தொடர்கள்
பங்குச் சந்தை
நடப்பு
Published:Updated:

ஓய்வுக்காலத் திட்டமிடல்... மியூச்சுவல் ஃபண்ட் முதலீடு மூலம் பென்ஷன் பெறுவது எப்படி?

ஓய்வுக்காலம்...
பிரீமியம் ஸ்டோரி
News
ஓய்வுக்காலம்...

ஒளிமயமான ஓய்வுக்காலம்! சூப்பர் பிளானிங் - 20

ஓய்வுக்காலத்தில் பென்ஷன் வழங்கும் திட்டங்கள் பற்றி இதுவரை நாம் விரிவாகப் பார்த்தோம். இந்தக் கட்டுரையில் மியூச்சுவல் ஃபண்ட் முதலீட்டில் உள்ள முக்கியமான வசதி Systematic Withdrawal Plan எனப்படும் எஸ்.டபிள்யூ.பி (SWP). அதாவது, குறிப்பிட்ட இடைவெளியில் பணத்தைத் திரும்ப எடுப்பது. ஓய்வுக்காலத்தில் அதிகம் பயன்படும் இந்தத் திட்டம் பற்றி சற்று விரிவாகப் பார்ப்போம்.

சம்பாதிக்கும் காலத்தில் மியூச்சுவல் ஃபண்ட் திட்டங்களில் சீரான முதலீட்டுத் திட்ட (Systematic Investment Plan - SIP) முறையைப் பயன்படுத்தித் தொகுப்பு நிதியை முதலில் சேர்க்க வேண்டும். எஸ்.ஐ.பி முறையில் முதலீடு செய்யும்போது முதலீட்டுக் காலம் மற்றும் முதலீட்டாளரின் ரிஸ்க் எடுக்கும் திறனுக்கேற்ப மியூச்சுவல் ஃபண்ட் திட்டங் களைத் தேர்வு செய்ய வேண்டும்.

என்.விஜயகுமார், நிர்வாக இயக்குநர்,
https://www.click4mf.com/
என்.விஜயகுமார், நிர்வாக இயக்குநர், https://www.click4mf.com/

ரிஸ்க் எடுக்கும் திறனுக்கேற்ப முதலீடு...

முதலீட்டுக் காலம் மூன்று ஆண்டுகளுக்குக் குறைவாக இருக்கிறது எனில், கடன் சந்தை சார்ந்த ஃபண்டுகளில் மொத்தமாக முதலீடு செய்யலாம். ஆனால், முதலீட்டில் கொஞ்சம்கூட ரிஸ்க் எடுக்க விரும்பவில்லை எனில், கடன் ஃபண்டுகளில் எஸ்.ஐ.பி முறையில் முதலீட்டை மேற்கொள்ளலாம். இந்த முதலீடுகளின் மூலம் சராசரியாக ஆண்டுக்கு 6.5% - 7.75% வருமானம் கிடைக்கும். முதலீடு செய்யும் தொகை அதிகமாக இருந்தால்தான், பணி ஓய்வுக்கால செலவுகளை சிக்கல் இல்லாமல் செய்ய முடியும்.

ஹைபிரிட் ஃபண்ட்...

அடுத்து, முதலீட்டில் ஓரளவுக்கு ரிஸ்க் எடுக்கக்கூடியவர் எனில், அவர் கடன் சந்தை மற்றும் பங்குச் சந்தையில் கலந்து முதலீடு செய்யும் ஹைபிரிட் ஃபண்டுகளில் முதலீடு செய்யலாம். இந்த ஃபண்டுகளில் எஸ்.ஐ.பி முறையில் முதலீடு செய்யலாம். மொத்த முதலீடு என்கிறபோது மொத்தத் தொகையை ரிஸ்க் இல்லாத லிக்விட் ஃபண்ட் ஒன்றில் போட்டு விட்டு, அதிலிருந்து குறிப்பிட்ட இடைவெளியில் முதலீடு செய்யத் திட்டமிட்டுள்ள ஹைபிரிட் ஃபண்டுக்கு முதலீட்டை முறையான பரிமாற்ற திட்ட (Systematic transfer plan - STP) முறை மூலம் மாற்றுவது ரிஸ்க்கைக் குறைக்கும்.முதலீட்டுக் காலம் மூன்று முதல் ஐந்து ஆண்டுகளுக்குள் இருக்கும் பட்சத்தில்தான் இந்த ஹைபிரிட் ஃபண்டுகளில் முதலீடு செய்ய வேண்டும்.

தவிர, அஸெட் அலொகேட்டர் ஃபண்ட் மற்றும் பேலன்ஸ்டு அட்வான்டேஜ் ஃபண்டு களிலும் இவர்கள் முதலீடு செய்யலாம்.

ஈக்விட்டி ஃபண்ட்...

முதலீட்டில் அதிக ரிஸ்க் எடுக்கக்கூடியவர்கள் பங்குச் சந்தை சார்ந்த ஃபண்டுகளில் முதலீட்டை எஸ்.ஐ.பி முறையில் மேற்கொண்டு வரலாம். இதிலும் பல வகையான ஃபண்டுகள் இருக்கின்றன. அதிக வருமானம் எதிர்பார்ப்பவர்கள் மல்ட்டி கேப் ஃபண்டுகள், ஃபிளெக்ஸிகேப் ஃபண்டுகள், லார்ஜ் அண்ட் மிட்கேப் ஃபண்டுகளில் முதலீடு செய்யலாம். மிதமான வருமானம் எதிர்பார்ப்ப வர்கள் லார்ஜ்கேப் ஃபண்டுகளில் முதலீடு செய்யலாம்.

முதலீட்டுக் காலம் 10 ஆண்டுகளைத் தாண்டி யிருக்கும்பட்சத்தில், ரிஸ்க் எடுக்கக்கூடிய முதலீட்டாளர்கள் லார்ஜ்கேப், மல்ட்டிகேப் ஃபண்ட், ஃபிளெக்ஸிகேப் ஃபண்டுகளில் முதலீட்டைப் பிரித்து எஸ்.ஐ.பி முறையில் மேற்கொண்டு வரலாம்.

ஓய்வுக்காலத் திட்டமிடல்... மியூச்சுவல் ஃபண்ட் முதலீடு மூலம் பென்ஷன் பெறுவது எப்படி?

மியூச்சுவல் ஃபண்ட் மூலம் பென்ஷன்...

முதலீடு செய்து சேர்த்திருக்கும் மியூச்சுவல் ஃபண்ட் தொகுப்பு நிதி மூலம் பென்ஷன் பெற முடியும். அதை விரிவாகப் பார்ப்போம்.

இதை ஓர் உதாரணம் மூலம் பார்த்தால் எளிதில் விளக்கும். 28 வயதான பிரசாந்த் என்பவர் தன் பணி ஓய்வுக்காலத்துக்காக ஈக்விட்டி ஃபண்டுகளில் மாதம் ரூ.10,000 முதலீடு செய்து வருகிறார். அவரின் 55 வயது வரை 27 ஆண்டுகள் தொடர்ந்து இடை விடாது முதலீடு செய்து வருகிறார். இந்த முதலீட்டின் மூலம் ஆண்டுக்கு சராசரியாக 12% வருமானம் கிடைப்பதாக வைத்துக்கொள்வோம்.

இவருக்கு அவரின் 56-வது வயதில் ரூ.2,16,23,130 தொகுப்பு நிதி சேர்ந்திருக்கும். இந்தத் தொகையை அவர் ரிஸ்க் இல்லாத கடன் ஃபண்டுகளில் முதலீடு செய்கிறார். அதன் மூலம் ஆண்டுக்கு 6% வருமானம் கிடைப்பதாக வைத்துக் கொள்வோம். இந்த நிலையில், ரூ.1,08,115-ஐ இவர் மாதம்தோறும் திரும்ப எடுத்து செலவு செய்யலாம்.

ஓய்வுக்காலத் திட்டமிடல்... மியூச்சுவல் ஃபண்ட் முதலீடு மூலம் பென்ஷன் பெறுவது எப்படி?

இளம் வயதில் முதலீடு ஆரம்பம்...

இதுவே இவர் 28 வயதுக்குப் பதிலாக ஓராண்டு தாமதமாக முதலீட்டை 29-வது வயதில் ஆரம்பித்தால், தொகுப்பு நிதி ரூ.1,91,92,379-ஆகவும், மாதம் தோறும் எடுக்கும் தொகை ரூ.95,962-ஆகவும் குறைந்துவிடும். முதலீட்டை இரண்டு ஆண்டுகள் தாமதமாக 30-வது வயதில் ஆரம்பித்தால், தொகுப்பு நிதி ரூ.1,70,22,066-ஆகவும், மாதம் தோறும் எடுக்கும் தொகை ரூ.85,110-ஆகவும் குறைந்துவிடும்.(பார்க்க, அட்டவணை)

எனவே, நாம் ஏற்கெனவே பல முறை சொன்னதுபோல், முதலீட்டை எந்த அளவுக்கு சீக்கிரமாக ஆரம்பிக்கிறோமோ, அந்த அளவுக்கு அதிக தொகுப்பு நிதி சேரும். முதலீட்டை 28 வயதில் ஆரம்பிப்பதற்கு பதில் 25 வயதில் மூன்று ஆண்டுக்குமுன் ஆரம்பித் திருந்தால் இன்னும் பல லட்சம் தொகுப்பு நிதி அதிகமாகச் சேர்ந் திருக்கும். எஸ்.டபிள்யூ.பி முறையில் மாதம்தோறும் எடுக்கும் தொகை யும் அதிகரித்திருக்கும்.

மேலும், சம்பளம் அதிகரிக்க அதிகரிக்க ஆண்டுதோறும் அல்லது 2 ஆண்டு, 3 ஆண்டுக்கு ஒருமுறை முதலீட்டுத் தொகையை அதிகரித்து வந்தாலும் தொகுப்பு நிதி மற்றும் எஸ்.டபிள்யூ.பி மூலம் மாதம் தோறும் பெறும் தொகை கணிசமாக அதிகரித்திருக்கும்.

ஓய்வுக்காலத் திட்டமிடல்... மியூச்சுவல் ஃபண்ட் முதலீடு மூலம் பென்ஷன் பெறுவது எப்படி?

வருமான வரியை மிச்சப்படுத்துவது எப்படி?

55 வயதில் சேர்ந்திருக்கும் தொகுப்பு நிதியைக் கடன் ஃபண்டுகளில் முதலீடு செய்து அதை மூன்றாண்டுகளுக்கு எடுக்காமல் வளரவிட்டால் மூன்று கூடுதல் நன்மைகள் இருக்கின்றன. முதல் நன்மை தொகுப்பு நிதி இன்னும் அதிகரித்திருக்கும். இரண்டாவது நன்மை, மாதம் தோறும் தொகையும் உயரும். மூன்றாவது முக்கியமான நன்மை, நீண்ட கால மூலதன ஆதாயத்துக்கு பணவீக்க விகித சரிக்கட்டலுக்குப் பிறகு, 20% வரி கட்டினால் போதும் என்கிற நிலையில் மிகக் குறைவான வருமான வரியைக் கட்டினால் போதும்.

தொகுப்பு நிதியைக் கடன் ஃபண்டுகளில் முதலீடு செய்துவிட்டு, அடுத்த மாதம் முதல் செலவுக்குப் பணம் எடுக்கும்பட்சத்தில் குறுகிய கால மூலதன ஆதாய வரியாக ஒருவர் எந்த வருமான வரி வரம்பில் (பழைய வருமான வரி வரம்பு 5%, 20%, 30%) வருகிறாரோ, அதற்கே வரி கட்ட வேண்டிவரும்.

இதுவே தொகுப்பு நிதியை ஈக்விட்டி ஃபண்டில் முதலீடு செய்யும்போது உடனடியாக அடுத்த மாதமே செலவுக்குப் பணம் எடுத்தால், ஆதாயத்துக்கு குறுகிய கால மூலதன ஆதாய வரியாக 15% கட்ட வேண்டும். ஓராண்டு கழித்து எடுத்தால், நீண்ட கால மூலதன ஆதாயத்துக்கு நிதி ஆண்டில் நிபந்தனைக்கு உட்பட்டு ரூ.1 லட்சம் வரைக்கும் வரி இல்லை. அதற்கு மேற்படும் ஆதாயத்துக்கு 10% வரி கட்டினால் போதும். அதே நேரத்தில், ஒருவர் அடிப்படை வரி வரம்புக்குள் வரவில்லை எனில், வரி எதுவும் கட்ட வேண்டியிருக்காது.

மியூச்சுவல் ஃபண்ட் மூலம் கிடைக்கும் நீண்ட கால மூலதன ஆதாயத்துக்கு இதர வகையான பென்ஷன் திட்டங்களைவிட குறைவான வரியைக் கட்ட வேண்டி வரும் என்பதால், எஸ்.டபிள்யூ.பி பென்ஷன் முறை லாபகரமானதாக உள்ளது.

தற்போது எஸ்.ஐ.பி மற்றும் எஸ்.டபிள்யூ.பி முறை இணைந்த சிறப்பு முதலீட்டுத் திட்டங்களை மியூச்சுவல் ஃபண்ட் நிறுவனங்கள் அறிமுகப்படுத்தத் தொடங்கி இருக்கின்றன. அந்த வகையில், முதலீட்டாளர்கள் மியூச்சுவல் ஃபண்ட் முதலீட்டின் மூலம் பென்ஷன் பெறுவது மிக எளிதாகி இருக்கிறது என்பதே உண்மை!

(திட்டமிடல் தொடரும்)