Published:Updated:

எஃப்.டி ரினிவல்... சொல்லப்பட்டதும், சொல்லப்படாததும்..!

எஃப்.டி
பிரீமியம் ஸ்டோரி
எஃப்.டி

FD RENEWAL

எஃப்.டி ரினிவல்... சொல்லப்பட்டதும், சொல்லப்படாததும்..!

FD RENEWAL

Published:Updated:
எஃப்.டி
பிரீமியம் ஸ்டோரி
எஃப்.டி

கஷ்டப்பட்டு சம்பாதித்த பணத்துக்குப் பாதுகாப்பு, வளர்ச்சிக்கு உறுதுணை என்று சாமானிய மக்கள் நம்பியிருப்பது வங்கிகளைத்தான். கடந்த இரண்டாம் தேதியன்று வெளியான ரிசர்வ் வங்கி சுற்றறிக்கை, பொதுமக்கள் மத்தியில் மட்டுமன்றி, வங்கி வட்டாரங்களிலேயே குழப்பத்தை ஏற்படுத்தியுள்ளது; சமீப காலங்களில் வங்கிகளின் நடவடிக் கைகளால் அதிருப்தி அடைந்திருக்கும் பொதுமக்களுக்கு அதிர்ச்சி தரும் செய்தியாக சமூக வலைதளங்களில் உலா வரும் அந்தச் செய்தி இதுதான்...

சுந்தரி ஜகதீசன்
சுந்தரி ஜகதீசன்

திரும்பக் கோரப்படாத எஃப்.டி...

இதுவரை வங்கிகளுக்கு ரிசர்வ் வங்கி கொடுத்திருக்கும் வழிகாட்டல் என்னவெனில், “ஒரு வைப்பு நிதி முதிர்வடைந்த பின் வாடிக்கையாளர் களால் திரும்பக் கோரப்படாமல் இருக்குமானால், வங்கியிடம் இருக்கும் அந்தப் பணத்துக்கு சேமிப்புக் கணக்குக்கு வழங்கப்படும் வட்டியே வழங்கப்பட வேண்டும்” என்பதே. (If a Term Deposit matures and proceeds are unpaid, the amount left unclaimed with the bank shall attract rate of interest as applicable to Savings Bank deposits).

இந்த நடைமுறையில் ஒரு சிறு திருத்தத்தைக் கடந்த 2-ம் தேதி அன்று கொண்டுவந்தது மத்திய ரிசர்வ் வங்கி. அதாவது, “ஒரு வைப்பு நிதி முதிர்வடைந்த பின் வாடிக்கை யாளர்களால் திரும்பக் கோரப் படாமல் இருக்குமானால், வங்கியிடம் இருக்கும் அந்தப் பணத்துக்கு சேமிப்புக் கணக்குக்கு வழங்கப்படும் வட்டி அல்லது அந்த வைப்பு நிதிக்கு இதுவரை வழங்கப்பட்ட வட்டி – இவற்றில் எது குறைவோ அதுவே வழங்கப்பட வேண்டும்” என்பதே. (If a Term Deposit (TD) matures and proceeds are unpaid, the amount left unclaimed with the bank shall attract rate of interest as applicable to Savings account or the contracted rate of interest on the matured TD, whichever is lower).

இந்தத் திருத்தத்தின் பின்னணி என்ன?

தற்போதைய நிலையில் மிகக் குறைவான வட்டி விகிதம் எனில், அது சேமிப்புக் கணக்கின் வட்டி விகிதமே. கோரப்படாத வைப்பு நிதிகளுக்கும் அந்த வட்டி விகிதமே வழங்கப்பட்டது. ஆனால், தற்போதைய வட்டி குறைப்பு நடவடிக்கைகளால் ‘பல்க் டெபாசிட்’ போன்ற வைப்பு நிதிகளின் வட்டி விகிதம், சேமிப்புக் கணக்கின் வட்டி விகிதத்தைவிடக் குறைவாக மாறியுள்ளது. (ரூ.2 கோடிக்கு அதிகமான பணத்தை வங்கி வைப்பு நிதியில் கம்பெனிகள் டெபாசிட் செய்வதை ‘பல்க் டெபாசிட்’ என்பார்கள்.)

எஃப்.டி ரினிவல்... சொல்லப்பட்டதும், சொல்லப்படாததும்..!

யாருக்கு பாதிப்பு?

“வங்கிகளை சொந்தக் கருவூலம் போல ‘பல்க் டெபாசிட்டு’களுக்கு பயன்படுத்துவதைத் தவிர்க்கவே இந்தத் திருத்தம் கொண்டு வரப்பட்டுள்ளதாக நாம் கருதலாம். அத்துடன் வைப்பு நிதி வைத்திருக்கும் வங்கியில் சேமிப்புக் கணக்கு வைத்துக்கொள்ளாமலும், ஆட்டோ ரினிவல் (Auto Renewal) வசதியைக் கேட்டுப் பெறாமலும் உள்ள முதலீட் டாளர்களுக்கும் பாதிப்பு ஏற்படலாம்” என்று ரிசர்வ் வங்கி வட்டாரங்கள் தெரிவிக்கின்றன.

கிளம்பியிருக்கும் வதந்திகள்...

பொதுமக்களுக்கு, முக்கியமாக மாத வருமானத்துக்கு வங்கி வைப்பு நிதிகளை நம்பியிருக்கும் சீனியர் சிட்டிசன்களுக்கு இனி ‘ஆட்டோ ரினிவல்’ வசதி வங்கிகளில் கிடைக் காது என்பது போன்ற பயத்தை இந்தச் செய்தி ஏற்படுத்தியுள்ளது.

ஆட்டோ ரினிவல் வசதி என்பது வங்கி வாடிக்கையாளர்களுக்கு ஒரு வரப்பிரசாதம். வைப்பு நிதி வைத்த பின், இந்த ஆட்டோ ரினிவல் வசதியைக் கேட்டுப் பெற்றுவிட்டால், ஒவ்வொரு முறை வைப்பு நிதி முதிர்வடையும்போதும் தேதியை நினைவில் வைத்து வங்கிகளுக்கு சென்று நாம் அதைப் புதுப்பிக்க வேண்டிய அவசியம் இல்லை. கம்ப்யூட்டர் தானாகவே வைப்பு நிதியைக் குறித்த காலத்துக்கு அன்றைய வட்டி விகிதத்தில் புதுப்பித்துவிடும்.

குறிப்பாக, வெளியூர் அல்லது வெளி நாடுகளுக்குச் சென்று அதிக நாள்கள் தங்கியிருக்கும் பழக்கம் உள்ளவர்களுக்கு வட்டி இழப்பு இன்றி வைப்பு நிதி தானாகவே புதுப்பிக்கப்படுவது பெரிய நிம்மதியைத் தரும் விஷயம். வங்கி ஊழியர்களுக்கும் இதனால் வேலைப்பளு குறையும். கொரோனா காலத்தில் வங்கியில் கூட்டம் தவிர்ப்பதற்கும் இந்த நடைமுறை பெரிதும் உதவியது.

ரிசர்வ் வங்கியின் புதிய சுற்றறிக்கை இந்த வசதி இனி இருக்காதோ என்ற பயத்தை எல்லா மட்டங்களிலும் ஏற்படுத்திவிட்டது. ஆனால், “உண்மை நிலை அதுவல்ல. முதலீட்டாளர்களுக்கு ஆட்டோ ரினிவல் வசதி தொடரும்” என்று வங்கி வட்டாரங்கள் தெரிவிக் கின்றன.

வதந்திகளுக்கான காரணம் என்ன?

1. சமூக ஊடகங்களின் வீச்சுதான் முக்கியமான காரணம். முன்பெல்லாம் இது போன்ற சுற்றறிக்கைகள் வங்கிகளுக்கு வரும்பட்சத்தில் ஒரு தெளிவும் நிச்சயமும் கிடைக்கப் பெறும்வரை அவை குறித்த தகவல் பொதுமக்களைச் சென்றடையாது. இன்று சமூக ஊடகங்களின் வீச்சு மிகப் பெரியது. அறிக்கை வெளியான இரண்டே நாள்களில் அது குறித்த கட்டுரை பல பத்திரிகைகளில் வெளி யாகி, வாட்ஸ்அப், ட்விட்டர், சிக்னல் போன்ற தளங்களில் சர்ச்சைகள் தொடங்கிவிட்டன.

2. சமீப காலமாக மக்களுக்கு வங்கிகள் மீதான நம்பிக்கை குறைந்திருப்பது. தனியார் வங்கிகளுக்கு இணையாக லாப வேட்டையில் பொதுத்துறை வங்கிகளும் இறங்கியதில் மிகவும் பாதிப் படைந்தவர்கள் நடுத்தட்டு மற்றும் அடித்தட்டு மக்கள்தாம். பணமதிப்பிழப்பு, வட்டிக் குறைப்பு, வங்கிகள் இணைப்பு - இவையாவும் காலத்தின் கட்டாயம்தான். ஆனால், ஏற்கெனவே கொரோனா பாதிப்பால் தள்ளாடிக் கொண்டிருக்கும் கோடிக்கணக் கான குடும்பங்களுக்கு இவை மென்மேலும் பாரத்தை ஏற்றுவ தாகவே உள்ளன. காமாலைக் காரனுக்குக் கண்டதெல்லாம் மஞ்சள் என்பதுபோல் வங்கி களின் ஒவ்வொரு செயல்பாடும் எங்கே தங்கள் வசதிகளைப் பறித்துவிடுமோ என்ற பயம் சாமானிய மக்களுக்கு ஏற்பட்டு உள்ளதைத்தான் இந்த வதந்திகளும், அதைத் தொடரும் குழப்பங்களும் காட்டுகின்றன.

இது போன்ற பயங்களும் சந்தேகங்களும் மக்கள் மனதில் ஏற்படாமல் இருக்கும் வகையில் வங்கிகளின் செயல்பாடு அமைய வேண்டும். வங்கி வைப்பு நிதி ரினிவல் பற்றித் தெளிவான வரையறைகளை ரிசர்வ் வங்கி சீக்கிரமே வெளியிடும் என்று நாம் எதிர்பார்க்கலாம். அதுவரை வேண்டாத குழப்பங்களில் இருந்து நாம் விலகி இருப்பது நல்லது.

அத்துடன் காலாண்டுக்கு ஒரு முறையாவது நம் வைப்பு நிதிகளின் முடிவு தேதிகளைப் பரிசீலனை செய்வது, வைப்பு நிதி வைத்திருக்கும் வங்கிகளில் சேமிப்புக் கணக்கையும் வைத் திருப்பது போன்ற ஒழுங்கு முறைகளைக் கைக்கொள்வது நிச்சயம் நன்மை தரும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism