Published:Updated:

25 வயதில் மாதம் ரூ.4,360.. 60 வயதில் ரூ.1 கோடி... ஓய்வுக்காலத்தை இனிமையாக்கும் கூட்டுவட்டிக் கணக்கு!

ஓய்வுக்கால முதலீடு
பிரீமியம் ஸ்டோரி
ஓய்வுக்கால முதலீடு

C O V E R S T O R Y

25 வயதில் மாதம் ரூ.4,360.. 60 வயதில் ரூ.1 கோடி... ஓய்வுக்காலத்தை இனிமையாக்கும் கூட்டுவட்டிக் கணக்கு!

C O V E R S T O R Y

Published:Updated:
ஓய்வுக்கால முதலீடு
பிரீமியம் ஸ்டோரி
ஓய்வுக்கால முதலீடு

ஓய்வு என்பதற்கு என்ன அர்த்தம் தெரியுமா? பாதுகாப்பான இடத்துக்கு நகர்வது என்பதுதான். அலைந்து திரிந்து வருகிறீர்கள். சற்று ஓய்வெடுக்க வேண்டும் என்று நினைத்து, ஒரு கட்டடத்தின்கீழ் உட்காருகிறீர்கள். அந்தக் கட்டடம் எப்போது வேண்டுமானாலும் இடிந்து விழலாம் என்கிற மாதிரி இருக்கிறது. அங்கே நீங்கள் நிம்மதியாக ஓய்வெடுக்க முடியுமா...? முடியாது இல்லையா...?

கா.ராமலிங்கம்
இணை நிறுவனர், 
Holistic
investment.in
கா.ராமலிங்கம் இணை நிறுவனர், Holistic investment.in

அதே மாதிரித்தான் ஒவ்வொரு மனிதனின் ஓய்வுக்காலமும். ஆணோ, பெண்ணோ 60 வயதுக்குப்பிறகு தங்கள் வாழ்க்கையில் பொருளாதாரக் கஷ்டங்களை அனுபவிக்காமல் பாதுகாப்பான மனநிலையில் இருப்பதுதான் நிம்மதியான ஓய்வுக் காலத்துக்கு அடிப்படை. ஆனால், இன்றைக்கு ஓய்வுக்காலத்தை நெருங்கியவர்களின் நிலையும், இன்னும் சில ஆண்டுகளில் நெருங்கப் போகிறவர்களின் நிலையும் அப்படியா இருக்கிறது?

அரசுத் துறை ஊழியர்களுக்காவது கொஞ்சநஞ்சம் பென்ஷன் கிடைத்து தப்பிக்க முடிகிறது. ஆனால், தனியார் நிறுவனங்களில் வேலை பார்ப்பவர்களுக்கு பென்ஷன் என்று எதுவும் கிடைப்பதில்லை. பி.எஃப்-ல் சேர்த்துவைத்த சில லட்சங்களையும் மகன், மகளின் திருமணத்துக்குச் செலவு செய்துவிட்டு, மிச்சமிருக்கும் காலத்தை அவர்களின் கருணையில் வாழவேண்டிய கட்டாயத்தில்தான் இன்றைக்குப் பல பெற்றோர்கள் இருக்கிறார்கள். இதனால், 60 வயதுக்குப் பிறகும் தகுதிக்குக் குறை வான வேலைக்குப் போக வேண்டிய கட்டாயத்தில் இருக்கிறார்கள். வாழ்நாள் முழுக்க குடும்பத்துக்காக உழைத்துவிட்டு, 60 வயதுக்குப் பிறகு தனக்கும் தன் மனைவிக்குமான செலவுகளுக்கு மகனையோ, மகளையோ நம்பியிருக்க வேண்டிய கட்டாயத்தில், அவர்களுக்கு சுமையாக இருப்பது எத்தனை கொடுமையான விஷயம்..!

25 வயதில் மாதம் ரூ.4,360.. 60 வயதில் ரூ.1 கோடி... ஓய்வுக்காலத்தை இனிமையாக்கும் கூட்டுவட்டிக் கணக்கு!

‘‘சம்பாதிக்கும் காலத்திலேயே ஓய்வுக்காலத்துக்கென கொஞ்சம் சேமித்து வைத்திருந்தால், இன்றைக்கு இத்தனை கஷ்டப்படத் தேவை இல்லையே’’ என்ற எண்ணம் 60 வயதுக்குப் பிறகு வந்து எந்தப் பிரயோ ஜனமும் இல்லை. 25 வயதிலேயே ஓய்வுக் காலத்துக்காக கொஞ்சம் கொஞ்சமாக பணத்தைச் சேர்த்துவைக்க வேண்டும் என்று நினைத்து, அதற்கான திட்ட மிடலைச் செய்து, அதை செயல் படுத்துவதே ஓய்வுக்காலத்தில் யாரையும் எதிர்பார்க்காமல் இருப்பதற்கு மிகச் சிறந்த வழி. ஒருவர் இதற்கு என்ன செய்ய வேண்டும், ஓய்வுக்காலத்தில் நமக்குத் தேவையான பணத்தைச் சேர்க்கும் அவசியத்தையும் சேர்க்கும் வழிகளையும் தெரிந்துகொள்வது எப்படி என்று பார்ப்போம்.

25 வயதில் ஓய்வுக்காலத் திட்டமிடல்...

பொதுவாக, இளம் வயதில்தான் நாம் அதிகம் சம்பாதிப்போம். அந்தக் காலத்தில்தான் நமக்கு அதிகமான நிதி இலக்குகளும் இருக்கும். குறிப்பாக, பிள்ளைகளின் உயர்கல்வி, கல்யாணம், சொந்த வீடு ஆகியவற்றுக்குத் திட்ட மிட்டிருப்போம். ஆனால், ஓய்வுக் காலத்துக்குச் சேர்க்க வேண்டிய பணம் பற்றி நினைத்துக்கூட பார்க்க மாட்டோம். ஒவ்வொருவரும் செய்யும் பெரிய தவறு இது. குழந்தைகளின் படிப்பு, திருமணம், சொந்த வீடு என்பதெல்லாம் நமக்கும் நம் குடும்பத்துக்கும் எந்த அளவுக்கு முக்கியமோ, அந்த அளவுக்கு முக்கியம் நம் ஓய்வுக் காலத்துக்குத் திட்டமிடுவதும், அதை நடைமுறைப்படுத்துவதும். எல்லாவற்றையும் செய்துவிட்டு, குடும்பத்தின் எல்லா இலக்கை நிறைவேற்றத் தேவையான நடவடிக்கையை எடுத்துவிட்டு, இந்த ஒரு விஷயத்தில் குறை வைத்தால், ஓய்வுக்காலத்தில் நாம் நிம்மதியாக இருப்போமா என்பது கேள்விக்குறிதான்.

25 வயதில் மாதம் ரூ.4,360.. 60 வயதில் ரூ.1 கோடி... ஓய்வுக்காலத்தை இனிமையாக்கும் கூட்டுவட்டிக் கணக்கு!
25 வயதில் மாதம் ரூ.4,360.. 60 வயதில் ரூ.1 கோடி... ஓய்வுக்காலத்தை இனிமையாக்கும் கூட்டுவட்டிக் கணக்கு!

பி.எஃப்-ம், இன்ஷூரன்ஸும் போதாது...

ஒரு சிலர், ‘‘எனக்கு பி.எஃப், கிராஜூவிட்டி, எஃப்.டி முதலீடு மற்றும் வீட்டு வாடகை இருக்கிறது. இவற்றை எல்லாம் வைத்து நாம் நிம்மதியாக இருந்துவிடுவேன்’’ என்கிறார்கள். ஆனால், இவை எல்லாம் ஓய்வுக்காலத்தில் நமக்கான வருமானம் தரும் ஒரு சிறிய ஆதாரமே தவிர, இவற்றை மட்டுமே முழுமையாக நம்பி நம்மால் இருக்க முடியாது; இருக்கவும் கூடாது.

வேறு சிலர், ‘‘ஓய்வுக்கால பென்ஷன் இன்ஷூரன்ஸ் பிளான் எடுத்திருக்கிறேன். எனவே, என் ஓய்வுக்காலம் பற்றி எனக்கு எந்தக் கவலையும் இல்லை” என்கிறார்கள். ரெடிமேட் ரிட்டயர்மென்ட் பிளான்கள்மூலம் நமக்கு ஓரளவு வருமானம் கிடைத்தாலும், அதை மட்டுமே வைத்து ஓய்வுக்காலத்தை நிம்மதியாக ஓட்டிவிட முடியாது.

பி.எஃப் தொகை, வீட்டு வாடகை, இன்ஷூரன்ஸ் பிளான்கள் ஆகியவற்றை நம்பி யிருந்தால், ஓய்வுக்காலத்தில் உங்களின் தேவைகளைக் குறைத்துக்கொண்டு வாழ வேண்டிய கட்டாயம் ஏற்படும். மேலும், இந்தத் திட்டங்களின் மூலம் கிடைக்கும் பணத்தை வைத்து எவ்வளவு காலத்தைக் கடத்த முடியும் என்பது கேள்விக்குறிதான். .

எப்படித் திட்டமிட வேண்டும்?

உங்களின் ஓய்வுக்காலத் திட்டமிடல் நடைமுறைக்கு சாத்தியமானதாக இருக்க வேண்டும். முதலில் ஓய்வுக் காலத்துக்கு எவ்வளவு காலம் இருக்கிறது, பணி ஓய்வுக்குப்பிறகு தோராயமாக எவ்வளவு காலம் நாம் உயிர் வாழ வாய்ப்பிருக்கிறது, ஓய்வுக்கால தொகுப்பு நிதியாக எவ்வளவு பணம் உங்களிடம் இருக்க வேண்டும் என்பது குறித்து துல்லியமாக இல்லை என்றாலும் தோராயமாகமாவது கணக்கிட்டு, ஒரு தொகையை நிர்ணயம் செய்ய வேண்டும்.

25 வயதில் மாதம் ரூ.4,360.. 60 வயதில் ரூ.1 கோடி... ஓய்வுக்காலத்தை இனிமையாக்கும் கூட்டுவட்டிக் கணக்கு!

ஓய்வுக்காலத் திட்டமிடல்: கவனிக்க வேண்டிய அம்சங்கள்...

ஓய்வுக்காலத்துக்கு திட்டமிட மிகச் சரியான வயது 25-லிருந்து 30 வயது என்பதை ஏற்கெனவே பார்த்தோம். உங்கள் ஓய்வுக்கால வாழ்க்கை எவ்வளவு காலத்துக்கு என்கிற கேள்வியும் முக்கியமானது. இதற்கு உங்களின் ஓய்வு பெறும் வயது தெரிய வேண்டும். காரணம், 58 வயதில்தான் எல்லோரும் ஓய்வு பெறுவார்கள் என்று நினைக்கத் தேவையில்லை. சிலர் 50 வயதிலேயேகூட ஓய்வு எடுக்க நினைக்கலாம். அப்படி முன்கூட்டியே ஓய்வெடுக்க நினைத்தால், இளமைப் பருவத்திலேயே அதிக தொகையை சேர்க்க வேண்டும்.

தவிர, ஓய்வுக்காலத்துக்காக நீங்கள் பணம் சேர்த்துவரும் வேளையில், உங்களின் உடல்நலம், பணிப் பாதுகாப்பு, எதிர்பாராத உடல் செயல் இழப்பு, சாதகம் இல்லாத குடும்பச் சூழ்நிலைகள் மற்றும் எதிர்பாராத புதிய நிதி இலக்குகள் உருவாதல் போன்றவை நம் பணி ஓய்வு வயதைக் குறைக்கவோ, அதிகரிக்கவோ செய்யும் .

உதாரணமாக, ஒருவர் 60 வயதில் ஓய்வு பெறத் திட்டமிட்டிருந்தார். ஆனால், அவருக்கு இடைப்பட்ட காலத்தில் திடீரென மாரடைப்பு வருகிறது. இந்த நிலையில் அவர் அமைதியான மற்றும் பதற்றமில்லாத வாழ்க்கை வாழ வேண்டும் எனில், முன்கூட்டியே பணி ஓய்வு பெற வேண்டியிருக்கும். அந்த நிலையில், ஓய்வுக்காலத்துக்காகத் திட்டமிட்ட தொகையை அவரால் சேர்க்க முடியாமல் போகும். அல்லது கஷ்டப்பட்டு உழைத்தாவது ஓய்வுக்காலத்துக்கான தொகுப்பு நிதியைச் சேர்க்க வேண்டியிருக்கும்.

ஓய்வுக்காலத்துக்குப் பிறகு எத்தனை ஆண்டுகள் நாம் உயிர் வாழ வாய்ப்புண்டு என்பதை தோராயமாக வாவது கணக்கிட்டு அதற்கேற்ப முதலீடு செய்து, தொகுப்பு நிதியை உருவாக்க வேண்டும். தற்காலத்தில் ஒருவர் எதிர்பார்த்ததைவிட அதிக ஆண்டுகள் உயிர் வாழும் நிலையே காணப்படுகிறது. கடந்த 20 ஆண்டு களில் நம் நாட்டில் ஒருவரின் சராசரி ஆயுள் எட்டு ஆண்டுகள் அதிகரித் திருப்பதாகப் புள்ளிவிவரங்கள் சொல்கின்றன. மேம்பட்ட நவீன மருத்துவம் இதற்கு முக்கியமான காரணமாக இருக்கிறது. நமது குடும்ப மருத்துவரை ஆலோசிப்பதன் மூலம் நமது ஆயுள் வயதை ஓரளவுக்கு கணிக்க முடியும். அதிலிருந்து சில ஆண்டுகளை அதிகரித்துக்கொண்டு நம் ஓய்வுக்கால தொகுப்பு நிதித் தேவையைக் கணக்கிட வேண்டும்.

இதன்பிறகு ஓய்வுக்காலத்தில் நமக்கு என்னென்ன செலவுகள் இருக்கின்றன எனப் பட்டியலிட்டு, அந்தச் செலவை இன்றைய விலையில் குறிப்பிட வேண்டும். பணவீக்க விகிதத்தைக் கணக்கில் எடுத்துக் கொண்டு, இன்றைய செலவு, ஓய்வுக் காலத்தில் எவ்வளவாக இருக்கும் எனக் கணக்கிட வேண்டும்.

பணி ஓய்வு பெற எத்தனை ஆண்டுகள், பணி ஓய்வுக்குப் பிறகு எத்தனை ஆண்டுகள் ஆயுள் இருக்கிறது என்பதைப் பொறுத்து தான், ஓய்வுக்கால தொகுப்பு நிதி கணக்கீடு இருக்கும். ரெடிமேட் ரிட்டயர்மென்ட் பிளான் போல் இல்லாமல், நாம் போடப்போகிற ஓய்வுக்காலத் திட்டமிடல், ஓய்வுக் கால தேவைகளை முழுமையாக நிறைவேற்றுவதாக இருக்கவேண்டும். இதற்கு, 1. நமது தற்போதைய மாத செலவுகள் என்னென்ன, 2. ஆண்டுக்கு அவசியமான செலவுகள் என்னென்ன என்பதைப் பட்டியலிட வேண்டும், 3. ஓய்வுக்காலத்தில் என்னென்ன செலவுகள் இருக்காது என்பதை இந்தப் பட்டியலிலிருந்து நீக்க வேண்டும். உதாரணமாக, ஓய்வுக்காலத்துக்குமுன் நாம் சொந்த வீடு வாங்கியிருந்தால், வாடகைச் செலவு நமக்கு எதுவும் இருக்காது. ஆனால், ஆண்டுச் செலவு பட்டியலில் சொத்து வரி, வெள்ளை அடித்தல், வர்ணம் அடித்தல் போன்ற செலவு கள் கட்டாயம் இருக்கும். ஓய்வுக் காலத்தில் மருத்துவச் செலவு அதிகரிக்கும் என்பதால், அதையும் கட்டாயம் சேர்க்க வேண்டும். இப்படி ஒவ்வொரு செலவையும் முன்கூட்டியே நாம் திட்டமிட்டு வைத்திருப்பது அவசியம்!

ஓய்வுக்காலத்தில் மாதச் செலவுகள் எவை, ஆண்டு செலவுகள் எவை என்பதைச் சரியாக பட்டிலிடப்பட்ட பிறகு, ஆண்டுச் செலவை 12-ஆல் வகுத்து மாதம் எவ்வளவு தொகை தேவை என்கிற முடிவுக்கு வாருங்கள். இந்தத் தொகை எவ்வளவு என்று தெரிந்துவிட்டால் போதும், ஓய்வுக் காலத்துக்கு நீங்கள் சேர்க்க வேண்டிய தொகுப்பு நிதி சுமாராக எவ்வளவு இருக்க வேண்டும் என்பது குறித்து ஒரு தெளிவான முடிவுக்கு வரமுடியும்.

இப்போது இந்தக் கட்டுரையில் அட்டவணை 1-ல் நிரப்ப வேண்டிய விவரங்களை நம்மால் எளிதில் நிரப்ப முடியும். நமது ஓய்வுக்கால செலவுகளை இன்றைய தேதியில் கணக்கீடு செய்துவிட்டு, அதன்பிறகு பணவீக்க விகிதத்தைச் சேர்த்தால் ஓய்வுக்காலத்தில் நமக்கு எவ்வளவு செலவு இருக்கும் என்பது தெரிய வரும். இந்தத் தொகையைப் பெறுவதற்கு எவ்வளவு மொத்த தொகை தேவை என்பதுதான் ஓய்வுக்கால தொகுப்பு நிதியாகும்.  

இந்தத் தொகுப்பு நிதியைத் திரட்ட எஸ்.ஐ.பி முறையில் ஈக்விட்டி மியூச்சுவல் ஃபண்டுகளில் முதலீடு செய்து வந்தாலே போதும். அவற்றின் மூலமே ஆண்டுக்கு சராசரியாக 12% வருமானம் கிடைக்க வாய்ப்பு இருக்கிறது. ரிஸ்க் எடுக்கத் தயாராக இல்லை என்பவர்கள் அஸெட் அலொகேஷன்படி, கடன் சார்ந்த திட்டங்கள், பங்குச் சந்தை சார்ந்த திட்டங்கள் மற்றும் தங்கத்தில் முதலீடு செய்து வரலாம்.

இதில் முக்கியமாக வேண்டிய விஷயம், கூட்டுவட்டிக் கணக்கு. சிறிய தொகையாக இருந்தாலும் அதை நீண்டகாலத்துக்கு ஒருவர் தொடர்ந்து முதலீடு செய்து வைத்திருப்பார் எனில், அது பெரும் தொகையாக மாறும் என்பதுதான் கூட்டுவட்டிக் கணக்கின் மகத்துவம்.

உதாரணமாக, 25 வயதில் ஒருவர் மாதம்தோறும் ரூ.4,359 முதலீடு செய்துவருகிறார். அதற்கு ஆண்டு தோறும் 8% வருமானம் கிடைக்கிறது. அந்த முதலீட்டை அவர் தனது 60 வயது வரை தொடர்ந்து வைத்தி ருக்கிறார் எனில், அவரிடம் ரூ.1 கோடி தொகுப்பு நிதியாக இருக்கும். 35 ஆண்டுகளில் அவர் முதலீடு செய்த தொகை ரூ.18.39 லட்சம்தான். ஆனால், அது ஒரு கோடியாக அதிகரித்துக் கிடைப்பதுதான் கூட்டிவட்டிக் கணக்கு.

ஓய்வுக்காலத்துக்கான தொகுப்பு நிதியைச் சேர்க்கிற விஷயத்தில் நாம் எடுக்கும் ரிஸ்க்குக்கு ஏற்பத்தான் வருமானம் கிடைக்கும். அவரவர் தீர்மானிக்கும் தொகுப்பு நிதியின் தேவைக்கேற்ப இளம் வயதிலேயே முதலீட்டை ஆரம்பித்தால் இனிமையான ஓய்வுக்காலம் நிச்சயம்.

உங்களுக்கான ஓய்வுக்காலத்தை இனிமையாக்கிக்கொள்ள நீங்கள் இப்போதே தொகுப்பு நிதியை சேர்க்கத் தொடங்குங்கள்!

டாக்டர் எஸ்.கார்த்திகேயன்
டாக்டர் எஸ்.கார்த்திகேயன்

இளமையில் திட்டமிட்டால் ஓய்வுக்காலத்தை ஈஸியா எதிர்கொள்ளலாம்!

டாக்டர் எஸ்.கார்த்திகேயன், நிறுவனர் & டைரக்டர், கணேஷ் கார்த்திக் சர்வீசஸ் பிரைவேட் லிமிடெட்

பென்ஷனுக்கு திட்டம் போடுவது கடினமா என்று நீங்கள் கேட்கலாம். இன்றைய சூழலில் அது மிகவும் சுலபமான விஷயம்தான். அப்புறம் என்ன சிக்கல் என்பீர்கள்? நடைமுறைப்படுத்துவதுதான் சிக்கல். உடனடியாகக் கிடைக்கும் பலாபலன்களையே நம்மில் பலரும் அதிகம் விரும்புவதாகச் சொல்கின்றன ஆய்வு முடிவுகள்.

பென்ஷனுக்குத் திட்டமிடுதல் என்பது மிக நீண்ட நாள்களுக்கான திட்டம். 25 முதல் 30 ஆண்டு காலகட்டத்துக்குப்பின்னால் வரப்போகும் ஒரு விஷயம். இது குறித்து அவ்வப்போது சிந்தித்தாலும் தள்ளிப்போடுவது மிகச் சாதாரணமாக பலரது வாழ்க்கையில் நடந்துவிடுகிறது. சுலபத்தில் தள்ளிப்போட்டுவிடுவோம். இதைத் தவிர்க்க நாம் ஓர் ஒழுங்கை நம் வாழ்க்கையில் உருவாக்கிக்கொள்ள வேண்டும். அதாவது, ஓய்வுக்காலத்துக்கான முதலீட்டை நம் துணையின்றி ஆட்டோமேட்டிக்காக நிகழும் ஒரு விஷயமாக அமைத்துக்கொள்ள வேண்டும். பிள்ளைகள் கல்வி, வீடு, கார் என நாம் வாங்கும் கடனுக்கான பிடித்தம் என்பது ஆட்டோமேட்டிக்காக ஆகிவிடுகிறது. ஓய்வூதியத்துக்கான ஏற்பாட்டுக்கும் இதே போன்ற ஒரு முறை, அதுவும் ஆட்டோமேட்டிக்காக நடக்கிற மாதிரி இருந்தால் எவ்வளவு நன்றாக இருக்கும்? வாழ்வின் ஏனைய விஷயங்களுக்குக் கடன் கிடைக்கும். ஓய்வுக்கால செலவுக்கு கடன் (ரிவர்ஸ் மார்ட்கேஜ் போன்ற திட்டங்கள் தவிர்த்து) கிடைக்கவே கிடைக்காது. ஏனென்றால், அது சம்பாத்தியம் இல்லாத காலம். கடன் கொடுக்கும்போது முதலாவதாகக் கேட்கப்படும் கேள்வி, நீங்கள் எவ்வளவு சம்பாதிக்கிறீர்கள் என்பதுதான் இல்லையா?

25 வயதில் மாதம் ரூ.4,360.. 60 வயதில் ரூ.1 கோடி... ஓய்வுக்காலத்தை இனிமையாக்கும் கூட்டுவட்டிக் கணக்கு!

இன்றைய சூழ்நிலையில் வரவையும் செலவையும் ஒரே அளவில் வைத்து பிழைப்பதே பெரிய விஷயமாக இருக்கிறது. இதில் எங்கே ஓய்வுக்காலத்துக்காகப் பணம் சேர்ப்பது என்று சொல்லி காலம் கடத்துவதை விட்டுவிட்டு, இன்றைக்கு நம்மால் முடிந்த ஒரு தொகையை நாம் சேர்க்கத் தொடங்கி, அதை நீண்ட காலத்துக்கு வைத்திருந்தால், அது மிகப்பெரும் தொகையாக மாறியிருக்கும் என்பதற்கு மேலே உள்ள அட்டவணையைப் பாருங்கள். இந்த அட்டவணையில் நாம் முக்கியமாகத் தெரிந்துகொள்ள வேண்டிய விஷயம், சூழ்நிலை சரியில்லை என்று ஓய்வுக்காலத்துக்குப் பணம் சேர்ப்பதைத் தள்ளிப்போடுவதால் மிக மோசமான விளைவுகளைச் சந்திக்க வேண்டியிருக்கும். அதாவது, 60 வயதில் ரூ.1 கோடியை சேர்க்க 25 வயதில் மாதம் ரூ.4,359 மட்டும் சேர்த்தால் போதும். முதலீட்டை 35 வயதில் நாம் தொடங்கினால், மாதம் ரூ.10,515 வேண்டும். பத்து ஆண்டுகளில் எவ்வளவு வித்தியாசம் என்பதைப் புரிந்துகொண்டு, உங்கள் பணத்தை உடனே சேர்க்கத் தொடங்குங்கள்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism