Published:Updated:

மில்க் மேன் வர்கீஸ் குரியன்!

தடைக்கல்லும் படிக்கல்லே!ச.ஸ்ரீராம்

தங்களுடைய பிரச்னைகளுக்கு வழி காண்பதற்கே ஒவ்வொருவரும் படாதபாடு படும்போது மற்றவர்களின் பிரச்னைகளைத் தீர்க்க தன் வாழ்க்கையை அர்ப்பணிப்பவர்கள் ஒருசிலர் மட்டுமே. அப்படிப்பட்டவர்களில் ஒருவர் இந்தியாவில் வெண்மை புரட்சியை ஏற்படுத்திய வர்கீஸ் குரியன்.

1921-ம் ஆண்டு நவம்பர் மாதம் கேரளாவின் கோழிக்கோட்டில் பிறந்த குரியன், தனது கல்லூரிப் படிப்பை சென்னை லயோலா கல்லூரியிலும், கிண்டி பொறியியல் கல்லூரியிலும் படித்தார். அமெரிக்காவில் உள்ள மிச்சிகன் பல்கலைக்கழகத்தில் உலோகவியல் துறையில் பட்டம் பெற்று இந்தியாவுக்கு வந்த குரியன், குஜராத் அரசின் பால்வளத் துறையுடன் இணைந்து ஆய்வு செய்யும் நிறுவனத்தில் வேலைக்குச் சேர்ந்தார். கொஞ்சநாளில் அந்த வேலை பிடிக்காமல், வேறு வேலை பார்த்துக் கொள்ளலாம் என்று விலக நினைத்தார்.

மில்க் மேன் வர்கீஸ் குரியன்!

அப்போதுதான் அவரது நண்பர் திருபுவன்தாஸ் படேல், பால் கொண்டுவரும் மக்களின் துன்பத்தை நேரடியாக எடுத்துக்காட்ட, வேலையை விடும் முடிவைக் கைவிட்டார். குரியனுக்கு பால் என்றாலே பிடிக்காது. ஆனால், இந்த துயரங்களைப் பார்த்தபின் இவர்களுக்கு என ஒரு தனிச் சந்தையை அமைக்க கனவு கண்டார். அதற்கு தடையாக இருந்த விஷயம், இந்தியாவின் பால் உற்பத்தி. இங்கு உற்பத்தியாகும் பாலை பன்னாட்டு நிறுவனங்கள்  கொள்முதல் செய்ய வலியுறுத்தினார். ஆனால், அனைத்திலும் தோல்வியையே கண்டார்.

தொழில்நுட்ப ரீதியாக மேம்படும்போதுதான் பால் உற்பத்தியாளர்கள் வெற்றி பெறுவார்கள் என நம்பினார். ஆனந்த் பால் கூட்டுறவு நிறுவனத்தை (அமுல்) ஆரம்பித்தார். இதன்மூலம் பால் உற்பத்தி யாளர்கள் தங்கள் பாலை தாங்களே சந்தைப்படுத்தி விற்க முடியும் என்ற நிலையை உருவாக்கினார். பால் மட்டும் விற்றால் லாபம் பார்க்க முடியாது. பால் பொருட்களையும் தயாரிக்க வேண்டும் என்பதில் உறுதியாய் இருந்ததால், அதற்கான பயிற்சிகளை அளித்து, அரசே இந்த நிறுவனத்துக்கு உதவும் அளவுக்கு வெண்மை புரட்சியை ஏற்படுத்தினார்.

இன்றைக்கு இந்தியாவின் முன்னணி நிறுவனங் களில் ஒன்றாக மாறியுள்ள அமுல் சர்வதேச நிறுவனங்களுக்கு மிகப் பெரிய போட்டியாக உருவாகி இருக்கிறது என்றால், காரணம் குரியன்தான். ஒரு தனிமனிதன் தன்முன் நிற்கும் தடைகளைக் கண்டு பயந்து ஒதுங்காமல், அவற்றைத் தாண்டி வந்தால் ஒரு தேசமே பயனடையும் என்பதற்கு இந்த மில்க் மேன் ஒரு மிகச் சிறந்த உதாரணம்!
 

அடுத்த கட்டுரைக்கு