Published:Updated:

யூ.டி.ஐ நிஃப்டி 200 மொமென்டம் 30 இண்டெக்ஸ் ஃபண்ட்... முதலீடு செய்யலாமா?

vikatan
பிரீமியம் ஸ்டோரி
News
vikatan

சந்தைக்குப் புதுசு - N E W S C H E M ES

சசி ரேகா

அண்மையில் சந்தைக்குப் புதிதாக வந்திருக்கும் சில முதலீட்டுத் திட்டங்களைப் பார்ப்போம்.

ஐ.டி.ஐ மிட்கேப் ஃபண்ட் (ITI MIDCAP FUND)

ஐ.டி.ஐ மியூச்சுவல் ஃபண்ட் நிறுவனம், புதிதாக ஐ.டி.ஐ மிட்கேப் ஃபண்ட் என்ற பங்குச் சந்தையில் நடுத்தர வகை நிறுவனங்களில் முதலீடு செய்யும் புதிய வகை திட்டத்தை வெளியிடுகிறது. இது ஓப்பன் எண்டடு வகையைச் சேர்ந்தது. இதில் குறைந்தபட்சம் 5,000 ரூபாயிலிருந்து முதலீட்டை ஆரம்பிக்கலாம். இந்தப் புதிய ஃபண்ட் வெளியீட்டுக்கு பிப்ரவரி 15 முதல் மார்ச் 1 வரை விண்ணப்பிக்க முடியும். மார்ச் 15-க்குப் பிறகு, இந்தத் திட்டத்தில் ஓப்பன் மார்க்கெட்டில் முதலீடு செய்ய முடியும். இதில் முதலீடு செய்யும்போது நுழைவு மற்றும் வெளியேறும் கட்டணம் கிடையாது. எஸ்.ஐ.பி முறையில் குறைந்தபட்சமாக 1,000 ரூபாய் மற்றும் ஆறு மாதங்கள் என்ற அளவில் இந்தத் திட்டத்தில் முதலீடு செய்ய முடியும். இதில், ரெகுலர் மற்றும் டைரக்ட் பிளான் மூலம் முதலீடு செய்யலாம். குரோத் மற்றும் டிவிடெண்ட் என்ற வகைகளில் முதலீடு செய்யலாம்.

இந்தத் திட்டத்தில் திரட்டப்படும் நிதியானது பெரும்பாலும் மத்தியத் தரப்பு நிறுவனங்களிலும், சிறுபகுதி கடன் பத்திரங்களிலும் முதலீடு செய்யப்படும். மிட்கேப் ஃபண்டுகள் கடந்த 10 ஆண்டுக்காலத்தில் கூட்டு வட்டி அடிப்படையில் 16% - 19% வரை லாபம் வழங்கி வருகின்றன.

குறுகியகாலத்தில் சந்தையின் ஏற்ற இறக்கம் காரணமாக அதிக ரிஸ்க் உடைய திட்டமாக இது உள்ளது. அதனால் அதிக ரிஸ்க் எடுக்கும் திறன் கொண்ட முதலீட்டாளர்கள் நீண்டகால நோக்கில் குறைந்த பட்சமாக 3-5 ஆண்டுகளுக்கு மேல் முதலீடு செய்யும்பட்சத்தில் இந்தத் திட்டத்தில் முதலீடு செய்யலாம்.

ஃபண்ட்
ஃபண்ட்

யூ.டி.ஐ நிஃப்டி 200 மொமென்டம் 30 இண்டெக்ஸ் ஃபண்ட் (UTI Nifty 200 Momentum 30 index Fund)

யூ.டி.ஐ மியூச்சுவல் ஃபண்ட், நிறுவனம், நிஃப்டி 200 இண்டெக்ஸில் 30 நிறுவனங்களைத் தேர்ந்தெடுத்து முதலீடு செய்யும் இந்தப் புது வகை திட்டத்தை அறிமுகம் செய்துள்ளது.

இந்தத் திட்டத்தில் மார்ச் 4 வரை முதலீடு செய்ய முடியும். இதில் திரட்டப்படும் நிதியில் 95% நிஃப்டி 200 இண்டெக்ஸில் சந்தையின் ஏற்ற இறக்கத்துக்கேற்ப கடந்த ஆறு மாதங்கள் முதல் ஒரு வருடம் என்ற அடிப்படையில் அதிக வருமானம் தந்த பங்குகளில் துறை வாரியாகத் தேர்ந்தெடுத்து முதலீடு செய்யப்படும்.

இந்தத் திட்டமும் பங்குச் சந்தையின் ஏற்ற இறக்கம் காரணமாக அதிக ரிஸ்க் உடையதாக இருக்கிறது. அதனால் அதிக ரிஸ்க் எடுக்கும் திறன் கொண்ட முதலீட்டாளர்கள் நீண்டகால நோக்கில் முதலீடு செய்யலாம்.

கோட்டக் நிஃப்டி நெக்ஸ்ட் 50 இண்டெக்ஸ் ஃபண்ட் (Kotak Nifty Next 50 Index Fund)

என்.எஸ்.இ-யின் நெக்ஸ்ட் 50 இண்டெக்ஸில் உள்ள பங்குகளில் முதலீடு செய்யும் திட்டத்தை கோட்டக் மியூச்சுவல் ஃபண்ட் நிறுவனம் அறிமுகம் செய்துள்ளது.

இந்தத் திட்டத்தில் பிப்ரவரி 24-ம் தேதி வரை முதலீடு செய்யலாம். திரட்டப்படும் நிதியில் 95% நிஃப்டி நெக்ஸ்ட் 50 இண்டெக்ஸில் முதலீடு செய்யப்படும். இதில் முதலீடு செய்யும்போது நுழைவு மற்றும் வெளியேறும் கட்டணம் கிடையாது. இதில் ரெகுலர் மற்றும் டைரக்ட் பிளான் மூலம் முதலீடு செய்யலாம்.

குரோத் மற்றும் டிவிடெண்ட் (டிவிடெண்ட் மற்றும் டிவிடெண்ட் மறுமுதலீடு) என்கிற இரண்டு வகைகளில் முதலீடு செய்யலாம். 95% நிதி, பங்குச் சந்தையில் முதலீடு செய்யப்படுவதால், சந்தையின் ஏற்ற இறக்கங்களுக்கேற்ப லாபம் கிடைக்கும்.

நிப்பான் நிஃப்டி 50 வேல்யூ 20 இண்டெக்ஸ் ஃபண்ட்

நிப்பான் இந்தியா மியூச்சுவல் ஃபண்ட் நிறுவனம், பிப்ரவரி முதல் வாரத்தில் நிஃப்டி இண்டெக்ஸில் இடம்பெற்றுள்ள சிறந்த 20 நிறுவனங்களில் முதலீடு செய்யப்படும் நிப்பான் நிஃப்டி 50 வேல்யூ 20 இண்டெக்ஸ் ஃபண்ட் (Nippon Nifty 50 Value 20 Index Fund) என்ற திட்டத்தையும் சிறந்த 150 மிட்கேப் நிறுவனங்களில் முதலீடு செய்யப்படும் நிப்பான் இந்தியா நிஃப்டி மிட்கேப் 150 இண்டெக்ஸ் ஃபண்ட் (Nippon India Nifty Midcap 150 Index) என்ற திட்டத்தையும் அறிமுகப் படுத்தியது.

இந்தத் திட்டத்தில் என்.எஃப்.ஓ (NFO) மூலம் விண்ணப்பிக்கும் தேதி தற்போது கடந்துவிட்டது. என்றாலும், இந்த இரண்டு திட்டங்களிலும் ஓப்பன் மார்க்கெட்டில் பிப்ரவரி 26 முதல் நாம் முதலீடு செய்ய முடியும்!

மோட்டார் பாலிசி எடுக்கப்போகிறீர்களா? உஷார்

பெங்களூரைத் தலைமையிடமாகக் கொண்ட டிஜிட்டல் மோட்டார் நேஷனல் இன்ஷூரன்ஸ் (Digital Motor National Insurance) நிறுவனம் மோட்டார் பாலிசிகளை வழங்கி வருகிறது. ஆனால், இந்த நிறுவனம் மோட்டார் பாலிசிகளை விற்பதற்கு இந்தியக் காப்பீட்டு மேம்பாட்டு மற்றும் ஒழுங்குமுறை ஆணையத்திடம் (IRDAI) எந்த முறையான அனுமதியும் பெறவில்லை. ஐ.ஆர்.டி.ஏ.ஐ, இந்த நிறுவனத்தை நம்பி எந்தக் காப்பீடு திட்டத்திலும் சேர வேண்டாம் என்று எச்சரித்துள்ளது. ஏற்கெனவே பாலிசி எடுத்தவர்கள் புதுப்பிக்க வேண்டாம்.