Published:Updated:

வங்கி டெபாசிட்டைவிட அதிக வருமானம் தரும் கடன் பத்திரங்கள்! முதலீட்டுக்குப் புதிய அறிமுகம்...

சந்தைக்குப் புதுசு
பிரீமியம் ஸ்டோரி
News
சந்தைக்குப் புதுசு

சந்தைக்குப் புதுசு - N E W S C H E M E S

சசி ரேகா

அண்மையில் சந்தையில் அறிமுகம் ஆகியுள்ள புதிய திட்டங்களில் சிலவற்றைப் பார்ப்போம்.

எஸ்.பி.ஐ இன்டர்நேஷனல் அக்சஸ் யு.எஸ் ஈக்விட்டி ஃபண்ட்ஸ் ஆஃப் ஃபண்ட் (SBI International Access - US Equity FoF)

சமீப காலமாக, வெளிநாட்டு பங்குச் சந்தைகளில் முதலீடு செய்ய நம் நாட்டவர்கள் அதிக ஆர்வம் காட்டி வருகிறார்கள். பங்குச் சந்தையின் முன்னோடியான வாரன் பஃபெட் தமது முதலீட்டாளர்களுக்கு எழுதிய கடிதத்தில் ‘அமெரிக்க மார்க்கெட் மேலும் உயரும்’ என்று சொல்லியிருப்பது இங்கு குறிப்பிடத் தக்கது.

முதலீட்டாளர்களின் ஆர்வத்தை ஈடேற்ற எஸ்.பி.ஐ மியூச்சுவல் ஃபண்ட் நிறுவனம், அமெரிக்க பங்குச் சந்தையில் முதலீடு செய்யும் இந்தத் திட்டத்தைக் கொண்டு் வருகிறது. இது மார்ச் 15 அன்று முடிவடைகிறது. என்றாலும், மார்ச் கடைசி வாரத்தில் இருந்து ஓப்பன் மார்க்கெட்டில் இந்தத் திட்டத்தில் முதலீடு செய்ய முடியும்.

இதில் முதலீடு செய்யும்போது நுழைவுக் கட்டணம் கிடையாது. ஒரு வருடத்துக்குள் வெளியேறினால் 1% வெளியேறும் கட்டணம் செலுத்த வேண்டும். இது ஓப்பன் எண்டடு வகையைச் சேர்ந்தது. குறைந்தபட்சம் 5,000 ரூபாயிலிருந்து முதலீட்டை ஆரம்பிக்கலாம். குரோத் மற்றும் டிவிடெண்ட் என்கிற இரண்டு வகைகளில் முதலீடு செய்யலாம். ரெகுலர் மற்றும் டைரக்ட் பிளான் வழிகளில் நேரடியாகவும் முதலீடு செய்ய முடியும். எஸ்.ஐ.பி முறையில் முதலீடு செய்யும் வசதியும் உள்ளது

முதலீடு பெறப்படும் தொகை இந்திய ரூபாயில் இருந்து அமெரிக்கா டாலராக மாற்றப்பட்டு அமெரிக்க பங்குச் சந்தையில் முதலீடு செய்யப்படும்.

இது ஒரு ஃபண்ட் ஆஃப் ஃபண்ட் வகை திட்டமாகும். அமெரிக்காவில் உள்ள அமுன்டி ஃபண்ட்ஸ் என்ற நிறுவனம், உலக அளவில் பங்கு சந்தையில் அதிக முதலீடு செய்யும் நிறுவனமாக உள்ளது. அவர்களுடன் கைகோத்து எஸ்.பி.ஐ இந்தத் திட்டத்தைச் செயல்படுத்த உள்ளது.

இதில் திரட்டப்படும் நிதியானது முழுவதும் பங்குச் சந்தையில் முதலீடு செய்யப்படும். மேலும், மாறுபடும் அமெரிக்க டாலர் காரணிகளாலும் ஈட்டப்படும் வருமானம் வேறுபடும். அதனால் அதிக ரிஸ்க் எடுக்கும் திறன் கொண்ட முதலீட்டாளர்கள் மட்டும் இந்தத் திட்டத்தில் சேரலாம். அமெரிக்கப் பங்குச் சந்தையில் முதலீடு செய்ய ஆர்வம் உள்ள முதலீட்டாளர்களுக்கு இந்தத் திட்டம் ஒரு வரப்பிரசாதம்.

கடன் பத்திரம்
கடன் பத்திரம்

ஐ.ஐ.எஃப்.எல் ஃபைனான்ஸின் பங்குகளாக மாறாத கடன் பத்திரங்கள் (IIFL Finance NCD)

ஐ.ஐ.எஃப்.எல் ஃபைனான்ஸ் நிறுவனம் 1,000 கோடி ரூபாய் அளவுக்கு இந்தத் முதலீட்டுத் திட்டத்தை அறிமுகம் செய்துள்ளது.

இந்த பாண்டுகளில் பொதுமக்கள் அனைவரும் முதலீடு செய்யலாம். சந்தையில் மிக அதிகமாக 10.03% என்று இந்த பாண்டுகளில் முதலீடு செய்யும் பணத்துக்கு வட்டி நிர்ணயம் செய்யப் பட்டுள்ளது. இந்த வட்டித் தொகையை ஒவ்வொரு மாத முடிவிலோ, ஆண்டு முடிவிலோ கடன் காலம் முடிந்த பிறகோ பெரும் வசதி உள்ளது.

இதன் திட்டக் காலமாக 87 மாதம் நிர்ணயம் செய்யப்பட்டுள்ளது. மார்ச் 23 வரை இந்த என்.சி.டியில் முதலீடு செய்ய முடியும். வங்கி டெபாசிட்டைவிட அதிக வருமானம் வேண்டுபவர்கள் இந்தத் திட்டத்தில் சேர்ந்து பயன் பெறலாம்.

டி.எஸ்.பி ஃப்ளோட்டர் ஃபண்ட்

டி.எஸ்.பி மியூச்சுவல் ஃபண்ட் நிறுவனம் மாறுபடும் வட்டி விகிதங்களைக் கொண்ட கடன் பத்திரங்களில் முதலீடு செய்யும் ரிஸ்க் குறைவான புதிய திட்டத்தை அறிமுகப்படுத்தி உள்ளது.

இந்தத் திட்டம் 65% முதல் 100% வரை மாறுபடும் வட்டி விகிதங்கள் கொண்ட பாண்டுகளிலும் அதிக பட்சமாக 35% வரை நிலையான வட்டி கொண்ட பாண்டுகளிலும் முதலீடு செய்யும் வகையில் வடிவமைக்கப்பட்டுள்ளது.

இந்தத் திட்டத்தில் மார்ச் 17 வரை முதலீடு செய்ய முடியும். திரட்டப்படும் நிதி, ஒரு வருடம் முதல் 4 வருடங்கள் வரை முதிர்வு கொண்ட, கடன் பத்திரங்களில் முதலீடு செய்யப்படும்.

ரிஸ்க் குறைவான முதலீட்டுத் திட்டமான இதில் குறுகிய காலத்தில் வங்கி டெபாசிட்டை விட அதிக வருமானம் வேண்டு பவர்கள் முதலீடு செய்யலாம்.

அஞ்சலக சேமிப்புக் கணக்கு: குறைந்தபட்ச வரம்பு ரூ.20,000-ஆக உயர்வு..!

அஞ்சலக சேமிப்புக் கணக்குகளில் இருந்து நாளொன்றுக்கு 5,000 ரூபாய் வரை மட்டுமே எடுக்க முடியும் என்பதை 20,000-ஆக உயர்த்தியிருக்கிறது தபால் துறை. பெரும்பான்மையான நடுத்தர வருமானம் உடைய மக்கள், அஞ்சலகங்களில்தான் சேமிப்புக் கணக்கு வைத்திருக்கிறார்கள். பின்தங்கிய கிராமங்களிலும் அஞ்சலகங்கள் செயல்படுவதால், மக்கள் தமது பணத்தைச் சேமிப்பதற்கு அஞ்சலகங்களை நாடுகின்றனர்.

வங்கிச் சேவைகளுக்கேற்ப தரம் உயர்த்தும் அரசின் நடவடிக்கையின் ஒரு பகுதியாக அஞ்சலக சேமிப்புத் திட்டத்தின் குறைந்தபட்ச பணம் எடுக்கும் அளவை அரசு ரூ.20 ஆயிரமாக அதிகரித்துள்ளது. இந்த மாற்றம் அஞ்சலகத் திட்டங்களில் கணக்கு வைத்திருக்கும் லட்சக்கணக்கான மக்களுக்கு உதவியாக இருக்கும். கடந்த சில ஆண்டுகளாக அஞ்சலகக் கணக்கு தொடங்கப்படுவது குறைந்து வருகிறது. இதுபோன்ற மாறுதல்கள் மக்களை மீண்டும் அஞ்சலக சேமிப்புத் திட்டங்களின்மேல் முதலீடு செய்ய உதவும் என்ற நோக்கில் இந்த மாறுதல் கொண்டுவரப்பட்டுள்ளது.