Published:Updated:

பயமுறுத்தும் பணவீக்கம்... உங்கள் முதலீட்டில் செய்ய வேண்டிய புதிய மாற்றங்கள்!

பணவீக்கம்
பிரீமியம் ஸ்டோரி
பணவீக்கம்

கவர் ஸ்டோரி

பயமுறுத்தும் பணவீக்கம்... உங்கள் முதலீட்டில் செய்ய வேண்டிய புதிய மாற்றங்கள்!

கவர் ஸ்டோரி

Published:Updated:
பணவீக்கம்
பிரீமியம் ஸ்டோரி
பணவீக்கம்

பணவீக்கம் 1970-களில் உலக நாடுகளின் பிரச்னையாக தலைதூக்கியபோது அமெரிக்க ஜனாதிபதியாக இருந்த ஜெரால்ட் ஃபோர்ட், ‘‘பணவீக்கம்தான் மக்களின் முதல் எதிரி’’ என்றார். அதன் பிறகு, உலகப் பொருளாதாரம் பல்வேறு மாற்றங் களுக்கு உள்ளாகி முன்னேற்றம் கண்டது. ஒரு சில நாடுகளில் மட்டும் அவ்வப்போது பணவீக்க பிரச்னை தலைதூக்கியது. இன்று மீண்டும் உலகம் முழுவதையும் பணவீக்கம் ஆட்டிப் படைக்கத் தொடங்கியிருக்கிறது.

அமெரிக்கா, ஜெர்மனி ஆகிய நாடுகளில் 40 ஆண்டுகளில் இல்லாத அளவுக்குப் பணவீக்கம் உயர்ந்திருக்கிறது. பொருளாதாரம் சீர்குலைந்து கலவரமே வெடித்துள்ள இலங்கையில் பணவீக்கம் 33 ஆண்டுகளில் இல்லாத அளவுக்கு உயர்ந்துள்ளது. இத்தாலி, இங்கிலாந்து ஆகிய நாடுகளில் 30 ஆண்டுகளில் இல்லாத அளவுக்குப் பணவீக்கம் தற்போது உள்ளது.

இந்தியாவில் எட்டு ஆண்டுகளில் இல்லாத அளவுக்குப் பணவீக்கம் உயர்ந்து, 7.79 சத விகிதமாக உள்ளது. இதனால் மீண்டும் 1970 காலகட்டத்துக்கு உலகப் பொருளாதாரம் திரும்புகிறதா என்ற அச்சம் எழுந்துள்ளது.

இப்படி வல்லரசு நாடுகள் தொடங்கி வளர்ந்த நாடுகள்கூட பணவீக்கத்தால் பாதிக்கப்பட்டுள்ளதால், சர்வதேச சந்தைகள் பெரும் சரிவுக்கு உள்ளாகியுள்ளன. கொரோனா காலத்தில் உலகப் பொருளாதாரம் நிலைகுலைந்து அதிலிருந்து மீண்டு வந்திருக்கும் இந்தத் தருணத்தில் மீண்டும் பெரிய அளவிலான பொருளாதாரச் சிக்கல்களை நோக்கி உலகம் செல்லும் சூழல், பணவீக்கத்தின் ரூபத்தில் உருவாகியிருக்கிறது.

பயமுறுத்தும் பணவீக்கம்... உங்கள் முதலீட்டில் செய்ய வேண்டிய புதிய மாற்றங்கள்!

சர்வதேச அளவில் சந்தைகள் பாதிப்புக்கு உள்ளாவதால், இந்தியப் பங்குச் சந்தையிலும் நிலையற்றத்தன்மை உருவாகியிருக்கிறது. இதற்குக் காரணம் என்ன, உலகப் பொருளா தாரம் இதே நிலையில் நீடிக்குமா அல்லது மீண்டும் சுமுகநிலைக்குத் திரும்புமா என்பது உள்ளிட்ட கேள்விகள் எழுகின்றன.

அதே சமயம், முதலீட்டாளர்கள் பண வீக்கத்தைச் சமாளித்து எப்படி தங்களுடைய முதலீடுகளைத் திட்டமிட வேண்டும் என்ற குழப்பத்திலும் உள்ளனர். இந்தக் கேள்வி களுடனும் குழப்பங்களுடனும் பங்குச் சந்தை நிபுணர் ரெஜி தாமஸிடம் பேசினோம். அவர் தற்போதைய சர்வதேச சந்தைகளின் நிலவரத் தையும், முதலீட்டாளர்கள் கவனிக்க வேண்டிய விஷயங்களையும் விரிவாக எடுத்துச் சொன்னார்.

“பணவீக்கத்தை இரண்டு விஷயங்கள்தான் தீர்மானிக் கின்றன. ஒன்று, விலையேற்றம், இன்னொன்று, தேவை. தற்போது பணவீக்கம் உயர்வதற்கு கமாடிட்டிகளின் விலையேற்றம் முக்கியமான காரணமாக இருக்கிறது. குறிப் பாக, கச்சா எண்ணெய் உள்ளிட்ட முக்கிய கமாடிட்டிகள் விலை உயர்ந்ததன் காரணமாகவே பணவீக்கம் அதிகரித்துள் ளது. பொருள்கள், சேவைகள் அனைத்திலும் போக்குவரத்து என்பது தவிர்க்க முடியாததாக இருப்பதால், எரிபொருள் விலையேற்றம் என்பது அனைத்து பொருள்கள், சேவைகள் விலையில் தாக்கத்தை ஏற்படுத்தவே செய்யும். இதனால் உலக நாடுகள் அனைத்துமே பணவீக்க உயர்வை எதிர்கொள்ளும் கட்டாயத்தில் உள்ளன.

உதாரணமாக, அமெரிக்காவில் இதுவரை இல்லாத அளவுக்கு பணவீக்கம் 8.5 சதவிகிதமாக உயர்ந்திருக்கிறது. இந்த மொத்த பணவீக்கத்திலிருந்து உணவு, எண்ணெய், எரிவாயு போன்றவற்றை நீக்கிவிட்ட பிறகும்கூட, பணவீக்கம் 6.5 சதவிகிதமாக இருக்கிறது. இது அமெரிக்க ஃபெடரலின் பணவீக்க நிர்ணய விகிதமான 2 சதவிகிதத்தைவிட அதிகம். இந்தியாவின் பணவீக்கமும் 8 ஆண்டுகளில் இல்லாத அளவுக்கு உயர்ந்துள்ளது.

பணவீக்கம் உயர்வதும், குறை வதும் ஒரு சுழற்சி முறையிலான தாக்கம்தான். பணவீக்கம் எப்போதுமே உயர்ந்துகொண்டே இருக்கப்போவதில்லை. நிச்சயம் ஒரு நாள் பணவீக்கம் குறையவே செய்யும்.

ரெஜி தாமஸ்
ரெஜி தாமஸ்

10 வருடத்துக்கும்மேலாக ஒரே மாதிரியான போக்கில் பணவீக்கம் இருப்பது என்பது ஜப்பான் தவிர, எந்த நாட்டிலும் நடக்கவில்லை. பணவீக்கம் குறுகிய காலத்துக்கு கவலைப்பட வேண்டிய விஷயம் தான் என்றாலும், தொடர்ந்து பணவீக்கம் இப்படி உயர்ந்து கொண்டே செல்லும் என்று பயப்படத் தேவையில்லை.

ஆனால், தற்போதைய சூழலை ஆராய்ந்து பார்க்கும் போது, பணவீக்கம் மட்டுமல்லாமல் பல்வேறு விவகாரங்கள் பின்னிப் பிணைந்து நிலைமையைச் சிக்கலானதாக மாற்றியிருப்பதைக் காணலாம்.

உலகப் பொருளாதார வளர்ச்சி கணிப்பு ஒருபக்கம் கவலை அளிக்கும் விதமாக இருக்கிறது. அத்துடன், இன்னமும் முடிவுக்கு வராத ரஷ்யா - உக்ரைன் போர் விவகாரம் நிலைமையை மோசமாக்கியுள்ளது. இதன் விளைவாக, கமாடிட்டி விலைகளில் தொடர்ந்து, ஏற்ற இறக்கமான சூழல் நிலவுவதால், சர்வதேச கமாடிட்டி சந்தைகளில் நிலையற்றத்தன்மை நீடிக்கிறது. அதே சமயம், ரூபாய் மதிப்பும் வீழ்ச்சியைச் சந்திக்கிறது. இவை அனைத்துமே பங்குச் சந்தைகளைப் பாதிக்கும் காரணிகளாக உள்ளன. சர்வதேச பங்குச் சந்தைகள் தொடர்ந்து சரிவைச் சந்திக்கும்போது, அதன் எதிரொலியாக இந்தியப் பங்குச் சந்தைகளும் சரிவைச் சந்திக்கின்றன. அதுமட்டுமல்லாமல், எஃப்.ஐ.ஐ என்கிற அந்நிய முதலீட்டாளர்கள் தொடர்ந்து இந்தியப் பங்குச் சந்தைகளிலிருந்து பங்குகளை விற்று வெளியேறுகிறார்கள்.

இதுபோன்ற பல காரணங்கள் ஒரே சமயத்தில் தலை தூக்கியதால், நேரடியாகவும் மறைமுகமாகவும் பணவீக்கம் சந்தையையும் முதலீடுகளையும் பெருமளவு பாதித்திருக்கிறது.

பணவீக்கம் அதிகரிக்கும்போது, மத்திய வங்கிகள் வட்டி விகித உயர்வு நடவடிக்கையை எடுக்க வேண்டிய கட்டாயத் துக்கு ஆளாகின்றன. இவ்வாறு வட்டி விகிதம் உயர்த்தப் படும்போது வங்கிகள், நிதிசார் துறைகள் நேரடியாகப் பாதிக்கப்படும். ஏனெனில், வட்டி விகிதம் உயர்ந்தால், கடன்கள் மட்டுமல்லாமல் டெபாசிட்டுகளின் வட்டியும் உயரும்.

இதனால் மக்கள் பணத்தை வங்கியில் டெபாசிட் செய்வது அதிகரிக்கும். அதே சமயம், வட்டி உயர்வாக இருக்கிறது என்பதால், கடன்களை வாங்கு வதற்குத் தயங்குவார்கள். குறிப்பாக, தொழில் விரிவாக்க நடவடிக்கைகளைத் தள்ளிப் போடுவார்கள். அல்லது கடன் வாங்கும் அளவைக் குறைவாக வைத்திருப்பார்கள். இதனால் வங்கிகள், நிதி நிறுவனங்கள் அடையக்கூடிய வருமானம் என்பது குறைய ஆரம்பிக்கும்.

அதே போல், கடன்கள் குறையும்போது தொழில் விரிவாக்க நடவடிக்கைகள், புதிய உட்கட்டமைப்புத் திட்டங்கள் போன்றவை குறையும் என்பதால் வேலைவாய்ப்பும் குறையும், உற்பத்தியும் குறையும். உற்பத்தி குறையும்போது தேவை அதிகரிக்கும்.

தேவை அதிகரிக்கும்போது, விலைவாசியும் உயரும். விலை உயர உயர மக்கள் பயன்பாட்டைக் குறைப்பார்கள். ஏனெனில், விலைவாசி உயர்வதற்கேற்ப மக்களின் வருமானம் உயர்வதில்லை. மக்களின் சேமிப்பு கரைய ஆரம்பிக்கும். ஒருபக்கம், நிறுவனங்களின் விரிவாக்க நடவடிக்கைகளும் உற்பத்தியும் குறைகிறது. இன்னொரு பக்கம், மக்களின் நுகர்வு குறைகிறது. இவை இரண்டும் நிறுவனங்களின் வருவாய் வளர்ச்சியில் பாதிப்பை ஏற்படுத்தும்.

ஆனால், பணவீக்கம், வட்டி விகித உயர்வு ஆகியவற்றின் விளைவாக உண்டாகும் பாதிப்புகள் உடனே தெரியாது. இந்த பாதிப்புகளைக் கண்கூடாகப் பார்ப்பதற்கு குறைந்தபட்சம் 3 - 6 மாதங்கள் வரை ஆகும். எனவே, முதலீட்டாளர்கள் தற்போதுள்ள சூழலில் தங்களுடைய போர்ட்ஃபோலியோவை ஆய்வுக்குட் படுத்த வேண்டும். வங்கி, நிதிசார் நிறுவனங்கள், உற்பத்தி, உட்கட்டமைப்பு, சிறு தொழில்கள் என அனைத்து துறைகளுமே பாதிப்புக்கு உள்ளாகும் என்பதால் பங்குகளைத் தேர்வு செய்யும்போது கவனமாக இருக்க வேண்டும்.

ஐ.டி, சேவைத் துறையில் பெரிய அளவில் பாதிப்பு இருக்காது. ரூபாய் மதிப்பு வீழ்ச்சி காண்பதும்கூட இந்தத் துறைகளுக்குச் சாதகமாக இருக்கும். இதனால் அவற்றின் வருவாய் அதிகரிக்கும். அவற்றின் பங்கு செயல்பாடும் பெரிய அளவில் பிரச்னையாக இருக்காது. ஆனால், மற்ற துறைகள் அனைத்திலுமே வைத்திருக்கும் பங்குகளை ஆய்வுக்குட்படுத்த வேண்டும்.

சந்தை சரிவில் பல பங்குகள் குறைவான விலையில் கிடைக்கிறதே என்பதற்காக பங்குகளை ஆய்வு செய்யாமல் வாங்குவதால், அதிக இழப்புகளைச் சந்திக்க நேரிடலாம். தரமான பங்குகளைத் தேர்ந்தெடுத்து வாங்குவதுதான் இது போன்ற தருணங்களில் சரியான முடிவு.

தரமற்ற பங்குகளை விலை குறைவாக இருக்கிறது என்பதற்காக வாங்குவதைத் தவிர்க்க வேண்டும். குறிப்பாக, குறுகிய கால இலக்கு அடிப்படையில் பங்குகளை வாங்கு பவர்கள் கவனமாக இருக்க வேண்டும்.

விலைவாசி ஏற்றத்தின் பாதிப்பை சுமக்க வேண்டிய சூழல் நம்மால் தவிர்க்க முடியாதது என்றே சொல்ல வேண்டும். ஏனெனில், மத்திய, மாநில அரசுகள் ஒன்றை யொன்று மாறி மாறி குறை சொல்வதற்குப் பதிலாக ஒன்றாக அமர்ந்து பேசி ஆக்கபூர்வமான முடிவுகளை எடுத்தாலுமே கூட பணவீக்க உயர்வைக் கட்டுக்குள் கொண்டு வர முடியாது. ஒரு பட்டனைத் தட்டி மாற்றுவது போன்றதல்ல பணவீக்கத்தின் போக்கு.

பணவீக்கம் என்பது ஒருகட்டத்துக்கு மேல் யாருடைய கையிலும் இல்லை. அது சந்தையின் சூழலைப் பொறுத்தே அமையும். குறிப்பிட்ட ஒரு பொருளின் விலை உயர்கிறது எனில், ஏற்றுமதிக்குத் தடை விதிப்பது, பதுக்கலைத் தடுப்பது, உற்பத்தியைப் பெருக்குவது போன்ற நடவடிக்கைகள் மூலமாக அதன் விலை உயர்வைக் கட்டுக்குள் வைக்க முயற்சி செய்யுமே தவிர, ஒட்டு மொத்தமாக அனைத்து பொருள்களின், சேவைகளின் விலை உயர்வதை என்ன நடவடிக்கை எடுத்தாலும் தடுத்து விட முடியாது. எனவே, நாம்தான் பணவீக்க உயர்வை எதிர்கொள்ள நம்மை தயார் படுத்திக்கொள்ள வேண்டும்” என்றார்.

பணவீக்கத்தைக் குறைப்ப தற்காக மத்திய அரசாங்கம் பல்வேறு நடவடிக்கைகள் எடுப்பது ஒருபக்கம் இருக்க, பணவீக்கத்தால் வரும் பாதிப்பு களில் இருந்து தப்பிக்க முதலீட் டாளர்களும் தங்களுடைய போர்ட்ஃபோலி யோவை மாற்றி அமைத்துக்கொள்வது அவசியம். அதற்கான வேலைகளை முதலீட்டாளர்கள் இப்போதே செய்வது நல்லது.

இப்போது சர்வதேச அளவில் கச்சா எண்ணெய் விலை மிக அதிகமாக இருப்பது, பணவீக்கம் தொடர்ந்து அதிகமாக இருப்ப தற்கு ஒரு காரணமாக இருக்கிறது. ரஷ்யா - உக்ரைன் போர்ப் பதற்றம் முடிவுக்கு வரும்போது கச்சா எண்ணெயின் விலையும் குறையும். நம் நாட்டில் பண வீக்கமும் குறையும். அதுவரை முதலீட்டாளர்கள் கொஞ்சம் கவனமாக இருப்பது நல்லது!

பயமுறுத்தும் பணவீக்கம்... உங்கள் முதலீட்டில் செய்ய வேண்டிய புதிய மாற்றங்கள்!

விலையை ஏற்றாமல், பொருள்களின் எடையைக் குறைக்கும் வியாபாரத் தந்திரம்..!

கடந்த ஏப்ரலில் மொத்த விலைப் பணவீக்கம் கடந்த காலத்தில் இல்லாத அளவுக்கு 15.08% என்கிற அளவுக்கு உயர்ந்திருக்கிறது. இதன் விளைவாக, பெரும்பாலான நிறுவனங்கள் தாங்கள் சந்தைப்படுத்தும் பொருள்கள் அல்லது சேவைகளின் விலையைக் கூட்ட ஆரம்பித்திருக்கின்றன.

பொதுமக்களின் மனதை நன்கு அறிந்து வைத்திருக்கும் நிறுவனங்கள் தாங்கள் சந்தைப்படுத்தும் அனைத்துப் பொருள்களின் விலையை அதிகரிப் பதற்குப் பதிலாக, சில பொருள்களின் எடையைக் குறைத்து விற்பனை செய்ய ஆரம்பித்திருக்கின்றன.

உதாரணமாக, மூன்று மாதங்களுக்கு முன்பு ரூ.10-க்கு விற்பனை செய்யப்பட்டுவந்த 155 கிராம் எடையுள்ள பிரபல நிறுவனம் தயாரித்து வெளியிடும் சோப்பின் எடை, இப்போது 135 கிராமாகக் குறைக்கப்பட்டிருக்கிறது. அதுபோல, நொறுக்குத் தீனி தயாரிக்கும் முக்கியமான நிறுவனம் ஒன்று, சில பொருள்களின் விலையை உயர்த்தாமல் 55 கிராமுக்குப் பதிலாக, 42 கிராமாகக் குறைத்து விற்பனை செய்ய ஆரம்பித்திருக்கிறது. உணவுப் பொருள்கள் தயாரிக்கும் பல நிறுவனங்களும் சமையல் எண்ணெய் விலை உயர்வாலும், பால் பொருள்களின் விலை உயர்வாலும், போக்குவரத்துச் (லாஜிஸ்டிக்) செலவு அதிகரிப்பாலும் பாதிக்கப்பட்டிருப்பதால் அந்தச் சுமையை நுகர்வோர்கள் மீது சுமத்த ஆரம்பித்திருக்கின்றன.

ஒரு முன்னணி எஃப்.எம்.சி.ஜி நிறுவனம் ரூ.1, 5, 10 விலை விற்பனை ஆகும் பொருள்களுக்கான விலையைக் கூட்டாமல் எடையைக் குறைத்து, விற்பனை செய்ய ஆரம்பித்திருக்கிறது. அப்படியிருந்தும் இந்தப் பொருள்களின் நுகர்வு குறையாமலே இருப்பதாக அந்த நிறுவனத்தைச் சேர்ந்த அதிகாரி ஒருவர் தெரிவித்திருக்கிறார்.

 சித்தார்த்தன் சுந்தரம்
சித்தார்த்தன் சுந்தரம்

2020-21-ம் நிதியாண்டில் ஏற்பட்ட மூலப்பொருள்களின் விலை அதிகரிப்பை ஓரளவுக்குச் சமாளிக்க அப்போதே முன்னணி வெளிநாட்டு நிறுவனம் இந்த எடைக் குறைப்பை செய்ய ஆரம்பித்தது. தற்போது ஏற்பட்டிருக்கும் பணவீக்கத்தால் இந்த நிறுவனம் இந்த உத்தியை இன்னும் அதிகமான பொருள்களுக்கு விரிவாக்கம் செய்யும் என எதிர்பார்க்கப்படுகிறது. தவிர, வேறொரு உத்தியையும் சில நிறுவனங்கள் அறிமுகப்படுத்த ஆரம்பித் திருக்கின்றன. உதாரணமாக, ஏற்கெனவே இருந்துவரும் விலையான ரூ.10-க்கும் ரூ.35-க்கும் இடைப்பட்ட விலை யில் உள்ள பொருள்களின் எடையை மட்டும் குறைத்து வருகின்றன.

பொதுவாக, குறைவான எடை கொண்ட பொருள்களை வாங்கும் போது நுகர்வோர்கள் விலையில் அக்கறை செலுத்துவதைப்போல பொருளின் எடை எவ்வளவு என்பதில் அதிக கவனம் செலுத்துவதில்லை. உதாரணமாக, ஒரு சாக்லேட் ரூ.40 என்பதில் இருக்கும் கவனம், அது 35 கிராமா இல்லை, 30 கிராமா என்று பார்ப்பதில் இருப்பதில்லை. இந்த மன உளவியலை அறிந்துகொண்ட நிறுவனங்கள் பணவீக்கத்தால் தங்களுக்கு ஏற்படும் சுமையைக் குறைக்க எடைக் குறைப்பு என்கிற உத்தியை கையிலெடுக்க ஆரம்பித்துள்ளன.

இனி கடைகளுக்குச் சென்று எந்தப் பொருளை வாங்குவதாக இருந்தாலும், அதன் எடை எந்த அளவுக்குக் குறைக்கப்பட்டுள்ளது என்பதைப் பார்த்து வாங்குவது அவசியம். பொருள்களைத் தயாரிக்கும் நிறுவனங்கள் மூலப்பொருள்களின் விலை உயர்வு காரணமாக உயர்த்தினாலும், பிற்பாடு இந்த விலையை எப்போதும் குறைக்கவே குறைக்காது!

- சித்தார்த்தன் சுந்தரம்

வித்யா பாலா
வித்யா பாலா

பணவீக்கம்... சிறு முதலீட்டாளர்கள் செய்ய வேண்டியது என்ன?

பணவீக்கம் அதிகரித்துள்ள சூழலில் சாதாரண மக்கள் தங்களுடைய சேமிப்பு, செலவினங்களை எப்படி நிர்வகித்து நிதி நெருக்கடிக்கு உள்ளாகாமல் இருக்க வேண்டும் என்பது பற்றி நிதி ஆலோசகர் வித்யா பாலாவிடம் கேட்டோம். விளக்கமாக எடுத்துச் சொன்னார் அவர்.

‘‘பணவீக்கம் அதிகரிக்கும்போது நம்முடைய செலவினங்கள் அதிகரிக்கும். அல்லது நுகரும் அளவு குறையும். பணவீக்கமானது மாதச் சம்பளக்காரர்களுக்குத் தான் அதிக பாதிப்பை ஏற்படுத்தும். ஏனெனில், பெரும்பாலும் நடுத்தர, மற்றும் பொருளாதாரத்தில் பின்தங்கிய மக்கள், தங்களுடைய வருமானத்தில் பெரும்பகுதியை அத்தியாவசிய செலவுகளுக்காகச் செலவு செய்ய வேண்டிய சூழலில்தான் இருக்கிறார்கள். எனவே, பணவீக்கம் எவ்வளவுதான் அதிகமாக இருந்தாலும், உணவு, பால், உடை, வாடகை, படிப்புச் செலவு, மருந்துகள் போன்ற அத்தியாவசிய செலவுகளைத் தவிர்ப்பது முடியாத காரியம்.

எனவே, செலவுகளைத் தவிர்ப்பதைவிட, அதைச் சரியாகத் திட்டமிடுவதுதான் புத்திசாலித்தனம். முக்கியமாக, நம்முடைய சேமிப்பு, முதலீடுகளை லாபகரமானதாக மாற்றுவது அதாவது, அதிக வருமானம் வரக்கூடிய திட்டங்களில் கவனம் செலுத்துவது நல்லது.

பணவீக்கத்தின் காரணமாக வட்டி விகிதம் உயர்த்தப்படும்போது, டெபாசிட்டுகள் மீதான வட்டியும் கணிசமாக உயரும். ஆனால், அந்த வட்டி விகிதம் எப்போது உயர்த்தப்படும் என்பதை வங்கிகள்தான் தீர்மானிக்கும். அப்படியிருக்கும்போது, பணவீக்கத்தைத் தாண்டிய வருமானம் தரக்கூடிய முதலீட்டுத் திட்டங்களைப் பற்றித் தெரிந்துகொள்ள வேண்டும்.

அவற்றில் முதல் இடத்தில் உள்ளவை, அரசுக் கடன் பத்திரங்கள், மாநில அரசுகளின் (State Development Loans) வளர்ச்சித் திட்டங்களுக்கான கடன் பத்திரங்கள். இவை, பணவீக்கத்தைவிடவும் அதிகமாக வட்டி வருமானம் தரக்கூடியவையாக உள்ளன. இவற்றில் முதலீடுகளை மேற்கொள்ளலாம். இவை உத்தரவாதமான வருமானம் தருவதுடன், பாதுகாப்பான முதலீட்டுத் திட்டமாகவும் இருக்கிறது. இந்தக் கடன் பத்திரங்களை யார் வேண்டுமானாலும் நேரடியாக வாங்கலாம். ரிசர்வ் வங்கியின் இணையதளம் மூலமாக டைரக்ட் ரீடெய்ல் கில்ட் கணக்குத் தொடங்கி இந்தக் கடன் பத்திரங்களை வாங்கலாம். இந்தப் பத்திரங்களின் முதிர்வுக் காலம் ஓராண்டு முதல் 40 ஆண்டுகள் வரை உள்ளன. உங்களுக்கு எத்தனை ஆண்டுகள் கழித்துப் பணம் தேவைப்படுகிறதோ, அதற்கேற்ப முதலீட்டுக் காலத்தைத் தேர்வு செய்யுங்கள். திருமணம், உயர்கல்வி, சுற்றுலா போன்ற இலக்குகளை இந்த பாண்டுகளில் முதலீடு செய்வதன் மூலம் திட்டமிடலாம்.

அதே சமயம், டெபாசிட்டுகள் என்று வரும்போது, வங்கிகளைக் காட்டிலும் ஸ்மால் ஃபைனான்ஸ் பேங்க் என்று சொல்லப்படுகிற குறுங்கடன் வங்கிகள் அதிகமான வட்டியைத் தருவதாக இருக்கின்றன. இவை வங்கிகளைக் காட்டிலும் 1 - 2% வரை அதிகமான வட்டி தருவதாக உள்ளன. பணவீக்கம் அதிகரிக்கும் காலங்களில் கணிசமான தொகையை இதுபோன்ற ஸ்மால் ஃபைனான்ஸ் வங்கிகளில் சேமிக்கலாம். இவை வழக்கமான வங்கிகளின் வட்டியைவிட கூடுதலாக வட்டி தருவதால், குறுகிய காலத்தில் கூடுதல் வட்டி வருமானத்தைப் பெற முடியும். ஆனால், இவற்றில் ரிஸ்க்கும் இருக்கவே செய்கிறது. ரூ.5 லட்சம் வரை டெபாசிட்டுகளுக்கு காப்பீடு தரப்படுவதால், கவலைப்படத் தேவையில்லை.

இவை போக, மூத்த குடிமக்களுக்கான திட்டம் போன்ற அரசு சேமிப்புத் திட்டங்களில் கவனம் செலுத்தலாம். காரணம், இவற்றில் எப்போதுமே சந்தையில் வழங்கப்படும் பிற திட்டங்களின் வட்டி வருமானத்தைவிட கூடுதலாகவே வழங்கப்படும். நீண்ட காலத்தில் ஈக்விட்டி மியூச்சுவல் ஃபண்ட் திட்டங்களில் முதலீடுகளைத் தொடர்ந்து மேற்கொண்டு வரலாம்.

கடன்களின் வட்டி விகிதம் உயர்வதால், இ.எம்.ஐ தொகை அல்லது கடன் செலுத்தும் தவணைக் காலம் அதிகரிக்கும். குறைவாக உள்ள வீட்டுக் கடன் வட்டியே உயரும் என்ற சூழலில், மற்ற கடன்கள் மீதான வட்டி விகிதம் அதிகமாகவே உயரும். எனவே, கடன்கள் வாங்கும் விஷயத்தில் கவனமாக இருக்க வேண்டும். முடிந்தவரை தேவையற்ற கடன்களைத் தவிர்க்கவும். கிரெடிட் கார்டுகளில் அவசியமற்ற பொருள்கள் வாங்குவதையும் குறைத்துக்கொள்ள வேண்டும். சாதாரண இ.எம்.ஐ திட்டங்களைவிடவும் கிரெடிட் கார்டு இ.எம்.ஐ திட்டங்களில் கூடுதலாக வட்டி வசூலிக்கப்படும்.

கிரெடிட் கார்டுகளில் எவ்வளவு பிடித்தம் செய்கிறார்கள் என்பதுகூட பலருக்குத் தெரியாது. ஒவ்வொரு மாத ஸ்டேட்மென்டையும் கவனமாகப் பார்க்க வேண்டும். சரியான காலத்தில் கிரெடிட் கார்டு கட்டணத்தைச் செலுத்த முடிந்தால் மட்டுமே அதைப் பயன்படுத்துங்கள்’’ என்றார்.