Published:Updated:

ஓய்வுக்காலத் திட்டம்... இந்த 7 விஷயங்கள் அவசியம்!

ஓய்வுக்காலத் திட்டம்
பிரீமியம் ஸ்டோரி
ஓய்வுக்காலத் திட்டம்

ஓய்வுக்காலத் திட்டமிடல்

ஓய்வுக்காலத் திட்டம்... இந்த 7 விஷயங்கள் அவசியம்!

ஓய்வுக்காலத் திட்டமிடல்

Published:Updated:
ஓய்வுக்காலத் திட்டம்
பிரீமியம் ஸ்டோரி
ஓய்வுக்காலத் திட்டம்

பணி ஓய்வுக்காலத்தை ஒருவரின் இரண்டாவது வாழ்க்கை எனக் குறிப்பிடலாம். காரணம், இந்தக் கால கட்டத்தில்தான் பலராலும் அவர்களுக்குப் பிடித்த விஷயத்தைச் செய்ய முடிகிறது.

ஆனால், இன்றைய தேதியில் ஓய்வுக் காலத்தில் பலரும் கஷ்டப்படுகிறார்கள், காரணம், அவர்கள் சம்பாதிக்கிற காலத்தில், வருமானம் இல்லாமல் சும்மா இருக்கப் போகிற ஓய்வுக்காலத்துக்காக எந்த வகையிலும் திட்டமிட்டுப் பணம் சேர்க்காததுதான்.

ஓய்வுக்காலத் திட்டம்... இந்த 7 விஷயங்கள் அவசியம்!

நம்மவர்களில் சுமார் 15% - 20% பேர் மட்டுமே தங்கள் ஓய்வுக்கால வாழ்க்கைக்கு போதுமான அளவு சேமிப்பதாக ஆய்வு அறிக்கைகள் தெரிவிக்கின்றன. அரசுப் பணி செய்திருந்தால், ஓய்வூதியம் கிடைக்கும். இந்த ஓய்வூதியத்தைக் கொண்டு இப்போதைக்குப் பெரிய கஷ்டம் இல்லாமல் சிலரால் வாழ்க்கையை ஓட்டிவிட முடியும்.

ஆனால், தனியார் நிறுவனங்களில் பணிபுரிபவர்களுக்கு அப்படி இல்லை. சம்பாதிக்கிற காலத்தில் ஒன்று அல்லது இரண்டு வீடுகளை வாங்கி வைத்திருந்தால், அதிலிருந்து கிடைக்கும் வாடகை வருமானத்தை வைத்து சிலர் காலம் தள்ளிவிடுகிறார்கள். இருப்பதற்கு ஒரு வீடுகூட இல்லை எனில், அவர்கள் பாடு படுதிண்டாட்டம்தான்.

போனது போகட்டும். தற்போது 50 வயதை நெருங்குபவர்கள் ஒருவர் பணி ஓய்வுபெறு வதற்குமுன் முக்கியமான ஏழு விஷயங்களைச் செய்தாக வேண்டும். இவற்றை மேற்கொள்வது மூலம் ஓய்வுக்கால வாழ்க்கை மிகவும் வசதியாக அமையும்.

1. கடன்களை காலி செய்யுங்கள்

வீட்டுக் கடன் தொடங்கி கார் கடன், தனிநபர் கடன் என எந்தக் கடனாக இருந்தாலும், பணி ஓய்வுக்கு முன் அவற்றை அடைத்துவிடுங்கள். வேலை பார்க்கும் காலத்தில் எந்தக் கடன் வாங்குவதாக இருந்தாலும், அதை ஓய்வுக்காலத்துக்கு ஓரிரு ஆண்டுகளுக்கு முன் அடைக்கும்படியாகக் கடனைத் திரும்பக் கட்டும் காலத்தைத் தேர்வு செய்யுங்கள்.

ஒருவர் 100% நிதிச் சுதந்திரமாக இருக்கும் போதுதான் ஓய்வுக்காலத்தை ரசித்து அனுபவிக்க முடியும். அதற்குக் கடன் இல்லாமல் இருக்க வேண்டும். ஓய்வுக் காலத்திலும் கடனைத் திருப்பி கட்டிக் கொண்டிருந்தால் இந்தச் சந்தோஷம் சாத்தியமில்லை.

ஓய்வுக்காலத் திட்டம்... இந்த 7 விஷயங்கள் அவசியம்!

2. அவசரகால நிதி அவசியம்

ஒருவருக்கு எப்போது வேண்டுமானாலும் அவசரச் செலவு வரலாம். அதுவும் வயதான காலத்தில் அதிகமாக இருக்கும். பணவீக்கம் அதாவது விலைவாசி உயர்வு மற்றும் வாழ்க்கை முறை செலவுகளுக்கேற்ப அவசரக் கால நிதியை அதிகமாக வைத்திருப்பது அவசியம்.

வருமானம் இல்லாத வயதான காலத்தில் அவசரகால நிதி இருப்பது ஒருவருக்குக் கூடுதல் பாதுகாப்பை மனரீதியாக மற்றும் உடல் ரீதியாக அளிக்கும். உங்களிடம் அவசரக் கால நிதி எதுவும் இல்லாதபட்சத்தில் இதர முதலீடுகளை அதற்குப் பயன்படுத்த வேண்டி யிருக்கும். அப்போது பண ரீதியாக இழப்பு ஏற்பட வாய்ப்பிருக்கிறது.

உதாரணமாக, ஒருவர் மூன்று ஆண்டு களுக்கு வங்கி ஒன்றில் ஃபிக்ஸட் டெபாசிட் போட்டிருக்கிறார். ஆனால், அவசரச் செலவுக்காக அந்த டெபாசிட்டில் உள்ள பணத்தை ஒன்றரை ஆண்டுகளில் திரும்ப எடுக்கும்போது 1% அபராதம் கட்ட வேண்டியிருக்கும். எனவே, அவசர கால நிதியை வங்கி சேமிப்புக் கணக்கு, மியூச்சுவல் ஃபண்டில் லிக்விட் ஃபண்ட் போன்ற ரிஸ்க் இல்லாத, விரைந்து பணமாக்கக்கூடியவற்றில் போட்டு வைத்திருப்பது நல்லது.

அவசரகால நிதியானது, ஏதாவது ஓர் அவசரத் தேவைக்குச் செலவாகிவிட்டது எனில், மீண்டும் அந்தத் தொகையை விரைந்து சேர்த்துவிடுவது நல்லது. பொதுவாக, குடும்பத்தின் மாதச் செலவைப்போல் சுமார் ஆறு மடங்கு தொகை அவசரகால நிதியை வைத்திருக்க வேண்டும். மூத்த குடிமக்கள் என்பதால் இதை ஒன்பது மடங்காக வைத்துக் கொள்வது நல்லது.

3. ஓய்வுக்கால பட்ஜெட்டை உருவாக்கவும்

உங்கள் ஓய்வுக்கால வாழ்க்கையை நீங்கள் முன்கூட்டியே கற்பனை செய்து பார்க்க வேண்டும். அதற்கேற்ப உங்கள் ஓய்வுக்காலத்துக்கான பட்ஜெட்டை உருவாக்கி, அதற்கு என்ன தொகுப்பு நிதித் தேவை எனக் கணக்கிட வேண்டும்.

அதாவது, நீங்கள் அலுவலகத் துக்குச் செல்ல மாட்டீர்கள். எனவே, போக்கு வரத்து மற்றும் ஆடைகளுக்கான செலவுகள் குறையும். மேலும், நீங்கள் அதிக ஓய்வு நேரம் செலவிடுவீர்கள். சுற்றுலா மற்றும் பயணங்களுக்கும், உடல்நலப் பாதுகாப்புக்கும் அதிக செலவு செய்ய வேண்டி யிருக்கும்.

4. பணவரத்தை உறுதி செய்யுங்கள்

ஓய்வுக்காலத்தில் உங்கள் பண வரவு மற்றும் செலவுகளை உன்னிப்பாகத் திட்டமிடுங்கள்.ஓய்வுக்குப் பிறகு வருமானம் வருமா, வீட்டு வாடகை வருமா, கொடுக்க வேண்டி வருமா, முதலீட்டின் மூலம் ஏதாவது வருமானம் வருமா அல்லது பென்ஷன் வருமா எனப் பலவற்றைப் பட்டியலிடுங்கள். மேலும், இப்போதுள்ள செயல் களில் எவற்றையெல்லாம் ஓய்வு பெற்ற பிறகு குறைக்க முடியும் எனப் பாருங்கள். இந்த வரவு செலவுக் கணக்கு பணப் பற்றாக் குறையைத் தவிர்க்க உதவும்.

5. ஓய்வூதியத் தொகுப்பு நிதியை அதிகரிக்கவும்

ஓய்வுபெறும்போது எவ்வளவு தொகுப்பு நிதி இருக்க வேண்டும் என்பதைக் கண்டறியவும். இந்த விஷயத்தில் உங்களுக்குத் தொழில் முறை நிதி ஆலோசகர் உதவி செய்யக்கூடும். பணவீக்க விகிதம் அதாவது, விலைவாசி உயர்வுக் கேற்ப தொகுப்பு நிதியை அதிகரிப்பது அவசியமாகும்.

6. தொகுப்பு நிதியைச் செலவிடும் உத்தி

ஓய்வுக்காலத் தொகுப்பு நிதி யிலிருந்து எவ்வளவு எடுத்து செலவு செய்யத் திட்டமிட்டு உள்ளீர்கள் என்று பாருங்கள். அப்படி எடுக்கும் தொகையானது மாதம் / காலாண்டு / அரை ஆண்டு அல்லது ஆண்டுக்கு ஒரு முறை உங்களுக்குப் பணம் தேவையா என்று பாருங்கள். எதுவாக இருந்தாலும் மியூச்சுவல் ஃபண்டுகளில் உள்ள முறையான திரும்பப் பெறும் திட்டத்தை (Sytematic Withdrawal Plan - SWP) பயன்படுத்திக் கொள்ளலாம். அதற்குமுன், தொகுப்பு நிதியை ரிஸ்க் குறைவான கடன் ஃபண்டு களுக்கு மாற்றி வைத்துக் கொள்வது நல்லது.

ரிஸ்க்கே வேண்டாம் என்பவர் கள், தபால் அலுவலக மாத வருமானத் திட்டத்தை (Montthly Income Plan -MIP) அல்லது வங்கி களின் மாத வருவாய் திட்டங் களைத் தேர்ந்தெடுக்கலாம். இவை அனைத்தும் நீங்கள் சேர்க்க வேண்டிய தொகுப்பு தொகையில் பெரும் தாக்கத்தை ஏற்படுத்தும். எனவே, நீங்கள் அதற்கு ஏற்ப முன்கூட்டியே தொகுப்பு நிதியை முடிவு செய்ய வேண்டும்.

7.வருமான வரியை மிச்சப்படுத்துங்கள்

தொகுப்பு நிதியைக் கடன் ஃபண்டுகளில் முதலீடு செய்து விட்டு, மூன்றாண்டு கழித்து எஸ்.டபிள்யூ.பி முறையில் பணத்தை எடுக்கும்பட்சத்தில், மூலதன ஆதாயத்துக்கு, பணவீக்க விகித சரிக்கட்டலுக்குப் பிறகு 20% வரி கட்டினால் போதும்.

இதுவே, தபால் அலுவலக ஃபிக்ஸட் டெபாசிட், வங்கி டெபாசிட் போன்றவற்றில் வட்டி வருமானத்துக்கு நீங்கள் எந்த வருமான வரி வரம்பில் வருகிறீர்கள் என்பதைப் பொறுத்து வரி கட்ட வேண்டி வரும். கூட்டிக் கழித்துப் பார்த்தால் கடன் ஃபண்டுகளிலிருந்து எஸ்.டபிள்யூ.பி முறையில் பணம் பெறுவது வரிக்கு பிந்தைய நிலையில் லாபகரமாக இருக்கும்.

இதுவே ஈக்விட்டி ஃபண்டுகளிலிருந்து எஸ்.டபிள்யூ.பி முறையில் பணம் எடுப்பதாக இருந்தால், முதலீடு செய்து ஓராண்டு கழித்து எடுத்தால், மூலதன ஆதாயத்துக்கு நிபந்தனைக்கு உட்பட்டு நிதி ஆண்டில் ரூ.1 லட்சம் வரைக்கும் வரி கிடையாது. அதற்கு மேல் உள்ள மூலதன ஆதாயத்துக்கு 10% வரி கட்டினால் போதும். இதுவே, ஓராண்டுக்கு முன் எடுத்தால் குறுகிய கால மூலதன ஆதாய வரியாக 15% கட்ட வேண்டும்.

தற்போதைய நிலையில், மியூச்சுவல் ஃபண்ட் டிவிடெண்ட் வருமானத்துக்கு ஒருவர் எந்த வருமான வரி வரம்பில் வருகிறாரோ, அதற்கு ஏற்ப வரி கட்ட வேண்டும் என்பதால், டிவிடெண்ட் ஆப்ஷனைத் தவிர்ப்பது லாபகரமாக இருக்கும். அதற்குப் பதில், எஸ்.டபிள்யூ.பி முறையில் பணம் பெறுவது லாபகரமாக இருக்கும்.

வருமான வரியை மிச்சப்படுத்தும் விதமாகத் தொகுப்பு நிதியிலிருந்து பணம் எடுப்பதைத் திட்டமிடுங்கள்.

மருத்துவக் காப்பீடு மிக முக்கியம்..!

ஆயுள் காப்பீடு பிரீமியம், வங்கி ஆர்.டி, மியூச்சுவல் ஃபண்ட் எஸ்.ஐ.பி முதலீடு ஆகிய வற்றுக்கான தவணை பெரும்பாலும் இருக்காது. ஆயுள் மருத்துவக் காப்பீட்டுக்கான பிரீமியம் அதிகமாக கட்ட வேண்டி வரும்.

உங்கள் தொழிலை ஆரம்பித்த காலத்தில் அல்லது வேலைக்குச் சேர்ந்த புதிதில், 58 அல்லது 60 வயது வரை பிரீமியம் செலுத்தும் விதமாக ஆயுள் காப்பீடு பாலிசியை எடுத்திருக்கலாம். ஆனால், இப்போது நீங்கள் 55 வயதிலேயே ஓய்வு பெறத் திட்டமிடலாம். எனவே, நீங்கள் ஏற்கெனவே உள்ள காப்பீடு மற்றும் பிற முதலீடுகளை ஓய்வு பெறும் வயதுக்கு ஏற்றவாறு மாற்றியமைப்பது அவசியமாகும். பிள்ளைகள் பெரியவர்களாகி வேலைக்குச் சென்று அவர்களுக்கு எனத் தனிக் குடும்பம் உருவாகி இருக்கும் நிலையில், உங்களிடமிருந்து எதையும் எதிர்பார்க்கவில்லை எனில், ஓய்வுக்காலத்தில் இருக்கும் குடும்பத் தலைவர் மற்றும் குடும்பத் தலைவிக்கு ஆயுள் காப்பீடு தேவையிருக்காது. அதற்குப் பதில் அதிக தொகைக்கு மருத்துவக் காப்பீடு தேவைப்படும்.

எஸ்டேட் பிளானிங் அவசியம்..!

பணி ஓய்வுக்காலத்தில் நீங்கள் இருக்கிறீர்கள்; இதுவரைக்கும் உயில் எழுதவில்லை எனில், இப்போதாவது அதை எழுதுங்கள்.

உங்களின் அசையா மற்றும் அசையும் சொத்துகளை சட்டப்படியான வாரிசுகளுக்கு (துணைவர் - கணவன்/மனைவி, பிள்ளைகள்) பிரித்து எழுதுங்கள். இது உங்களின் மறைவுக்குப் பின், குடும்ப உறுப்பினர்களிடையே சண்டை, சச்சரவைத் தவிர்க்க உதவும்.

ஒருமுறை உயில் எழுதிவிட்டால், அதை மாற்றக் கூடாது என்பதில்லை. எத்தனை முறை வேண்டுமானாலும் மாற்றிக்கொள்ளலாம். தேவைப் பட்டால் சார்பதிவாளர் அலுவலகத்திலும் அந்த உயிலைப் பதிவு செய்துகொள்ளலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism