Published:Updated:

ஒளிமயமான ஓய்வுக்காலம்! சூப்பர் பிளானிங்...

ஓய்வுக்காலம்
பிரீமியம் ஸ்டோரி
ஓய்வுக்காலம்

புதிய தொடர்

ஒளிமயமான ஓய்வுக்காலம்! சூப்பர் பிளானிங்...

புதிய தொடர்

Published:Updated:
ஓய்வுக்காலம்
பிரீமியம் ஸ்டோரி
ஓய்வுக்காலம்

பணி ஓய்வுக்காலத்துக்குத் திட்டமிடுவது விருப்பமல்ல. அது ஓர் அவசியத் தேவை ஆகும். ஒருவர் அவரின் வயதின் அடிப் படையில் ஓய்வு பெறாமல், அவரின் நிகர செல்வ மதிப்பு மற்றும் வருமானத்தின் அடிப் படையில்தான் ஓய்வு பெற வேண்டும்.

என்.விஜயகுமார், நிதி ஆலோசகர், 
https://www.vbuildwealth.com/
என்.விஜயகுமார், நிதி ஆலோசகர், https://www.vbuildwealth.com/

பணி ஓய்வுக்கான திட்டம்..!

நம்மில் பலர் 58 வயது, 60 வயதானவுடன் வேலை பார்க்கும் அலுவலகத்தில் ஓய்வு தந்துவிடுவார்கள். அப்போது ஓய்வுபெற்று விடலாம் எனச் செயல்படுகிறார்கள். அப்படிச் செய்வது மகிழ்ச்சியான வாழ்க்கைக்கு வழி வகுக்காது. எத்தனை வயதில் ஓய்வு பெறப் போகிறோம் என்று முன்கூட்டியே தெரிந் திருக்கும்பட்சத்தில், அதற்கு அடுத்த நாளில் இருந்து யாருடைய தயவையும் எதிர்பார்க்காமல் செலவு செய்வதற்கான திட்டத்துடன் ஓய்வு பெறுவதுதான் மகிழ்ச்சியான வாழ்க்கைக்கு அடிப்படையாக இருக்கும்.

இன்றைய தேதியில் கடன் வாங்குவது மிகவும் சுலபம். கார் வாங்க, வீடு வாங்க, பிள்ளைகளின் உயர்கல்வி, அவசரச் செலவு என அனைத்துக்கும் கடன் வாங்க முடியும். ஆனால், ஓய்வுக்கால செலவுகளுக்குக் கடன் வாங்க முடியாது. அதனால், அந்தச் செலவு களுக்காக முன்கூட்டியே திட்டமிட்டு பணம் சேர்த்து வைத்திருப்பது மிக முக்கியமாகும். அதிலும், பென்ஷன் எதுவும் கிடைக்காத தனியார் நிறுவன ஊழியர்களுக்கு ஓய்வுக்காலத்துக்கான பணத்தைச் சேர்ப்பது மிக மிக அவசியம்.

அடுத்து, ‘நீண்ட ஆயுள் என்பது நல்ல வரம். ஆனால், போதிய அளவுக்கு சேமிப்பில்லாத நீண்ட ஆயுள், பெரும் சாபம்’ ஆகும். தனக்கென போதிய அளவுக்கு பணம் இல்லாததால், ஓய்வுக் காலத்தில் ஒவ்வொரு செலவுக்கும் பிள்ளைகளை நம்பி இருக்க வேண்டியிருக்கும். ஓய்வுக்காலத்துக்கென எதுவும் சேமித்து வைக்காத சிலர், 70 வயதைக் கடந்த பின்னும் வேலைக்குச் சென்று சம்பாதிக்கும் கட்டாயத்தில் இருப்பதைப் பார்க்கிறோம். திறமையும் அனுபவமும் இருந்தாலும், இந்த வயதில் பல நிறுவனங்கள் நல்ல வேலையைத் தராது என்பதால், செக்யூரிட்டி போன்ற வேலையில் அவர்கள் சேர வேண்டிய கட்டாயம் ஏற்படுவது கொடுமையான அனுபவம்.

ஒளிமயமான ஓய்வுக்காலம்!
சூப்பர் பிளானிங்...

நாம் ஓய்வு பெற்ற பிறகு, நம் பிள்ளைகள் நம்மைக் காப்பாற்றலாம்; காப்பாற்றாமலும் போகலாம், நாம் நன்கு சம்பாதிக்கும்போது நமது கடைசிக் காலத்துக்காக தனியாக சேமிக்காமல் இருந்துவிட்டு, பிள்ளைகள் நம்மைக் காப்பாற்றுவார்கள் என்று எதிர்பார்ப்பது எந்த வகையிலும் நியாயமில்லை. காரணம், நமது பிள்ளைகள் அவர்களுக்கான வாழ்க்கைமுறை (Lifestyle) செலவுகளை செய்யவே கஷ்டப்பட்டுக் கொண்டிருக்கிறார்கள். அவர்களுக்கும் வீட்டுக் கடன், கார் கடன்களுக்கான மாதத் தவணைகள் இருக்கும். அவற்றைச் சமாளிப்பதே அவர்களுக்கு பெரும் பிரச்னையாக இருக்கும்போது, அவர் களால் பெற்றோரை எப்படிக் கவனிக்க, காப்பாற்ற முடியும்? ‘உங்கள் பிள்ளைகள் உங்கள் ஓய்வூதிய நிதி அல்ல’ என்பதை ஒவ்வொருவரும் தெளிவாகப் புரிந்துகொள்வது அவசியமாகும். எனவே, நீண்ட, வசதியான ஓய்வுக்காலத்தை அனுபவிக்க, முதல் சம்பளத்தில் இருந்தே சேமிப்பது அவசியம்.

ஓய்வுக்கால செலவுகளுக்கு ஏன் முதலீடு செய்ய வேண்டும் என்பதை இனி விரிவாகப் பார்ப்போம்.

பணி ஓய்வுக்குப் பிறகு, சுமார் 20 - 25 ஆண்டுகள் எந்த வருமானமும் இல்லாமல் வாழ வேண்டியிருக்கிறது. இந்த சமயத்தில் ஒரு பெரும் தொகை இருந்தால்தான், கணவன் மனைவி ஆகிய இருவரும் ஓய்வுக் காலத்தை நிம்மதியாக, மகிழ்ச்சி யாகக் கழிக்க முடியும். இதற்கு பணிபுரியும் காலத்திலேயே முதலீடு செய்யத் தொடங்குவது மிக முக்கியம். ஏன் தெரியுமா?

ஆயுள் அதிகரிப்பு...

1950-ம் ஆண்டில் இந்தியர் களின் சராசரி ஆயுள் 35 வயதாக இருந்தது. இது 1960-ம் ஆண்டில் 41 வயதாக அதிகரித்தது. இப்போது 2022-ம் ஆண்டில் சுமார் 70 வயதாக உயர்ந்துள்ளது. வருங்காலத்தில் 80 வயதாக உயர அதிக வாய்ப்புள்ளது. பணி ஓய்வுக்காலத்தில் எவ்வளவுக்கு அதிக ஆண்டுகள் நாம் உயிர் வாழ்கிறோமோ, அந்தளவுக்கு அதிகமான தொகை நம்மிடம் இருந்தால்தான் ஓய்வுக்காலத்தை நம்மால் மகிழ்ச்சியாகக் கழிக்க முடியும்.

ஓய்வூதியம் இல்லை...

2004-ம் ஆண்டுக்குப் பிறகு மத்திய, மாநில அரசுப் பணிகளில் சேர்பவர்களுக்கு நம் நாட்டில் ஓய்வூதியம் கிடையாது. 2014-க்குப் பிறகு, தனியார் நிறுவனப் பணிகளில் சேர்பவர்களுக்கு மாத அடிப்படை சம்பளம் மற்றும் பஞ்சப்படி 15,000 ரூபாயைத் தாண்டும் பட்சத்தில் பணியாளர் சேமநல நிதி (EPF) குடும்ப ஓய்வூதியத் திட்டத்தில் சேர முடியாது.

ஒளிமயமான ஓய்வுக்காலம்!
சூப்பர் பிளானிங்...

பி.எஃப் தொகை போதாது...

தற்போது பெரும்பாலான தனியார் நிறுவனங்களில் இ.பி.எஃப்-கான தொகை மிகக் குறைந்த அளவாக அதாவது, ரூ.1,800 மட்டுமே பிடிக்கப் படுகிறது. அந்த அளவுக்கான தொகையை வேலை பார்க்கும் நிறுவனமும் தருகிறது என்றாலும் இதன் மூலம் சேரும் தொகை யானது ஓய்வுக் காலத்துக்குப் போதுமானதாக இருக்காது. மேலும், நம்மில் பெரும்பாலானோர் ஓய்வுக்காலத்துக்கு முன்பே இந்தத் தொகையை அவசர மருத்துவச் செலவு, வீடு கட்ட/ வாங்க, பிள்ளை களின் உயர்கல்வி, கல்யாணம் போன்ற தேவைகளுக்கு எடுத்து செலவு செய்துவிடுகிறார்கள். இதனால், கடைசியில் பணி ஓய்வு பெறும்போது பி.எஃப் கணக்கில் பெரிதாக ஒன்றும் இருக்காது.

தனிக் குடும்பங்கள் அதிகரிப்பு...

முந்தைய தலைமுறையில் தாத்தா, பாட்டி, அப்பா, அம்மா, பெரியப்பா, சித்தப்பா, பிள்ளைகள் மற்றும் அவர்களின் குடும்பத்தினர் என அனைவரும் ஒரே குடும்பமாக ஒரே வீட்டில் வாழ்ந்தனர். வயதான வர்களைக் கூட்டுக் குடும்பத்தினர் பாசத்தோடும் கணிவோடும் கவனித்துக்கொண்டார்கள். இன்றைக்கு அப்படி அல்ல. கடைசிக் காலத்தில் கணவன், மனைவி தனியே வாழ வேண்டிய நிலை. எனவே, ஓய்வுக்கால செலவு களுக்கு தனியே முதலீடு செய்யத் தொடங்குவது மிக முக்கியமாகும்.

மருத்துவச் செலவு அதிகரிப்பு...

முன்பைவிட மருத்துவச் செலவுகள் மிகவும் அதிகரித்துள்ளது. நோய் பாதிப்புகள் அதிகரித்துள்ள நிலையில், அதற்கான மருத்துவமும் மேம்பட்டிருக்கிறது. மருத்துவக் காப்பீட்டு பாலிசிக்கு பிரீமியம் கட்டுவது, மருந்து மாத்திரை செலவுகள், மருத்துவர் கட்டணத் துக்கென தனியாக ஒரு பெரும் தொகை தேவைப்படும். இந்தச் செலவுகளுக்குத் தேவையான தொகையையும் சேர்த்து வைத்திருப் பது அவசியமாகும். சில பத்தாண்டு களுக்கு முன்பு வரை மருத்துவரை ஒருமுறை பார்க்க சுமார் 100 ரூபாய் கட்டணம் இருந்தது. இன்றைக்கு அது ரூ.300 - ரூ.500 என அதிகரித்திருக்கிறது. மேலும், விபத்தில் காயம் அல்லது ஏதாவது நோய் பாதிப்புக்காக சில தினங்கள் மருத்துவமனைகளில் மருத்துவச் சிசிக்சை எடுத்தாலே 3 - 5 லட்சம் ரூபாய் செலவாகிவிடுகிறது.

பணவீக்க விகித பாதிப்பு...

பணவீக்கம் அதாவது, விலைவாசி உயர்வானது ஓய்வுக் காலத்தில் மிகப் பெரிய பிரச்னையாக உள்ளது. பலரும் ஓய்வுக்காலத்தில் செலவு குறைந்துவிடும் என்று நினைக் கிறார்கள். இதில், ஓரளவு உண்மை இருந்தாலும் முற்றிலும் உண்மையில்லை.

ஆண்டு சராசரி பணவீக்க விகிதம் 5% எனில், இன்றைக்கு ஒரு குடும்பத்துக்கு ரூ.35,000 செலவாகிறது எனில், ஐந்து ஆண்டுகள் கழித்து ரூ.44,920-ஆக அதிகரித்திருக்கும். இதுவே 30 ஆண்டுகளில் ரூ.1,56,370-ஆக அதிகரித்திருக்கும். (பார்க்க வரைபடம்)

ஒரு காலத்தில் பணியாளர்களுக்கு பென்ஷன் இருந்தது. அவர்கள் ஓய்வுக்காலம் பற்றியும் ஓய்வுக்காலத்திலும் டென்ஷன் இல்லாமல் இருந்தார்கள். இன்றைக்கு அப்படி இல்லை. வேலையும் டென்ஷன், பென்ஷனும் இல்லை. எனவே, ஓய்வுக்காலத்துத்துக்கு அவசியம் சேமிக்க வேண்டிய நிலைக்கு நாம் அனைவருமே தள்ளப் பட்டிருக்கிறோம். அதற்குத் திட்டமிடுவது எப்படி என்பது பற்றி அடுத்து வரும் அத்தியாயங்களில் பார்ப்போம்.

(திட்டமிடல் தொடரும்)

கட்டுரை ஆசிரியர் பற்றி...

என்.விஜயகுமார் நிதிச் சேவையில் 20 ஆண்டு களுக்கு மேல் அனுபவம் கொண்டவர். நிதித் திட்டமிடல் மற்றும் அஸெட் அலொகேஷன் முறையில் 200-க்கும் மேற்பட்ட குடும்பங்களுக்கு முதலீடு செய்ய உதவி வருகிறார். தற்போது சுமார் ரூ.245 கோடி நிர்வகித்து வருகிறார். நாணயம் விகடன் இதழில் முதலீடு, நிதி ஆலோசனை, வரிச் சேமிப்பு குறித்து கடந்த 10 ஆண்டுகளுக்கும் மேலாக கட்டுரைகள் எழுதி வருகிறார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism