Published:Updated:

‘‘3 - 5 ஆண்டுகளில் ஸ்மால்கேப் ஃபண்டுகள் அதிக வருமானம் தரலாம்’’ ‘பிஜிம் இந்தியா ஃபண்ட்’ அனிருதா நாஹா

அனிருதா நாஹா
பிரீமியம் ஸ்டோரி
அனிருதா நாஹா

SPL INTERVIEW

‘‘3 - 5 ஆண்டுகளில் ஸ்மால்கேப் ஃபண்டுகள் அதிக வருமானம் தரலாம்’’ ‘பிஜிம் இந்தியா ஃபண்ட்’ அனிருதா நாஹா

SPL INTERVIEW

Published:Updated:
அனிருதா நாஹா
பிரீமியம் ஸ்டோரி
அனிருதா நாஹா

பங்குச் சந்தை மற்றும் கடன் சந்தையில் சுமார் 20 ஆண்டுகள் அனுபவம் கொண்டவர் அனிருதா நாஹா. இவர் பிஜிம் (PGIM) இந்தியா மியூச்சுவல் ஃபண்ட் நிறுவனத்தின் மூத்த ஃபண்ட் மேனேஜர். நாணயம் விகடன் இதழுக்கு அவர் அளித்த சிறப்பு பேட்டி இனி...

நீங்கள் நிர்வகிக்கும் மியூச்சுவல் ஃபண்ட் திட்டங்கள் பற்றிக் குறிப்பிடுங்களேன்?

“பிஜிம் இந்தியா டைவர்சிஃபைடு ஈக்விட்டி ஃபண்ட், மிட்கேப் ஆப்பர்ச்சூனிட்டீஸ் ஃபண்ட் மற்றும் பேலன்ஸ்டு அட்வான்டேஜ் ஃபண்ட் ஆகியவற்றை நிர்வகித்து வருகிறேன். இந்த மூன்று மியூச்சுவல் ஃபண்டு களின் மூலம் மொத்தம் ரூ.1,600 கோடி நிர்வகித்து வருகிறேன்.”

பிஜிம் என்பது 140 ஆண்டுகள் பழைமையான நிறுவனம். உங்களின் டேக்லைன் ‘அனுபவத்திலிருந்து ஆதாயம்’ (Gain from experience) என்பதாக இருக்கிறது. இது பற்றி சொல்லுங்களேன்.

“எங்களின் தாய் நிறுவனமான பிஜிம் என்பது சர்வதேச அளவில் பெரிய சொத்து மேலாண்மை பிராண்ட் ஆகும். இது நீண்ட பாரம்பர்யத்தைக் கொண்டது. அந்த அனுபவம் முதலீட்டாளர்களுக்கு லாபத்தை அளிக்கிறது.

ஆசியா, ஐரோப்பா, அமெரிக்கா கண்டங்களில் 1,300-க்கும் மேற்பட்ட முதலீட்டு நிபுணர்களுடன் இயங்கி வருகிறோம். எங்களின் அனுபவம் மற்றும் நிபுணத்துவம் மூலம் உலக அளவில் முதலீட்டாளர்களின் நிதி இலக்குகள் மற்றும் கனவுகளை எல்லாம் நிறைவேற்றி வருகிறோம். இதன் அடிப்படையில்தான் அனுபவத் திலிருந்து ஆதாயம் என்கிற டெக்லைனை வைத்திருக்கிறோம்.”

அனிருதா நாஹா
அனிருதா நாஹா

இந்தியப் பங்குச் சந்தையின் எதிர்காலம் எப்படி இருக்கும்?

“கோவிட் தடுப்பூசிகள் கிடைப்பது அதிகரிப்பது, இரண்டாம் அலையின் பாதிப்பு கட்டுக்குள் இருப்பது போன்றவை பொருளாதார வளர்ச்சிக்கு சாதகமாக இருக்கின்றன. ஸ்டீல், சிமென்ட், லாஜிஸ்டிக்ஸ் ஆகிய துறைகள் சிறப்பாகச் செயல்பட்டு வருகின்றன. கொரோனா பாதிப்பு குறையும்போது, சில்லறை வணிகம், ஹோட்டல், மால், மல்ட்டிபிளக்ஸ் ஆகியவை நன்றாகச் செயல்படத் தொடங்கும். நீண்டகாலத்தில் இந்தியப் பங்குச் சந்தை பாசிட்டிவாக இருக்கும்; குறுகிய காலத்தில் ஏற்ற இறக்கத்தில் இருக்கும் என எதிர்ப்பார்க்கிறோம்.”

தற்போது இந்தியப் பங்குச் சந்தையில் முதலீட்டுக்கான வாய்ப்பு இருக்கிறதா?

“மூன்று முதல் 5 ஆண்டுக்கால முதலீட்டு இலக்குடன் இந்தியப் பங்குச் சந்தையை அணுகினால் லார்ஜ்கேப், மிட்கேப், ஸ்மால்கேப் பங்குகளில் முதலீட்டுக்கான நல்ல வாய்ப்புகள் இருக்கின்றன. குறியீடுகளை விட தனிப்பட்ட நிறுவனப் பங்குகள் நிலையில் ஏராளமான வாய்ப்புகள் உள்ளன. நல்ல நிறுவனப் பங்குகளில் செய்யப்படும் முதலீடு லாபகரமாக இருக்க அதிக வாய்ப்பு இருக்கிறது.

அண்மைக் காலத்தில் இந்தியப் பங்குச் சந்தை என்ன விஷயங்களை மியூச்சுவல் ஃபண்ட் நிறுவனங்கள் மற்றும் முதலீட்டாளர் களுக்கு கற்பித்ததாக நீங்கள் நினைக்கிறீர்கள்?

‘‘நாங்கள் முக்கியமாகக் கற்றுக் கொண்டது, நிறுவனங்களின் பண வரத்து (cash flows) நீண்டகாலத்துக்கு வலிமையாக இருக்க வேண்டும் என்பதாகும். அடுத்து நிறுவனங்களின் பேலன்ஸ் ஷீட், நிர்வாகம் நன்றாக இருக்க வேண்டும். மேலும், வணிகத்தில் ரிஸ்க் குறைவாக இருக்க வேண்டும்.

இந்த விஷயங்களைத்தான் முதலீட் டாளர்களும் அண்மை ஆண்டுகளில் கற்றிருப்பார்கள் என நினைக்கிறோம். கொரோனா பாதிப்பு காலத்தில் நல்ல பணவரத்துள்ள நிறுவனங்கள் சிறப்பாகச் செயல்பட்டதைக் கண்கூடாக நாம் அனைவரும் பார்த்தோம்.”

அடுத்த 3 முதல் 5 ஆண்டுகளில் எந்தக் கருத்துகளின் அடிப்படையில் முதலீடு செய்தால் லாபகரமாக இருக்கும்?

“நிதிச் சேவைகள், டிஜிட்டல் மயமாக்கம், நுகர்வு போன்ற தீம்கள், லாபம் தரும் நல்ல முதலீடாக இருக்கும். நாட்டின் மொத்த உள்நாட்டு உற்பத்தியில் (GDP), இந்தியர்களின் தனிநபர் வருமானம் 2,000 டாலரைத் தாண்டும்போது நுகர்வு முன்பைவிட மிகவும் அதிகரிக்கும். பொருளாதாரம் வளரும்போது வங்கிச் சேவைகள் மேம்படும். நாட்டில் இணையப் பயன்பாடு அதிகரிக்கும்போது டிஜிட்டல் வளர்ச்சி பெறும். அந்த வகையில் நிதிச் சேவை, டிஜிட்டல், நுகர்வு துறைகள் சிறப்பான வளர்ச்சியைப் பெறும் எனலாம்.”

முதலீட்டுக்காக ஒரு பங்கைத் தேர்வு செய்யும்போது என்னென்ன விஷயங்களைக் கவனிப்பீர்கள்?

“எங்களின் பங்குத் தேர்வில் முதலில் முக்கியத்துவம் கொடுப்பது வணிகம் சார்ந்த ரிஸ்க்குகளை நீக்குவதாகும். இதற்காக, நிறுவனத்தின் பண வரத்து மற்றும் பேலன்ஸ் ஷீட்டை நன்கு அலசி ஆராய்வோம். மேலும், நீண்டகாலத்தில் நிறுவனத்தின் வணிகம் எவ்வளவு வலிமையாக இருக்கிறது என்பதைக் கவனிப்போம்.”

இப்போது ஸ்மால்கேப் புதிய ஃபண்ட் வெளியாவது ஏன்?

“கடந்த சில ஆண்டுகளாக வலிமையான பணவரத்துடன் நல்ல பேலன்ஸ் ஷீட்டை ஸ்மால் கேப் நிறுவனங்கள் கொண்டுள்ளன. இந்த ஸ்மால் கேப் நிறுவனங்களில் பல, பணமதிப்பு நீக்கம், ஜி.எஸ்.டி அறிமுகம் மற்றும் தற்போதைய கொரோனா பரவல் காலத்திலும் சவால்களைச் சமாளித்து சிறப்பாகச் செயல்பட்டுள்ளன. இன்றைக்கு இந்த கம்பெனிகள் வலிமையான நிதிநிலையைக் கொண்டிருக்கின்றன. மேலும், பொருளாதார வளர்ச்சி மேம்படும்போது, தேவை அதிகரிக்க ஆரம்பித்திருக்கிறது. இதன் தொடர்ச்சியாக அடுத்த சில ஆண்டுகளில் இந்த ஸ்மால் கேப் நிறுவனங்கள் சிறப்பாகச் செயல்படும் எனலாம்.”

இந்த ஸ்மால்கேப் ஃபண்டுகள் மூலம் சிறு முதலீட்டாளர்கள் நல்ல வருமானத்தை எதிர்பார்க்க முடியுமா?

“ஸ்மால்கேப் நிறுவனங்கள் அடுத்து வரும் ஆண்டுகளில் சிறப்பாகச் செயல்படும் என ஏற்கெனவே சொன்னேன். இதன் தொடர்ச்சியாக ஸ்மால் கேப் ஃபண்டுகளும் நல்ல லாபம் கொடுக்கும் என எதிர் பார்க்கலாம்.

கடந்த ஓராண்டில் ஸ்மால் கேப் நிறுவனப் பங்குகள் மற்றும் ஃபண்டுகள் நல்ல வருமானத்தைக் கொடுத்திருக்கின்றன. எனவே, அடுத்து வரும் ஆண்டுகளில் அதேபோல் அதிக வருமானம் தரும் என்கிற எதிர்பார்ப்பைக் குறைத்துக்கொள்வது நல்லது. ஸ்மால்கேப் குறியீடு 50% இறக்கம் நடந்து, ஓராண்டுக்குப் பிறகு நல்ல வருமானம் கொடுத்திருக் கிறது.

அடுத்த 3 முதல் 5 ஆண்டுகளில் ஸ்மால்கேப் பங்குகள் மற்றும் ஃபண்டுகள் அதிக வருமானம் கொடுக்க வாய்ப்புள்ளது. இது லார்ஜ்கேப் பங்குகள் மற்றும் ஃபண்டுகளைவிட அதிகமாக இருக்கும். ஸ்மால்கேப் முதலீடு மூலம் நல்ல லாபம் எதிர்பார்க்கும் முதலீட்டாளர்கள் குறைந்த பட்சம் ஐந்து ஆண்டுகள் முதலீட்டைத் தொடரும் நோக்கத்தோடுதான் முதலீட்டை ஆரம்பிக்க வேண்டும்.”

புதிய முதலீட்டாளர்களுக்கு உங்களின் ஆலோசனை என்ன?

“ஒவ்வொரு சொத்துப் பிரிவிலும் என்ன ரிஸ்க் இருக்கிறது என்பதை சிறு முதலீட்டாளர்கள் அவசியம் அறிந்துகொள்ள வேண்டும். அதன் பிறகே முதலீடு செய்ய வேண்டும்.

பங்கு சார்ந்த சொத்துப் பிரிவுகளில் ஸ்மால்கேப் பங்குகள் மற்றும் ஃபண்டுகள் அதிக ஏற்ற இறக்கம் கொண்டவை. சிறு முதலீட்டாளர்கள், இந்த முதலீடுகளில் இறக்கத்தின் காரணமாக ஏற்படும் மூலதன இழப்பைத் தாங்கக்கூடியவர்களாகவும், அது குறித்து நன்கு அறிந்தவர்களாகவும் இருப்பது அவசியம்.

பங்குச் சந்தையின் ஏற்ற இறக்கத்தைப் புரிந்துகொண்டு செயல்பட்டால் நீண்ட காலத்தில் அதிக வருமானத்தைப் பெற முடியும். ஈக்விட்டி என்பது ஒரு சொத்துப் பிரிவாக உள்ளது. இதில் எஸ்.ஐ.பி முறை அல்லது மொத்த முதலீட்டை மேற்கொள்வது மூலம் நீண்டகாலத்தில் செல்வம் சேர்க்க முடியும். ஒரு நிறுவனத்தின் விற்றுமுதல் என்பது பெருமை. அதன் நிகர லாபம் என்பது நல்ல நிலை. பணவரத்து என்பது ஒரு நிறுவனத்துக்கு உயிராகும். எனவே, விற்றுமுதல், நிகர லாபத்தைவிட பணவரத்துக்கு அதிக முக்கியத்துவம் கொடுங்கள். இதைத்தான் நாங்களும் மியூச்சுவல் ஃபண்ட் திட்டங்களுக்கு நிறுவனப் பங்குகளைத் தேர்வு செய்வதற்கு பின்பற்றுகிறோம்” என்றார்.

இனிவரும் காலத்தில் இந்த நிறுவனத்தின் ஃபண்ட் திட்டங்களை நோக்கி முதலீட்டாளர்கள் திரும்புவார்கள் என்று எதிர்பார்க்கலாம்!

அஸெட் அலொகேஷன் எந்த அளவுக்கு முக்கியமானது?

“அஸெட் அலொகேஷன் (Asset allocation) என்பது முதலீட்டாளரின் ரிஸ்க் எடுக்கும் திறன், முதலீட்டுக் காலம், எதிர்பார்க்கும் வருமானம் ஆகிய மூன்று விஷயங்களைச் சார்ந்திருக்கிறது. வருமானத்தைத் துரத்தி செல்வதற்கு பதில் அஸெட் அலொகேஷன்படி ஈக்விட்டி, டெஃப்ட், தங்கம் ஆகியவற்றில் பிரித்து முதலீடு செய்யும்போது ரிஸ்க் குறைந்து எதிர்பார்க்கும் வருமானத்தைப் பெற முடியும்’’ என்றார் அனிருதா நாஹா.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism