Published:Updated:

முதலீட்டுக்கு முன்பு நிறுவனத்திடம் கவனிக்க வேண்டியவை... பங்குச் சந்தை கைடன்ஸ்!

பங்குச் சந்தை
பங்குச் சந்தை

பங்குச் சந்தை: ஒரு நிறுவனத்தின் வருமானம் அதிகரிக்கும் போது, அதன் பி.இ (PE) விகிதம் உயரும். அதே நிறுவனத்தின் வருமானம் குறையும்போது பி.இ விகிதம் குறையும்.

"பங்குச் சந்தை மட்டுமல்ல, எல்லா முதலீடுகளுக்கும் சுழற்சி என்பது நிச்சயமான ஒன்று. ரியல் எஸ்டேட்டை எடுத்துக் கொண்டால், அதுவும் சுழற்சியின் அடிப்படையில் இயங்கக்கூடியதே. அதில், குறிப்பிட்ட காலத்துக்கு தொடர் ஏற்றம் இருக்கும். அதைத் தொடர்ந்து, குறிப்பிட்ட காலத்துக்கு இறக்கம் இருக்கும்.

தங்கம் விலை மாற்றமும் ஒரு சுழற்சிதான். 2002-லிருந்து 2012 வரை தங்கம் விலை பிரமாதமாக ஏறியது. 2013 முதல் 2017 வரை தங்கம் கிட்டத்தட்ட ஒரே விலையில்தான் வர்த்தகமானது. கடந்த சில ஆண்டுகளாக, தங்கத்தின் விலை ஏறிக்கொண்டிருக்கிறது. ஒவ்வொரு சொத்துப் பிரிவின் விலை மாற்றமும் ஒரு சைக்கிள்தான். அதைப் புரிந்துகொண்டால், எதில் எப்போது முதலீடு செய்ய வேண்டும், எதில் எப்போது முதலீட்டை அதிகரிக்க வேண்டும் அல்லது குறைக்க வேண்டும், எந்த நேரத்தில் எதில் முதலீடு செய்யவே கூடாது என்பதை நம்மால் முடிவு செய்ய முடியும்.

ஒரு நபர் ஒரு நிறுவனத்தில் பங்கு முதலீட்டை மேற்கொள்கிறாரென்றால், அவர் அந்த நிறுவனத்தின் பங்குதாரர்களில் ஒருவராக மாறுகிறார். அப்போது அந்த நிறுவனத்தின் பங்கு வருமானத்தை (Earnings Per Share-EPS) நிச்சயமாக கவனிக்க வேண்டும்.

கடந்த 10, 20, 30 வருடங்களில் ஒரு நிறுவனத்தின் இ.பி.எஸ் வளர்ச்சியும், நிறுவனத்தின் வருவாய் வளர்ச்சியும் கிட்டத்தட்ட ஒன்றுபோல்தான் ஏறியிருக்கும். நிறுவனத்தில் லாபம் குறைந்துகொண்டே வந்தால், பங்கின் விலையும் குறைந்துகொண்டே வரும். இதற்கும் ஒட்டுமொத்த பங்குச் சந்தையின் செயல்பாட்டுக்கும் எந்தத் தொடர்பும் கிடையாது. அதேபோல, ஒரு நிறுவனத்தின் லாபம் ஏறிக்கொண்டே சென்றால், பங்குச் சந்தை இறங்கினாலும் அந்த நிறுவனத்தின் பங்கு விலையும் ஏறிக்கொண்டேயிருக்கும். அதாவது, சந்தை இறக்கத்தில் இருந்தாலும் இந்தப் பங்கின் விலை உயர்ந்துகொண்டே செல்லும்.

முதலீடு
முதலீடு

ஆக, ஒட்டுமொத்த சந்தையின் செயல்பாட்டைப் பிரதிபலிக்கும் சென்செக்ஸ், நிஃப்டி குறியீட்டின் செயல்பாட்டுக்கும் குறிப்பிட்ட ஒரு நிறுவனத்தின் பங்கு விலை உயர்வுக்கும் அல்லது இறக்கத்துக்கும் தொடர்பு கிடையாது.

நீண்டகாலத்தில் ஒரு நிறுவனத்தில் நிகர லாப அதிகரிப்பும், ஒரு பங்கு வருமான அதிகரிப்பும் கிட்டத்தட்ட ஒன்றுபோலத்தான் இருக்கும். ஒரு பங்கின் விலை தினசரி மாறும். ஆனால், நிறுவனம் சம்பாதிக்கும் லாபம் தினசரி மாறுவதில்லை.

ஒரு நிறுவனத்தின் வருமானம் அதிகரிக்கும் போது, அதன் பி.இ (PE) விகிதம் உயரும். அதே நிறுவனத்தின் வருமானம் குறையும்போது பி.இ விகிதம் குறையும். இதற்குப் பல காரணங்கள் இருக்கின்றன. குறுகியகாலத்தில் வருமானம் கூடியிருக்கும்; ஆனால், பி.இ விகிதம் குறைந்திருக்கும். வெளிநாட்டு நிதி நிறுவன முதலீட்டாளர்கள் (எஃப்.ஐ.ஐ-க்கள்), இந்திய மியூச்சுவல் ஃபண்ட், இன்ஷூரன்ஸ் நிறுவனங்கள் (டி.ஐ.ஐ-க்கள்) பங்குகளை விற்றதால் ஏற்பட்ட விளைவாக இருக்கலாம்.

நல்ல நிறுவனத்தில், நீண்டகாலத்தில் பி.இ விகிதம் மற்றும் வருமான அதிகரிப்பு ஒன்றுபோல் இருக்கும் என்று ஏற்கெனவே பார்த்தோம். ஒரு பங்கை முதலீட்டுக்குத் தேர்வு செய்வதற்கு முன்னர் அந்த நிறுவனத்தை யார் நடத்துகிறார்கள், அதன் எதிர்காலம் எப்படியிருக்கும் என்பதை கவனித்துத்தான் முதலீட்டை மேற்கொள்ள வேண்டும். பி.இ விகிதம் குறைவாக இருக்கிறது என்பதற்காக முதலீடு செய்யக் கூடாது."

- பங்குச் சந்தை முதலீட்டில் சுமார் முப்பது ஆண்டுகளுக்கு மேலான அனுபவம்கொண்டவர், யூனிஃபை கேப்பிட்டல் நிறுவனத்தின் செயல் இயக்குநர் ஜி.மாறன். முதலீட்டு குருவான வாரன் பஃபெட்டை நேரில் சந்தித்துப் பேசிய அனுபவம் இவருக்கு உண்டு. நாணயம் விகடன் நடத்திய நிகழ்ச்சியில் 'பங்குச் சந்தை சுழற்சிகளும் வாய்ப்புகளும்' என்ற தலைப்பில் அவர் பேசியதன் முழுமையான வடிவம் இங்கே... படிக்க க்ளிக் செய்க... > நீண்டகால முதலீடு... லாபம் பார்க்கும் சூட்சுமங்கள்! - வழிகாட்டும் ஆலோசனைகள்..! https://bit.ly/3ad6chV

சிறப்புச் சலுகை

விகடன் App-ஐ டவுன்லோடு செய்து ரெஜிஸ்டர் செய்தால், ரூ.149 மதிப்புள்ள ஒரு மாத Vikatan Digital Pack-ஐ முற்றிலும் இலவசமாகப் பெறலாம். ஆனந்த விகடன் தொடங்கி பசுமை விகடன் வரை அனைத்து இதழ்களையும் 30 நாள்களுக்கு கட்டணமின்றி வாசிப்பதுடன், 15 ஆண்டுகால பொக்கிங்களிலும் வலம் வரலாம். விகடன் ஆப் டவுன்லோடு செய்து, இந்தச் சலுகையைப் பெற https://bit.ly/2VRp3JV

அடுத்த கட்டுரைக்கு