Published:Updated:

இளமையிலேயே பணி ஓய்வுபெற என்ன செய்ய வேண்டும்?

மிடில் கிளாஸ் டு மில்லியனர்
பிரீமியம் ஸ்டோரி
மிடில் கிளாஸ் டு மில்லியனர்

மிடில் கிளாஸ் டு மில்லியனர் - 22

இளமையிலேயே பணி ஓய்வுபெற என்ன செய்ய வேண்டும்?

மிடில் கிளாஸ் டு மில்லியனர் - 22

Published:Updated:
மிடில் கிளாஸ் டு மில்லியனர்
பிரீமியம் ஸ்டோரி
மிடில் கிளாஸ் டு மில்லியனர்

இன்றைக்கு 22-23 வயதில் வேலைக்குச் சேரும் இளைஞர்களும் இளம் பெண்களும் 35, 40 வயதுக்குள் பணி ஓய்வு பெற்றுவிட வேண்டும் எனத் திட்டமிடுகிறார்கள். இந்த எண்ணம் மிக அதிக சம்பளம் பெறும் தகவல் தொழில்நுட்பத் துறையில் பணிபுரிபவர்கள் மத்தியில் மிக அதிகமாக இருப்பதைப் பார்க்க முடிகிறது.

எம்.சதீஷ் குமார் 
நிறுவனர், 
http://sathishspeaks.com/
எம்.சதீஷ் குமார் நிறுவனர், http://sathishspeaks.com/

நம் பெற்றோர்களை எடுத்துக்கொண்டால், அவர்கள் 30, 35, 40 ஆண்டுகள் ஒரே நிறுவனத்தில் வேலை பார்த்து பணி ஓய்வு பெற்றவர்களாக இருந்தார்கள். ஆனால், அடுத்து வரும் தலைமுறையினர் நான்கு ஐந்து நிறுவனத்தில் வேலை பார்த்துவிட்டு, 40 - 45 வயதில் பணி ஓய்வு பெற்றுவிட வேண்டும் என நினைக்கிறார்கள்.

முந்தைய தலைமுறையினர் படித்து முடித்த பின் கொஞ்சம் சாவகாசமாகத்தான் வேலைக்குச் சேர்ந்தார்கள். ஆனால், இன்றைய தலைமுறையினரோ கல்லூரி முடித்த கையுடன் 22, 23 வயதில் ஏதாவது ஒரு நிறுவனத்தில் வேலைக்குச் சேர்ந்துவிடுகிறார்கள்.

ஒரு நிறுவனத்தில் அதிகபட்சம் ஐந்து ஆண்டுகள் என மூன்று, நான்கு நிறுவனங்களில் வேலை பார்த்துவிட்டு, அதன் பிறகு வீட்டில் ஜாலியாக சும்மா இருக்க வேண்டும் என நினைப்பதில்லை. அப்போதும் அவர்களுக்குப் பிடித்த ஏதாவது ஒரு வேலையை செய்து டென்ஷன் இல்லாமல் சம்பாதிக்க நினைக்கிறார்கள்.

அவர்களுக்குப் பிடித்தமான விஷயம் அல்லது பொழுதுபோக்கை ஓய்வுக்காலத்தில் பயன்படுத்தி சம்பாதிக்கவும், பிசினஸ் செய்ய வேண்டும் எனவும், பகுதி நேரமாக வேலை செய்ய வேண்டும் எனவும் நினைக்கிறார்கள்.

இளமையிலேயே பணி ஓய்வுபெற 
என்ன செய்ய வேண்டும்?

தொகுப்பு நிதி ரூ.1 கோடி...

இவர்கள் அனைவரும் ரூ.1 கோடியை தொகுப்பு நிதியாகச் சேர்த்துவிட்டார்கள் எனில், அவர்கள் விரும்பியதுபோல் 35, 40 வயதில் தாராளமாக பணி ஓய்வு பெற்றுவிடலாம்.

ஓய்வுக்கால தொகுப்பு நிதி ரூ.1 கோடியை எப்படிச் சேர்ப்பது என்பதைப் பார்ப்போம்.

இந்தத் தொகுப்பு நிதியை விரைவிலேயே உருவாக்க ஒருவர் மூன்று தங்க விதிமுறைகளைப் பின்பற்றுவது அவசியமாகும்.

1. சம்பளத்தில் பாதி சேமிப்பு...

பழைய தலைமுறையைச் சேர்ந்தவர்கள் ஆயுள் முழுக்க கஷ்டப்பட்டு பல லட்சங்களைச் சேர்த்தார்கள். காரணம், அந்தக் காலத்தில் அவர்கள் சம்பாதித்த வருமானம் குறை வாகவே இருந்தது. அதேபோல, இந்தத் தலைமுறையினரும் செய்யக் கூடாது.

காரணம், இந்தத் தலைமுறையினர் ஓரளவு நன்றாகவே சம்பாதிக்கின்றனர். பொதுவாக, இன்றைய இளைஞர்கள் 15% - 20% தொகையைச் சேமித்தாலே பெரிய விஷயமாக இருக்கிறது. ஆனால், 40 - 45 வயதில் முன்கூட்டியே பணி ஓய்வு பெறத் திட்டமிட்டால், நீங்கள் உங்கள் சம்பளம் அல்லது வருமானத்தில் 50% - 70% வரை சேமிக்க வேண்டும்.

உங்களின் மாதச் சம்பளம் ரூ.1 லட்சம் எனில், மாதம்தோறும் ரூ.50,000 முதல் ரூ.70,000 வரை கட்டாயம் நீங்கள் சேமிக்க வேண்டும். மேலும், எந்தக் கடனையும் வைத்துக்கொள்ளக் கூடாது. அப்போதுதான் இளம் வயதிலேயே ஓய்வு என்கிற இலக்கை சுலபமாக அடைய முடியும்.

2. மிக எளிய வாழ்க்கை...

எவ்வளவுக்கு எவ்வளவு எளிய வாழ்க்கை வாழ முடியுமோ, அவ்வளவுக்கு அவ்வளவு எளிமையாக வாழ வேண்டும். உலகின் மிகப் பெரிய கோடீஸ்வரர்களான வாரன் பஃபெட், ஃபேஸ்புக் நிறுவனர் மார்க் சக்கர்பெர்க் ஆகியோர் மிகவும் எளிமையான வாழ்க்கையைத்தான் வாழ்ந்து வருகிறார்கள்.

உங்களுடைய வணிகம் மற்றும் வேலைக்கு கார் தேவையெனில், சிறிய அளவிலான கார் வாங்கிக்கொள்ளுங்கள். அந்தஸ்தைக் காட்டும், ஆடம்பரத்தை வெளிக்காட்டும் சொகுசு கார் வேண்டவே வேண்டாம். அப்படிச் செய்தால் மட்டுமே உங்களுடைய சம்பளத்தில் 50% - 70% சேமிக்க முடியும்.

3. புத்திசாலித்தனமான முதலீடு...

சேமிக்கும் இந்த அதிகப் பணத்தை புத்திசாலித்தனமாக முதலீடு செய்ய வேண்டும். ஃபிக்ஸட் டெபாசிட், தங்கம், லைஃப் இன்ஷூரன்ஸ் எண்டோவ்மென்ட் பாலிசி, ரெக்கரிங் டெபாசிட் போன்றவற்றில் முதலீடு செய்வது புத்திசாலித்தனமானது அல்ல. மற்றும் லாபகரமானது இல்லை. இத்தகைய முதலீடுகள் மூலம் பணவீக்கம் அளவுக்கு அல்லது அதைவிடக் குறைவாகத்தான் வட்டி / வருமானம் கிடைக்கும்.

பணவீக்க விகிதத்தை அதிக வருமானம் தரக்கூடிய மற்றும் வருமானத்துக்குக் குறைவான வரி கட்டும் பங்குச் சந்தை சார்ந்த மியூச்சுவல் ஃபண்டுகள் மற்றும் நிறுவனப் பங்குகளில் முதலீடு செய்வது மிகவும் அவசியமாகும்.

சம்பளம் / வருமானத்தில் 50% - 70% சேமிப்பது, எளிமையான வாழ்க்கை முறை, புத்திசாலித்தன மான முதலீடு என இந்த மூன்று தங்க விதிமுறைகள்தான் இளமை யிலேயே பணி ஓய்வு பெறுவதன் அடிப்படையாகும்.

இளமையிலேயே பணி ஓய்வுபெற 
என்ன செய்ய வேண்டும்?

மாதம் ரூ.50,000 முதலீடு...

உங்களுக்கு ஓய்வுக்காலத் தொகுப்பு நிதியாக ரூ.1 கோடி தேவைப்படும். இந்தத் தொகையைச் சேர்த்து விட்டீர்கள் எனில், தாராளமாக நீங்கள் வேலையை விட்டு விடலாம். ஆனால், இந்த ஒரு கோடி ரூபாயை எப்படிச் சேர்ப்பது?

உங்களால் மாதம் ரூ.50,000 முதலீடு செய்ய முடியும் எனில், 8 ஆண்டுகள் 3 மாதங்கள் அதாவது, 100 மாதங்கள் நீங்கள் செய்யும் மொத்த முதலீடு என்பது ரூ.50 லட்சமாக இருக்கும். இந்த முதலீடு ஆண்டுக்கு சராசரியாக 15% வளர்ச்சி கண்டால் ரூ.1 கோடி தொகுப்பு நிதி உருவாகிவிடும்.

இந்த ஒரு கோடியிலிருந்து ஆண்டுக்கு 8% தொகை அதாவது, ரூ. 8 லட்சம் எடுப்பதாக வைத்துக் கொள்வோம். அதாவது, மாதம் ரூ.66,666. இந்தத் தொகையை மாதச் செலவுக்கு வைத்துக் கொள்ளலாம். உங்கள் தொகுப்பு நிதி ஆண்டுக்கு 14% - 15% வளர்ச்சி அடையும்போது, அதிலிருந்து ஆண்டுக்கு 8% தொகையை எடுக்கும் போது, தொகுப்பு நிதி அவ்வளவு சீக்கிரமாகக் காலியாகாது.

மேலும், 40 வயதிலேயே ஓய்வு பெற விரும்பும் இந்தக் காலத்து இளைஞர்கள் வீட்டில் சும்மா இருக்காமல், தங்களுக்குப் பிடித்த வகையில் எளிமை யான வேலை அல்லது வணிகம் அல்லது தொழில் செய்யவே விரும்பு கிறார்கள். அதிலிருந்தும் வருமானம்/ சம்பாத்தியம் வரப் போகிறது. பிரதான வருமானமாக ஓய்வுக்காலத் தொகுப்பு நிதி யிலிருந்து கிடைப்பதை வைத்துக் கொள்ளுங்கள்.

மாதம் ரூ.50,000 முதலீடு செய்வது இயலாத காரியம் எனில், மாதம் ரூ.25,000 வீதம் 12 ஆண்டு களுக்கு அதாவது, 144 மாதங்களுக்கு மொத்தம் ரூ.36 லட்சம் முதலீடு செய்வதாக வைத்துக்கொள்வோம். உங்களுக்குக் கிடைக்கக்கூடிய தொகுப்பு நிதி ரூ.1 கோடியாக இருக்கும்.

23 வயதில் வேலைக்குச் சேர்ந்து மாதம் ரூ.25,000 வீதம் 12 ஆண்டுகள் முதலீடு செய்துவந்தால் உங்களின் 35-வது வயதில் ரூ.1 கோடி சேர்ந்து விடும். இன்னும் 5 ஆண்டுகள் 40 வயது வரை முதலீடு செய்துவந்தால், உங்களுக்கு போதிய அளவைவிட அதிகமாகவே தொகுப்பு நிதி சேர்ந்துவிடும்.

பங்குச் சந்தை சார்ந்த மியூச்சுவல் ஃபண்டுகள், நிறுவனப் பங்குகள் மூலம் ஆண்டுக்கு சராசரியாக 15% வருமானம் சாத்தியமா எனில், சாத்தியம்தான். அதற்கு உங்களின் ஈக்விட்டி மியூச்சுவல் ஃபண்ட் முதலீடுகளை 3 - 6 மாதத்துக்கு ஒருமுறை அலசி ஆராய்ந்து தேவையான மாற்றங்களைச் செய்வது அவசியம்.

இத்தகைய முதலீட்டு விஷயங்களை உங்களால் நேரம் ஒதுக்கி மேற்கொள்ள முடியவில்லை என்கிற நிலையில், நல்ல நிதி ஆலோசகர் வசம் ஒப்படைத்துவிடுவது லாபகரமாக இருக்கும்.

ஆக, 40 - 45 வயதில் ஓய்வு பெறுவது என்பது முடியாத செயல் அல்லவே அல்ல. சம்பாதிக்கத் தொடங்கிய ஆரம்ப காலம் முதலே திட்டமிட்டுச் செயல்படத் தொடங்கினால், ஒருவர் சீக்கிரத்திலேயே ஒரு கோடி ரூபாய்க்கு மேலேயே சேர்க்க முடியும்.

எனவே, வாழ்க்கையில் விரைவில் ஓய்வு பெற வேண்டும், மனம் விரும்பும் வாழ்க்கை முறைக்கு மாற வேண்டும் என நினைப்பவர்கள், இளம் வயது முதலே அதற்கான தொகுப்பு நிதியைச் சேர்க்கத் தொடங்குவது அவசியத்திலும் அவசியம்.

(கோடீஸ்வரர் ஆவோம்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism