Published:Updated:

மகிழ்ச்சியான வாழ்க்கைக்கு எப்போதும் கைகொடுக்கும் பாசிட்டிவ் பார்வை!

நாணயம் புக் செல்ஃப்

பிரீமியம் ஸ்டோரி

ன்றைய உலகம் நல்ல விஷயங்களைக் கவனிப்பதைவிட கெட்டவற்றின்மீதே அதிக கவனம்கொள்கிறது. எதிர்மறை எண்ணத்தைத் தரும் குறுஞ்செய்திகள், வாட்ஸ்அப் மெசேஜ் என ஆரம்பித்து, எல்லா வகையான தகவல் ஊடகங்களிலும் எதிர்மறையான விஷயங்கள் மட்டுமே பெரிதுபடுத்தப்பட்டு கவனம் பெறும் வகையில் செய்யப்படுகின்றன. இந்த எதிர்மறை எண்ணங்களை எப்படி விரட்டியடிப்பது என்பதைச் சொல்கிறது மைக் ராபின்ஸ் என்பவர் எழுதிய ‘ஃபோகஸ் ஆன் குட் ஸ்டஃப்” என்கிற புத்தகம். இந்தப் புத்தகத்தில் அவர் சொல்லியுள்ள சுலபமான பல நடைமுறைகள் மிகவும் சக்திவாய்ந்தவையாக இருக்கின்றன. அவை நம்மைச் சுற்றியுள்ள எதிர்மறை விஷயங்களை விரட்டியடித்து உண்மையான மகிழ்ச்சியை நாம் அடைவதற்கு உதவும் வகையில் இருக்கின்றன.,

பிரச்னையைப் பேசினால் தீர்ந்துவிடாது

மூன்று பிரிவுகளாக எழுதப்பட்டிருக்கும் இந்தப் புத்தகத்தின் முதல் பிரிவு, எதிர்மறைச் சூழல்கள் நிறைந்த உலகில் என்னென்ன பிரச்னைகள் உள்ளன, அதனால் தனிமனித வாழ்வில் என்னென்ன பிரச்னைகள் ஏற்படுகின்றன என்பதை விளக்குகிறது. பிரச்னைகளுக்கு நடுவில்தான் மனிதன் வாழ விரும்புகிறான். வேலையில் இருக்கும் சவால்கள், குழந்தை வளர்ப்பில் இருக்கும் சவால்கள், குடும்பத்தை நடத்துவதில் இருக்கும் சவால்கள் என நாம் சவால்கள் குறித்தே எப்போதும் நினைத்துவருகிறோம்.

மகிழ்ச்சியான வாழ்க்கைக்கு எப்போதும் கைகொடுக்கும் பாசிட்டிவ் பார்வை!

உதாரணத்திற்கு, நமது குடும்பத்துடன் நாம் பொதுவாகப் பெரிய அளவில் உரையாடும் விஷயம் எது என்று பார்த்தால், உடல்நலப் பிரச்னை, பணியிடத்தில் நடந்த பிரச்னை, குடும்பத்தில் இருக்கும் பணப் பிரச்னை, வீட்டில் மற்றும் நாட்டில் இருக்கும் அரசியல் பிரச்னை என்றே சொல்லலாம். நல்ல விஷயங்கள் குறித்து குறைவாகவே பேசுகிறோம்.

‘‘எதிர்மறை விஷயங்கள் குறித்தே நாம் அதிகம் பேசுவதால், நம்மைச் சுற்றி இருப்பவர்களும் அவர்களுடைய பிரச்னைகள் குறித்து சற்று அதிகமாகவே சிந்திக்க ஆரம்பிக்கின்றனர். பிரச்னைகள் குறித்துப் பேசினால், அது தீர்ந்துவிடும் என்ற மூடநம்பிக்கையே இத்தகைய செயலில் நாம் இறங்கக் காரணமாக இருக்கிறது. இதற்கு மாறாக அந்தப் பிரச்னைகளிலிருந்து வெளியே வருவதற்காக நாம் சிறுதுரும்பை நகர்த்தினால் அது மிகவும் உபயோகமாக இருக்கும்’’ என்கிறார் ஆசிரியர்.

‘‘நம்முடைய பிரச்னைகள்மீது நமக்கு இருக்கும் ஆர்வம், அடுத்தவர்மீது நாம் கொண்டிருக்கும் எதிர்மறை எண்ணங்கள், வீணான கிசுகிசுக்கள், ஒப்பிட்டுப் பார்த்தல், போட்டி போடுதல், எதையும் பாராட்டாத மனநிலை, ‘நல்லவனா இருந்தால் பிழைக்க முடியாது’ என்று நம்முடைய நிலைப்பாட்டுக்காக நாமே வக்காலத்து வாங்கிக்கொள்ளுதல் போன்றவையே நம்மைச் சுற்றியிருக்கும் எதிர்மறைச் சூழலுக்கான காரணங்களாகும்’’ என்கிறார் ஆசிரியர்.

மகிழ்ச்சியான வாழ்க்கைக்கு எப்போதும் கைகொடுக்கும் பாசிட்டிவ் பார்வை!

பாராட்டுவதில் ஐந்து கோட்பாடுகள்

புத்தகத்தின் இரண்டாவது பகுதியில் பாராட்டுதலின் ஐந்து கோட்பாடுகள் குறித்து விளக்கப்பட்டுள்ளது. “நன்றியுள்ளவர்களாக இருத்தல், நேர்மறை எண்ணங்களையே தேர்ந்தெடுத்தல், நேர்மறையான வார்த்தைகளையே உபயோகித்தல், மற்றவர்கள் சொல்லும் விஷயங்களுக்குச் செவிசாய்த்து அவற்றில் சரியான விஷயங்களை ஒப்புக்கொள்ளச் செய்தல், நம்மை நாமே பாராட்டிக் கொள்ளுதல் என்ற ஐந்து விஷயங்களுமே நம்மை நேர்மறையாகச் செயல்பட வழிவகை செய்பவை” என்கிறார் ஆசிரியர்.

“நன்றி சொல்வதில் இருக்கும் மகத்துவம் என்பது இன்றைக்கு மனிதகுலம் பெருமளவில் மறந்துவிட்ட ஒன்றாக இருக்கிறது என்கின்றன ஆய்வு முடிவுகள். ஒரு பொய்யான முகமூடியை அணிந்துகொண்டு மனிதர்கள் செயல்படுவதாலேயே நன்றியுணர்வு குறைந்துபோய்விட்டது. எனவே, நன்றியுணர்வின் பலன்களை நாம் நன்றாகப் புரிந்துகொண்டால் மட்டுமே நம்மால் அதைக் கடைப்பிடிக்க முடியும்” என்று சொல்லும் ஆசிரியர், நன்றியுணர்வு குறித்து தெளிவான விளக்கங்களையும் அதை எப்படி நடைமுறையில் கடைப்பிடிப்பது என்பதையும் தெளிவாக விளக்கியுள்ளார்.

மகிழ்ச்சியான வாழ்க்கைக்கு எப்போதும் கைகொடுக்கும் பாசிட்டிவ் பார்வை!

“எண்ணம் நேர்மறையாக இருந்தால் மட்டுமே மகிழ்ச்சி என்பது நிலைத்திருக்கும். எண்ணமே வாழ்க்கையாவதால் நல்லதையே எண்ணுங்கள் என்று பல அறிஞர்கள் சொல்லிவந்தபோதிலும் நம்மில் பலருக்கும் எதிர்மறை எண்ணங்கள் வந்துபோகத்தானே செய்கிறது..? நன்றியுணர்வுடனும் பாராட்டியும் வாழ்வதற்கு நேர்மறை எண்ணங்கள் அத்தியாவசியமான ஒன்றாகிறது.

எண்ணங்களே உணர்ச்சிகளாகின்றன (உணர்ச்சி ரீதியான செயல்பாடு). பாசிட்டிவ் எண்ணங்கள் (அன்பு, சமாதானம், சந்தோஷம், பாராட்டு போன்றவை) நம்மை கிரியேட்டிவ்வாக ஆக்கும் வல்லமை படைத்தவை. நெகட்டிவ் எண்ணங்கள் நம்முடைய செயல்திறனை (எனர்ஜி) ஒரேயடியாக விழுங்கி ஏப்பம் விட்டு நம்மைச் சிதைந்து போகச் செய்து, நம்முடைய இலக்கு நோக்கிய பயணத்திற்குத் தடைபோட வல்லவையாகும். எனவே, நேர்மறை எண்ணம் என்பது அவசியமான ஒன்றாகிறது” என்கிறார் ஆசிரியர்.

நேர்மறையான வார்த்தைப் பிரயோகத்தின் அவசியத்தை வலியுறுத்தும் ஆசிரியர், கிசுகிசு இல்லாத சூழலை உருவாக்குதல், எதற்கெடுத் தாலும் புகார் சொல்லாமல் இருத்தல், நம்மைப் பற்றி சற்று பாசிட்டிவாகவே பேசுதல், ‘நான் இதையெல்லாம் செய்ய நினைக்கிறேன்’ என்பதை பாசிட்டிவான வார்த்தைகளில் சொல்லுதல், ‘எனக்கு என்ன வேண்டாம்’ என்பதைச் சொல் லாமல், ‘என்ன வேண்டும்’ என்பதை மட்டுமே சொல்லுதல் போன்றவற்றை இதற்கான உதாரணமாகச் சொல்கிறார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பாராட்டும் பண்பு

“மற்றவர்களிடம் இருக்கும் நல்ல விஷயங்களைக் கண்டறிய முயலுதல், மனதார அந்த விஷயங்களில் அவர்களைப் பாராட்டுதல், தனிப்பட்ட முறையில் நன்றி சொல்லுதல், மற்றவர்கள் உங்களுடைய வாழ்க்கையில் ஏற்படுத்திய நேர்மறை பாதிப்புகள் குறித்து வெளிப் படையாகப் பாராட்டுதல் போன்றவை இதற்கான வழிமுறைகள்.

மகிழ்ச்சியான வாழ்க்கைக்கு எப்போதும் கைகொடுக்கும் பாசிட்டிவ் பார்வை!

இதெல்லாம் சரி. நம்மை நாமே பாராட்டிக் கொள்ளுதல் என்பதுதான் கடைசி நிலை. இது கொஞ்சம் கஷ்டமான நிலையும்கூட. ஆனால், நம்மை நாமே பாராட்டிக்கொள்வதற்குத் தெரிந்துவிட்டால் அது நம் வாழ்க்கை மகிழ்ச்சிகரமாக அமையத் தேவையான நல்லதொரு அடித்தளத்தை அமைத்துக் கொடுக்கும். பொதுவாக, நம்மை நாமே பாரட்டிக்கொள்ளுதல் என்பது தலைக்கனத்திற்கு வழிவகுக்கும் என்பது பொதுப்புத்தியாக நம்முள் புகுத்தப்பட்டுள்ளது. ‘நம்மை நாமே பாரட்டிக்கொள்வதா, பைத்தியக் காரத்தனமாக இருக்கிறதே!’ என நினைத்து நம்மை நாம் பாராட்டாமலே போய்விடுகிறோம்.

இல்லையென்றால், ‘என் திறமைக்கு இதெல்லாம் ஒரு மேட்டரே இல்லை’ என்று தவிர்த்துவிடுகிறோம். தன்னம்பிக்கை, உடல்நலம், அடுத்தவரை பாராட்டும் குணம், அடுத்தவர்களை நம்மை நோக்கி ஈர்ப்பது, வாழும் வாழ்க்கைக்கு ஒரு அர்த்தம் பெறுவது என்ற எல்லாமே நம்மை நாமே பாராட்டிக்கொள்வதால் கிடைக்கும் அபூர்வப்பலன்கள்” என்று சொல்லும் ஆசிரியர், இதனாலேயே இதை நாம் அனைவரும் கட்டாயம் செய்யவேண்டும் என்று வலியுறுத்துகிறார்.

“நமக்கு என்னவெல்லாம் தெரிகிறது என்பது வாழ்க்கையின் வெற்றிக்கான ஒரு விஷயம் இல்லை. நாம் என்ன செய்கிறோம் என்பதே வாழ்வில் நாம் வெற்றிபெற பெருமளவில் உதவுகிறது.எனவேதான் சொல்கிறேன் நேர்மறை விஷயங்களைக் கண்டறிந்து பாராட்டும் பண்பை வளர்த்துக் கொள்ளுங் கள். உங்களுடைய வாழ்வு சிறந்து மகிழ்ச்சி என்பது நீங்காது நிறைந்திருக்கும்’’ என்று இந்தப் புத்தகத்தின் மூன்றாவது பகுதியில் சொல்லி முடிக்கிறார் ஆசிரியர்.

நாம் அனைவரும் விரும்பும் மகிழ்ச்சி என்ற முக்கியமான ஒரு விஷயத்தை வாழ்க்கையில் கொண்டுவருவது எப்படி என்பதை எடுத்துச் சொல்லும் இந்தப் புத்தகத்தை நாம் அனைவரும் ஒருமுறையாவது கட்டாயம் படிக்கலாம்!

நாணயம் விகடன் டீம்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு