Published:Updated:

மியூச்சுவல் ஃபண்ட்... கணிக்க முடியாத சந்தையிலும் கச்சிதமான வருமானம்! கைகொடுக்கும் வழிமுறைகள்

மியூச்சுவல் ஃபண்ட்
பிரீமியம் ஸ்டோரி
மியூச்சுவல் ஃபண்ட்

கவர் ஸ்டோரி

மியூச்சுவல் ஃபண்ட்... கணிக்க முடியாத சந்தையிலும் கச்சிதமான வருமானம்! கைகொடுக்கும் வழிமுறைகள்

கவர் ஸ்டோரி

Published:Updated:
மியூச்சுவல் ஃபண்ட்
பிரீமியம் ஸ்டோரி
மியூச்சுவல் ஃபண்ட்

ரஷ்யா-உக்ரைன் போர் தொடரும் நிலையில் தொடர்ந்து பங்குச் சந்தை யிலும் நிதிச் சந்தையிலும் பல்வேறு மாற்றங்கள் நிகழ்ந்துகொண்டிருக்கின்றன. பங்குச் சந்தையில் தொடர்ந்து ஏற்ற இறக்கமான சூழல் நீடிக்கிறது. சந்தையின் போக்கு முழுமையான கரடியின் ஆதிக்கத்துக்கு உள்ளாகவில்லை என்றாலும், சந்தையில் காணப்படும் சரிவு தொடர்ச்சியாக முதலீட்டாளர்களின் முதலீடுகளில் பாதிப்பை ஏற்படுத்திவருகிறது.

நேரடியாகப் பங்குகளில் ஈடுபடுபவர்கள் மட்டுமல்லாமல் மியூச்சுவல் ஃபண்ட் மூலமாக முதலீடு செய்பவர்களும் சந்தையின் தற்போதைய ஏற்ற இறக்கத்தால் பாதிக்கப்பட்டுள்ளனர். இத்தகைய சூழலில் மியூச்சுவல் ஃபண்ட் முதலீடுகளில் எந்த மாதிரியான உத்திகளைக் கையாள வேண்டும். சந்தையின் நிலையற்ற தன்மையிலும் நிலையான வருமானத்தை ஈட்டுவது எப்படி என்பது குறித்து மியூச்சுவல் ஃபண்ட் நிபுணர் சொக்கலிங்கம் பழனியப்பனிடம் கேட்டோம்.

பங்குச் சந்தையில் தற்போது ஏற்பட்டிருக்கிற சூழல் தற்காலிகமான நிலைதான். இப்போது பிரச்னை என்னவெனில் ரஷ்யா-உக்ரைன் போர் சூழலானது மூன்றாம் உலகப் போருக்கான தூண்டுதலை உருவாக்கிவிடுமோ என்கிற பயம் எல்லோரிடமும் பரவலாக இருக்கிறது. ரஷ்யா-உக்ரைன் போரில் சீனாவும் அமெரிக்காவும் தலையிட்டால் பிற நாடுகளும் போரில் ஈடுபடுவதற்கான சூழல் உண்டாகும். அப்படியான நிலையில் மூன்றாம் உலகப் போர் மூளும். அப்போது உலகப் பொருளா தாரங்கள் அனைத்துமே சரிவடையும். பங்குச் சந்தைகள் வீழ்ச்சி அடையும். இப்போது அனைவருக்கும் இந்த பயம்தான் இருக்கிறது. ஆனால், தற்போதைய உலகப் பொருளா தாரத்தின் பின்னணியை ஆராய்ந்து பார்க்கும் போது மூன்றாம் உலகப் போருக்கான வாய்ப்புகள் மிகவும் குறைவு.

ஏனெனில், இப்போது உலக அளவில் பெரும்பாலான நாடுகள் போரை விரும்புவதில்லை. ரஷ்யா- உக்ரைன் விவகாரத்தில் தனிப்பட்ட காரணங் களால் போர் நடந்துகொண்டிருக்கிறது. ஆனால் அமெரிக்காவோ, சீனாவோ, ஐரோப்பிய நாடுகளோ போர் செய்வதற்கு விரும்பவில்லை. அமெரிக்காவும், நேடோ நாடுகளும் இப்போரில் நேரடியாக ஆதரவு தராமல் இருப்பதே இதற்கு சான்று.

ஆனால், பங்குச் சந்தையைப் பொறுத்தவரை பரவலாக எல்லோரும் பயத்தில் இருக்கும் போது முதலீடு செய்ய வேண்டும். எல்லோரும் பேராசையில் ஆர்வமாக சந்தையில் குவியும்போது விற்க வேண்டும் என்பதை அடிப்படையாகச் சொல்லலாம். கடந்த இரண்டு வருடங்களாகப் பார்த்தோ மானால் சந்தை நன்றாக ஏற்றம் கண்டது. பேராசை அதிகமாக இருந்தது. நிறைய பேர் முதலீடு செய்தார்கள். சந்தைக்குள் பண வரவு அதிகமாக இருந்தது. எஸ்.ஐ.பி முதலீடுகள் அதிகரித்தன. இப்போது சந்தையில் பயம் அதிகமாக இருக்கும்போது எல்லோரும் முதலீட்டை வெளியே எடுப்பதற்கான முடிவை எடுக்கிறார்கள்.

ஆனால், இந்தியா போன்ற வலுவான பெரிய ஜனநாயக நாட்டின் உள்நாட்டு நுகர்வு சந்தை அவ்வளவு சீக்கிரம் அழிந்துவிடாது. ஆனால், குவைத், சிங்கப்பூர் போன்ற சிறு பொருளாதாரங்களில் சர்வதேச காரணிகள் அதிக பாதிப்புகளை உண்டாக்கிவிடும். அப்போது இந்த நாடுகளின் பங்குச் சந்தைகளிலும் ஏற்றம் இறக்கம் ரொம்பவே அதிகமாக இருக்கும்.

ஆனால், இந்தியா, அமெரிக்கா போன்ற பெரிய ஜனநாயக நாடுகளில் பங்குச் சந்தைகள் தற்காலிக பாதிப்புக்குள்ளானாலும் பெரிய பாதிப்பு இல்லாமல் மீண்டுவந்துவிடும். முதலீட்டாளர்களுக்கும் இவற்றின் பொருளாதாரத்தின் மீதும், அதன் சந்தைகள் மீதும் வலுவான நம்பிக்கை இருக்கும். தொழில் நடவடிக்கைகள், நிறுவனங்களின் வளர்ச்சி மீது பாசிட்டிவான சென்டிமென்ட் எப்போதும் இருக்கும். எனவே இந்தியப் பொருளாதாரம் குறித்தோ, பங்குச் சந்தைகள் குறித்தோ அச்சம் கொள்ள வேண்டாம்.

மியூச்சுவல் ஃபண்ட்...
கணிக்க முடியாத சந்தையிலும்
கச்சிதமான வருமானம்!  
கைகொடுக்கும் வழிமுறைகள்

எஸ்.ஐ.பி முதலீடுகள்

எப்போதும் சொல்வதுபோல எஸ்.ஐ.பி முறையில் முதலீடு செய்பவர்கள் எந்தச் சூழலிலும் நிறுத்தாமல் தொடர்ந்து முதலீடு செய்ய வேண்டும். ஏனெனில், இதுபோன்ற இறக்கங்களில்தான் என்.ஏ.வி குறைந்த மதிப்பில் கிடைக்கும்; அதன்மூலம் அதிக யூனிட் கிடைப்பதால் முதலீட்டின் மீதான லாப நஷ்ட இடைவெளியை சராசரி செய்ய முடியும். நீண்ட காலத்திலும் அதன் மதிப்பு உயர்ந்து முதலீட்டின் மீதான வருமானம் பெருகும். அதன் காரணமாகவே நாம் எஸ்.ஐ.பி முறையில் முதலீட்டைத் தொடர வலியுறுத்துகிறோம். புதிதாக சந்தைக்குள் முதலீடு செய்ய வருபவர்கள் எஸ்.ஐ.பி முறையில் முதலீடுகளை மேற்கொள்ளலாம். நீண்ட கால இலக்குடன் முதலீடுகளைத் திட்டமிடுபவர்கள் 7 - 10 வருட அளவிலான இலக்குகளுக்கு மல்ட்டிகேப் பிரிவில் முதலீடு களை மேற்கொள்ளலாம்.

செக்டார் ஃபண்டுகள்

பொருளாதாரத்தின் கண்ணாடி வங்கித் துறைதான். எனவே, எப்போதெல்லாம் பொருளாதாரம் சார்ந்த நிலையற் றத்தன்மை தலைதூக்குகிறதோ அப்போது வங்கித்துறை பாதிக்கும். தற்போதைய இறக்கத்திலும் வங்கித்துறை பாதிப்புக்குள்ளாகியிருக்கிறது. ஆனால், இந்திய வங்கித்துறை வலுவான செயல்பாட்டைக் கொண்டிருக்கிறது என்பதில் எந்த மாற்றுக் கருத்தும் இல்லை.

தற்போதைய இறக்கத்தை வாய்ப்பாகப் பயன்படுத்தி வங்கி செக்டார் ஃபண்டுகளில் மொத்த முதலீடுகளை மேற்கொள்ளலாம். அதேபோலத்தான் பார்மா துறையும். தற்போது இறங்கி யிருக்கும் நிலையில் குறைந்த மதிப்பீட்டில் கிடைப்பதால் இவற்றிலும் முதலீடுகளை மேற் கொள்வதற்கான முடிவுகளை எடுக்கலாம்.

சந்தையில் பெரிய அளவில் இறக்கங்கள் உண்டாகும்போது ஃபண்டுகளின் என்.ஏ.வி நன்றாகக் குறைந்திருக்கும்; அப்போது கையில் உபரி பணம் இருந்தால், அதாவது அடுத்த 5 வருடங்களுக்குத் தேவைப் படாது என்ற வகையில் இருக்கும் பணத்தை ஏற்கெனவே வைத்துள்ள ஃபோலியோக்களில் முதலீடு செய்து யூனிட்டுகளைக் கூடுதலாகச் சேர்த்துக்கொள்ள லாம். அது 5,000 முதல் 10 லட்சம் வரை எவ்வளவு தொகையாக இருந்தாலும் பெரிய இறக்கங் களின்போது முதலீடு செய்வது நல்ல வருமானம் ஈட்டுவதற்கான ஸ்ட்ராட்டஜியாக இருக்கும்.

போர்ட்ஃபோலியோ மாற்றம்

சந்தை தொடர் இறக்கங்களில் இருக்கும்போது நிறைய பேருக்கு அவர்களுடைய முதலீட்டின் மீதான லாபம் குறைந்திருக்கும். போர்ட்ஃபோலியோவில் மாற்றம் செய்ய நினைத்திருப்பவர்களுக்கு இது சரியான நேரமாக இருக்கும். இதில் கவனமாக இருக்க வேண்டிய ஒரு விஷயம் என்ன வெனில் வாங்குவதும் விற்பதும் ஒரே நாளில் இருக்க வேண்டும். ஏனெனில், ஏற்ற இறக்கம் அதிக மாக இருக்கும்போது, ஒரே நாளில் வாங்கி விற்காமல், இன்று விட்டு சில நாள்கள் கழித்து விற்றால் அதனால் பலன் கிடைக்காமல் போகலாம். அப்படி ஒரே நாளில் வாங்குவதையும் விற்பதையும் செய்ய முடியாதவர்கள் எஸ்.டி.பி முறையைப் பயன்படுத்தி முதலீடுகளை மேற்கொள்ளலாம்.

சொக்கலிங்கம் பழனியப்பன்
சொக்கலிங்கம் பழனியப்பன்

பேலன்ஸ்டு அட்வான்டேஜ் ஃபண்ட்

சந்தை ஏற்ற இறக்கமாக இருக்கிறது, அதிகமாக ரிஸ்க் எடுக்க விரும்பவில்லை என்பவர்களுக்கான சரியான திட்டம் இது. இந்தியாவில் வட்டி விகிதம் உயரப்போகிறது எனத் தொடர்ந்து சொல்லப்பட்டு வருகிறது. ஆனால், இதுவரை வட்டி விகித உயர்வு பெரிய அளவில் நடக்க வில்லை. ஆனால், ஒருபக்கம் பணவீக்கம் அதிகரித்துக் கொண்டே இருக்கிறது. டெபாசிட்டுகளுக்கும் பெரிதாக வட்டி வழங்கப்படவில்லை. பிற அரசு சேமிப்புத் திட்டங் களுக்கும் அதிகபட்சமாக 7.4 சதவிகித அளவுக்குத்தான் வட்டி கிடைக்கிறது. பி.எஃப் வட்டியும் 8.1 சதவிகிதமாகக் குறைக்கப்பட்டுவிட்டது.

இதுபோன்ற சூழல்களில் முதலீட்டாளர்களின் தேவைக்காக சந்தையில் பேலன்ஸ்டு அட்வான்டேஜ் ஃபண்ட் வழங்கப்படுகிறது. சமீப காலங் களில் ஃபிக்ஸட் டெபாசிட் பணத்தைத் தொடர்ந்து முதலீடு செய்வதற்குப் பதிலாக பலர் பேலன்ஸ்டு அட்வான்டேஜ் ஃபண்டில் முதலீட்டைக் குவித்து வருகிறார்கள்.

சந்தையின் ஏற்ற இறக்கமான சூழலை சமாளிக்கவே உருவாக்கப்பட்ட ஒரு ஃபண்டுதான் பேலன்ஸ்டு அட்வான்டேஜ் ஃபண்ட் ஆகும். ஒரே சமயத்தில் மொத்தமாக முதலீடுகளைச் செய்ய விரும்புபவர்கள் இதில் முதலீடு செய்யலாம். இந்த ஃபண்டில் சுமார் 30 - 50 சதவிகிதம் பங்கு சார்ந்த முதலீடுகளில் மேற்கொள்ளப்படுகிறது.

இந்த பேலன்ஸ்டு அட்வான்டேஜ் ஃபண்டில் முதலீடு செய்து விட்டு கணிசமான தொகையை சிஸ்டமேட்டிக் வித்ட்ராவல் பிளான் மூலமாக எடுத்துக்கொள்ளலாம். அதேசமயம் ஃபிக்ஸட் டெபாசிட்டைவிட இதில் செலுத்த வேண்டிய வரியும் குறைவாக வரும்.

ஈக்விட்டி மியூச்சுவல் ஃபண்ட் லாபத்துக்கு் ரூ.1 லட்சம் வரைக்கும் வரி இல்லை. அதற்கு மேல் உள்ள லாபத்துக்கு 10 சதவிகிதம் மட்டுமே வரி. ஃபிக்ஸட் டெபாசிட்டில் ஈட்டும் வருமானத்துக்கு ஒருவர் என்ன வரி வரம்புக்குள் இருக்கிறாரோ அதற்கேற்ப வரி செலுத்த வேண்டிவரும்.

உதாரணமாக, ஃபிக்ஸட் டெபாசிட்டில் ரூ.10 லட்சம் முதலீடு செய்து சுமார் ரூ.55,000 வருமானம் வருகிறது எனில் அதில் 30 சதவிகித வரி வரம்பில் இருப்பவர் சுமார் ரூ.17,000 வரியாகச் செலுத்த வேண்டிவரும். அதே ரூ.10 லட்சத்தை பேலன்ஸ்டு அட்வான்டேஜ் ஃபண்டில் முதலீடு செய்தால் ரூ.55,000 வருமானம் வருகிறது எனில், முதல்வருடம் சுமார் ரூ.50,000 வருமான வரிக் கணக்கில் அசலாகக் கணக்கிடப்படும். சுமார் ரூ.5,000 மட்டுமே லாபமாகக் கருதப்படும். இதில் ரூ.1 லட்சம் வரை லாபத்துக்கு வரி இல்லை என்பதால், வேறு எந்த முதலீடுகளும் இல்லாதபட்சத்தில் முற்றிலும் வரி இருக்காது.

பேலன்ஸ்டு அட்வான்டேஜ் ஃபண்டில் கன்சர்வேட்டிவ், அக்ரெஸிவ் என இரண்டு விதமான புராடக்டுகள் உள்ளன. எடில்வைஸ் பேலன்ஸ்டு அட்வான்டேஜ் ஃபண்ட் அக்ரெஸிவ் வகையிலானது. இதில் சந்தை ஏற்றம் காணும் போது பங்குகளின் சதவிகிதத்தை அதிகமாக்கிக்கொள் வார்கள், சந்தை இறங்க இறங்க பங்குகளின் சதவிகிதத் தைக் குறைத்துக்கொள்வார்கள்.

ஐ.சி.ஐ.சி.ஐ பேலன்ஸ்டு அட்வான்டேஜ் ஃபண்ட் போன்றவை கன்சர்வேட்டிவ் வகையிலானவை. இவை சந்தை ஏற்றம் காணும்போது பங்குகளின் சதவிகிதத்தைக் குறைப்பார்கள். சந்தை இறங்க இறங்க பங்குகளின் சதவிகி தத்தை அதிகப்படுத்துவார்கள். அக்ரெஸிவ் புராடக்ட்டில் ரிட்டர்ன் அதிகமாக இருக்கும்.

கோல்டு ஃபண்ட்

பணவீக்க உயர்வு மற்றும் வட்டி விகித உயர்வு போன்ற விவகாரங்கள் தலைதூக்கும் போது தங்கத்தின் பக்கம் கவனம் திரும்புவது வழக்கம். அப்படி யான சூழலில் ரிஸ்க் எடுக்க விரும்பாதவர்கள், கன்சர் வேட்டிவாக இருப்பவர்கள் நீண்டகால அடிப்படையில் கோல்டு ஃபண்டுகளைக் கவனிக்கலாம்.

இவற்றில் பெரும்பாலும் எக்சிட் லோடும் இல்லை. எப்போது வேண்டுமானாலும் நுழையலாம் எப்போது வேண்டு மானாலும் வெளியேறலாம். அரசு தங்கப் பத்திரங்களிலும் முதலீடு செய்யலாம்.

மியூச்சுவல் ஃபண்ட்...
கணிக்க முடியாத சந்தையிலும்
கச்சிதமான வருமானம்!  
கைகொடுக்கும் வழிமுறைகள்

கடன் ஃபண்டுகள்

சிறு முதலீட்டாளர்களுக்கு கடன் ஃபண்டுகள் அத்தனை லாபகரமானதாக கவர்ச்சிகர மானதாக இல்லை. ஏனெனில், இவை தரும் ரிட்டர்ன் 3 - 5 சதவிகிதம் என்ற அளவில்தான் இருக்கிறது. ஆனால் 3-5-8 ஆண்டுகள் அடிப்படையில் இலக்கு வைத்திருப்பவர்கள் முதலீடு செய்யலாம். ஏனெனில், அந்தக் கால அவகாசங்களில் பொருளாதாரமும் சந்தையின் செயல்பாடும் கணிசமாக முன்னேற்றம் கண்டிருக்கும் என்பதால் கணிசமான வருமானத்தையும் பார்க்க முடியும்.

குறிப்பாக, மூத்த குடிமக்கள் தங்களின் முதலீட் டின் மீதான வருமானத்தை வைத்துதான் அன்றாட செலவுகளைப் பார்த்துக் கொள்ள வேண்டும் என்ற நிலையில் இருப்பவர்கள் கன்சர் வேட்டிவாக இருப்பது நல்லது.

ஓய்வுபெற்ற மூத்த குடிமக்கள் தங்களுடைய நிதித் தேவைகளுக்கு என்று திட்டமிடும்போது உத்தர வாதமான வருமானம் தரக்கூடிய ரிசர்வ் வங்கி பாண்டுகள் மற்றும் மூத்த குடிமக்களுக்கான சேமிப்புத் திட்டங்கள் போன்ற வற்றைத் தேர்வு செய்யலாம். கடன் ஃபண்டுகள் பெரும்பாலும் எமர்ஜென்சி ஃபண்டாகத்தான் கருதப்படும். எனவே, அதற்கான தேவைக்காக வைத்திருப்பவர்கள் தொடரலாம்.

ஆனால், அஸெட் அலொ கேஷனுக்காக வைத்திருப்பவர்கள் ஈக்விட்டி ஃபண்டுகளுக்கு மாற்றிக் கொள்ளலாம் நீண்ட காலத்துக்கு திட்டமிடுபவர்கள் கடன் ஃபண்டிலிருந்து ஈக்விட்டி ஃபண்டுகளுக்கு தற்போதைய இறக்கத்தைப் பயன்படுத்தி மாற்றிக்கொள்ளலாம்.

மியூச்சுவல் ஃபண்ட்...
கணிக்க முடியாத சந்தையிலும்
கச்சிதமான வருமானம்!  
கைகொடுக்கும் வழிமுறைகள்

டெக்னாலஜி ஃபண்டுகள்

டெக்னாலஜி பங்குகள் முதல் ஃபண்டுகள் வரை அனைத்துமே தற்போது அதிக மதிப்பீட்டில் உள்ளன. எனவே, அவற்றின் கடந்த கால ரிட்டர்னை பார்த்து அதன் அடிப்படையில் அவற்றில் முதலீடு செய்யாமல், நியாயமான மதிப்பீட்டுக்கு வரும் வரை காத்திருந்து, பின்னர் முதலீடு செய்வது பயனுள்ளதாக இருக்கும். தற்போது பங்குச் சந்தை கரடியின் ஆதிக்கத்துக்குள்ளாகிவிடுமா என்ற கேள்வி பலரிடம் இருக்கிறது. கடந்த 2021 முழுக்க உலகம் முழுவதும் பங்குச் சந்தைகள் அபரிமிதமான ஏற்றத்தை நோக்கி நகர்ந்தன.

சந்தைகள் அதிக மதிப்பில் வர்த்தகமாகிக் கொண்டிருந்ததால் அந்த உச்சக்கட்ட மதிப்பீட்டை சரி செய்வதற்குத் தேவையான இறக்கத்துக்கு சரியான காரணத்தை எதிர்பார்த்து காத்திருந்தது. ஃபெடரல் வட்டி விகிதத்தை உயர்த்துவதுதான் அதற்கான காரணமாக இருக்குமென்று எதிர்பார்த்தார்கள். ஆனால், எதிர்பாராத விதமாக ரஷ்யா-உக்ரைன் போர் அந்தக் காரணமாக மாறியது.

முன்பே குறிப்பிட்டதுபோல் சந்தையின் இப்போதைய போக்கு தற்காலிகமானதே. ஏனெனில், இந்தியப் பொருளாதாரம் வலுவானதாக இருக்கிறது. இந்தியா எந்த நாட்டையும் எதிர்க்கவில்லை. இதனால் பாதுகாப்பான பொருளாதாரமாக இருக்கிறது.

தற்போது சர்வதேச அரசியல் சூழலில் ஏற்பட்டுள்ள பிரச்னையில் இந்தியாவுக்கு கச்சா எண்ணெய் சார்ந்து மட்டுமே நெருக்கடி உண்டாகும். மற்றபடி இந்தியப் பொருளாதாரத்துக்கு நெருக்கடிகள் பெரிதாக வர வாய்ப்பில்லை.

பங்குச் சந்தையும் நிச்சயமாக நன்றாகச் செயல்படும் என்ற நம்பிக்கை உலக அளவில் வலுவாகவே இருக்கிறது. எனவே முதலீட்டாளர்கள் நம்பிக்கையுடன் முதலீடுகளை மேற்கொள்ளலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism