Published:Updated:

முதல்முறை முதலீட்டாளர்கள் கவனிக்க வேண்டிய 7 அம்சங்கள்..!

முதலீடு
பிரீமியம் ஸ்டோரி
News
முதலீடு

முதலீடு

சித்தவேலாயுதம், நிறுவனர் மற்றும் முதன்மை செயல் அதிகாரி, https://aliceblueonline.com/

கொரோனா பாதிப்புக்குப் பிறகு, அண்மைக் காலத்தில் நம்மிடையே முதலீடு செய்பவர்களின் எண்ணிக்கை கணிசமாக அதிகரித்திருக்கிறது. அதுவும் பணவீக்க விகிதத்தைத் தாண்டி அதிக வருமானம் தரும் நவீன முதலீடுகளான பங்குச் சந்தை மற்றும் மியூச்சுவல் ஃபண்ட் திட்டங் களில் முதலீடு அதிகரித்துள்ளது. புதிதாக முதல்முறையாக முதலீடு செய்பவர்கள் கவனிக்க வேண்டிய எட்டு அம்சங்கள் பற்றி சற்று விளக்கமாகப் பார்ப்போம்.

சித்தவேலாயுதம் 
நிறுவனர் மற்றும் முதன்மை செயல் அதிகாரி  
https://aliceblueonline.com/
சித்தவேலாயுதம் நிறுவனர் மற்றும் முதன்மை செயல் அதிகாரி https://aliceblueonline.com/

1. முதலீட்டை உங்களின் நிதி இலக்குகளுடன் இணையுங்கள்...

நிதி இலக்குகள் (Financial Goals) என்று எடுத்துக்கொண்டால், முதலீட்டுக் காலத்தைப் பொறுத்து, அதைக் குறுகிய கால நிதி இலக்கு, நடுத்தரக் கால நிதி இலக்கு மற்றும் நீண்ட கால நிதி இலக்கு என மூன்றாகப் பிரிக்கலாம். நீங்கள் முதல்முறை முதலீட்டாளர் மற்றும் இளைஞர் என்கிறபோது, இத்தகைய கால கட்டுப்பாடுடன்கூடிய நிதி இலக்குகளை நிர்ணயம் செய்வது சற்றுக் கடினமானதாக இருக்கலாம்; இருந்தாலும், அதை நீங்கள் கட்டாயம் பின்பற்ற வேண்டும்.

பொதுவாக, இளம் வயதில் நிதி இலக்குகள் என்பவை, நல்ல லேப் டாப் வாங்க ஓராண்டுக் குள் ரூ.1 லட்சம் சேர்ப்பது, கார் வாங்க 3 ஆண்டுகளில் ரூ.4 லட்சம் திரட்டுவது அல்லது வீட்டுக் கடன் மூலம் வீடு வாங்க 5 ஆண்டுகளில் முன்பணமாக (Down Payment) ரூ.25 லட்சம் திரட்டுவது என்பவையாக இருக்கும்.

உங்கள் முதலீட்டுத் தொகை, முதலீட்டுக் காலம், முதலீட்டுத் திட்டங்கள், உங்களின் ரிஸ்க் எடுக்கும் திறன், முதலீட்டைப் பணமாக்கும் தன்மை (Liquidity) போன்றவற்றைச் சார்ந்து உங்கள் நிதி இலக்குகள், இருக்க வேண்டும். எந்தவொரு முதலீட்டை மேற் கொண்டாலும், அதை ஓர் இலக்குடன் இணைத்துவிடுவது மிகவும் அவசியம்.

உதாரணமாக, நீங்கள் மாதம் ரூ.5,000 முதலீடு செய்து வருகிறீர்கள். இந்த முதலீட்டை இன்னும் 10 ஆண்டுகளுக்குத் தொடர்ந்து செய்து, அந்தத் தொகுப்பு நிதியை மகளின் உயர்கல்விக்குப் பயன்படுத்தப்போகிறீர்கள் என இலக்கை நிர்ணயம் செய்துவிட்டீர்கள் எனில், அந்தப் பணத்தை இடையில் எடுத்து செலவு செய்ய மாட்டீர்கள். இலக்கு இல்லை எனில், அந்தப் பணம் காற்றில் கரைந்த கற்பூரமாகிவிடும். அந்த வகையில், எந்த முதலீடாக இருந்தாலும் அதை எதற்குப் பயன் படுத்தப்போகிறீர்கள் என இலக்கை நிர்ணயம் செய்வது கட்டாயம் ஆகும்.

முதல்முறையாக முதலீட்டை ஆரம்பிக்கும் போது அவசரப்பட்டு இலக்கு எதுவும் இல்லாமல் பணத்தைப் போட வேண்டாம். உங்களின் நிதி இலக்கு, அதை நிறைவேற்ற இன்னும் இருக்கும் காலம் ஆகியவற்றைப் பொறுத்து முதலீட்டை மேற்கொண்டு வரவும். தேவைப்பட்டால் நல்ல நிதி ஆலோசகர் ஒருவரின் ஆலோசனை பெறுவதில் தவறில்லை.

2. உங்கள் ரிஸ்க் எடுக்கும் திறனை அறிந்து கொள்ளுங்கள்...

நீங்கள் முதலீடு செய்த பணம் நஷ்டமானால் அல்லது அதன் மதிப்பு குறைந்துபோனால், புதிய முதலீட்டாளர்கள் பீதி அடைவது ஒன்றும் புதியதல்ல. எனவே, புதியவர்கள் முதலீடு செய்யத் தொடங்கும் முன், உங்களின் ரிஸ்க் எடுக்கும் திறனைப் (Risk Appetite) புரிந்து கொள்வது மிகவும் முக்கியம்.

உங்கள் ரிஸ்க் எடுக்கும் திறன் குறைவாக இருந்தால், அதிக ரிஸ்க் கொண்ட முதலீடு களான நிறுவனப் பங்குகள், ஸ்மால்கேப் ஈக்விட்டி ஃபண்டுகள் போன்றவற்றில் ஆரம்பத்திலேயே அதிக தொகையை முதலீடு செய்வதைத் தவிர்க்கலாம். முதலீட்டில் நல்ல அனுபவம் கிடைக்கும் வரை ரிஸ்க் குறைவான வங்கி அல்லது தபால் அலுவலக ஆர்.டி மற்றும் கடன் சார்ந்த ஃபண்டுகளில் முதலீடு செய்து வரலாம்.

முதல்முறை முதலீட்டாளர்கள்
கவனிக்க வேண்டிய 7 அம்சங்கள்..!

3. ரிஸ்க்கான திட்டங்களில் மொத்த முதலீடு வேண்டாம்...

ஃபிக்ஸட் டெபாசிட், கடன் பத்திரங்கள் போன்றவற்றில் மொத்தமாக முதலீடு செய்தால் தப்பில்லை. அதே நேரத்தில், நிறுவனப் பங்குகள், பங்குச் சந்தை சார்ந்த மியூச்சுவல் ஃபண்டுகள் என்கிறபோது மொத்தமாக முதலீடு செய்யும் பட்சத்தில் ரிஸ்க் அதிகரிக்க வாய்ப்பிருக்கிறது. இந்த முதலீடுகளில் சீரான முதலீட்டுத் திட்ட முறையான எஸ்.ஐ.பி முறையில் முதலீடு செய்வது லாபகரமாக இருக்கும். கையில் மொத்தத் தொகை இருந்தாலும் அதைப் பாதுகாப் பான முதலீடுகளில் வைத்திருந்து, அதிலிருந்து கொஞ்சம் கொஞ்சமாக ரிஸ்க் உள்ள முதலீடுகளுக்கு மாற்றலாம். நிறுவனப் பங்குகள் மற்றும் பங்குச் சந்தை சார்ந்த மியூச்சுவல் ஃபண்டுகளில் முதலீட்டைப் படிப்படியாக அதிகரித்து நீண்ட காலத்தில் உங்கள் இலக்குத் தொகையை அடையவும்.

4. முதலீட்டைப் பிரித்து மேற்கொள்ளவும்…

நீங்கள் புதிய முதலீட்டாளராக இருப்பதால், சில முதலீடுகள் உங்களுக்கு மிகவும் கவர்ச்சிகரமானதாக இருக்கும். அதே நேரத்தில், வேறு சில முதலீட்டுத் திட்டங்கள் சலிப்பை ஏற்படுத்துவதாக இருக்கலாம். ஒவ்வொரு முதலீட்டுத் திட்டத்துக்கும் ஒரு தனித்துவமான நோக்கம் உள்ளது. உதாரணமாக, உங்களின் இலக்கை அடைய குறுகிய காலம்தான் (மூன்று ஆண்டுக்குள்) இருக்கிறது எனில், ஃபிக்ஸட் டெபாசிட் மற்றும் கடன் மியூச்சுவல் ஃபண்டுகள் சரியானதாக இருக்கும். இதுவே முதலீட்டுக் காலம் நீண்ட காலம் (மூன்று ஆண்டுகளுக்கு மேல்) எனில், நிறுவனப் பங்குகள், ஈக்விட்டி ஃபண்டுகள் சரியாக இருக்கும்.

இப்படி முதலீட்டுக் காலத்துக்கேற்ப முதலீடுகளைத் தேர்வு செய்யும்போது, உங்கள் நிதி இலக்குகளை நீங்கள் சிக்கல் இல்லாமல் அடைய முடியும். எனவே, உங்கள் மொத்தப் பணத்தையும் ஒரே முதலீட்டுத் திட்டத்தில் போட்டு வைப்பதைத் தவிர்க்கவும்.

சிலர் தங்கத்தில் மட்டுமே முதலீடு செய்துவருவார்கள்; வேறு சிலர், மனை, வீடுகளாக வாங்கிச் சேர்ப்பார்கள். இந்த அணுகுமுறையைத் தவிர்த்து உங்களின் பணத்தைப் பல்வேறு சொத்துப் பிரிவுகளில் பிரித்து மேற்கொள்ளவும்.

ஒவ்வொரு முதலீடும் ஒரு குறிப்பிட்ட காலத்தில் சிறப்பாகச் செயல்படும்; ஒவ்வொரு முதலீட்டில் இருக்கும் ரிஸ்க்கும் வேறுபடும். இப்படிச் செய்யும் போது முதலீட்டுக் கலவையின் ரிஸ்க் கணிசமாகக் குறையும். மேலும், வருமானமும் அதிக மாகக் கிடைக்கும். அதனால், உங்களின் முதலீட்டுக் கலவை எப்போதும் சராசரியாகப் பணவீக்க விகிதத்தைத் தாண்டி நல்ல வருமானத்தைக் கொடுக்க வாய்ப்பிருக்கிறது. இதனால், சரியான நேரத்தில் உங்கள் நிதி இலக்கை நிறைவேற்ற முடியும்.

5. வருமான வரியைச் சேமிக்க மட்டுமே முதலீடு செய்ய வேண்டாம்

வருமான வரியைச் சேமிக்கும் நோக்கத்துக்காக முதலீடு செய்வது மிகவும் முக்கியமானது. அதே நேரத்தில், வரிச் சேமிப்பு நிர்ப்பந்தம் மட்டுமே முதலீட்டுக் கான காரணமாக இருக்கக் கூடாது. அதற்குப் பதிலாக, உங்கள் நிதி இலக்குகளை நிறைவேற்ற முதலீடு செய்வதை நோக்கமாகக் கொள்ள வேண்டும்; அதே நேரத்தில், அந்த முதலீடுகள் மூலம் வருமான வரியை மிச்சப் படுத்த வேண்டும்.

வருமான வரியை மிச்சப் படுத்த மட்டுமே முதலீடு செய்வது போதிய வருமானத்தைக் கொடுக்காமல் போகலாம் அல்லது முதலீட்டின் நீண்ட லாக் இன் காலம் உங்கள் நிதி இலக்குகளைச் சரியான நேரத்தில் அடையும் உங்கள் பயணத்தைத் தடுக்கக் கூடும். முக்கியமாக, வரிச் சேமிப்புக்காக பாரம்பர்ய இன்ஷூரன்ஸ் திட்டங்களை எடுக்க வேண்டாம். அதன்மூலம் அதிக பிரிமீயம் தொகையைக் கட்டுவதுடன், குறைந்த கவரேஜ் தொகையே கிடைக்கும். அதற்குப் பதிலாக, குறைந்த பிரீமியத்தில் அதிக கவரேஜ் தொகை கிடைக்கும் டேர்ம் இன்ஷூரன்ஸ் பாலிசி களை எடுப்பதே சரியான முடிவாக இருக்கும்.

6. கடன் வாங்கி முதலீடு வேண்டாம்

உங்களின் வருமானம் அல்லது சம்பளத்தில் செலவு போக உள்ள சேமிப்புப் பணத்தை முதலீடு செய்வது எப்போதும் நல்லது. முதலீடு செய்யக் கடன் வாங்கு வதை எப்போதும் தவிர்க்கவும். கடன் வாங்கி செய்யும் முதலீடு தவறாகப் போய்விட்டால் அல்லது எதிர்பார்த்த வருமானம் கிடைக்காமல் போனால் அல்லது மூலதனத்துக்கு இழப்பு ஏற்பட்டால், அது உங்களைக் கடன் வலையில் சிக்க வைத்துவிடும்.

முதல்முறையாக முதலீடு செய்யத் தொடங்கும்போது உங்களிடம் இருக்கும் சொந்தப் பணத்தில் சிறிய தொகையில் தொடங்குவதில் எந்தத் தவறும் இல்லை. சிறுதுளிகள்தான் பெருவெள்ளமாக மாறுகிறது. உங்கள் வருமானம், சம்பாத்தியம் அதிகரிக்க ஆரம்பிக்கத் தொடங்கியதும் முதலீட்டுத் தொகையை நீங்கள் அதிகரித்துக்கொள்ளலாம்.

7. முதலீட்டை சீக்கிரமாக ஆரம்பித்து சீராகத் தொடருங்கள்...

சிலர் சம்பளம், சம்பாத்தியம் அதிகரிக்கட்டும்; அதன் பிறகு, முதலீட்டை ஆரம்பிக்கலாம் எனத் தாமதப்படுத்து கிறார்கள். இது தவறான அணுகு முறை. எவ்வளவு சீக்கிரமாக இளம் வயதிலேயே முதலீட்டை ஆரம்பிக்க முடியுமோ, அவ்வளவு சீக்கிரம் ஆரம்பிப்பது லாபகரமாக இருக்கும். தொடர்ந்து சிறு தொகையை முதலீடு செய்து வந்தால் அது நீண்ட காலத்தில் பெரிய தொகையாக வளர்ந்து நிற்கும். சீக்கிரமாக முதலீட்டை ஆரம்பிப்பது மூலம் கூட்டு வளர்ச்சியின் பலனை (Compounding Benefit) அடைய முடியும்.

இனியாவது இந்த விஷயங்களை எல்லாம் மனதில் கொண்டு முதலீடு செய்யத் தொடங்குங்கள்!

முதலீட்டின் நுட்பங்களைத் தெரிந்துகொள்ளுங்கள்..!

எந்தவொரு முதலீடாக இருந்தாலும், அதன் வளர்ச்சி மற்றும் செயல்பாட்டை இடையிடையே கவனித்து வாருங்கள். உங்களின் வருமான எதிர்பார்ப்பு, நிதி இலக்கை அடையும் விதமாக முதலீடு வளர்ந்து வருகிறதா என்பதைக் கவனியுங்கள். தேவைப்பட்டால் முதலீட்டுத் திட்டங்களை மாற்றியமையுங்கள். இதில் ஏதாவது கஷ்டத்தை உணர்ந்தால், நிதி ஆலோசகரின் உதவியை பெற்றுக்கொள்ளக் தயங்காதீர்கள்.

எந்த முதலீடாக இருந்தாலும் அதைப் புரிந்துகொண்டு முதலீடு செய்யுங்கள். உலகின் முன்னணி முதலீட்டாளர் வாரன் பஃபெட் அந்தக் காலத்திலிருந்தே இந்தக் கருத்தைதான் வலியுறுத்தி வருகிறார். நீங்கள் முதலீடு செய்யும் தொகை எங்கே முதலீடு செய்யப்படுகிறது, அதிலுள்ள ரிஸ்க் என்ன, முதலீட்டுக்கு லாக் இன் பிரீயட் ஏதாவது இருக்கிறதா, முதலீட்டுக்கான செலவு எவ்வளவு என்பன போன்ற விவரங்களைத் தெரிந்துகொண்டு, அதன்பிறகு முதலீடு செய்யுங்கள். இந்த விவரங்களைப் புத்தகங்கள், கட்டுரைகள் மற்றும் ஆன்லைன் மூலம் சுலபமாகத் தெரிந்து கொள்ள முடியும்.

பங்குச் சந்தை, கமாடிட்டி போன்ற அதிக ரிஸ்க்கானவற்றில் முதலீடு மற்றும் வர்த்தகம் செய்வதாக இருந்தால், அது தொடர்பான பயிற்சி வகுப்புகளில் சில ஆயிரம் ரூபாய்களைச் செலவு செய்து பங்கேற்று போதிய விவரங்கள் மற்றும் நுட்பங்களைத் தெரிந்துகொண்டு முதலீடு செய்வதன் மூலம் லட்சக்கணக்கான பணத்தை, ஏன் கோடிகளைக்கூட சம்பாதிக்க முடியும்!