Published:Updated:

குறுகிய காலம்... நடுத்தர காலம்... நீண்ட காலம்... உங்கள் இலக்குக்கு ஏற்ற முதலீடுகள்!

முதலீடு
பிரீமியம் ஸ்டோரி
முதலீடு

C O V E R S T O R Y

குறுகிய காலம்... நடுத்தர காலம்... நீண்ட காலம்... உங்கள் இலக்குக்கு ஏற்ற முதலீடுகள்!

C O V E R S T O R Y

Published:Updated:
முதலீடு
பிரீமியம் ஸ்டோரி
முதலீடு

முதலீட்டின் முக்கியமான நோக்கம் நமது நிதி இலக்கை நிறைவேற்றுவதாக இருக்கிறது. ஒரு நிதித் தேவையை நிறைவேற்ற, சரியான முதலீட்டைத் தேர்வு செய்வது அவசியம்.

ஹசன் அலி 
ஆலோசகர், 
Siptiger.com
ஹசன் அலி ஆலோசகர், Siptiger.com

ஒவ்வொருவருடைய வாழ்க்கையிலும் முக்கியமான நிதி இலக்குகள் என்கிறபோது பிள்ளை களின் உயர்கல்வி, திருமணம், சொந்த வீடு, ஓய்வுக்காலம் ஆகும். இவை தவிர, ஆண்டுதோறும் இன்ஷூரன்ஸ் பிரீமியம் கட்டுவது, பள்ளிக் கல்விக்கான கட்டணம் கட்டுவது எனப் பல்வேறு நிதி இலக்குகள் ஒவ்வொருவருக்கும் இருக்கின்றன.

பல வகை முதலீட்டுக் காலம்...

எப்போதும் இலக்கைப் பொறுத்து தான் முதலீட்டுக் காலம் அமையும். பள்ளிக்கல்விக் கட்டணம் என்பது ஆண்டுதோறும் வரும் இலக்கு. சொந்த வீடு என்பது நடுத்தர காலத்தில் வரும் இலக்கு. பிள்ளையின் திருமணம் என்பது நீண்ட காலத்துக்குப் பிறகு வரும் இலக்கு.

ஒவ்வொரு இலக்குக்குமான காலம் ஒவ்வொரு மாதிரியாக இருப்பதால், அந்த இலக்குகளை நிறைவேற்றத் தேவையான முதலீட்டு முறை மாறும். எல்லா இலக்குகளுக்கும் ஒரே முதலீட்டு முறையைத் தேர்வு செய்யக் கூடாது. எனவே, எந்த இலக்குக்கு, எந்தத் தேவைக்கு எந்த வகை முதலீடு சரியாக இருக்கும் என்பது முக்கியம்.

பொதுவாக, முதலீட்டுக் காலத்தை குறுகிய காலம், நடுத்தர காலம் மற்றும் நீண்ட காலம் என மூன்று விதமாகப் பிரித்திருக்கிறார்கள். ஆனால், நமது முதலீட்டின் தேவையை மிகச் சரியாக நிறைவேற்ற வேண்டும் எனில், இந்த மூன்று பிரிவு காலத்தை மேலும் பல பிரிவு காலமாகப் பிரிக்க வேண்டும்.

இந்திய மியூச்சுவல் ஃபண்ட் நிறுவனங்களின் கூட்டமைப்பான ஆம்ஃபி (AMFI), முதலீட்டுக் காலத்தை, மிக குறுகிய காலம் (Very Short Term), குறுகிய காலம் (Short Term), நடுத்தர காலம் (Medium Term), நீண்ட காலம் (Long Term), மிக நீண்ட காலம் (Very Long Term) என ஐந்தாகப் பிரித்திருக்கிறது. இந்த ஐந்து காலத்தின் அடிப்படையில் அமையும் நமது இலக்குகளை சரியாக நிறைவேற்றத் தேவையான முதலீட்டு முறை என்ன என்பதை இனி பார்ப்போம்.

மிக குறுகிய காலம்

இந்தப் பிரிவில் முதலீட்டுக் காலம் ஓராண்டுக்குக் குறைவாக இருக்கும். முதலீட்டுக் காலம் மிகக் குறுகியதாக இருப்பதால், இந்த முதலீட்டில் ரிஸ்க் எடுக்க முடியாது. எனவே, அவசரகால தொகுப்பு நிதி, சில மாதங்கள் கழித்து பயன்படுத்த இருக்கும் பணம், தீபாவளி, பொங்கல் போனஸ் போன்ற பணத்தை குறுகிய கால ஃபிக்ஸட் டெபாசிட், மியூச்சுவல் ஃபண்டில் லிக்விட் ஃபண்ட் ஆகியவற்றில் முதலீடு செய்து வைக்கலாம்.

இந்த முதலீட்டில் ரிஸ்க் இல்லை என்பதால், இவற்றின் மூலம் ஆண்டுக்கு சராசரியாக 5% வருமானத்தைத்தான் எதிர்பார்க்க முடியும்.

இதில் முதலீட்டுக் காலம் ஒரு நாள் முதல் மூன்று மாதங்களுக்குள் இருந்தால் லிக்விட் ஃபண்ட் லோ டியூரேஷன் டெஃப்ட் மியூச்சுவல் ஃபண்ட் மற்றும் 1, 2, 3 மாத ஃபிக்ஸட் டெபாசிட்டுகள் ஏற்றதாக இருக்கும்.

முதலீட்டுக் காலம் மூன்று மாதத்துக்குமேல் ஓராண்டு என இருந்தால், ஷார்ட் டேர்ம் ஃபண்ட், ஆர்பிட்ரேஜ் ஃபண்ட், 3 மாதம் முதல் ஓராண்டு முதிர்வைக் கொண்ட ஃபிக்ஸட் டெபாசிட்டுகளில் முதலீடு செய்துவைக்கலாம்.

குறுகிய காலம்... நடுத்தர காலம்... நீண்ட காலம்... உங்கள் இலக்குக்கு ஏற்ற முதலீடுகள்!

குறுகிய காலம்

குறுகிய கால முதலீடு என்பது ஓராண்டுக்கு மேற்பட்டு, மூன்று ஆண்டுகளுக்கு உட்பட்டதாகும். சிறிய கார் வாங்குதல், சுற்றுலா செல்லுதல், வீட்டுக் கடன் மூலம் வீடு வாங்க முன்பணம் (டவுன் பேமென்ட்) சேர்த்தல், ஓய்வுக் கால தொகுப்பு நிதியைப் பாது காப்பாக வைக்க ரிஸ்க் எடுக்க விரும்பாதவர்கள் ஒன்று முதல் மூன்றாண்டுக்கு உட்பட்ட ஃபிக்ஸட் டெபாசிட்டுகளில் இந்த இலக்குகளை நிறைவேற்றும் பணத்தைப் போட்டு வைக்கலாம். இந்த ஃபிக்ஸட் டெபாசிட் மூலம் சுமார் 5 - 6% வருமானம் கிடைக்கக் கூடும்.

முதலீட்டில் ஓரளவுக்கு ரிஸ்க் எடுக்கக்கூடியவர்கள், கடன் சந்தை சார்ந்த மியூச்சுவல் ஃபண்டுகளில் குறிப்பாக, மீடியம் டியூரேஷன் டெப்ட் மியூச்சுவல் ஃபண்டுகளில் முதலீடு செய்ய லாம். இந்த முதலீட்டின் மூலம் ஆண்டுக்குச் சராசரியாக 8% வருமானத்தை எதிர்பார்க்கலாம்.

நடுத்தர காலம்

நடுத்தர கால முதலீடு என்பது மூன்று முதல் ஆறு ஆண்டுகளுக்கு உட்பட்ட முதலீட்டுக் காலத்தைக் குறிக்கும். சிறிய சொந்த வீடு வாங்குதல், கார் வாங்குதல் போன்ற தேவைகளுக்கு நடுத்தர காலத்தில் முதலீடு செய்து வரலாம்.

இந்த இலக்குகளை நிறைவேற்ற ஹைபிரிட் மியூச்சுவல் ஃபண்டு களில் டைனமிக் அஸெட் அலொகேஷன் ஃபண்டுகளில் முதலீடு செய்து வரலாம். பங்குச் சந்தை பற்றி நன்கு அறிந்தவர்கள் புளூசிப் நிறுவனங்கள் என்கிற மிகப்பெரிய நிறுவனப் பங்கு களில் இந்த இலக்குகள் நிறைவேற முதலீடு செய்துவரலாம். இந்த முதலீடுகளின் மூலம் ஆண்டுக்கு சராசரியாக 10% வருமானத்தை எதிர்பார்க்கலாம்.

குறுகிய காலம்... நடுத்தர காலம்... நீண்ட காலம்... உங்கள் இலக்குக்கு ஏற்ற முதலீடுகள்!

நீண்ட காலம்

நீண்ட கால முதலீடு என்பது ஆறு ஆண்டுகளுக்குமேல் 10 ஆண்டுகளுக்கு உட்பட்டதாகும். பிள்ளைகளின் உயர்கல்வி, அவர்களின் திருமணம், சொந்த வீடு வாங்குதல் போன்றவை நீண்ட கால முதலீட்டின்கீழ் வரும். இந்தத் தேவையை நிறைவேற்ற ஃப்ளெக்ஸிகேப் ஃபண்ட், மல்ட்டிகேப் ஃபண்ட், லார்ஜ் அண்ட் மிட்கேப் ஃபண்டுகளில் முதலீடு செய்து வரலாம்.

பங்குச் சந்தை பற்றி அறிந்தவர் கள் லார்ஜ்கேப் நிறுவனங்கள் என்கிற பெரிய நிறுவனப் பங்குகளில் முதலீடு செய்து வரும்பட்சத்தில் நீண்ட கால இலக்குகள் நிறைவேறும்.

குறுகிய காலம்... நடுத்தர காலம்... நீண்ட காலம்... உங்கள் இலக்குக்கு ஏற்ற முதலீடுகள்!

மிக நீண்ட காலம்

பத்தாண்டுகளுக்கு மேற்பட்ட முதலீட்டுக் காலம் மிக நீண்ட கால முதலீட்டின்கீழ் வருகிறது. ஓய்வுக்காலத் தொகுப்பு நிதி, பிள்ளைகளின் எதிர்காலம், செல்வம் சேர்த்தல் போன்ற இலக்குகளை நிறைவேற்ற மிட்கேப், ஸ்மால்கேப் மற்றும் செக்டார் ஃபண்டுகளில் முதலீடு செய்துவரலாம். பங்குச் சந்தை பற்றி நன்கு தெரிந்து வைத்திருந்தால், மிட்கேப், ஸ்மால்கேப் ஃபண்டுகளில் முதலீடு செய்துவரலாம்.

கவனிக்க வேண்டிய விஷயங்கள்...

முதலீட்டுக் காலம் மற்றும் இலக்குகளின் அடிப்படையில் ஒருவர் முதலீடு செய்ய வேண்டிய திட்டங்கள் பற்றி இதுவரை பார்த்தோம். இந்த முதலீட்டுத் திட்டங் களை ஒருவரின் ரிஸ்க் எடுக்கும் திறன், அஸெட் அலோகேஷன் முறைப்படி முதலீட்டைத் தேர்வு செய்வது அவசியம்.

ஓய்வுக்காலத் தொகுப்பு நிதிக்கு மிட், ஸ்மால்கேப் ஃபண்டுகள் மற்றும் பங்கு களில் முதலீடு செய்யலாம் என்று சொல்லியிருக்கிறோம். இது முதலீட்டுக் காலம் பத்தாண்டுகளுக்கு மேல் இருக்கும்பட்சத்தில்தான். முதலீட்டுக் காலம் ஆறு முதல் 10 ஆண்டுகளுக்குள் இருக்கும்பட்சத்தில், ஃப்ளெக்ஸிகேப் ஃபண்ட், மல்ட்டிகேப் ஃபண்ட், லார்ஜ் அண்ட் மிட்கேப் ஃபண்டுகளில்தான் முதலீடுகளில் செய்ய வேண்டும்.

இதேபோல், மற்ற இலக்குகள் நிறைவேறுவதற்கான காலம் குறுகியதாக இருக்கும்பட்சத்தில், குறுகிய காலத்துக்கு சொல்லப்பட்ட முதலீடுகளைத்தான் மேற்கொள்ள வேண்டும். இந்த விஷயத்தில் உங்களுக்கு ஏதாவது சந்தேகம் மற்றும் குழப்பம் இருந்தால், ஒரு நல்ல முதலீட்டு ஆலோசகரை அணுகுவது நல்லது.

தங்கம் வாங்க...

திருமணத்துக்கு தங்க நகை தேவை என்கிறபட்சத்தில், கோல்டு சாவரின் ஃபாண்டு (முதலீட்டுக் காலம் 8 ஆண்டுகள்), கோல்டு இ.டி.எஃப் மற்றும் கோல்டு சேவிங்க்ஸ் ஃபண்டு களில் முதலீடு செய்துவரலாம். தங்க நகைக்கு பதில் டிஜிட்டல் தங்கத்தில் முதலீடு செய்தால், பாதுகாப்பு, செய்கூலி, சேதாரம், பழைய நகை, பழைய டிசைன் பிரச்னை இல்லை.

ரியல் எஸ்டேட் முதலீடு...

பலரும் தங்கள் வாழ்க்கையில் சொத்து சேர்க்க வேண்டும் என்பதற் காக மனைகளில் முதலீடு செய்து வருகிறார்கள். இது மிக நீண்ட காலத்தில் லாபகரமான முதலீடாக இருக்க வாய்ப்பிருக்கிறது. ஆனால், கடந்த காலங்களைப் போல பல மடங்கு வருமானம் இதில் கிடைக்கும் என எதிர்பார்க்க முடியாது. காரணம், சொத்துகளின் விலை மிகவும் அதிகரித்திருப்பதும், இளைஞர்கள் இடையே ரியல் எஸ்டேட்டுக்கான ஆர்வம் குறைவாக இருப்பதும்தான்.

வாடகை வருமானம் பெறும் நோக்கில் வீடு, அடுக்குமாடிக் குடியிருப்புகள் வாங்குவது இப்போது லாபகரமாக இல்லை. வீட்டு வாடகை வருமானம் என்பது சொத்து மதிப்பில் 2 - 3 சதவிகிதமாகத்தான் இருக்கிறது. அந்த வகையில், குடியிருக்கும் வீடு தவிர, இரண்டாவது, மூன்றாவது வீடு வாங்குவது லாபகரமாக இல்லை.

எஸ்.ஐ.பி முதலீட்டு முறை...

இந்த இலக்குகளை நிறைவேற்ற மாதச் சம்பளக்காரர்களால் மொத்த மாக முதலீட்டை மேற்கொள்ள முடியாது. அவர்கள் வங்கி மற்றும் தபால் அலுவலகத் தொடர் சேமிப்புத் திட்டம் (ஆர்.டி) மற்றும் மியூச்சுவல் ஃபண்ட் மற்றும் நிறுவனப் பங்கு களில் எஸ்.ஐ.பி முறையில் தொடர்ந்து முதலீடு செய்தால், உங்கள் இலக்கு களை சுலபமாக நிறைவேற்றிக் கொள்ள முடியும்.

நீண்ட காலம் மற்றும் மிக நீண்ட கால முதலீடு என்கிறபோது ரிஸ்க் அதிகம் உள்ள திட்டங்களில் முதலீடு செய்தால்தான், அதிக வருமானம் கிடைக்கும் என்பதை மனதில் கொண்டு இனி முதலீடு செய்யத் தொடங்குங்கள்!

டேர்ம் இன்ஷூரன்ஸ் - முதலீட்டுக்கு பாதுகாப்பு..!

தேவையின் அடிப்படையில் முதலீட்டுக் காலம் மற்றும் சரியான முதலீட்டுத் திட்டங்களைத் தேர்வு செய்து முதலீடு செய்துவரும் அதே நேரத்தில், அந்த முதலீடுகளுக்குப் பாதுகாப்பையும் மேற்கொள்ள வேண்டும். அதாவது, பிள்ளையின் உயர்கல்விக்கு முதலீடு செய்துவரும் நிலையில் வருமானம் ஈட்டும் குடும்பத் தலைவருக்கு ஏதாவது அசம்பாவிதம் ஏற்பட்டால் குடும்ப உறுப்பினர்கள் நிதிச் சிக்கலில் மாட்டிக்கொள்வதுடன், பிள்ளையின் உயர்கல்வி தடைபடக்கூடும். இதைத் தவிர்க்க வருமானம் ஈட்டும் நபரின் பெயரில் அவரின் ஆண்டு வருமானத்தைப்போல் சுமார் 15 மடங்கு தொகைக்கு ஆயுள் காப்பீடு எடுத்துக்கொள்ளும்பட்சத்தில் குடும்பச் செலவுகள் மற்றும் உயர்கல்வி செலவுகளை ஈடுகட்ட முடியும்.

ஒட்டுமொத்த குடும்பத்துக்கு மருத்துவக் காப்பீடு எடுத்துக்கொள்வது மிக முக்கியம். இல்லை எனில், ஏதாவது திடீர் மருத்துவச் செலவு வரும்போது சேமிப்பு மற்றும் முதலீடு கரைந்துவிடும். கூடவே, மூன்று மாதக் குடும்பச் செலவுக்கான தொகையை அவசரகால நிதியாக வைத்திருப்பதும் அவசியம்.