Published:Updated:

திட்டமிட்டவர்களின் பணத்தைக் கரைக்கும் திட்டமிடாதவர்களின் அலட்சியம்!

முதலீடு
பிரீமியம் ஸ்டோரி
News
முதலீடு

முதலீடு

சுரேஷ் தன்னுடைய அண்ணன் கணேஷ் மீது அதிக பாசம் கொண்டவர். இவர்கள் இருவருக்கும் தனியார் நிறுவனத்தில் வேலை. சுரேஷை ஆயுள் காப்பீடு எடுக்க ஏஜென்ட் ஒருவர் அணுக, தன் குடும்பத்துக்கு முழுமையான பாதுகாப்பு தரும் காப்பீட்டுத் திட்டமான டேர்ம் பிளானில் ரூ.30 லட்சத்துக்கு பாலிசி எடுத்தார். மறக்காமல் தன் அண்ணன் கணேஷின் போன் நம்பரைக் கொடுத்து, அவருக்கும் டேர்ம் பாலிசி எடுக்கப் பரிந்துரை செய்யுங்கள் என்று அந்த ஏஜென்டிடம் சொல்லி அனுப்பினார். ஆனால் கணேஷோ, ‘‘எதற்கு இன்ஷூரன்ஸ் பாலிசிக்கு வெட்டியா பணம் கட்டிக்கிட்டு... எனக்குத்தான் உடம்பு நல்லா இருக்கே...’’ என்று சொல்லி, காப்பீட்டு முகவரைத் திருப்பி அனுப்பிவிட்டார். காப்பீட்டு முகவர் எவ்வளவோ எடுத்துச் சொல்லியும் இன்ஷூரன்ஸ் பாலிசியை எடுக்க மறுத்துவிட்டார் கணேஷ்.

எஸ்.கார்த்திகேயன் 
நிதி ஆலோசகர், 
Winworthgroups.com
எஸ்.கார்த்திகேயன் நிதி ஆலோசகர், Winworthgroups.com

இந்த நிலையில், சில ஆண்டுகளுக்கு முன்பு விபத்து ஒன்றில் கணேஷ் இறந்துவிட, அவரின் குடும்பம் நிர்க்கதியாக நின்றது. கணேஷின் மனைவி குறைந்த சம்பளத்துக்கு வேலைக்குப் போக வேண்டிய கட்டாயம் ஏற்பட்டது. அந்தத் தொகையும் குடும்பச் செலவுக்கே சரியாக இருக்க, கணேஷின் இரு பிள்ளைகளின் படிப்புச் செலவு உட்பட பல்வேறு செலவு களைச் செய்தாக வேண்டிய கட்டாயம் சுரேஷுக்கு. அந்தப் பிள்ளைகள் வளர்ந்து, பெரியவர்களாகி நல்ல வேலைக்குச் சென்று, சம்பாதிக்கும் வரை அவர்களுக்குத் தேவையான அத்தனை விஷயங்களையும் சுரேஷ் செய்து தான் ஆக வேண்டும். காரணம், சேமிப்பு / முதலீடு என கணேஷ் எதையும் சேர்த்து வைக்கவில்லை.

இந்த கணேஷைப் போலத்தான் இன்றைக்குப் பலரும் இருக்கிறார்கள். சேமிப்பு/ முதலீடு செய்வது பற்றியோ, தனக்குப் பிறகு தன் குடும்ப உறுப்பினர்களுக்கு பாதுகாப்பு டேர்ம் இன்ஷூரன்ஸ் பாலிசி எடுப்பது பற்றியோ அவர்கள் நினைத்துக்கூட பார்ப்பது இல்லை. மாதம்தோறும் சம்பாதிக்கும் வருமானத்தில் பெரும்பகுதியை செலவு செய்துவிடுவதால், பிற்காலத்தில் போதிய அளவு பணம் இல்லாமல் கஷ்டப்படுகிறார்கள். அல்லது, எதிர்பாராத விதமாக இறக்கும் பட்சத்தில், குடும்ப உறுப்பினர்கள் கஷ்டப்படும் நிலைக்குச் சென்றுவிடுகிறார்கள். அந்த நிலையில், அந்தக் குடும்ப உறுப்பினர்களைக் காக்க வேண்டிய கடமையை வேறு யாராவது எடுக்க வேண்டிய கட்டாயம் ஏற்பட்டுவிடுகிறது.

அதாவது, நிதித் திட்டமிட்டு வாழ்ந்துவரும் ஒருவர் கஷ்டப்பட்டு சேர்த்த பணம், நிதித் திட்ட மிடல் பற்றி கிஞ்சுத்தும் கவலைப்படாத ஒருவரின் செலவுக்குச் சென்றுவிடுகிறது. நிதித் திட்டம் இல்லாத தன் அண்ணன் கணேஷின் தவற்றால், சரியாக நிதித் திட்டமிட்ட சுரேஷ் நிறைய கஷ்டப்பட வேண்டியிருக்கிறது.

ஆக, இந்தக் கதை மூலம் இரண்டு முக்கிய மான மாற்றங்கள் நடக்க வேண்டும். முதலாவ தாக, நிதித் திட்டமிடலுடன் வாழ்பவர்கள் தாங்கள் மட்டும் அப்படி இருந்தால் போதாது; தம்மைச் சுற்றி இருப்பவர்களும் அப்படி நிதித் திட்டமிடலுடன் வாழ வேண்டும் என்று வற்புறுத்த வேண்டும். இரண்டாவது, நிதித் திட்டமிடல் இல்லாமல் வாழ்பவர்கள், நிதித் திட்டமிடலுடன் வாழ்பவர்களைப் பார்த்து, அவர்களைப்போல பழக வேண்டும்.

திட்டமிட்டவர்களின் பணத்தைக் கரைக்கும் திட்டமிடாதவர்களின் அலட்சியம்!

முதலில், முதல் மாற்றத்தை எடுத்துக் கொள்வோம். பலரும் தங்கள் அளவுக்கு ஒரு நிதித் திட்டமிடலைச் செய்துகொண்டு, அதன்படி வாழ்ந்தாலே போதும் என்று நினைக்கிறார்கள். இப்படி இருப்பதில் தவறில்லை என்றாலும், சுரேஷ் - கணேஷ் சகோதரர்கள் போல ஏதாவது அசம்பாவிதம் நடக்கும் பட்சத்தில், அந்தக் குடும்ப உறுப்பினர்களுக்காகவும் நீங்கள் கஷ்டப்பட வேண்டும் என்பதை மறக்காதீர்கள். சொந்தக் காரர்களாக இருந்தாலும், அவர்கள் பணம் சேர்த்து வைக்காததற்கு அவர்களே காரணம். அதற்கான தண்டனையை அவர்களே அனுபவிக்கட்டும் என்று விட்டு விட முடியாது. அவர்களிடம் எவ்வளவு பக்குவமாக எடுத்துச் சொல்லி, சேமிப்பு / முதலீடு, ஆயுள் மற்றும் மருத்துவக் காப்பீடுகளை எடுக்க வேண்டியதன் அவசியம் பற்றி புரிய வைக்க முயற்சி செய்ய வேண்டுமே தவிர, தனக்கு அதில் பங்கு இல்லை என்று ஒதுங்கி நிற்க முடியாது.

முதலீடு என்றாலே அது பெரும் பணக்காரர்களுக்கானது என்றோ, பெரிய அளவில் பணம் இருந்தால்தான் முதலீட்டை ஆரம்பிக்க முடியும் என்றோ நினைக்கிறார்கள். மியூச்சுவல் ஃபண்ட் முதலீட்டில் எஸ்.ஐ.பி முறையில் மாதம்தோறும் ரூ.100, ரூ.500, ரூ.1,000 என முதலீடு செய்து வரலாம். இந்த முதலீட்டை அபராதம் எதுவும் இல்லாமல் எப்போது வேண்டுமானாலும் திரும்ப எடுத்துக்கொள்ளலாம்.

முதலீடு செய்வதற்கு இத்தனை வாய்ப்புகள் இருந்தாலும் முதலீட்டை ஆரம்பிக்கும்போதே, வேலை போய்விட்டால் என்ன செய்வது, அடுத்த மாதம் கூடுதல் செலவு வந்துவிட்டால் என்ன செய்வது என நெகடிவ்வாகச் சிந்திப்பதைப் பலர் வழக்கமாகக் கொண்டிருக்கிறார்கள். முதலீட்டை ஆரம்பித்து விட்டால், பிற்பாடு அதை நிறுத்த முடியுமா, அந்த நிலையில் முதலீடு செய்த பணம் திரும்பக் கிடைக்குமா என்றெல்லாம் யோசிக்கத் தொடங்கிவிடுகிறார்கள். இந்த எதிர்மறை எண்ணங்கள் ஒருவரை முதலீடு செய்யவிடாமல் தடுத்து விடுகிறது.

மேலும், நெருக்கடியான சூழ்நிலையைச் சமாளிக்க ஆயுள் காப்பீடு மற்றும் மருத்துவக் காப்பீட்டு பாலிசிகள் எடுப்பது அவசியம் என்பதையும் நிதித் திட்டமிடல் செய்யாதவர்களிடம் எடுத்துச் சொல்லி புரியவைக்க வேண்டும். கொரோனா காலத்தில் பலரும் திடீர் திடீரென மருத்துவமனையில் சேர்ந்து, பல லட்சங்களைச் செலவு செய்து கஷ்டப்பட்டதை எடுத்துச் சொல்லி, மருத்துவக் காப்பீட்டு பாலிசிகளின் முக்கியத்துவத்தைப் புள்ளியைப் புரியவைக்கலாம். இதே போல, ஒருவர் திடீரென உயிரிழக்கும் நிலையில், அவரின் குடும்ப உறுப்பினர்களின் நிதித் தேவையை நிறைவேற்ற ஆயுள் காப்பீடு எப்படி பயன்படும் என்பதையும் எடுத்துச் சொல்லி புரிய வைக்கலாம்.

நிதித் திட்டமிடல் செய்யத் தயங்குபவர்கள் சொல்லும் முக்கியமான காரணம், ‘வரவுக்கும் செலவுக்கும் சரியா இருக்கு... இதுல எங்கே இருந்து முதலீடு செய்வது’ என்பதே...

இவர்களிடம் முதலீட்டுக்கான பணத்தை முதலில் எடுத்துவைத்து விட்டு, மீதமுள்ள தொகையை செலவு செய்யக் கற்றுத் தரலாம். முதலில் இந்த நடைமுறையை அவர்கள் பின்பற்றத் தயங்கி னாலும், இதன் மூலம் கிடைக்கும் பயனை அவர்கள் உணரத் தொடங்கிவிட்டால், நீங்கள் சொல்லாமலே இதைப் பின் பற்றத் தொடங்கிவிடுவார்கள்.

இதே போல, நிதித் திட்டமிடல் செய்யாதவர்கள், நிதித் திட்ட மிடல் செய்து வாழ்பவர்களைப் பார்த்து, அவர்களைப் போல வாழக் கற்றுக்கொள்வது அவசியம். காரணம், நிதித் திட்ட மிடல்படி வாழ்கிறவர்கள், கடன் வாங்க மாட்டார்கள்; திடீர் பணப் பற்றாக்குறை வந்தாலும் அதை எளிதாகச் சமாளிப்பார்கள். எப்போதும் பணம் பற்றிய கவலை இல்லாமல் மகிழ்ச்சியாக இருப்பார்கள்.

ஆக, நீங்கள் இனி முடிவு செய்ய வேண்டியது ஒன்றே ஒன்றுதான்... நீங்கள் நிதித் திட்டமிடல் செய்து, அதன்படி வாழப்போகிறீர்களா அல்லது எந்த நிதித் திட்டமிடலும் இல்லாமல் இஷ்டப்படி வாழ்ந்து கஷ்டப்படப்போகிறீர்களா?