Published:Updated:

அதிக சிபில் ஸ்கோர்... குறைவான வட்டியில் வீட்டுக் கடன் கிடைக்குமா? வழிகாட்டும் ஆலோசகர்...

கேள்வி - பதில் Q & A

பிரீமியம் ஸ்டோரி

கே.கமலா, படப்பை

எனக்கு சிபில் ஸ்கோர் 850 இருக்கிறது. நான் வீட்டுக்கடன் வாங்க உள்ளேன். எனக்கு வழக்கமான வட்டியைவிட குறைவான வட்டியில் வீட்டுக் கடன் கிடைக்குமா?

சுரேஷ் பார்த்தசாரதி, நிதி ஆலோசகர், myassetsconsolidation.com

“முன்னணி வங்கிகள் மற்றும் வீட்டு வசதி நிறுவனங்கள் வீட்டுக் கடனுக்கான வட்டி இதுவரை இல்லாத அளவுக்கு மிகவும் குறைத்துள்ளன. நாட்டின் மிகப் பெரிய பொதுத்துறை வங்கியான எஸ்.பி.ஐ வீட்டுக் கடனுக்கான வட்டியை ரூ.30 லட்சத்துக்கு உட்பட்ட கடன்களுக்கு 6.7 சதவிகிதமாகக் குறைத்துள்ளது. ஆன்லைன் மூலம் கடன் வாங்கும்பட்சத்தில் 0.05% வட்டியில் சலுகை இருக்கிறது.

ஐ.சி.ஐ.சி.ஐ பேங்க், ஹெச்.டி.எஃப்.சி பேங்க், ஹெச்.டி.எஃப்.சி, எல்.ஐ.சி ஹவுஸிங் ஃபைனான்ஸ் உள்ளிட்ட வீட்டு வசதி நிறுவனங்களும் வீட்டுக் கடனுக்கான வட்டியை 7 சதவிகிதத் துக்கும் குறைவாகக் குறைந்துள்ளன. இந்தக் குறைந்த வட்டியில் வீட்டுக் கடன் வாங்க வேண்டும் எனில், கிரெடிட் ஸ்கோர் மிக அதிகமாக இருக்க வேண்டும்.

பொதுவாக 750-க்கு மேல் இருந்தால், குறைந்த வட்டியில் கடன் கிடைக்கும். உங்களின் கிரெடிட் ஸ்கோர் 850-ஆக உள்ளதால், குறைக்கப்பட்ட வட்டியில் கடன் கிடைக்க வாய்ப்புள்ளது. இது தவிர, நீங்கள் பணிபுரியும் நிறுவனம் முன்னணி கார்ப்பரேட் நிறுவனமாக இருந்து, உங்களின் சம்பளம் மிக அதிகமாகவும், கடனைத் திரும்பக் கட்டும் திறன் உங்களுக்கு அதிக மாகவும், வாங்கப்போகும் கடன் சொத்தின் மதிப்பில் 75 சதவிகிதத்துக்கும் குறைவாகவும் இருக்கிறது எனில், வங்கி அல்லது வீட்டு வசதி நிறுவனத்தின் ரிஸ்க் குறைகிறது. அந்த நிலையில் உங்களுக்கு இன்னும் குறைவான வட்டியில் கடன் கிடைக்க வாய்ப்புள்ளது.’’

சிவசங்கர், அடையாறு, சென்னை

நான் என் மகளின் உயர் கல்விக்காக மாதம் ரூ.5,000 முதலீடு செய்யத் திட்டமிட்டுளேன். முதலீட்டுக் காலம் 10 ஆண்டுகள். நான் சில்ட்ரன் மியூச்சுவல் ஃபண்டுகளில் முதலீடு செய்யலாமா? அல்லது வேறு மியூச்சுவல் ஃபண்ட் திட்டங்களில் முதலீடு செய்யலாமா? நான் முதலீடு செய்ய வேண்டிய ஃபண்டுகளைக் குறிப்பிடவும்.

சதீஷ் குமார், மியூச்சுவல் ஃபண்ட் விநியோகஸ்தர், http://sathishspeaks.com/

“பிள்ளைகளின் எதிர் காலம் தொடர்பானது என்பதால், சில்ட்ரன்ஸ் ஃபண்டுகளில்தான் முதலீடு செய்ய வேண்டும் என்கிற அவசியம் இல்லை. உங்களின் முதலீட்டுக் காலம் 10 ஆண்டுகள் என நீண்டதாக இருப்பதால், உங்களின் ரிஸ்க் எடுக்கும் திறனுக்கேற்ப ஃபண்டுகளைத் தேர்வு செய்துகொள்ளலாம். நீங்கள் ஓரளவுக்கு ரிஸ்க் எடுக்கக் கூடியவர் எனில், மிரே அஸெட் ஹைபிரிட் ஈக்விட்டி ஃபண்ட் மற்றும் ஆக்ஸிஸ் புளூசிப் ஃபண்டுகளில் தலா ரூ.2,500 முதலீடு செய்து வரலாம்.நீங்கள் அதிக ரிஸ்க் எடுக்கக்கூடியவர் எனில், மிரே அஸெட் லார்ஜ்கேப் ஃபண்ட் மற்றும் ஆக்ஸிஸ் மிட்கேப் ஃபண்டுகளில் தலா ரூ.2,500 வீதம் பத்து ஆண்டுகளுக்கு முதலீடு செய்து வரலாம். மிக முக்கியமாக, ஆறு மாதத்துக்கு ஒரு முறை இந்த ஃபண்டுகளின் செயல்பாட்டைக் கவனித்து வாருங்கள். தேவைப்பட்டால் நிதி ஆலோசகரின் உதவியை நாடவும்.”

விநாயகமூர்த்தி, திருவண்ணாமலை.

தேசிய சேமிப்புப் பத்திரத்தில் (என்.எஸ்.சி) செய்யப்படும் முதலீட்டுக்கு உள்ள சிறப்பு என்ன?

வி.எஸ்.சரண்சுந்தர், சார்ட்டர்ட் அக்கவுன்டன்ட்

“என்.எஸ்.சி முதலீடு மூலம் கிடைக்கும் வட்டியை மீண்டும் முதலீடு செய்தால், நிபந்தனைக்கு உட்பட்டு அந்தத் தொகைக்கும் வரிச் சலுகை உண்டு. அதாவது, இதர முதலீடுகள் மற்றும் செலவுகள் மூலமான வரிச் சலுகை நிதி ஆண்டில் ரூ. 1.5 லட்சத்தைத் தாண்டாத போது, இந்த வரிச் சலுகை கிடைக்கும். இந்தத் திட்டத்தில், ஆண்டுக்கு ஒரு முறை வட்டி போடப்படும். இந்த வட்டி முதலீட்டாளருக்கு வழங்கப்படாது. அது முதலீட்டாளரின் கணக்கில் சேர்க்கப்படும். இந்தத் தொகை மறுமுதலீடாக கருதப்படும். எனவே, இந்தத் திட்டத்தில் முதலீடு செய் திருப்பவர்கள், அந்த மறு முதலீட்டுத் தொகை அந்த நிதி ஆண்டில் வரிச் சலுகைக் காகக் கழித்துக்கொள்ளலாம். இந்தப் பத்திரம் முதிர்வு பெறும்போது, எந்த வரியும் பிடிக்காமல் வட்டி வருமானம் மற்றும் அசலைத் திருப்பி தருவார்கள். என்.எஸ்.இ மூலமான வட்டி வருமானத்தை இதர வருமானம் எனக் காட்ட வேண்டும். என்.எஸ்.இ திட்டத்தில் இந்துக் கூட்டுக் குடுத்தினர் முதலீடு செய்து வரிச் சலுகை பெற முடியாது என்பது மட்டும் பாதகமான அம்சமாக உள்ளது.”

சுரேஷ் பார்த்தசாரதி, சதீஷ் குமார், வி.எஸ்.சரண்சுந்தர், வித்யா பாலா
சுரேஷ் பார்த்தசாரதி, சதீஷ் குமார், வி.எஸ்.சரண்சுந்தர், வித்யா பாலா

ம.ஆனந்தகுமார், சென்னை - 17

நான் வருமான வரி சேமிப்புக் காக வங்கி ஃபிக்ஸட் டெபாசிட்டில் முதலீடு செய்யலாமா? இதில் கவனிக்க வேண்டிய விஷயங்கள் குறித்து விளக்கவும்.

வித்யா பாலா, இணை நிறுவனர், Primeinvestor.in

“முதலீட்டில் நீங்கள் ரிஸ்க் எடுக்க விரும்பவில்லை என்பதால், ஐந்தாண்டு லாக் இன் கொண்ட வங்கி ஃபிக்ஸட் டெபாசிட் திட்டத்தில் தாராளமாக முதலீடு செய்யலாம். ஆனால், தற்போதைய நிலையில் இந்த முதலீட்டுக்கு ஆண்டுக்கு 6.5% முதல் 6.75% வட்டி கிடைக்கக் கூடும்.

இதில், கவனிக்க வேண்டிய இரு விஷயங்கள். ஒன்று, மிகக் குறைவான வட்டி வருமானம். அடுத்து, அந்த வட்டி வருமானத்துக்கு வரி கட்ட வேண்டும். அந்த வகையில், உங்களின் வரிக்கு பிந்தைய வருமானம் என்பது மிகக் குறைவாக இருக்கும். இது உங்களுக்குப் பிரச்னை இல்லை என்றால், நீங்கள் வரி சேமிப்பு ஃபிக்ஸட் டெபாசிட் திட்டங்களில் முதலீட்டை மேற்கொள்ளலாம்.

இது ஐந்தாண்டு லாக் இன் கொண்ட திட்டம் என்பதால், அதிக வட்டிக்கு ஆசைப்பட்டு அதிக வலுவில்லாத வங்கிகளின் திட்டத்தைத் தேர்வு செய்வதைத் தவிர்க்கவும். சிறப்பாகச் செயல்பட்டு வரும் பெரிய பொதுத்துறை மற்றும் தனியார்துறை வங்கியில் வரிச் சேமிப்புத் திட்டத்தைத் தேர்வு செய்வது ரிஸ்க்கைக் குறைக்கும்.

குறைவான வட்டி வருமானம் அளிக்கும் எஃப்.டிக்கு பதில் மத்திய அரசின் உத்தரவாதத்துடன் கூடிய பப்ளிக் பிராவிடன்ட் ஃபண்ட் (பி.பி.எஃப்) திட்டத்தில் முதலீடு செய்வதன் மூலம் அதிக வட்டி வருமானத்தைப் பெற முடியும். தற்போதைய நிலை யில், பி.பி.எஃப் முதலீட்டுக்கு ஆண்டுக்கு 7.10% வட்டி வழங்கப்படுகிறது. வட்டி வருமானத்துக்கு வரி கிடையாது. அந்த வட்டியை மறுமுதலீடு செய்வதன் மூலம் வரிச் சலுகை பெற முடியும்.

பி.பி.எஃப் திட்டத்தில் செய்யப்படும் முதலீட்டுக் கான லாக்இன் காலம் 15 ஆண்டுகள். நீங்கள் நீண்ட கால முதலீட்டாளர் என்கிற பட்சத்தில் வரிச் சேமிப்புக்கு பி.பி.எஃப் திட்டத்தைத் தேர்வு செய்வது சரியாக இருக்கும்.”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு