Published:Updated:

பங்கு முதலீடு... அதிக லாபத்துக்கு உதவும் ‘ரிஸ்க் பேலன்ஸ்’ டெக்னிக்!

‘ரிஸ்க் பேலன்ஸ்’
பிரீமியம் ஸ்டோரி
‘ரிஸ்க் பேலன்ஸ்’

கவர் ஸ்டோரி

பங்கு முதலீடு... அதிக லாபத்துக்கு உதவும் ‘ரிஸ்க் பேலன்ஸ்’ டெக்னிக்!

கவர் ஸ்டோரி

Published:Updated:
‘ரிஸ்க் பேலன்ஸ்’
பிரீமியம் ஸ்டோரி
‘ரிஸ்க் பேலன்ஸ்’

‘பங்குச் சந்தை சார்ந்த முதலீடுகள் ரிஸ்க் கானவை; மியூச்சுவல் ஃபண்ட் முதலீடு அபாயங்களுக்கு உட்பட்டவை’ என்கிற விளக்கத்தை நம்மில் பலரும் அடிக்கடி கேட்டிருப்போம்.

சிவகாசி மணிகண்டன்  
நிதி ஆலோசகர், 
Aismoney.com
சிவகாசி மணிகண்டன் நிதி ஆலோசகர், Aismoney.com

எந்த முதலீட்டை வேண்டுமானாலும் எடுத்துக்கொள்ளுங்கள், அந்த முதலீடு ரிஸ்க் கானவை என்று சொல்வதே இல்லை. உதாரணமாக, இன்றைக்கு ஒரு கிராம் தங்கம் விலை ரூ.5,200 என்று வைத்துக்கொள்வோம். இந்த விலைக்கு நாம் தங்கம் வாங்கிய பின் அதன் விலை இறங்காது என்பதற்கு எந்த உத்தரவாதமும் இல்லை; அதே போலத்தான், வீடு, மனை வாங்குவதும். நாம் வாங்கிய பிறகு வீட்டின்/மனையின் விலை இறங்க வாய்ப்பு இருப்பதை மறுக்க முடியாது.

தங்கத்தையும், ரியல் எஸ்டேட்டையும் நீண்ட காலம் வைத்திருப்பதன்மூலம் விலை இறக்கம் என்கிற ரிஸ்க்கை நாம் வெற்றிகரமாக சமாளிக்கிறோம்.

ஆனால், பங்குச் சந்தை, மியூச்சுவல் ஃபண்ட் முதலீடு - இந்த இரண்டு முதலீடுகள்தான் தங்கள் முதலீட்டில் ரிஸ்க் இருக்கிறது என்பதை உண்மையாக ஒப்புக்கொள்கின்றன. இந்த உண்மையை நமக்கு எடுத்துச் சொன்னவுடன், நாம் பயந்து போய் அதிலிருந்து விலகி நிற்கவே நினைக்கிறோம். இந்த பயம் தேவை இல்லாதது. நாம் சரியாகப் புரிந்துகொண்டால், இந்த பயத்தில் இருந்து நம்மால் எளிதாக வெளி வர முடியும். பங்குச் சந்தை முதலீட்டையும், பங்குச் சந்தை சார்ந்த மியூச்சுவல் ஃபண்ட் முதலீட்டையும் நமக்கு உதவும் தோழனாக மாற்றிக்கொள்ள முடியும். அதன்மூலம் நீண்ட காலத்தில் பணவீக்கத்தைவிட அதிகமான வருமானத்தை நம்மால் நிச்சயம் சேர்க்க முடியும்.

ஆனால், முதலீட்டில் ரிஸ்க் மீதான பயம்தான் முதலீட்டாளரின் மோசமான எதிரியாக இருக்கிறது. இந்தப் பயம் பல நேரங்களில் முதலீட்டில் தவறான முடிவுகளை எடுக்க வைத்துவிடுகிறது. முதலீட்டில் உணர்ச்சிகளைக் கட்டுப்படுத்த மற்றும் நிர்வகிக்க தெரிந்தால் மட்டுமே லாபமீட்ட முடியும்.

முதலீட்டில் ரிஸ்க் எடுக்காவிட்டால், பணவீக்க விகிதத்தைவிட அதிக வருமானம் ஈட்ட முடியாது. முதலீட்டில் பயமும் பேராசையும் இயற்கையானதாகும். அது புரியாமல் சந்தை ஏற்ற இறக்கத்தின் போது புதிய முதலீட்டாளர்கள் சித்தப்பிரமை பிடித்தவர்கள் போலாகிவிடுகிறார்கள். இது அவர்களின் முடிவெடுக்கும் திறனை பாதிக்கிறது. இதைக் கட்டுப்படுத்த முதலீட்டாளர்கள், கடந்த காலத்தில் பங்குச் சந்தை பயணித்து வந்த பாதை பற்றி நன்கு புரிந்துகொள்வது அவசியம்.

ரிஸ்க் எடுக்க வேண்டியதன் அவசியம்...

முதலீட்டில் நாம் எந்த அளவுக்கு அதிக ரிஸ்க் எடுக்கி றோமோ, அந்த அளவுக்கு அதிக வருமானம் நமக்குக் கிடைக்க வாய்ப்பு இருக்கிறது. முதலீட்டில் ரிஸ்க் எடுக்கவில்லை எனில், நிலையான வருமானம் தரும் ஃபிக்ஸட் டெபாசிட், கடன் ஃபண்டுகளில்தான் முதலீடு செய்ய வேண்டிவரும். அப்படி செய்யும்போது மிக அதிகமான முதலீட்டுத் தொகையை முதலீடு செய்ய வேண்டியிருக்கும். அப்படி அதிக தொகையை முதலீடு செய்யவில்லை எனில், நாம் நினைத்த இலக்குத் தொகை நமக்குக் கிடைக்காமலே போகும்.

பங்குச் சந்தை சார்ந்த முதலீடுகள் குறுகிய காலத்தில் மதிப்பு இறக்கத்துக்கு உள்ளானாலும், நீண்ட காலத்தில் பணவீக்கத்தைத் தாண்டிய வருமானத்தைத் தரும். இந்த வருமானம் தங்கம், ரியல் எஸ்டேட்டில் கிடைக்கும் என்கிற கேள்விக்கு உறுதியான பதில் எதுவும் இல்லை என்பதை நாம் புரிந்துகொள்ள வேண்டியது அவசியம்.

சரி, பங்கு சார்ந்த முதலீட்டில் என்னென்ன ரிஸ்க்குகள் இருக்கின்றன, அவற்றைச் சமாளித்து சமநிலைப்படுத்தும் நுட்பங்களை அறிந்து அதிக லாபம் ஈட்டுவது எப்படி எனப் பார்ப்போம்.

பங்கு முதலீடு... அதிக லாபத்துக்கு உதவும் ‘ரிஸ்க் பேலன்ஸ்’ டெக்னிக்!

1. பங்குச் சந்தையின் ஏற்ற இறக்க ரிஸ்க்...

பங்குச் சந்தை மற்றும் பங்குச் சந்தை சார்ந்த முதலீடுகளின் இயற்கை குணமே அதன் மதிப்பு ஏற்ற இறக்கம் (Volatility) ஆகும். இந்த வாலட்டிலிட்டி ரிஸ்க்கைக் குறைக்க குறிப்பிட்ட இடைவெளியில் தொடர்ந்து முதலீடு செய்ய வேண்டும். மியூச்சுவல் ஃபண்ட் முதலீடு எனில், சிஸ்டமேட்டிக் இன்வெஸ்ட்மென்ட் பிளான் (எஸ்.ஐ.பி) முறையில் தொடர்ந்து முதலீடு செய்து வர வேண்டும்.

மொத்த முதலீட்டை மேற் கொண்ட பிறகு, சந்தை அதிக மாக இறங்கிவிட்டால், இழப்பிலிருந்து மீண்டு வர நீண்ட காலம் பிடிக்கும். எனவே, மொத்தத் தொகை கையிலிருக்கும்பட்சத்தில் அதை லிக்விட் ஃபண்டில் முதலீடு செய்துவிட்டு, அதிலிருந்து எடுத்து நிறுவனப் பங்குகள் மற்றும் ஈக்விட்டி ஃபண்டுகளில் முதலீடு செய்யும் போது ரிஸ்க்கை வெகுவாகக் குறைக்க முடியும்.

சந்தையின் ஏற்ற இறக்கத்தை முதலீட்டாளரால் ஒன்றும் செய்ய முடியாது. ஆனால், அவரால் அதைப் பல வகை களில் குறைக்க முடியும். ஒன்று, சந்தை இறக்கத்தில் இருக்கும் போது அதிகமாக முதலீடு செய்வதாகும். இப்படி செய்யும் போது பங்குகளில் அதிக பங்குகள் கிடைக்கும்; மியூச் சுவல் ஃபண்டுகளில் அதிக யூனிட்டுகள் கிடைக்கக்கூடும்.

அடுத்து, முதலீட்டைப் பரவலாக்கம் (Diversifying) செய்வது மூலம் பங்குச் சந்தை யில் உள்ள ரிஸ்க்கைக் குறைக்க முடியும். அதாவது, பல்வேறு துறைகளைச் சேர்ந்த நிறுவனங் களின் பங்குகள், பல்வேறு பங்குச் சந்தை மதிப்புகொண்ட ஃபண்டுகளில் (ஃபிளெக்ஸி கேப் ஃபண்டுகள், மல்ட்டிகேப் ஃபண்டுகள், லார்ஜ்கேப் ஃபண்டுகள், மிட் கேப் ஃபண்டுகள், ஸ்மால் கேப் ஃபண்டுகள்) முதலீட்டுத் தொகையைப் பிரித்து முதலீடு செய்வதாகும். மேலும், அஸெட் அலொகேஷன்படி முதலீட் டைப் பிரித்து மேற்கொள்வதன் மூலமும் பங்குச் சந்தையின் இறக்க ரிஸ்க்கை சமாளிக்க முடியும்.

2. சந்தை வளர்ச்சி குறித்து கணிப்பதால் ஏற்படும் ரிஸ்க்...

பலரும் பங்குச் சந்தை இனி இவ்வளவுதான் செல்லும், அவ்வளவு எல்லாம் இறங்காது என்றெல்லாம் கணித்து முதலீட்டு முடிவை எடுக் கிறார்கள். இது மிகப் பெரிய தவறாக அமைந்துவிடுகிறது. காரணம், யாராலும் பங்குச் சந்தையின் உச்சம் மற்றும் குறைந்தபட்ச நிலையை சரியாகக் கணிக்க முடியாத தாகும்.

சென்செக்ஸ் புள்ளிகள் 50,000 தாண்டியபோது அதுதான் சந்தையின் உச்சம் என்று பங்குகள் மற்றும் ஈக்விட்டி ஃபண்டு களை விற்றுவிட்டு வெளியே வந்தவர்கள் அதிகம் பேர். ஆனால், அந்த நிலையில் சந்தையானது எதிர்பார்ப்புகளைத் தாண்டி கீழே இறங்காமல் மேலே சென்றதை பலரும் அனுபவபூர்வமாக உணர்ந்திருப்பார்கள்.

சந்தையின் எதிர்கால வளர்ச்சி குறித்து கணிக்க முற்படாமல், உங்கள் முதலீட்டுத் தொகையை சுமார் ஐந்து பங்காகப் பிரித்து வைத்துக்கொண்டு, அவற்றைக் குறிப்பிட்ட இடைவெளியில் முதலீடு செய்து வருவதன்மூலம் பணவீக்கத்தைத் தாண்டிய வருமானத்தை ஈட்ட முடியும்.

3. மூலதனத்தை இழக்கும் ரிஸ்க்...

பங்குச் சந்தை சார்ந்த முதலீடு என்கிறபோது மூலதனத்தின் ஒரு பகுதி அல்லது முழுத் தொகையை இழக்கும் ரிஸ்க் இருக்கிறது. ஒருவரின் ரிஸ்க் எடுக்கும் திறனுக்கேற்ப முதலீட்டைப் பல்வேறு சொத்துப் பிரிவுகளில் பிரித்து முதலீடு செய்வது மூலம் இந்த ரிஸ்க்கைத் தவிர்க்க மற்றும் குறைக்க முடியும். இந்த ரிஸ்க்கை சமாளிக்க ஒரு வழி இருக்கிறது. அது, 100-லிருந்து உங்கள் வயதைக் கழித்து வரும் எண்ணை சதவிகித மாக பாவித்து, அந்த அளவு தொகையை மட்டும் நிறுவனப் பங்குகள் மற்றும் ஈக்விட்டி மியூச்சுவல் ஃபண்டுகளில் முதலீடு செய்வது. மீதமுள்ள தொகையைக் கடன் சார்ந்த முதலீடுகள் (ஃபிக்ஸட் டெபாசிட், கடன் ஃபண்டுகள்), தங்கம் (கோல்டு இ.டி.எஃப், கோல்டு சேவிங்ஸ் ஃபண்ட்) ஆகியவற்றில் பிரித்து முதலீடு செய்ய வேண்டும்.

இப்படிச் செய்யும்போது நீங்கள் மூலதனத்தை இழப்பதற் கான வாய்ப்பு என்பது மிகவும் குறைவாக இருக்கும். காரணம், ஒவ்வொரு முதலீடும் ஒவ்வொரு வகையில் வருமானத்தைத் தரும் என்பதால், நீங்கள் மூலதனத்தை இழக்கும் அபாயத்தை சந்திக்க மிகக் குறைவான வாய்ப்பே உண்டு.

4. கடந்த காலத்துக்கு அதிக முக்கியத்துவம் தருவதால் ஏற்படும் ரிஸ்க்...

பங்குச் சந்தை என்றாலும் சரி, பங்குச் சந்தை மியூச்சுவல் ஃபண்ட் முதலீடாக இருந்தாலும் சரி, கடந்த காலத்தில் தந்த வருமானத்தை மட்டுமே மனதில் கொண்டு குறிப்பிட்ட ஒரு பங்கில் அல்லது ஃபண்டில் முதலீடு செய்வது. இதை ‘Recency bias’ என்கிறார்கள். இப்படிச் செய்வதால், நமது முதலீடு நஷ்டத்தை ஏற்படுத்தித் தரவும் வாய்ப்புண்டு.

பங்குச் சந்தையைப் பொறுத்தவரை, கடந்த காலத்தில் நடந்தது போலவே எதிர்காலத் திலும் நடக்க வேண்டும் என்பதற்கு எந்த உத்தரவாதமும் இல்லை. கடந்த ஐந்து ஆண்டு காலத்தில் ஒரு பங்கு ஆண்டுக்கு சராசரியாக 20% வருமானம் தந்திருக்கலாம். ஆனால், அடுத்த ஐந்து ஆண்டுகளில் 8% மட்டுமே தரலாம். அந்த நிறுவனப் பங்கு தயாரிக்கும் பொருள் அல்லது அளிக்கும் சேவைக்கு இருக்கும் வரவேற்பு உட்பட பல்வேறு விஷயங் களின் அடிப்படையில்தான் அதன் வருமானம் அமையுமே தவிர, கடந்த காலத்தில் கிடைத்த மாதிரியே நமக்குக் கிடைக்க வேண்டும் என்று எதிர்பார்க்கக் கூடாது. ஒரு நிறுவனப் பங்கு தொடர்பான ஃபண்டமென்டல் விஷயங் களைத் தொடர்ந்து தெரிந்து கொள்வதன் மூலமும் நாம் வாங்கி வைத்திருக்கும் நிறுவனப் பங்கைத் தொடர்ந்து கண்காணிப்பதன் மூலமே இந்த ரிஸ்க்கை நம்மால் எளிதா கச் சமாளிக்க முடியும்.

5. வெற்றியால் ஏற்படும் ஓவர் கான்ஃபிடன்ஸ் ரிஸ்க்...

பங்குச் சந்தை அல்லது பங்குச் சந்தை சார்ந்த மியூச் சுவல் ஃபண்ட் முதலீடு என்பது நன்கு விஷயம் தெரிந்து செய்ய வேண்டியவை. இந்த முதலீட் டைத் தொடங்கிய காலத் திலேயே ஒருவருக்கு வெற்றி கிடைத்துவிட்டால், பங்குச் சந்தையைக் கரைத்துக் குடித்துவிட்டது மாதிரியான ஓர் எண்ணம் வந்துவிடுகிறது. இந்த எண்ணம் வந்தவுடன், அவரே தப்பும் தவறுமாக முதலீடு செய்து நஷ்டத்தைச் சந்திப்பதுடன், மற்றவர்களுக்கும் தவறான வழியைக் காட்டத் தொடங்கிவிடுகிறார்கள்.

இந்த ரிஸ்க்கை சமாளிப்பதற்கு எளிய வழி, வெற்றி என்றாலும், தோல்வி என்றாலும் அதை நம் தலையில் ஏற்றிக் கொள்ளாமல், நிதானமாக நடப்பது. இப்படி நிதானமாக நடப்பதன்மூலம் இழப்பில் இருந்து நிச்சயம் நம்மைத் தற்காத்துக்கொள்ள முடியும்.

ஆக மொத்தத்தில், முதலீடு என்று வரும்போது நம் உணர்ச்சிகளே நமக்கு எதிரிகளாக இருக்கின்றன. நீண்ட கால முதலீடு என்கிறபோது மனித மனம் இயற்கையாகவே அதிகம் உணர்ச்சிவசப் படாது. அந்த நிலையில், நம்முடைய முதலீட்டை நிதானமாக அமைத்துக்கொள்ள முடியும்.

சைக்கிள் அல்லது இரு சக்கர வாகனம் ஓட்டிப் பழகுவது போலத்தான் பங்குச் சந்தை சார்ந்த முதலீடுகளில் உள்ள ரிஸ்க் என்பது. இந்த ரிஸ்க்கை நிர்வகிப்பது எப்படி என்று தெரிந்து கொண்டால், நம்மால் நீண்ட காலத்தில் நல்ல லாபம் பெற முடியும் என்பதில் சந்தேகமே இல்லை!

ஃபோமோ ரிஸ்க்..!

இன்றைய இளைஞர்கள், பங்கின் விலை ஏறத் தொடங்கியதும் அவசரப்பட்டு, அந்தப் பங்கை துரத்தி சென்று முதலீடு செய்கிறார்கள். இப்படி வாய்ப்பை தவறவிட்டு விடுவோமோ என்பதை ஃபோமோ (FOMO - Fear of Missing Out) என்பார்கள். அந்தப் பங்கின் மதிப்பீடு மிக அதிகமாக இருக்கும்பட்சத்தின் பங்கின் விலை விரைவிலேயே இறங்கிவிடுகிறது. இதைத் தவிர்க்க நிதானமாக முதலீடு செய்வது அவசியமாகும்.

தீபக்
தீபக்

‘‘நல்ல லாபத்தில் இருந்தால் விற்கத் தயங்க மாட்டேன்!’’

தீபக், சென்னை.

‘‘கடந்த பத்து வருடங்களாக பங்கு சார்ந்த முதலீடுகளை மேற்கொண்டு வருகிறேன். பங்குச் சந்தை ஏற்ற இறக்கங்களுக்கு உட்பட்டது என்பதை தினமும் பார்த்து வருகிறோம். எனவே, ஏற்ற இறக்கங்களின்போது நம்முடைய உணர்வுகளுக்கு இடமளித்து முடிவுகளை எடுக்கக் கூடாது என்பதை முதலில் நான் புரிந்துகொண்டேன்.

அதே சமயம், நம்முடைய முதலீடு நன்றாக ஏற்றத்தில் இருக்கும்போது அவற்றை விற்று, பணமாக இருப்பில் வைத்துக்கொண்டு சந்தை நன்றாக இறங்கும்போது தரமான பங்குகளைக் குறைந்த விலையில் வாங்கிவிடுவேன். அதுமட்டுமல்லாமல், இறக்கத்தில் இருக்கிற மொத்த பணத்தையும் முதலீடு செய்யாமல், கொஞ்சம் கொஞ்சமாக முதலீடுகளைச் செய்வேன். மொத்தமாக ஒரு பங்கிலேயே போட்டுவிட்டால் சில நேரங்களில் அதில் மாட்டிக்கொள்ளும் நிலை வரலாம். அதனால் அதிக ரிஸ்க்காகிவிட வாய்ப்புள்ளது.

உணர்வுகளுக்கு இடம் கொடுக்காமல் பணத்தை புத்திசாலித்தனமாகக் கையாண்டு என்னுடைய நிதி இலக்குகளை எட்டுவதற்கான உத்திகளை செயல்படுத்துகிறேன். வீடு வாங்க வேண்டும் என்ற என்னுடைய இலக்குக்குத் தேவையான முன்பணத்தை பங்குச் சந்தை முதலீட்டின் மூலம்தான் திரட்டினேன். அடுத்தடுத்து பிள்ளைகளின் மேற்படிப்பு, திருமணம் போன்றவற்றுக்காக முதலீடுகளைத் தொடர்ந்து செய்ய திட்டமிட்டுள்ளேன்.’’

அஸ்வின் பாஸ்கரன்
அஸ்வின் பாஸ்கரன்

‘‘பொறுமை மிக மிக முக்கியம்..!’’

அஸ்வின் பாஸ்கரன், சென்னை.

‘‘பங்குச் சந்தையில் முதலில் தேவை, பொறுமை. ரிஸ்க்கை மேனேஜ் பண்ண பொறுமை அவசியம். பொறுமை இருந்தால் நெருக்கடிக் காலத்திலும் சரியான முடிவுகளை எடுக்கலாம். எனக்கு 25 வயதில் சொந்தமாக யாருடைய உதவியும் இல்லாமல் நல்ல ஸ்போர்ட் பைக் வாங்க வேண்டுமென்ற ஆசை இருந்தது. அதற்காக 22 வயதிலிருந்தே எஸ்.ஐ.பி மூலம் முதலீடு செய்ய ஆரம்பித்தேன்.

பங்குச் சந்தையில் உள்ள ரிஸ்க் ‘எப்போது சந்தை ஏறும், இறங்கும் என்பது தெரியாது’ என்பதுதான். 2008-க்குப் பிறகு கொரோனா காலத்தில் பங்குச் சந்தை கடுமையாக விழுந்தது. அப்போது எல்லோரும் பதற்றமாகி விற்க ஆரம்பித்தனர். ஆனால், அதன் பிறகு சந்தை ஏற்றம் கண்டு நல்ல ரிட்டர்ன் கொடுத்தது. அந்த சரிவின்போது பல நிறுவனப் பங்குகள் 70% வரை விலை குறைந்து வர்த்தகமாயின.

பெரும்பாலும் உபரியாக உள்ள பணத்தைதான் பங்குச் சந்தைகளில் முதலீடு செய்து வருவதால், தரமான பங்குகளை அந்த நேரத்தில் விற்காமல் பொறுமையாக வைத்திருந்தேன். அது சரியான முடிவாக இருந்தது. இறக்கத்தின்போது தரமான பங்குகளை விற்காமல் இருப்பது ஒரு வழி. இன்னொன்று, பணம் கையிலிருந்தால் இறக்கத்தில் வாங்கி சராசரி செய்துகொள்வது இன்னொரு வழி. இந்த இரண்டு வழிகளின் மூலமும் ரிஸ்க்கைக் குறைத்து சமாளித்து வருகிறேன்.’’

சிதம்பரம் ராமநாதன்
சிதம்பரம் ராமநாதன்

"டைவர்சிஃபைட்டாக முதலீடு செய்திருக்கிறேன்..!"

சிதம்பரம் ராமநாதன், சென்னை.

‘‘பங்குச் சந்தையில் இருக்கும் ரிஸ்க்கை இரண்டு விதமாகப் பார்க்கிறேன். ஒன்று, சிஸ்டமேட்டிக் ரிஸ்க்; மற்றொன்று, ‘நான்- சிஸ்டமேட்டிக் ரிஸ்க்.’ கொரோனா, பொருளாதார நெருக்கடி போன்ற காரணங்களால் பொதுவாக பங்குச் சந்தையில் ஏற்படும் பாதிப்புகளை சிஸ்டமேட்டிக் ரிஸ்க்காகப் பார்க்கலாம். இந்த ரிஸ்க்கைப் பெரிதாக கண்டுகொள்ள மாட்டேன்.

அதே சமயம் ஒரு தனிப்பட்ட நிறுவனப் பங்கு சார்ந்தோ, தனிப்பட்ட துறை சார்ந்தோ வரும் பிரச்னைகளால் அது சார்ந்த பங்குகளில் வரக்கூடிய ரிஸ்க் ‘நான் - சிஸ்டமேட்டிக் ரிஸ்க்’ எனலாம். இதற்கு அந்தந்த ரிஸ்க்குக்கு ஏற்ப முடிவுகளை எடுக்க வேண்டும். பொதுவாகவே, என்னுடைய முதலீடுகளை டைவர்சிஃபைடாக வைத்திருக்கிறேன். ஈக்விட்டி, கடன் சார்ந்த முதலீடு, கொஞ்சம் தங்கம் இப்படி. எனவே, எடுக்கக்கூடிய ரிஸ்க்குக்கு என்ன ரிட்டர்ன் கிடைக்கும் என்பதற்கேற்பதான் ரிஸ்க் எடுப்பேன்.

இன்னொரு விஷயம், போர்ட்ஃபோலியோவில் இருக்கும் பங்குகளுக்கு இடையிலான தொடர்பு அதாவது, correlation எப்படி இருக்கிறது என்று பார்ப்பேன். இந்தcorrelation பூஜ்யமாக இருக்கும்படி போர்ட்ஃபோலியோவைத் திட்டமிட்டுக்கொண்டால் ரிஸ்க்கை சரியாக மேனேஜ் செய்துகொள்ளலாம்.’’