட்டுக்குள் கொண்டுவர வேண்டும்.

இந்தத் தேவைகளை நிறைவேற்ற செய்யும் முதலீடுகள் மூலம் சிறிது வருமானம் எதிர் பார்க்கலாம். ஆனால், முதலீட்டுத் தொகைக்கு அதாவது, அசலுக்கு எந்தப் பாதிப்பும் வராமல் பார்த்துக்கொள்வது மிக முக்கியம். இந்த பக்கெட்டில் இடம்பெற்றிருக்கும் நிதித் தேவைகள் (பள்ளிக் கட்டணம், இன்ஷூரன்ஸ் பிரீமியம்) மிக முக்கியமானவையாகும்.

இரண்டு ஆண்டுக்கு உட்பட்ட வங்கி மற்றும் தபால் அலுவலக ஃபிக்ஸட் டெபாசிட்டுகள், ஷார்ட் டேர்ம் டெஃப்ட் ஃபண்டுகள், ஃப்ளோட்டிங் ரேட் ஃபண்டுகள், டைனமிக் பாண்ட் ஃபண்டுகள் ஆகியவற்றில் குறுகிய கால தேவைக்கான முதலீடுகளை வைத்திருப்பது பாதுகாப்பானதாக இருக்கும். மேலும், தேவைக்கு எடுத்து பயன்படுத்துவதும் எளிதாக இருக்கும்.

சரியாக முதலீடு செய்ய
உதவும் 5 வாளி வழிமுறைகள்..!

வாளி 3: நடுத்தரக் கால இலக்குகள்...

இரண்டு ஆண்டுகளுக்கு மேற்பட்டு ஐந்து ஆண்டுகளுக்கு உட்பட்ட தேவைகளுக்கு இந்த வாளிக்குள் முதலீட்டைத் திட்டமிட வேண்டும். சிறிய கார் வாங்குதல், வீட்டுக் கடன் வாங்குவதற்கான முன்பணம் திரட்டுதல், வெளிநாட்டு சுற்றுலா போன்ற நிதித் தேவைகளுக்கான முதலீடுகளை இந்த வாளி மூலம் மேற்கொண்டுவர வேண்டும்.

வங்கி ஃபிக்ஸட் டெபாசிட்டுகள், கம்பெனி ஃபிக்ஸட் டெபாசிட்டுகள், மீடியம் டேர்ம் டெஃப்ட் ஃபண்டுகள், ஹைபிரிட் ஃபண்டுகள் ஆகிய வற்றில் இந்தத் தேவைகளுக்கு முதலீடு செய்துவரலாம். முதலீட்டுக் காலம் மூன்று ஆண்டுகளுக்கு மேற்படும் போது, முதலீட்டில் சற்று ரிஸ்க் எடுத்து கம்பெனி ஃபிக்ஸட் டெபாசிட்டுகள், ஹைபிரிட் ஃபண்டுகளில் (பங்குகள் மற்றும் கடன் பத்திரங்களில் முதலீடு செய்யும் மியூச்சுவல் ஃபண்ட் திட்டம்) முதலீடு செய்து வரலாம்.

சரியாக முதலீடு செய்ய
உதவும் 5 வாளி வழிமுறைகள்..!

வாளி 4: நீண்ட கால இலக்குகள்...

ஐந்து ஆண்டுகளுக்கு மேற் பட்ட முதலீடுகளை இந்த நான்காவது வாளிக்குள் கொண்டுவர வேண்டும். பிள்ளைகளின் உயர்கல்வி, சொந்த வீடு, ஓய்வுக்காலம் ஆகியவற்றுக்கான முதலீடு களை இந்த நான்காவது பக்கெட்டில் வைத்து பராமரிக்க வேண்டும்.

முதலீட்டுக் காலம் ஐந்து ஆண்டுகளுக்கு மேல் இருப்ப தால், ரிஸ்க் எடுக்கலாம். அந்த வகையில், பங்குச் சந்தை, பங்குச் சந்தை ஃபண்டுகளில் முதலீடு செய்து வரலாம். முதலீட்டுக் காலம் 5 முதல் 8 ஆண்டுகளுக்குள் இருக்கும் பட்சத்தில், லார்ஜ்கேப் பங்குகள், ஃபிளெக்ஸிகேப் ஃபண்ட், மல்ட்டிகேப் ஃபண்டு கள், லார்ஜ்கேப் ஃபண்டுகளில் முதலீடு செய்து வரலாம்.

முதலீட்டுக் காலம் 8 ஆண்டு களுக்கு மேல் 15 ஆண்டுகளுக்குள் இருக்கும்பட்சத்தில், மிட்கேப் பங்குகள், லார்ஜ் அண்ட் மிட் கேப் ஃபண்டுகள், மிட்கேப் ஃபண்டுகள், செக்டார் ஃபண்டு களில் முதலீடு செய்து வரலாம். இதுவே முதலீட்டுக் காலம் 15 ஆண்டுகளுக்கு மேற்படும் பட்சத்தில் ஸ்மால்கேப் பங்குகள் மற்றும் ஸ்மால்கேப் ஃபண்டுகள், செக்டார் ஃபண்டுகளில் முதலீடு செய்து வரலாம்.

வாளி 5: வரிச் சேமிப்பு இலக்குகள்...

வருமான வரியை மிச்சப் படுத்துவது மற்றும் அதற்கு செய்யும் முதலீடு மூலம் நல்ல வருமானம் பெறுவது முக்கிய மாகும். வரிச் சேமிப்புகாக ஆயுள் காப்பீட்டு பாலிசியில் எண்டோவ்மென்ட் பிளான் கள், சில்ட்ரன் பிளான்கள், ஹோல் லைஃப் பாலிசிகளில் பணம் போட்டு வருவதைத் தவிர்க்கவும். காரணம், இந்த பாலிசிகளில் ரிஸ்க் கவர் மிகக் குறைவாக இருப்பதுடன், முதலீட்டு வருமானமும் சொல்லிக் கொள்ளும்படி இருக்காது. அதற்கு பதில் டேர்ம் பிளான் எடுத்துவிட்டு, மீதியை இதர வரிச் சேமிப்புத் திட்டங்களில் மேற்கொண்டு வரலாம்.

முதலீட்டில் ரிஸ்க் எடுக்க விரும்பாதவர்கள் வங்கி ஐந்தாண்டு ஃபிக்ஸட் டெபாசிட், 15 ஆண்டு பப்ளிக் பிராவிடன்ட் ஃபண்ட் (PPF), ஐந்தாண்டு தேசிய சேமிப்புப் பத்திரம் ஆகியவற்றில் முதலீடு செய்து வரலாம்.

முதலீட்டில் ரிஸ்க் எடுப்பவர்கள் பங்குச் சந்தை சேமிப்புத் திட்டமான இ.எல். எஸ்.எஸ் (ELSS) மியூச்சுவல் ஃபண்ட், நேஷனல் பென்ஷன் சிஸ்டம் (NPS) ஆகியவற்றில் முதலீடு செய்துவரலாம்.

இப்படி வரிச் சேமிப்புக்காக செய்யும் முதலீடுகளை நிதி இலக்குகளுடன் இணைப்பது மிக முக்கியம். பி.பி.எஃப் மற்றும் என்.பி.எஸ் ஆகியவை ஓய்வுக் காலத்துக்கானவையாக இருக்கின்றன. வங்கி ஃபிக்ஸட் டெபாசிட், இ.எல்.எஸ்.எஸ் ஆகியவற்றை கார் வாங்குதல், பிள்ளைகளின் உயர்கல்வி ஆகிய ஏதாவது நிதி இலக்குடன் இணைப்பது முக்கியம்.

மேலும், இ.எல்.எஸ்.எஸ் ஃபண்டில் டிவிடெண்ட் ஆப்ஷனைத் தவிர்த்து குரோத் ஆப்ஷனைத் தேர்வு செய்வது நல்லது. அப்போதுதான் பின்னர் பெரும் தொகையாகக் கிடைக்கும். அதைக்கொண்டு ஏதாவது முக்கிய நிதி இலக்கை நிறைவேற்ற முடியும். டிவிடெண்ட் ஆப்ஷன் என்கிறபோது இடையிடையே கிடைக்கும் வருமானத்தால் பெரிய பயன் எதுவும் இருக்காது.

அஸெட் அலொகேஷன்...

மேலே கூறப்பட்ட ஐந்து வாளி முதலீடுகளை பின்பற்றும்போது முதலீட்டுக் காலத்தைக் கவனிக்கும் அதேநேரத்தில், முதலீட்டாளரின் ரிஸ்க் எடுக்கும் திறனையும் கவனிப்பது மிக முக்கியமாகும்.

முதலீட்டாளரின் வயது, அவரின் நிகர சொத்து மதிப்பு, வருமானம், நிதி இலக்குகள் ஆகியவற்றின் அடிப்படையின் அவரின் ரிஸ்க் எடுக்கும் திறன் இருக்கும். அதன் அடிப்படையில் அவர் எந்த நிதி இலக்கு மற்றும் எந்த வாளியாக இருந்தாலும் முதலீட்டுக் காலம் ஐந்து ஆண்டுகளுக்கு மேற்படும் போது அஸெட் அலொகேஷன்படி, கடன் சந்தை சார்ந்த முதலீடுகள் (ஆர்.டி, ஃபிக்ஸட் டெபாசிட், கடன் ஃபண்டு கள்), பங்குச் சந்தை சார்ந்த முதலீடுகள் (நிறுவனப் பங்குகள், பங்குச் சந்தை சார்ந்த மியூச்சுவல் ஃபண்ட்) மற்றும் தங்கத்தில் (கோல்டு பாண்டு, கோல்டு இ.டி.எஃப், கோல்டு சேவிங்ஸ் ஃபண்ட்) பிரித்து முதலீடு செய்வது லாபகரமாக இருக்கும்.

மேற்கண்ட ஐந்து வாளி முதலீட்டு முறையைப் பின்பற்றி உங்களின் நிதி இலக்குகளை சுலபமாக நிறைவேற்றுவதற்கான வழிமுறைகளை இன்றிலிருந்தே நீங்கள் தொடங்கலாமே!