கேம்ஸ் ஐ.பி.ஓ முதலீடு செய்யலாமா? - முதலீட்டாளர்கள் கவனத்துக்கு..!

கே ம்ஸ் நிறுவனம் மியூச்சுவல் ஃபண்ட் மற்றும் பிற நிதி நிறுவனங்களுக்கு நிதி சார்ந்த உள்கட்டமைப்பு மற்றும் சேவைகளை வழங்கும் தொழில்நுட்ப நிறுவனமாகும். . மியூச்சுவல் ஃபண்ட் பரிவர்த்தனைகளின் பதிவு மற்றும் பரிமாற்ற நடவடிக்கைகளை நிர்வகிக்கும் நிறுவனமான கேம்ஸ், இந்திய மியூச்சுவல் ஃபண்ட் துறையின் 70% பரிவர்த்தனைப் பங்களிப்பைத் தன்வசம் வைத்திருக்கும் பெரிய நிறுவனமாகும். கிரிசில் அறிக்கையின்படி, மியூச்சுவல் ஃபண்ட் துறை நிர்வகிக்கும் சொத்து மதிப்பில் கேம்ஸ் நிர்வகிக்கும் பங்களிப்பு 2015-ல் 61 சதவிதமாக இருந்தது, 2020 மார்ச்சில் 69 சதவிகிதமாக உயர்ந்துள்ளது.

. வார்பர்க் பின்கஸ் எல்.எல்.சி மற்றும் என்.எஸ்.இ இந்த இரண்டு நிறுவனங்களும் கேம்ஸில் முக்கியப் பங்குதாரர்களாக உள்ளன. ஆனால், செபி கடந்த பிப்ரவரியில் கேம்ஸ் நிறுவனத்தில் என்.எஸ்.இ வைத்திருக்கும் பங்குகளை விற்பனை செய்ய வேண்டும் என்றும், கேம்ஸ் நிறுவனத்தின் இயக்குநர் பொறுப்புகளிலிருந்தும் என்.எஸ்.இ வெளியேற வேண்டும் என்றும் உத்தரவிட்டது. இதற்கு ஓராண்டு அவகாசம் அளித்துள்ளது. மேலும், கேம்ஸ் நிறுவனத்தில் வாக்களிப்பது மற்றும் பிற நிறுவனம் சார்ந்த லாபங்களில் பங்கு பெறுவது போன்றவற்றிலும் ஈடுபடக் கூடாது என்றும் கூறியுள்ளது. 2014-ல் என்.எஸ்.இ-யின் இணை நிறுவனமான என்.எஸ்.இ இன்வெஸ்ட்மென்ட்ஸ் லிமிடெட் நிறுவனம் கேம்ஸ் நிறுவனத்தின் பங்குகளை வாங்கும்போது முன்கூட்டியே செபியிடம் அனுமதி பெற்றிருக்க வேண்டும் என்று கருதுகிறது. 2019 மார்ச் 31 நிலவரப்படி, என்.எஸ்.இ இன்வெஸ்ட்மென்ட்ஸ் நிறுவனம் கேம்ஸ் நிறுவனத்தில் 37.5% அதாவது, 1,82,85,000.00 பங்குகளைத் தன்வசம் வைத்துள்ளது.

. செபியிடம் பதிவு செய்யப்பட்ட மறுமதிப்பீட்டு அறிக்கையின்படி, பங்கு விற்பனைத் திட்டத்தில் 1.82 கோடி பங்குகளை விற்க என்.எஸ்.இ இன்வெஸ்ட்மென்ட்ஸ் நிறுவனம் திட்டமிட்டிருப்பதாகத் தெரிகிறது. இதற்கான விலைப்பட்டை ரூ.1,200 முதல் 1,240 வரையில் இருக்கலாம்.

. கேம்ஸின் பட்டியலிடப்படாத பங்குகள் தற்போது வெளிச்சந்தையில் ரூ.350-360 என்ற விலையில் விற்பனை ஆகிறது. பங்கின் அதிகபட்ச விலை வரம்பு அடிப்படையில் பார்க்கும்போது, பங்கு விற்பனையின் மதிப்பு ரூ.2,260 கோடி ஆகும். 2019-2020 நிதி ஆண்டில் நிறுவனத்தின் வரிக்குப் பிந்தைய லாபம் ரூ.173 கோடி ஆகும். வருவாய் ரூ.721 கோடி ஆகும். இந்த வெளியீட்டில் பங்கு அதிக பிரீமியம் விலையாக இருந்தாலும், கேம்ஸ் அதன் பிரிவில் பங்குச் சந்தையில் பட்டியலாகும் முதல் நிறுவனமாக உள்ளது.

கேம்ஸ் நிறுவனத்தின் பிசினஸ் மாடல் வலுவாக உள்ளது. இந்திய நிதித்துறையில் கடந்த 20 ஆண்டுகளாக கேம்ஸ் நிறுவனம் தொழில்நுட்ப சேவைகளை வழங்கிவருகிறது. இந்தப் பிரிவில் சிறந்த பதிவாளராகவும் பரிமாற்றத் தரகு நிறுவனமாகவும் சொத்து நிர்வகிப்புத் துறையில் பெயர் பெற்று விளங்குகிறது. மேலும், தனியார் ஆயுள் காப்பீடு நிறுவனங்கள், தனியார் மியூச்சுவல் ஃபண்ட் நிறுவனங்கள், வங்கிகள் மற்றும் வங்கி அல்லாத நிதி நிறுவனங்கள் போன்றவற்றுக்கு தொழில்நுட்பம் சார்ந்து தீர்வு வழங்கும் சிறந்த கூட்டாளியாகவும் இருந்துவருகிறது.

. குறிப்பாக, டிஜிட்டல் சார்ந்த சேவைகளைத் தனது கூட்டு நிறுவனங்களுக்கு வழங்கும் வகையில் கேம்ஸ் தன்னை தகவமைத்துக் கொண்டது. இந்தியா முழுவதையும் உள்ளடக்கும் வகையில் சேவை மையங்களை நிறுவியுள்ளது. மேலும், வாடிக்கையாளர் சேவை மையங்கள், இணையதளம், மொபைல் செயலி மற்றும் சாட்பாட் சேவை ஆகியவற்றை கட்டமைத்துள்ளது. நாடு முழுவதும் 278 வாடிக்கையாளர் சேவை மையங்களை அமைத்துள்ளது. மியூச்சுவல் ஃபண்ட் மற்றும் காப்பீடு மீது மக்களின் ஆர்வம் அதிகரித்து வருகிறது. தொடர்ந்து இந்தத் துறைகளில் முதலீடுகள் அதிகரித்துவருவதால், கேம்ஸ் நிறுவனத்தின் வளர்ச்சியும் வலுவாகவே இருக்கும் என எதிர்பார்க்கலாம்.

எனவே, இப்போது வரும் கேம்ஸ் ஐ.பி.ஓ-வில் தாராளமாக விண்ணப்பிக்கலாம். ஆனால், பட்டியலாகும்போது கிடைக்கும் லாபத்துக்காகப் பங்குகளை விற்பனை செய்துவிடாமல், தொடர்ந்து முதலீட்டை வைத்திருக்கலாம். சி.டி.எஸ்.எல் போலவே, கேம்ஸ் நிறுவனப் பங்கும் நீண்டகாலத்தில் நல்ல வளர்ச்சியைத் தரும். நம் நாட்டில் இன்னும் பலதரப்பட்ட மக்கள் முதலீடு செய்யத் தொடங்கும்போது முதலீட்டுக் கலாசாரம் அதிகரிக்கும்போது கேம்ஸ் நிறுவனமும் வளர்ச்சியடையும். எனவே, முதலீடு செய்து நீண்டகாலத்துக்கு வைத்திருக்கலாம்.

கேம்ஸ் ஐ.பி.ஓ முதலீடு செய்யலாமா? - முதலீட்டாளர்கள் கவனத்துக்கு..!

நாணயம் விகடன் டீம்