Published:Updated:

எஸ்.ஐ.பி, எஸ்.டி.பி, எஸ்.டபிள்யூ.பி... எதை எப்போது பயன்படுத்தினால் லாபம்?

சேமிப்பும் முதலீடும்
பிரீமியம் ஸ்டோரி
சேமிப்பும் முதலீடும்

சேமிப்பும் முதலீடும் - 22

எஸ்.ஐ.பி, எஸ்.டி.பி, எஸ்.டபிள்யூ.பி... எதை எப்போது பயன்படுத்தினால் லாபம்?

சேமிப்பும் முதலீடும் - 22

Published:Updated:
சேமிப்பும் முதலீடும்
பிரீமியம் ஸ்டோரி
சேமிப்பும் முதலீடும்

மியூச்சுவல் ஃபண்ட் திட்டங்களில் அதிகம் பேர் முதலீடு செய்து வருகிறார்கள் எனில், அதற்கு அதிலுள்ள மூன்று முதலீட்டு வசதிகள்தான் முக்கியமான காரணம். அந்த மூன்று வசதிகள் எஸ்.ஐ.பி, எஸ்.டி.பி மற்றும் எஸ்.டபிள்யூ.பி ஆகியவை. அவற்றை எப்போது பயன்படுத்தினால் லாபம் கிடைக்கும் என்று பார்ப்போம்.

சிவகாசி மணிகண்டன் 
நிதி ஆலோசகர், 
Aismoney.com
சிவகாசி மணிகண்டன் நிதி ஆலோசகர், Aismoney.com

சீரான முதலீட்டுத் திட்டம்

தபால் அலுவலகம் மற்றும் வங்கி ரெக்கரிங் டெபாசிட் (ஆர்.டி) போல், ஒரு குறிப்பிட்ட தொகையைத் தொடர்ந்து முதலீடு செய்து வருவதுதான் மியூச்சுவல் ஃபண்டில் சீரான முதலீட்டுத் திட்டம் (SIP - Systematic Investment Plan) எனப்படுகிறது.

இந்த எஸ்.ஐ.பி முறையில் முதலீட்டாளர் ஒருவர் மியூச்சுவல் ஃபண்ட் திட்டங்களில் நிலையான தொகையைத் தொடர்ந்து முதலீடு செய்து வரலாம். குறிப்பிட்ட தொகையை வழக்கமான இடை வெளியில், அதாவது வாரம், மாதம் மற்றும் காலாண்டு போன்ற இடைவெளியில் முதலீடு செய்ய முடியும்.

பங்குச் சந்தை சார்ந்த மியூச்சுவல் ஃபண்ட் திட்டங்களில் எஸ்.ஐ.பி முறையில் செய்யப் படும் தொடர் முதலீடு என்பது நீண்ட கால மூலதனத்தை அதிகரிக்கவும், செல்வத்தை உருவாக்கவும் பயன்படுகிறது.

இப்படி எஸ்.ஐ.பி முறையில் முதலீடு செய்வதால், பங்கு சார்ந்த திட்டங்களில் நேரம், காலம் பார்க்கத் தேவையில்லை. சந்தையின் ஏற்றம் மற்றும் இறக்கத்தில் தொடர்ச்சியாக முதலீடு செய்வதன் மூலம் சராசரியாக அதிக யூனிட்டுகள் கிடைக்க அதிக வாய்ப்புள்ளது.

எஸ்.ஐ.பி, எஸ்.டி.பி, எஸ்.டபிள்யூ.பி... எதை எப்போது பயன்படுத்தினால் லாபம்?

எஸ்.ஐ.பி: முக்கிய நன்மைகள்

1. சீரான முதலீட்டு அணுகுமுறையான இதன் மூலம் முதலீட்டாளர்கள் இடையே தொடர்ந்து சேமிக்கும் பழக்கம் உருவாகுகிறது.

2. இந்த முறையில் மியூச்சுவல் ஃபண்ட் நிறுவனம் மற்றும் திட்டத்தைப் பொறுத்து, மாதம் ரூ.1,000கூட முதலீடு செய்ய முடியும். மியூச்சுவல் ஃபண்ட் நிறுவனங்கள், ஏழைகள், கிராமப்புறத்தினர் பயன்பெறும் நோக்கத்துடன் மாதம் ரூ.100, ரூ.500கூட முதலீடு செய்வதற்கு முதலீட்டாளர்கள் அனுமதிக்கின்றனர்.

மேலும், முதலீட்டாளரின் வசதிக்கேற்ப மாதத்தின் முதல் வாரம், இரண்டாம் வாரம், மூன்றாம் வாரம், நான்காம் வாரம் என எப்போது வேண்டுமானாலும் முதலீடு செய்ய முடியும்.

3. இப்படி எஸ்.ஐ.பி முறையில் முதலீடு செய்யும்போது, பங்குச் சந்தையின் செயல் பாட்டைக் கவனிக்கத் தேவையில்லை. விலை நன்கு இறங்கிய பின் வாங்கலாம் எனக் காத்திருந்து வாங்கவும் விற்கவும் முயற்சி செய்வதற்கு ‘டைமிங் தி மார்க்கெட்’ என்று பெயர்.

நல்ல திறமையான ஃபண்ட் மேஜேனர்கள், நிபுணர்களாலேயே பல நேரங் களில் சந்தையின் போக்கை மிகச் சரியாகக் கணிக்க முடியாமல் போய்விடுகிறது. இந்த நிலையில், எஸ்.ஐ.பி முதலீட்டு முறை மூலம் முதலீடு செய்து சாதாரணமானவர்கள்கூட பங்குச் சந்தை ரிஸ்க்கை வெகுவாகக் குறைக்க முடியும்.

4. சந்தையின் ஏற்ற இறக்கத்தில் கூடுதல் யூனிட்டுகள் கிடைக்கும்.

5. முதலீடு சிறிதாக இருந்தாலும் அவை தொடர்ந்து செய்யப்படுவதால், நீண்ட காலத்தில் மிகப் பெரிய நிதித் தொகுப்பை உருவாக்க முடியும்.

6. சம்பள உயர்வு, வருமான அதிகரிப்புக் கேற்ப எஸ்.ஐ.பி முதலீட்டை ஆண்டுக்கு ஒரு முறை குறிப்பிட்ட சதவிகிதம் அல்லது ரூபாயின் மதிப்பில் அதிகரித்துக்கொள்ள முடியும். அதாவது, எஸ்.ஐ.பி முறையில் முதலீட்டுத் தொகையை ஆண்டுதோறும் 5%, 10% அல்லது ரூ.500, ரூ.1,000 என அதிகரிக்க முடியும்.

7. ரிஸ்க் அதிகம் உள்ள பங்குச் சந்தை சார்ந்த திட்டம், ரிஸ்க் குறைவான கடன்கள், மிதமான ரிஸ்க் கொண்ட கலப்பின ஃபண்ட் என அனைத்துவகையான ஃபண்டு களிலும் எஸ்.ஐ.பி முறையில் முதலீடு செய்யலாம். எஸ்.ஐ.பி முறையில் எவ்வளவு சீக்கிரமாக முதலீட்டை ஆரம்பிக் கிறீர்களோ, அந்தளவுக்கு பவர் ஆஃப் காம்பவுண்டிங் என்கிற கூட்டு வளர்ச்சி கிடைக்கும். பலரும் நினைப்பது போல், எஸ்.ஐ.பி என்பது தனி முதலீட்டுத் திட்டமல்ல. இது ஒரு முதலீட்டு முறையாகும். மொத்தமாகப் பெரிய தொகையை முதலீடு செய்ய வசதி இல்லாதவர்களுக்கு உதவும் முதலீட்டு முறைதான் இது.

சீரான பணப் பரிமாற்ற திட்டம்

முதலீட்டாளர்களிடம் மொத்தத் தொகை இருக்கிறது. ஆனால், அது நீண்டகாலத் தேவைக்கு என்கிறபோது, பங்குச் சந்தை ஃபண்டுகளில் முதலீடு செய்வது மூலம் அதிக லாபம் ஈட்ட முடியும். பங்குச் சந்தை தொடர்ந்து ஏறுவதாக இருந்தால் தான் இது நடக்கும். பங்குச் சந்தை விரைவில் இறங்கும் சூழல் இருந்தால், மொத்த முதலீட்டை அதிக ரிஸ்க்கான பங்குச் சந்தை ஃபண்டுகளில் முதலீடு செய்யாமல், ரிஸ்க் குறைவான கடன் ஃபண்ட் வகையைச் சேர்ந்த லிக்விட் ஃபண்டில் முதலீடு செய்ய வேண்டும். இந்த லிக்விட் ஃபண்டிலிருந்து வாரம், 15 நாள் அல்லது மாதம்தோறும், பங்குச் சந்தை ஃபண்டுகளுக்கு குறிப்பிட்ட காலத்துக்கு குறிப் பிட்ட தொகையை மாற்றுவது, சீரான பரிமாற்றத் திட்டம் (Systematic Transfer Plan - STP) எனப்படும்.

இந்த முறையில் பங்குச் சந்தை ஃபண்டுகளிலிருந்து கடன் ஃபண்டுகளுக்கும் முதலீட்டை மாற்ற முடியும். ஒரே நிறுவனத் தின் இரு வேறு திட்டங்களுக்கு இடையேதான் இப்படி முதலீட்டை மாற்றிக்கொள்ள முடியும்.

இப்படி மாற்றும்போது, முதலீட்டுத் தொகையை மொத்த மாக அப்படியேகூட மாற்றிக் கொள்ளலாம் அல்லது முதலீட்டின் ஒரு பகுதியை மட்டும் மாற்றிக்கொள்ளலாம் அல்லது ஃபண்ட் மூலம் கிடைக்கும் லாபத்தை மட்டும் கூட மாற்றிக்கொள்ளும் வசதி இருக்கிறது.

எஸ்.டி.பி முறையில் ஒரு ஃபண்டிலிருந்து மற்றொரு ஃபண்டுக்கு இப்படி முதலீட்டை மாற்றும்போது யூனிட்டுகளை விற்று பணமாக்கப்படும். இப்படிக் கிடைக்கும் லாபத்துக்கு குறுகிய மூலதன ஆதாய வருமான வரி செலுத்த வேண்டி இருக்கும். ஈக்விட்டி ஃபண்டிலிருந்து கடன் ஃபண்டுக்கு தொகை மாற்றப்பட்டால் லாபத்துக்கு 15%, கடன் ஃபண்டில் இருந்து ஈக்விட்டி ஃபண்டுக்கு மாற்றப்பட்டால், ஒருவர் எந்த வருமான வரி வரம்பில் வருகிறாரோ, அதற்கேற்ப வரி கட்ட வேண்டிவரும். அதற்கேற்ப திட்டமிட்டுக்கொள்வது நல்லது.

இதுவும் கிட்டத்தட்ட எஸ்.ஐ.பி முறை போன்றது தான். ஒரே ஒரு வித்தியாசம், ஒரு ஃபண்ட் திட்டத்தில் பணம் செல்வதற்குப் பதிலாக, ஒரு ஃபண்ட் திட்டத்தில் இருந்த இன்னொரு ஃபண்ட் திட்டத்துக்கு மாற்று வதாகும்.

எஸ்.டி.பி முறையிலும் ஈக்விட்டி ஃபண்டுக்கு குறிப்பிட்ட கால இடைவெளியில் பணம் மாற்றப் படுவதால், சந்தையின் ஏற்ற இறக்கத்தில் சராசரியாக அதிக யூனிட்டுகள் கிடைக்க வாய்ப்பிருக்கிறது.

எஸ்.ஐ.பி, எஸ்.டி.பி, எஸ்.டபிள்யூ.பி... எதை எப்போது பயன்படுத்தினால் லாபம்?

சீரான பணம் எடுக்கும் திட்டம்

பணி ஓய்வுக்காலத்தில் இருப்பவர்கள், முதலீட்டின் மூலம் இடையிடையே செலவுக்குப் பணம் தேவைப் படுகிறவர்களுக்கு சீரான பணம் எடுக்கும் திட்டம் (Systematic Withdrawal Plan- SWP) என்கிற எஸ்.டபிள்யூ.பி மிகச் சரியாக இருக்கும்.

இது எஸ்.ஐ.பி திட்டத்தின் தலைகீழ் மாதிரி எனலாம். இந்த எஸ்.டபிள்யூ.பி முறையில் தொடர்ந்து சீரான இடைவெளியில் பணம் திரும்பப் பெறப் படுகிறது. இந்த எஸ்.டபிள்யூ.பி முறையில் வாரம், 15 நாள்கள், மாதம் அல்லது காலாண்டுக்கு ஒரு முறை ஃபண்டிலிருந்து குறிப்பிட்ட தொகையை நம் வங்கிக் கணக்கு மாற்றிக்கொள்ள முடியும். மாதம் எவ்வளவு தொகை தேவையோ, அதற்கேற்ப யூனிட்டுகள் விற்கப்பட்டு, வங்கிக் கணக்கில் பணம் வரவு வைக்கப்படும்.

ஒருமுறை, மியூச்சுவல் ஃபண்ட் நிறுவனத்திடம் எழுதித் தந்துவிட்டால், அதில் குறிப்பிட்டுள்ள ஆண்டுகளுக்கு அல்லது ஃபண்டில் பணம் இருக்கும் வரை, வங்கிக் கணக்கில் பணம் வரவு வைக்கப்படும். வேண்டாம் எனில், இடையில், நிறுத்திக்கொள்ளலாம்.

எஸ்.டபிள்யூ.பி வசதியை பங்குச் சந்தை சார்ந்த ஃபண்டுகளில் ஓராண்டுக்குப் பிறகும், கடன் ஃபண்டு களில் மூன்று ஆண்டுகளுக்குப் பிறகும் பயன்படுத்தினால் லாபத்துக்கு குறைவாக வரி கட்டினால் போதும். அதாவது, ஈக்விட்டி ஃபண்டில் ஓராண்டுக்குப் பிறகு பணம் எடுக்கும்போது, நிபந்தனைக்கு உட்பட்டு நிதி ஆண்டில் ரூ.1 லட்சம் நீண்ட கால மூலதன ஆதாயத்துக்கு வரி இல்லை. அதற்கு மேற்படும் லாபத்துக்கு 10% வரி கட்டினால் போதும்.

இதுவே கடன் ஃபண்டுகள் என்கிற போது மூன்று ஆண்டுகள் கழித்து பணம் எடுக்கும்போது, நீண்ட கால மூலதன ஆதாயதுக்கு பணவீக்க சரிக்கட்டலுக்குப் பிறகு 20% வரிக் கட்டினால் போதும்.

எஸ்.டபிள்யூ.பி முறையில் மாதம் தோறும் வங்கிக் கணக்கு பென்ஷன் போல் ஒரு தொகை வந்து சேருவதால், பணி ஓய்வு பெற்றவர்கள் மத்தியில் இதற்கு அண்மைக் காலத்தில் அமோக ஆதரவு கிடைத்து வருகிறது.

(முதலீடு செய்வோம்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism