Published:Updated:

குறுகிய காலத் தேவைக்கு ஏற்ற கடன் ஃபண்டுகள்..!

சேமிப்பும் முதலீடும்
பிரீமியம் ஸ்டோரி
சேமிப்பும் முதலீடும்

சேமிப்பும் முதலீடும் - 17

குறுகிய காலத் தேவைக்கு ஏற்ற கடன் ஃபண்டுகள்..!

சேமிப்பும் முதலீடும் - 17

Published:Updated:
சேமிப்பும் முதலீடும்
பிரீமியம் ஸ்டோரி
சேமிப்பும் முதலீடும்

மியூச்சுவல் ஃபண்ட் திட்டங் களில் எப்போது வேண்டு மானாலும் முதலீடு செய்ய லாம். குறுகிய காலத்தில் பணம் தேவைப்படும் என்கிறபோது, ரிஸ்க் குறைவான கடன் சந்தை சார்ந்த ஃபண்டுகளில் முதலீடு செய்யலாம்.

சிவகாசி மணிகண்டன் 
நிதி ஆலோசகர், 
Aismoney.com
சிவகாசி மணிகண்டன் நிதி ஆலோசகர், Aismoney.com

கடன் ஃபண்டுகள் என்றால்...?

முதலீட்டாளர்களிடமிருந்து திரட்டப்படும் நிதி, பெரிய கார்ப்பரேட் நிறுவனங்களின் டெபாசிட்டுகள், அரசுக் கடன் பத்திரங்கள் போன்றவற்றில் பிரித்து முதலீடு செய்யப்படுவது, கடன் சந்தை சார்ந்த மியூச்சுவல் ஃபண்டுகள் (Debt Mutual Funds) எனப்படும்.

கடன் ஃபண்டுகளில் ரிஸ்க் உள்ள திட்டங்களும் உள்ளன; ரிஸ்க் இல்லாத திட்டங்களும் இருக்கின்றன. கில்ட் ஃபண்டுகள், லிக்விட் ஃபண்டுகள் போன்றவை ரிஸ்க் குறைவான பிரிவில் முக்கியமானவை. மூலதனத் துக்கு இழப்பு இல்லாதவாறு, தேவைப்படும்போது எடுத்துக்கொள்ளக்கூடிய வகையில் முதலீடு செய்வது இந்த வகை ஃபண்டுகளின் சிறப்பம்சம் ஆகும்.

ஃபிக்ஸட் டெபாசிட்டைவிட சிறந்தது...

கடன் ஃபண்டுகளில் ரிஸ்க் குறைவாக இருப்பது போல், வருமானமும் குறைவாகத்தான் இருக்கும். அதே நேரத்தில், வங்கி ஃபிக்ஸட் டெபாசிட், கம்பெனி டெபாசிட்டுகளுக்குப் பதிலாக, இந்தக் கடன் ஃபண்டு களில் முதலீடு செய்யலாம்.

இந்தக் கடன் ஃபண்டுகளில் முதலீடு எத்தனை நாள் களுக்கு இருக்கிறதோ, அதற்கேற்ப வருமானம் கிடைக்கும். எஃப்.டி மாதிரி இடையில் எடுப்பதற்கு அபராதம், முழுப் பணத்தையும் எடுக்க வேண்டும் என்கிற கட்டாயம் எல்லாம் மியூச்சுவல் ஃபண்டுகளில் இல்லை என்பதால் விவரம் தெரிந்த பலரும் கடன்களில் முதலீடு செய்கிறார்கள்.

எப்போது வேண்டுமானாலும் முதலீடு செய்யும் மற்றும் எப்போது வேண்டுமானாலும் வெளியேற அனுமதிக்கும் ஓப்பன் எண்டட் ஃபண்டுகளைத் தேர்வு செய்வது நல்லது. மேலும், ஆறு மாதம் அல்லது ஓராண்டுக்குப் பிறகு, இதன் யூனிட்டுகளை விற்று பணமாக்கும்போது வெளியேறும் கட்டணம் எதுவும் இருக்காது. எஃப்.டியில் முதிர்வுக்கு ஒரு நாள் முன்னால் எடுத்தால்கூட அபராதம் கட்டவேண்டி வரும் என்பதை நினைவில் கொள்வது அவசியம்!

பங்குச் சந்தை சார்ந்த மியூச்சுவல் ஃபண்ட் திட்டங்கள் போல் கடன் ஃபண்டுகளின் யூனிட் என்.ஏ.வி மதிப்பு அதிக ஏற்ற இறக்கத்துக்கு உள்ளாகாது.

குறுகிய காலத் தேவைக்கு ஏற்ற
கடன் ஃபண்டுகள்..!

கடன் ஃபண்ட் வகைகள்

இந்த ஃபண்டுகளில் முதலீடு செய்யும் காலத்தைப் பொறுத்து, குறுகிய காலத்துக்கு ஷார்ட் டேர்ம் ஃபண்ட், நடுத்தரக் காலத்துக்கு மீடியம் டேர்ம் ஃபண்ட், நீண்ட காலத்துக்கு லாங் டேர்ம் ஃபண்ட் என மூன்றாகப் பிரிக்கப் பட்டுள்ளது.

ஒருவருக்கு முதலீடு செய்யும் பணம் எவ்வளவு காலத்துக்குப் பிறகு தேவை என்பதைப் பொறுத்து, அதற்கேற்ற கடன் ஃபண்டைத் தேர்வு செய்ய வேண்டும்.

இந்த வாரம் நாம் குறுகிய காலக் கடன் ஃபண்டுகள் பற்றி கேட்போம். கடந்த இதழில் வங்கிச் சேமிப்புக் கணக்குக்கு மாற்றாக, அவசரகால நிதியைச் சேர்த்து வைக்க கடன் ஃபண்ட் பிரிவைச் சேர்ந்த லிக்விட் ஃபண்டைப் பயன்படுத்தலாம் எனப் பார்த்தோம்.

இதைத் தாண்டி, ஒரு சொத்தை விற்றுவிட்டு அடுத்த சொத்து வாங்குகிற வரைக்கும் அந்தப் பணத்தைப் பாதுகாப்பாகவும், சிறிது வருமானம் ஈட்டுவதாகவும் வைக்க குறுகிய கால கடன் ஃபண்டுகளில் முதலீடு செய்யலாம்.

இதேபோல், பிள்ளைகளின் கல்வி, கல்யாணம் ஆகிய தேவைகளுக்கு வைத்திருக்கிற பணத்தையும் குறுகிய கால கடன் ஃபண்டுகளில் முதலீடு செய்து வைக்கலாம். இது போன்ற தேவை உள்ளவர்கள் பணம் தேவைப்படும் காலத்தைப் பொறுத்து, அதற்கேற்ப முதிர்வைக் கொண்ட ஃபண்டு களில் முதலீடு செய்யலாம்.

குறுகிய கால கடன் ஃபண்ட் வகைகள்

கடன் ஃபண்டுகளை செபி அமைப்பு 16 வகைகளாகப் பிரித்துள்ளது. அதில், ஓவர்நைட் ஃபண்ட், லிக்விட் ஃபண்ட், அல்ட்ரா சார்ட் டூரேஷன் ஃபண்ட், லோ டூரேஷன் ஃபண்ட், மணி மார்க்கெட் ஃபண்ட், ஷார்ட் டூரேஷன் ஃபண்ட், கார்ப்பரேட் பாண்ட் ஃபண்ட், பேங்கிங் அண்ட் பி.எஸ்.யூ ஃபண்ட், கில்ட் ஃபண்ட் ஆகியவை குறுகிய கால முதலீட்டுக்கு ஏற்றவையாக உள்ளன.

இந்த ஃபண்டுகள் பற்றி விரிவாகப் பார்ப்போம்.

ஓவர்நைட் ஃபண்ட்: ஒரே ஒரு நாள் முதிர்வு கொண்ட நிதி ஆவணங்களில் முதலீடு செய்யும் ஃபண்ட் இது. இதில், பெரும் பாலும் வங்கிகள், மியூச்சுவல் ஃபண்ட் போன்ற பெரிய நிறு வனங்கள்தான் முதலீடு செய்யும்.

லிக்விட் ஃபண்ட்: முதலீட் டாளர்களிடமிருந்து திரட்டப் படும் பணம், இந்தத் திட்டத்தில் 91 நாள் வரை முதிர்வுகொண்ட கடன் பத்திரங்கள் மற்றும் நிதிச் சந்தை ஆவணங்களில் முதலீடு செய்யப்படுகிறது. வங்கி சேமிப்புக் கணக்கைவிட சிறிது அதிக வருமானம் கொடுக்கும். அவசரத் தேவைக்கு இதில் பணத்தைப் போட்டு வைக்கலாம்.

அல்ட்ரா ஷார்ட் டூரேஷன் ஃபண்ட்: முதலீட் டாளர்களிடமிருந்து திரட்டப்படும் தொகை, இந்தத் திட்டத்தில் மூன்று மாதங்கள் மற்றும் ஆறு மாதங்கள் இடையே முதிர்வுக் கொண்ட கடன் சந்தை மற்றும் நிதிச் சந்தை ஆவணங்களில் முதலீடு செய்யப்படுகிறது.

லோ டூரேஷன் ஃபண்ட்: திரட்டப்படும் தொகை, இந்த ஃபண்டில் ஆறு மாதங்கள் மற்றும் 12 மாதங்கள் இடையே முதிர்வுகொண்ட கடன் சந்தை மற்றும் நிதிச் சந்தை ஆவணங்களில் முதலீடு செய்யப்படும்.

மணி மார்க்கெட் ஃபண்ட்: முதலீட்டாளர் களிடமிருந்து திரட்டப்படும் தொகை, இந்த ஃபண்டில் 365 நாள்கள் வரை முதிர்வுகொண்ட நிதிச் சந்தை ஆவணங்களில் முதலீடு செய்யப்படும்.

ஷார்ட் டூரேஷன் ஃபண்ட்: இந்த ஃபண்டில் திரட்டப்படும் தொகையானது ஒன்று, மூன்று ஆண்டுகள் இடையே முதிர்வுகொண்ட கடன் சந்தை மற்றும் நிதிச் சந்தை ஆவணங்களில் முதலீடு செய்யப் படும்.

பேங்கிங் அண்ட் பி.எஸ்.யூ ஃபண்ட்: இந்த ஃபண்டில் திரட்டப்படும் தொகையில் குறைந்தபட்சம் 80% வங்கிகள், பொதுத்துறை நிறுவனங்கள், பொதுத் துறை நிதி அமைப்புகள் போன்றவை வெளியிடும் கடன் பத்திரங்களில் முதலீடு செய்யப் படும். அரசு சார்ந்த நிறுவனங்களின் கடன் பத்திரங்களில் முதலீடு செய்யப்படுவதால் ரிஸ்க் மிகக் குறைவாகும். இந்த ஃபண்டுகளின் மூலம் பாதுப்பான, நிலையான, தொடர்ச்சியான வருமானத்தை எதிர்பார்க்கலாம்.

கில்ட் ஃபண்ட்: முதலீட்டாளர்களிடமிருந்து திரட்டப்படும் பணத்தில் குறைந்தபட்சம் 80% அரசு கடன் பத்திரங்களில் முதலீடு செய்யும் திட்டம், கில்ட் ஃபண்ட். சூழ்நிலைக்கு ஏற்ப பல்வேறு முதிர்வு கொண்ட அரசு நிதி ஆவணங்களிலும் முதலீடு செய்யப்படுகிறது. அரசுப் பத்திரங்களில் முதலீடு செய்யப்படுவதால், ரிஸ்க் இல்லை. இதனால் மூலதனத்தில் ரிஸ்க் எடுக்க விரும்பாதவர்கள், மூத்த குடிமக்கள் ஆகியோருக்கு ஏற்ற திட்டம் ஆகும்.

வருமான வரியைப் பொறுத்தவரை, மூன்று ஆண்டு களுக்கு உட்பட்ட குறுகிய கால முதலீட்டுக்கு ஒருவர் எந்த அடிப்படை வரி வரம்பில் வருகிறாரோ, அதற்கேற்ப வருமான வரியைக் கட்ட வேண்டும்.

மேலே விவரிக்கப்பட்ட ஃபண்டுகள் அனைத்தும் பெரும்பாலும் ஓப்பன் எண்டட் ஃபண்ட் வகையைச் சேர்ந்தவை ஆகும். இந்த ஃபண்டுகளில் திரட்டப்படும் பணம், முதலீடு செய்யும் கடன் பத்திரங்களின் முதிர்வுக் காலத் துக்கு இணையாக உங்களின் முதலீட்டு காலமும் இருந்தால் லாபகரமாக இருக்கும்.

பிள்ளைகளின் பள்ளிக்கூட ஆண்டுக் கட்டணம், காப்பீட்டுத் திட்டங்களின் ஆண்டு பிரீமியம், உள்நாட்டு சுற்றுலா வுக்குத் தேவையான தொகை போன்ற வற்றுக்கு இந்தக் குறுகிய கால கடன் ஃபண்டுகளில் முதலீடு செய்து வரலாம்.

குறுகிய காலத் தேவைக்குக் கடன் ஃபண்டுகள் இருக்க கவலை ஏன்?

(முதலீடு செய்வோம்)

கார்ப்பரேட் பாண்ட் ஃபண்ட் முதலீடு!

இந்த ஃபண்டில் திரட்டப்படும் பணத்தில் குறைந்தபட்சம் 80% பெரிய நிறுவனங்கள் வெளியிடும் கடன் பத்திரங்களில் முதலீடு செய்யப்படும். அதுவும் அதிக தரக்குறியீடு கொண்ட கடன் பத்திரங்களில்தான் முதலீடு செய்யப்படும். அந்த வகையில், இந்த கார்ப்பரேட் பாண்ட் ஃபண்ட்டில் ரிஸ்க் சற்றுக் குறைவாக உள்ளது.