Published:Updated:

இ.எல்.எஸ்.எஸ் ஃபண்ட்... தவறான நம்பிக்கைகள், சரியான விளக்கங்கள்!

இ.எல்.எஸ்.எஸ் ஃபண்ட்
பிரீமியம் ஸ்டோரி
இ.எல்.எஸ்.எஸ் ஃபண்ட்

இ.எல்.எஸ்.எஸ் ஃபண்ட்

இ.எல்.எஸ்.எஸ் ஃபண்ட்... தவறான நம்பிக்கைகள், சரியான விளக்கங்கள்!

இ.எல்.எஸ்.எஸ் ஃபண்ட்

Published:Updated:
இ.எல்.எஸ்.எஸ் ஃபண்ட்
பிரீமியம் ஸ்டோரி
இ.எல்.எஸ்.எஸ் ஃபண்ட்

ஆர்.வெங்கடேஷ், நிறுவனர், www.gururamfinancialservices.com

வருமான வரியை மிச்சப்படுத்த உதவும் பங்குச் சந்தை சேமிப்புத் திட்டம் (Equity Linked Savings Scheme - ELSS) குறித்த பல்வேறு தவறான நம்பிக்கைகள் (Myths) முதலீட்டாளர்கள் இடையே நிலவுகிறது. அவற்றுக்குச் சரியான பதில் இனி...

ஆர்.வெங்கடேஷ் 
நிறுவனர், 
www.gururamfinancialservices.com
ஆர்.வெங்கடேஷ் நிறுவனர், www.gururamfinancialservices.com

தவறான நம்பிக்கை 1: இ.எல்.எஸ்.எஸ் ஃபண்ட் வரிச் சேமிப்புக்கு மட்டுமே

விளக்கம்: இந்த ஃபண்டில் செய்யப்படும் முதலீட்டுக்கு வருமான வரிச் சலுகை கிடைக்கிறது என்பதால், இதைப் பலரும் வரிச் சேமிப்புக்கு மட்டுமே என்று நினைக்கிறார்கள். ஆனால், உண்மை அதுவல்ல. இந்த ஃபண்டில் திரட்டப்படும் நிதியானது பல்வேறு துறை களைச் சேர்ந்த பல நிறுவனப் பங்குகளில் பிரித்து முதலீடு செய்யும் டைவர்சிஃபைடு ஃபண்டாக இருக்கிறது. அந்த வகையில் இதில் அனைத்துத் தரப்பினரும் முதலீடு செய்யலாம். அதுவும் குறிப்பாக, புதிதாக பங்குச் சந்தை சார்ந்த மியூச்சுவல் ஃபண்டுகளில் முதலீடு செய்பவர்கள் இந்த ஃபண்டில் முதலீடு செய்யலாம். காரணம், இந்த ஃபண்ட் மூன்று ஆண்டுகள் ‘லாக் இன் பிரீயட்’ காலத்தைக் கொண்டிருப்பதால், இடையில் சந்தை இறங்கினால், பயந்து முதலீட்டை வெளியில் எடுப்பது தடுக்கப்படுகிறது.

இந்த ஃபண்டில் வரிச் சலுகை தேவை இல்லாதவர்களும் முதலீடு செய்யலாம். ஆனால், அவர்களும் மூன்று ஆண்டுகளுக்குள் முதலீட்டை வெளியில் எடுக்க முடியாது என்பதை மறக்கக் கூடாது.

தவறான நம்பிக்கை 2: இ.எல்.எஸ்.எஸ் ஃபண்ட் முதலீடு மூன்று ஆண்டுகளுக்கு மட்டுமே

விளக்கம்: இந்த ஃபண்டில் ‘லாக் இன் பிரீயட்’ மூன்று ஆண்டுகளாக இருப்பதால் முதலீடு செய்தவர்களில் பலரும் மூன்று ஆண்டுகள் முடிந்ததும் பணத்தை வெளியே எடுத்துவிட வேண்டும் என நினைக்கிறார்கள். இது தவறான எண்ணம். மூன்று ஆண்டு ‘லாக் இன் பீரியட்’ முடிந்ததும் பணத்தை எடுக்க வேண்டும் என்கிற எந்த அவசியமும் இல்லை.

இந்த ஃபண்டில் முதலீடு செய்த தொகை நல்ல லாபம் தந்திருக்கும்பட்சத்தில், பணத் தேவை இருக்கிறது எனில், எடுத்துக்கொள்ளலாம். அப்படி இல்லையெனில், எவ்வளவு நாளைக்கு வேண்டுமானாலும் இந்த முதலீட்டைத் தொடரலாம். மூன்று ஆண்டு ‘லாக் இன் பிரீயட்’ முடிந்ததும், உங்களின் இ.எல்.எஸ்.எஸ் ஃபண்ட் முதலீடு ஓப்பன் எண்டட் ஃபண்டாக மாறிவிடும். அதன் பிறகு, எப்போது வேண்டு மானாலும் உங்களின் தேவைக்கேற்ப அதன் யூனிட்டுகளை விற்றுப் பணம் எடுத்துக் கொள்ளலாம்.

இ.எல்.எஸ்.எஸ் ஃபண்ட்... தவறான நம்பிக்கைகள், சரியான விளக்கங்கள்!

தவறான நம்பிக்கை 3: இ.எல்.எஸ்.எஸ் ஃபண்டில் எஸ்.ஐ.பி முறையில் மூன்று ஆண்டுகள் முதலீடு செய்துவந்தால், மூன்று ஆண்டுகள் கழித்ததும் மொத்தப் பணத்தையும் எடுத்துக்கொள்ள முடியும்.

விளக்கம்: மியூச்சுவல் ஃபண்டில் எஸ்.ஐ.பி முறையில் செய்யப்படும் ஒவ்வொரு தவணை யும் தனி முதலீடாக எடுத்துக்கொள்ளப்படும். இதை ஓர் உதாரணம் மூலம் பார்ப்போம். ஒருவர் மாதம் ரூ.5,000 எஸ்.ஐ.பி முதலீட்டை 2018 நவம்பர் 5-ம் தேதி ஆரம்பித்திருக்கிறார். அவர் 2021 நவம்பர் 5-ம் தேதி வரை மூன்று ஆண்டுகள் எஸ்.ஐ.பி முதலீட்டைத் தொடர்ந்தார். அவர் இப்போது மொத்த முதலீடான அதாவது, இந்த ஃபண்டில் எஸ்.ஐ.பி முறையில் செய்த மொத்த முதலீடு 1,80,000 ரூபாயை மொத்தமாக எடுக்க முடியாது.

எஸ்.ஐ.பி முறையில் முதன்முதலில் முதலீடு செய்ய ரூ.5,000-க்கு ஒதுக்கப்பட்ட யூனிட்டு களை மட்டுமே 2021 நவம்பரில் விற்க முடியும். மற்ற யூனிட்டுகள் ‘லாக் இன் பீரியட்’ முடியும் நிலையில் இருக்கும். 2021 டிசம்பரில், 2018 டிசம்பரில் செய்யப்பட்ட 5,000 ரூபாய்க்கான யூனிட்டுகளை யும் சேர்த்து விற்க முடியும். இப்படியே 2021 நவம்பரில் செய்யப்பட்ட 5,000 ரூபாய்க்கான யூனிட்டுகளை 2024 நவம்பரில்தான் விற்க முடியும். 2024 நவம்பருக்குப் பிறகு அனைத்து யூனிட்டுகளையும் விற்று, பணமாக்கிக்கொள்ள முடியும்.

தவறான நம்பிக்கை 4: இ.எல்.எஸ்.எஸ் ஃபண்ட் ஒரு குளோஸ்டு எண்டட் ஃபண்ட்

விளக்கம்: வரிச் சேமிப்பு மியூச்சுவல் ஃபண்ட் திட்டத்தில் முதலீட்டை மூன்று ஆண்டுகளுக்கு எடுக்க முடியாது என்பதால், பலரும் அதை குளோஸ்டு எண்டட் ஃபண்ட் என்றே நினைக்கிறார்கள். குளோஸ்டு எண்டட் ஃபண்டு களில் புதிய ஃபண்ட் வெளியீட்டின்போது (NFO) மட்டுமே முதலீடு செய்ய முடியும். இ.எல்.எஸ்.எஸ் ஃபண்டில் அப்படி இல்லை. எப்போது வேண்டுமானாலும் முதலீடு செய்ய முடியும் என்பதால், இது குளோஸ்டு எண்டட் ஃபண்ட் இல்லை; ஓப்பன் எண்டட் ஃபண்ட் ஆகும்.

தவறான நம்பிக்கை 5: இ.எல்.எஸ்.எஸ் ஃபண்டில் ஒருவர் ரூ.1.5 லட்சம் மட்டுமே முதலீடு செய்ய முடியும்

விளக்கம்: பப்ளிக் பிராவிடன்ட் ஃபண்ட் (PPF) போல, வரிச் சேமிப்பு மியூச்சுவல் ஃபண்டில் ஒருவர் நிதி ஆண்டில் அதிகபட்சம் ரூ.1.5 லட்சம்தான் முதலீடு செய்ய வேண்டும் என்ற எந்தக் கட்டுப்பாடும் கிடையாது. ஒருவர் இ.எல்.எஸ்.எஸ். ஃபண்டில் நிதி ஆண்டில் எவ்வளவு வேண்டு மானாலும் முதலீடு செய்துகொள்ளலாம். ஆனால், நிபந்தனைக்கு உட்பட்டு 80சி பிரிவின்கீழ் ரூ.1.5 லட்சம் வரைக்கும்தான் வரிச் சலுகை பெற முடியும்.

தவறான நம்பிக்கை 6: இ.எல்.எஸ்.எஸ் ஃபண்ட் ஒரு குறுகிய கால முதலீடு ஆகும்

விளக்கம்: இந்த வரிச் சேமிப்பு ஃபண்டுக்கு ‘லாக் இன் பீரியட்’ மூன்று ஆண்டுகள் என்பதால், பலரும் இதைக் குறுகியகால முதலீட்டுத் திட்டமாக நினைக்கிறார்கள். ஆனால், இந்த ஃபண்ட் செல்வம் சேர்க்க, நீண்ட கால நிதி இலக்குகளை நிறைவேற்றிக்கொள்ள ஒருவர் எவ்வளவு காலத்துக்கு வேண்டுமானாலும் பயன்படுத்திக்கொள்ளலாம்.

சிலர் இந்த வரிச் சேமிப்பு ஃபண்டில், தொடர்ந்து பல ஆண்டுகளாக ஆண்டுக்கு சுமார் ரூ.1.5 லட்சம் வருமான வரியைச் சேமிக்க முதலீடு செய்துவிட்டு, அதை அப்படியே விட்டுவிடுகிறார்கள். அந்தத் தொகை நீண்ட காலத்தில் கோடி ரூபாயாகக்கூட அதிகரித்திருக்கிறது.

தவறான நம்பிக்கை 7: இ.எல்.எஸ்.எஸ் ஃபண்ட் அதிக ரிஸ்க் ஆனது

விளக்கம்: வரிச் சேமிப்பு மியூச்சுவல் ஃபண்ட் அதிக ரிஸ்க்கானது. அதனால், அதைத் தவிர்ப்பது நல்லது எனச் சிலர் நினைக்கிறார்கள். அது தவறு.

இந்த ஃபண்டில் திரட்டப்படும் நிதியில் நிறுவனப் பங்குகள் மற்றும் அது சார்ந்த ஆவணங் களில் குறைந்தபட்சம் 80% தொகை முதலீடு செய்யப்படும். பொதுவாக, பங்குச் சந்தை மற்றும் பங்குச் சந்தை சார்ந்த ஃபண்ட் முதலீடு ஏற்ற இறக்கத் துக்கு உட்பட்டதாகும். இ.எல்.எஸ்.எஸ் ஃபண்டில் திரட்டப் படும் பணம் 30 முதல் 40 வரையிலான பல்வேறு துறை களைச் சேர்ந்த நிறுவனப் பங்கு களில் பிரித்து முதலீடு செய்யப் படுவதால், அது டைவர்சிஃபைடு ஃபண்டாக இருப்பதால், நீண்ட காலத்தில் ரிஸ்க் குறைகிறது. இந்த இ.எல்.எஸ்.எஸ் ஃபண்ட் நீண்ட கால முதலீட்டுக்கு ஏற்றதாக இருக்கிறது.

தவறான நம்பிக்கை 8: இ.எல்.எஸ்.எஸ் ஃபண்டில் முதலீடு செய்ய டீமேட் கணக்கு தேவை

விளக்கம்: அப்படி எந்தக் கட்டாயமும் இல்லை. பொதுவாக, மியூச்சுவல் ஃபண்டில் டீமேட் கணக்கு இல்லாமல், பான் மற்றும் ஆதார் எண் அடிப்படையில் முதலீடு செய்ய முடியும். டீமேட் இருக்கும்பட்சத்தில் அதன்மூலம் முதலீடு செய்தால், ஆவணங்களை பராமரிப்பது சுலபமாக இருக்கும்.

தவறான நம்பிக்கை 9: இ.எல்.எஸ்.எஸ் ஃபண்டில் மொத்த முதலீடு மட்டுமே செய்ய முடியும்

விளக்கம்: வரிச் சேமிப்பு மியூச்சுவல் ஃபண்ட் திட்டத்தில் ஒருவர் தாராளமாக மொத்த முதலீடு மற்றும் சிஸ்டமேட்டிக் இன்வெஸ்ட்மென்ட் பிளான் (SIP) மற்றும் இடையிடையே எப்போதெல்லாம் அவரால் முதலீடு செய்ய முடியுமோ, அப்போதெல்லாம் முதலீடு செய்துகொள்ளலாம். எந்த முதலீடாக இருந்தாலும் குறைந்தபட்சம் ரூ.500 இருந்தால் போதும். அனைவரும் வரிச் சேமிப்புக்காக இந்த ஃபண்டை பயன்படுத்த வேண்டும் என்பதற்காக குறைந்தபட்ச முதலீடு குறைவாக வைக்கப் பட்டிருக்கிறது.

தவறான நம்பிக்கை 10: இ.எல்.எஸ்.எஸ் ஃபண்டில் மறுசுழற்சி லாபகரமானது

விளக்கம்: சில முதலீட்டாளர்கள், ‘லாக் இன் பீரியட்’ மூன்று ஆண்டுகள் நிறைவு பெற்றதும், யூனிட்டுகளை விற்று மறுமுதலீடு செய்கிறார்கள். இதன்மூலம் அவர்கள் மீண்டும் அந்தக் குறிப்பிட்ட நிதி ஆண்டில் 80சி பிரிவின்கீழ் வரிச் சலுகை பெறுகிறார்கள். இப்படிச் செய்வதன் மூலம் அந்தக் குறிப்பிட்ட ஆண்டில் இதர செலவுக்கு அதிக தொகை கிடைக்கக் கூடும். ஆனால், இப்படிச் செய்வதன் மூலம் ஒருவர் நீண்ட காலத்தில் அதிக தொகையைச் சேர்ப்பது தடைபடும். மேலும், செலவாளியாக மாறவும் வாய்ப்பிருக்கிறது.

தவறான நம்பிக்கை 11: அனைத்து இ.எல்.எஸ்.எஸ் ஃபண்டுகளும் ஒன்றுதான்

விளக்கம்: வரிச் சேமிப்புக்காக முதலீடு செய்யும் வங்கி ஃபிக்ஸட் டெபாசிட் மற்றும் பொது சேமநல நிதித் திட்டம் அனைவருக்கும் ஒரே வருமானத்தைக் கொடுக்கும். ஆனால், இ.எல்.எஸ்.எஸ் ஃபண்ட் வருமானம் என்பது ஒவ்வொரு ஃபண்டைப் பொறுத்து மாறுபடும். காரணம், அந்தக் குறிப்பிட்ட ஃபண்டில் முதலீடு செய்யப்பட்டிருக்கும் நிறுவனப் பங்குகளின் வருமானத்தைப் பொறுத்து வருமானம் மாற்றத்துக்கு உட்பட்டதாகும். பொதுவாக, செபி வரையறைபடி திரட்டப்படும் நிதியில் 80% வரை இந்த ஃபண்டில் நிறுவனப் பங்குகளில் ஃபண்ட் மேனேஜரின் முடிவுக்கு ஏற்ப முதலீடு செய்யப்படும்.

தவறான நம்பிக்கை 12: வரிச் சேமிப்பு பெற ஒரே ஃபண்டில் முதலீடு செய்ய வேண்டும்

விளக்கம்: அப்படி எல்லாம் இல்லை. ஒருவர் வருமான வரிச் சலுகை பெற ரூ.1.5 லட்சம் வரையிலான தொகையை எத்தனை இ.எல்.எஸ்.எஸ் ஃபண்டு களிலும் முதலீடு செய்யலாம். இந்த ஆண்டில் சில ஃபண்டுகளில் முதலீடு செய்யலாம். அடுத்த ஆண்டு வேறு ஃபண்டுகளில் முதலீடு செய்யலாம். இதில் எந்த நிபந்தனையும் கிடையாது.

ஒருவர் வரிச் சேமிப்புக்காக மாதம் ரூ.5,000 முதலீடு செய்கிறார் எனில், ரூ.1,000 வீதம் ஐந்து ஃபண்டுகளில்கூட முதலீடு செய்யலாம்.

இந்த ஃபண்டுகளில் இன்றே முதலீடு செய்ய பரிசீலியுங்கள்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism