Published:Updated:

சாதாரண மக்களுக்குக் கைகொடுக்கும் சிறுசேமிப்பு! வட்டியைக் குறைக்க நினைப்பது சரியா?

S M A L L  S A V I N G S
பிரீமியம் ஸ்டோரி
S M A L L S A V I N G S

S M A L L S A V I N G S

சாதாரண மக்களுக்குக் கைகொடுக்கும் சிறுசேமிப்பு! வட்டியைக் குறைக்க நினைப்பது சரியா?

S M A L L S A V I N G S

Published:Updated:
S M A L L  S A V I N G S
பிரீமியம் ஸ்டோரி
S M A L L S A V I N G S

கடந்த 31.3.2021 அன்று, மத்திய அரசு தனது சிறு சேமிப்புத் திட்டங்களுக்கான வட்டி விகிதத்தை 0.4% - 1.1% வரை அதிரடியாகக் குறைத்தது.

சமீபத்திய விலைவாசி உயர்வால் கடுமையாகப் பாதிக்கப்பட்டுள்ள நடுத்தட்டு மக்களிடையே, குறிப்பாக, ஓய்வுக்கால வாழ்வாதாரத்துக்காக வட்டி வருவாயைப் பெருமளவு நம்பியுள்ள மூத்த குடிமக்களிடையே, அரசின் இந்த அதிரடி வட்டிக் குறைப்பு நடவடிக்கைக்கு கடும் எதிர்ப்பு கிளம்பியது. இந்த அறிவிப்பு, கவனக் குறைவால் (Oversight) வெளியிடப்பட்டுவிட்டதாகத் தெரிவித்த மத்திய நிதி அமைச்சர், வட்டிக் குறைப்பு நடவடிக்கையைத் திரும்பப் பெறுவதாக மறுதினமே (01.04.2021) அறிவித்தார்.

சிறுசேமிப்பு
சிறுசேமிப்பு

ஐந்து மாநிலங்களில் சட்டமன்றத் தேர்தல் நடைபெற்று வந்ததாலேயே வட்டிக் குறைப்பு நடவடிக்கை மத்திய அரசாங்கம் திரும்பப் பெற்றதாகவும், அடுத்த சில மாதங் களில் வட்டி விகிதங்கள் மீண்டும் குறைக்கப்படும் அறிவிப்பு வெளியாகலாம் எனப் பலவிதமான ஊகங்கள் தொடர்ந்து மக்களிடையே பரபரப்பாகப் பேசப்பட்டு வருகிறது.

சாதாரண மக்களுக்குக் கைகொடுக்கும் சிறுசேமிப்பு! வட்டியைக் குறைக்க நினைப்பது சரியா?

சிறுசேமிப்புக்கென ஒரு வாரியம்...

நம் நாட்டில் சிறுசேமிப்புத் திட்டங்களுக்கு நீண்ட வரலாறு உண்டு. இந்திய மக்களிடையே சேமிக்கும் பழக்கத்தை ஊக்குவிக்கவும், அரசு நலத் திட்டங்களுக்கு தேவை யான நிதியைத் திரட்டவும் தேசிய சிறு சேமிப்பு வாரியம் (National Small Savings Institute) 1948-ல் உருவாக்கப் பட்டது. மத்திய நிதி அமைச்சகத்தின் கீழ் இயங்கிவரும் தேசிய சிறு சேமிப்பு வாரியம், ஒன்பது திட்டங்களை நிர்வகித்து வருகிறது.

தேசிய சிறுசேமிப்புத் திட்டங்களை மக்களிடம் கொண்டு சேர்க்கும் முக்கியமான நிறுவனமாக இந்திய அஞ்சல் துறை இருந்தாலும், பொதுத் துறை வங்கிகள் மற்றும் சில தனியார் வங்கிகளும் (ஹெச்.டி.எஃப்.சி பேங்க், ஆக்ஸிஸ் பேங்க் மற்றும் ஐ.சி.ஐ.சி.ஐ பேங்க்) பொது சேமநல நிதி, மூத்த குடிமக்கள் சேமிப்புத் திட்டம் போன்ற குறிப்பிட்ட சில சிறுசேமிப்பு திட்டங் களை நிர்வகித்து வருகின்றன. பொது சேமநல நிதி போன்ற சில திட்டங்களுக்கு அரசின் சிறப்பு வரிச் சலுகைகளும் வழங்கப்படுகின்றன.

நிதியைப் பயன்படுத்திக்கொள்ளும் மத்திய, மாநில அரசுகள்...

தேசிய சிறுசேமிப்புத் திட்டங்களின் வாயிலாகத் திரட்டப்படும் நிதியானது, மத்திய, மாநில அரசுகளிடையே பகிர்ந்து கொள்ளப்படுகிறது. இந்த நிதியை சிறு சேமிப்பு வாரியத்திடமிருந்து பெற மத்திய, மாநில அரசுகள் சிறப்புக் கடன் பத்திரங்களை (Special Government Securities) வெளியிடுகின்றன. மொத்த நிதிக்கான வட்டிச் செலவினமும் மத்திய, மாநில அரசுகளிடையே விகிதாசார அடிப்படையில் பகிர்ந்துகொள்ளப்படுகின்றன. கடந்த சில ஆண்டுகளாக, இந்திய உணவுக் கழகம் (Food Corporation of India) போன்ற பொதுத்துறை நிறுவனங்களுக்கும் தேசிய சிறுசேமிப்பு நிதியிலிருந்து கடன் வழங்கப்பட்டது.

கடந்த 2019-20-ம் ஆண்டு, மொத்த சிறுசேமிப்பு நிதி ரூ.8,46,660.75 கோடியும் நிகரமாக ரூ.2,80,274.93 கோடியும் சேமிப்புத் திட்டங்களின் வாயிலாக திரட்டப்பட்டுள்ளது. சிறு சேமிப்புத் திட்டங்களுக்கான வட்டி விகிதம் ஒவ்வொரு காலாண்டின் ஆரம்பத்திலும் மத்திய அரசின் நிதி அமைச்சகத் தினால் வெளியிடப்படுகிறது.

சாதாரண மக்களுக்குக் கைகொடுக்கும் சிறுசேமிப்பு! வட்டியைக் குறைக்க நினைப்பது சரியா?

சியாமளா கோபிநாத் குழுவின் பரிந்துரை...

13-வது நிதி ஆணையத்தின் பரிந்துரையின் பேரில், சிறு சேமிப்புத் திட்டங்களின் நிர்வாகம் குறித்தும், வட்டி விகிதங்களை நிர்ணயிப்பதில் வெளிப்படைத்தன்மையை உருவாக்குவது பற்றி ஆராய் வதற்காக, 08.11.2010-ல், அப்போதைய ரிசர்வ் வங்கியின் துணை ஆளுநர் சியாமளா கோபிநாத் தலைமையில் குழு அமைக்கப்பட்டது.

07.06.2011-ம் தேதி தனது அறிக்கையைத் தாக்கல் செய்த சியாமளா குழு, சிறுசேமிப்பு வட்டி விகிதங்களை அரசுக் கடன் பத்திரச் சந்தையுடன் ஒருங்கிணைக்க வேண்டும் என்று பரிந்துரைத்தார். சிறுசேமிப்புத் திட்டத்தின் வட்டி விகிதமானது, அதன் முதிர்ச்சிக் காலத்துக்கு இணையான அரசுக் கடன் பத்திரத்தின் சந்தை வட்டி விகிதத்தைவிட 0.25% அதிகமாக இருக்க வேண்டும் என்றும், மூத்த குடிமக்கள் சேமிப்புத் திட்டத்துக்கு சிறப்புச் சலுகை யாக 1.00% அதிக வட்டித் தொகை வழங்க வேண்டும் என்று பரிந்துரைத்தது. சிறு சேமிப்புத் திட்டங்களுக்கான வட்டி விகிதங்களை ஆண்டுதோறும் அரசு முன்கூட்டியே வெளியிட வேண்டும் என்றும் அறிவுறுத்தியது. (பிற்காலத்தில், ஒவ்வொரு காலாண்டிலும் வட்டி விகிதங் களை அரசு வெளியிடத் தொடங்கியது).

சேமிப்பின் முக்கியத்துவம்...

ஒரு நாட்டின் மொத்த உள்நாட்டு சேமிப்புக் குறையும்போது, புதிய தொழில் துறை முதலீடுகளுக்காக வெளிநாடுகளை எதிர்பார்த்துக் காத்திருக்க வேண்டிய கட்டாயம் ஏற்படுகிறது. உள்நாட்டுச் சேமிப்பு விகிதம் அதிகரிக்கும்போதோ, தொழில்துறை முதலீடுகள் அதிகரிப்பதுடன் புதிய வேலை வாய்ப்புகளும் உருவாகின்றன. பல கோடி மக்கள், பொருளாதார ரீதியாக முன்னேற்றம் அடைகின்றனர். தனி மனித வாழ்வா தாரத்தில் முன்னேற்றம் உருவாகும் போது, மக்கள் அதிகப்படியாக செலவு செய்வதுடன் அதிகமாக சேமிக்கவும் செய்கின்றனர். எனவே, சேமிப்பு விகித வளர்ச்சி, சிறப்பான தொடர்விளைவுகளைக் கொண்ட தாக உள்ளது.

சுதந்திரம் அடைந்தபோது 8.8% என்கிற அளவில் மட்டுமே இந்தியர் களின் சேமிப்பு விகிதமாக இருந்தது. இந்த நிலையில், படிப்படியாக உயர்ந்து, 2008-ம் ஆண்டில், முன்னெப்போதும் இல்லாத உச்ச அளவான 36.8 சதவிகிதத்தை எட்டியது. இதே காலகட்டத்தில், இந்தியாவின் பொருளாதார வளர்ச்சி சிறப்பாக உயர்ந்திருப்பதுடன், வறுமைக் கோட்டுக்குக் கீழே வாழும் மக்களின் சதவிகிதம் வெகுவாகக் குறையவும் செய்தது.

இறக்கத்தில் அரசுக் கடன் பத்திரச் சந்தை...

மத்திய, மாநில அரசுகள் தமது நிதிப் பற்றாக்குறையைச் சமாளிப்பதற் காக, தேசியக் கடன் சந்தையில் தமது கடன் பத்திரங்களைத் தொடர்ந்து வெளியிட்ட வண்ணம் உள்ளன. இந்தக் கடன் பத்திரங்களுக்கென தனியே உள்ள சிறப்புச் சந்தையின் வாயிலாக வங்கிகள், காப்பீட்டு நிறுவனங்கள், சேமநல நிதி மற்றும் பென்ஷன் திட்டங்கள் அரசுக் கடன் பத்திரங்களில் முதலீடு செய்கின்றனர். சமீப காலமாக, வெளிநாட்டு முதலீட்டாளர்களும் இந்தச் சந்தையில் பங்கெடுக்க அனுமதிக்கப் பட்டுள்ளனர்.

கடன் பத்திரங்களின் வட்டி விகிதத்தின் சந்தை அளவு, ரிசர்வ் வங்கியின் நிதிக் கொள்கை, பணவீக்கம், அரசின் நிதிப் பற்றாக் குறை போன்ற பல காரணிகளை சார்ந்திருந்தாலும், அதிகப்படியான பணப்புழக்கம் மிகப்பெரிய தாக்கத்தை உருவாக்குகிறது. சமீப காலமாக, கொரோனா பெருந் தொற்றால் ஏற்பட்டுள்ள பொருளா தார பாதிப்புக்களைத் தடுப்பதற்காக, உலகெங்கிலும் உள்ள மத்திய வங்கிகள் ஏராளமான பணத்தை பொதுவெளியில் வெளியிட்டு வருகின்றன. மேலும், தமது உள்நாட்டிலும் வட்டி விகிதங் களையும் குறைத்து வருகின்றனர். இதனால் அதிகப்படியான வட்டி வருவாயை விரும்பும் பன்னாட்டு முதலீட்டாளர்கள் இந்தியா உள்ளிட்ட வளரும் நாடுகளின் கடன் பத்திரங்களில் முதலீடு செய்ய முனைகின்றனர். எனவே, அதிகப் படியான பன்னாட்டு பணவரத்தின் காரணமாக, இந்தியக் கடன் சந்தை யின் வட்டி விகிதமும் குறைவாகக் காணப்படுகிறது.

வட்டியைக் குறைக்கக் கூடாது...

மேலை நாடுகளைப்போல, இந்தியாவில் சமூகப் பாதுகாப்புத் திட்டங்கள் பெருமளவில் இல்லாத நிலையில், சாதாரண மக்கள் தமது ஓய்வுக்காலம் மற்றும் அவசரகால தேவைகளுக்கு சிறுசேமிப்பையே சார்ந்திருக்க வேண்டிய கட்டாயம் உள்ளது. இதை நன்கு உணர்ந்த தால்தான், சியாமளா கோபிநாத் குழு, சந்தை வட்டியைவிட அதிக வட்டித் தொகையை, சாதாரண மக்களின் சிறுசேமிப்புக்கு வழங்க வேண்டும் என்று பரிந்துரைத்தது. சியாமளா குழு பரிந்துரைத்த 2011-ம் ஆண்டைக் காட்டிலும் தற்போது சந்தை வட்டி விகிதங்கள் மிகவும் குறைந்து காணப்படுவது குறிப்பிடத்தக்கது.

மேலும், வரிக்குப் பிந்தைய வட்டி வருவாய்க்கும் (Post Tax Interest Income) பணவீக்கத்துக்கும் இடையேயான உண்மையான வருவாய் (Real Rate of Return) தற்போது மிகவும் குறைந்தி ருப்பதைக் கருத்தில்கொண்டு வட்டி விகித குறைப்பை கூடுமானவரைத் தவிர்ப்பது மக்களுக்கு பெருத்த நன்மை பயக்கும். மத்திய மாநில அரசுகளின் பல லட்சம் கோடி ரூபாய் மதிப்புள்ள பட்ஜெட் வரவு - செலவுக் கணக்குகளை ஒப்பிடுகை யில், சந்தை வட்டி விகிதத்தைவிட சற்று அதிகமாக சிறுசேமிப்புத் திட்டங்களுக்கு வட்டி வழங்குவதால் அரசுகளுக்கு பெரிய இழப்பு ஏதும் ஏற்பட்டுவிடாது. மத்திய, மாநில அரசுகள் தங்கள் தங்கள் பங்குக்கு சில நூறு கோடி ரூபாய்களைப் பொறுப்பேற்க முன்வரும்பட்சத்தில் இந்த வட்டிக் குறைப்பு என்கிற பேச்சை அறவே தவிர்த்துவிட முடியும். முன்னாள் ரிசர்வ் வங்கி ஆளுநர் சுப்பாராவ் கூறியபடி, வட்டி விகிதத்தை நிர்ணயிக்கும் போதெல்லாம், குரலற்றவர்களாக உள்ள பல கோடி சிறு சேமிப்பாளர் களின் நலனையும் சற்றே சிந்தித்துப் பார்க்க வேண்டும்!

மத்திய அரசாங்கம் சிறுசேமிப்புத் திட்டங்களுக்கான வட்டியைக் குறைக்கும் போக்கை இனியாவது கைவிடுமா என்று பார்க்க வேண்டும். மக்கள் தாங்கள் சேமிக்கும் பணத்துக்கு அவர்களே பாதுகாப் பையும் அதிக வருமானத்தையும் தேடிக்கொள்ள வேண்டும். அதற்குத் தாங்கள் பொறுப்பல்ல என மத்திய அரசாங்கம் யோசிக்கத் தொடங்குவது ஆரோக்கியமான போக்காக இருக்காது. அப்படிப்பட்ட சிந்தனைப்போக்கு மக்களிடையே வெறுப்பையே ஏற்படுத்தும்!

சிறுசேமிப்புத் திட்டங்களுக்கான வட்டி விகிதம் எவ்வளவு?

தபால் அலுவலகம் தற்போது தனிநபர் / கூட்டுச் சேமிப்புக் கணக்குகளில் ஆண்டுக்கு 4% வட்டியை வழங்குகிறது. சேமிப்புக் கணக்கில் பராமரிக்கப்பட வேண்டிய குறைந்தபட்ச இருப்பு ரூ.500 ஆகும்.

தொடர்ச்சியான வைப்புத்தொகை (ஆர்.டி):

மாதத்துக்கு குறைந்தபட்சம் ரூ.100 அல்லது ரூ.10 மடங்குகளில் சேமிப்பைத் தொடர முடியும். முதலீட்டுக்கு அதிகபட்ச வரம்பு இல்லை. இது நடப்புக் காலாண்டில் 5.8% வட்டி விகிதத்தை வழங்குகிறது. தபால் அலுவலக ஆர்.டி கணக்கின் முதிர்வுக் காலம் 5 ஆண்டுகள்.

கால வைப்புத் திட்டம் (டைம் டெபாசிட்):

ஒரு வருடம், இரண்டு ஆண்டு மற்றும் மூன்று ஆண்டு முதிர்வுக் காலங்களின் கால வைப்பு 5.5% விகிதத்தில் வட்டி விகிதம் தரப்படுகிறது. ஐந்தாண்டு கால வைப்புக் கணக்கு 6.7% வருவாயை வழங்குகிறது, இது வருமான வரிச் சட்டம், 1961-இன் பிரிவு 80சி-யின் நன்மைக்குத் தகுதி பெறுகிறது.

மாத வருமானத் திட்டம் (எம்.ஐ.எஸ்):

அதிகபட்ச முதலீட்டு வரம்பு ரூ.4.5 லட்சம். ஒரு கணக்கு மற்றும் கூட்டுக் கணக்கில் ரூ.9 லட்சம். முதலீடுகள் ரூ.1,000 மடங்காகச் செய்யப்பட வேண்டும். இது தற்போது 6.6% வட்டி விகிதம் வழங்கப்படுகிறது. இது மாதம்தோறும் செலுத்தப்படும்.

பொது வருங்கால வைப்பு நிதி (பி.பி.எஃப்):

7.1% வட்டி விகிதத்தை வழங்குகிறது. இது ஆண்டுதோறும் கூட்டு வட்டியின் மூலம் ஒருங்கிணைக்கப்படுகிறது. இதன் முதிர்வுக் காலம் 15 ஆண்டுகள் ஆகும். முதிர்ச்சியடைந்த ஒரு வருடத்துக்குள் மேலும் 5 ஆண்டுகளுக்கு நீட்டிக்கப்படலாம். பிரிவு 80சி-யின்கீழ் வருமானத்திலிருந்து விலக்கு வைப்புத் தொகை தகுதி பெறுகிறது.

தேசிய சேமிப்புச் சான்றிதழ் (என்.எஸ்.சி):

6.8% வட்டி தருகிறது. இந்த வட்டி ஆண்டுதோறும் கூட்டுவட்டியின் மூலம் கணக்கிடப்படுகிறது. ஆனால், இது முதிர்ச்சியின்போது கொடுக்கப்படும். தேசியச் சேமிப்புச் சான்றிதழில் உள்ள வைப்புக்கள் வருமான வரிச் சட்டத்தின் பிரிவு 80சி-யின்கீழ் கழிக்க தகுதி பெறுகின்றன.

மூத்த குடிமக்கள் சேமிப்புத் திட்டம் (எஸ்.சி.எஸ்.எஸ்):

60 வயது அல்லது அதற்கு மேற்பட்ட வயதுடைய ஒருவர் இந்தத் திட்டத்துக்குத் தகுதியானவர். இந்தத் திட்டம் ஆண்டுக்கு 7.4% வட்டி விகிதத்தை வழங்குகிறது. இது வைப்புத் தேதியிலிருந்து மார்ச் 31/ செப்டம்பர் 30 / டிசம்பர் 31 முதல் செலுத்தப்படும் முதல் நிகழ்வாகும், அதன்பின்னர் மார்ச் 31, ஜூன் 30, செப்டம்பர் 30 மற்றும் டிசம்பர் 31 மாதங்களில் வட்டி செலுத்தப்படும். இந்தத் திட்டத்தின்கீழ் முதலீட்டுப் பிரிவு 80சி-யின் நன்மைக்கு தகுதி பெறுகிறது.

கிசான் விகாஸ் பத்ரா (கே.வி.பி):

6.9% வட்டி வழங்குகிறது, இந்த வட்டி ஆண்டுதோறும் கூட்டு வட்டியின் மூலம் கணக்கிடப்படுகிறது. முதலீடு செய்யப்பட்ட தொகை 124 மாதங்களில் இரட்டிப்பாகிறது. முதலீடு செய்யப்பட வேண்டிய குறைந்தபட்ச தொகை ரூ.1,000 மற்றும் அதன் ரூ.100-யின் மடங்குகளில் ஆகும்.

சுகன்யா சம்ருதி கணக்கு:

இந்தக் கணக்கு 7.6 % வட்டி விகிதத்தை வழங்குகிறது, இது ஆண்டு அடிப்படையில் கணக்கிடப்படுகிறது. முதலீடு செய்ய வேண்டிய குறைந்தபட்ச தொகை ரூ.250 மற்றும் ஒரு நிதியாண்டில் அதிகபட்சம் ரூ.1,50,000 ஆகும். ஒரு மாதத்தில் அல்லது நிதியாண்டில் வைப்புத் தொகையின் எண்ணிக்கையில் வரம்பு இல்லை. பிரிவு 80சி-யின் நன்மைக்கு தகுதி பெறுகிறது.

- ஶ்ரீதர் சாரதி