ரிலையன்ஸுக்குத் தடை... முதலீட்டாளர்கள் என்ன செய்ய வேண்டும்?

மு கேஷ் அம்பானிக்குச் சொந்தமான ரிலையன்ஸ் இண்டஸ்ட்ரீஸ் நிறுவனம், இந்திய பங்குச் சந்தையில் ஃப்யூச்சர்ஸ் மற்றும் ஆப்ஷன் வியாபாரம் என்னும் ‘டெரிவேட்டிவ்’ வர்த்தகத்தில் ஈடுபட ஓராண்டு காலத்துக்குத் தடை விதித்துள்ளது, இந்திய பங்குச் சந்தை கட்டுப்பாட்டு ஆணையம் (செபி).

. இன்சைடர் டிரேடிங்

கடந்த 2007-ம் ஆண்டு, பங்குகளை விற்பனை செய்ததில் விதிமுறைகள் மீறப்பட்டதாக ரிலையன்ஸ் பெட்ரோலியம் நிறுவனம் மீது குற்றம் சுமத்தப்பட்டது. இதுதொடர்பாக, செபி விசாரணை நடத்திவந்தது. அதில் ரிலையன்ஸ் நிறுவனம், பிற நிறுவனங்களுடன் இணைந்து உள்வர்த்தகம் எனப்படும் இன்சைடர் டிரேடிங் -ல் ஈடுபட்டது தெரியவந்தது. இதன் மூலம் ரிலையன்ஸ் இண்டஸ்ட்ரீஸ் நிறுவனம், சட்டத்துக்குப் புறம்பாக 513 கோடி ரூபாய் வருமானம் ஈட்டியது கண்டுபிடிக்கப்பட்டது. இப்போது, இதுதொடர்பான வழக்கில் ரிலையன்ஸ் நிறுவனத்துக்கு செபி தடை விதித்துள்ளது. ரிலையன்ஸ் நிறுவனம், 45 நாட்களுக்குள் ரூ.447 கோடி டெபாசிட் செய்ய வேண்டும் என்றும், அந்தத் தொகைக்கு, 2007 நவம்பர் 29-ம் தேதி முதல் 12% வட்டி அளிக்க வேண்டும் என்றும் செபி உத்தரவிட்டுள்ளது. இதன்படி, ரிலையன்ஸ் நிறுவனம் ரூ.1,000 கோடி ரூபாய்க்கு மேல் செலுத்த வேண்டிய சூழ்நிலை உருவாகியுள்ளது. ஆனால், இந்தப் `பரிவர்த்தனைகள் நியாயமான முறையில் நடந்ததாகவும், செபியின் உத்தரவை எதிர்த்து மேல்முறையீடு செய்ய உள்ளதாகவும்’ ரிலையன்ஸ் நிறுவனம் அறிவித்துள்ளது.

செபி தடை விதித்ததினால் ரிலையன்ஸ் பங்கு விலை எதிர்காலத்தில் குறையுமா, என்னென்ன மாற்றங்கள் வரும் என்பது குறித்து ஐடிபிஐ கேப்பிட்டல் நிறுவன ஈக்விட்டி ரிசர்ச் பிரிவின் தலைவர் ஏ.கே.பிரபாகரிடம் கேட்டோம்.

ரூ.32,000 கோடி லாபம்

“ரிலையன்ஸ் நிறுவனம், டெரிவேட்டிவ் மார்க்கெட்டில் எந்தப் பங்குகளும் வாங்கி விற்கக்கூடாது எனத் தடை விதிக்கப்பட்டுள்ளது. இன்சைடர் டிரேடிங்கில் ஈடுபட்டதாக குற்றம் சுமத்தப்பட்டு நிரூபிக்கப்பட்டதே இதற்குக் காரணம். ஆனால், இதற்காகப் பெரிதாக அலட்டிக்கொள்ளத் தேவையில்லை. இது ஒன்றும் பெரிய பிரச்னை இல்லை. இந்தத் தீர்ப்பே மிகத் தாமதமாக வழங்கப்பட்டுள்ளது. குறைந்தபட்ச தண்டனையே அளிக்கப்பட்டுள்ளது. குறைந்தபட்சம் ரூ.6,000 கோடி அபராதம் விதிக்கப்படலாம் என்று

. எதிர்பார்க்கப்பட்டது. ஆனால், குறைவாகவே அபராதம் விதித்துள்ளனர்.

இந்தத் தீர்ப்பால் ரிலையன்ஸ் பங்குகளில் பெரிய தாக்கம் இருக்காது. ஏனெனில், ரிலையன்ஸ் நிறுவனத்தின் ஒரு காலாண்டு லாபமே ரூ. 8,000 கோடியாக இருக்கிறது. ஆண்டுக்கு 32,000 கோடி ரூபாய்க்கு லாபம் ஈட்டுகிறது.

ஆகையால் ரூ.500 கோடி அபராதம் என்பது மிகக் குறைந்த தொகை. ரூ.5,000 கோடி அபராதம் விதித்்தாலும் அது பெரிய தொகை கிடையாது. அதை எதிர்த்து அவர்கள் மேல்முறையீடுதான் செய்திருப்பார்கள். இப்போது இந்தத் தீர்ப்புக்கும் மேல்முறையீடு செய்வதாகச் சொல்லி இருக்கின்றனர். இந்த விசாரணை முடிவடைய 2-3 ஆண்டுகள் ஆகும். அதற்குள் இந்தப் பிரச்னை நீர்த்துப்போகும்.

கவனிக்க வேண்டிய விஷயம்

இப்போது இன்சைடர் டிரேடிங் முறைகேட்டில் யாரும் ஈடுபடுவதில்லை; ஈடுபடவும் விரும்புவதில்லை. முன்பெல்லாம், பெரிய நிறுவனங்கள் தவறு செய்தால், எந்தவொரு நடவடிக்கையையும் செபி எடுக்காது. இப்போது அப்படியில்லை.வெளிப்படைத்தன்மை அதிகரித்துள்ளது.

ஆகையால், இனிமேல் யாரும் தவறு செய்யமாட்டார்கள். இதில் பெரிதாக கவனிக்க வேண்டிய விஷயம் ஒன்றுமில்லை. இந்த ஆண்டில் பங்கு ஒன்றின் சம்பாத்தியம் (EPS) 100 ரூபாயாக இருக்கக் கூடும். ரிலையன்ஸ் பங்கின் விலை ரூ.1,300 என 13 மடங்கில்தான் வர்த்தகமாகி வருகிறது. இது கவர்ச்சிகரமான மதிப்பீடு.

கடந்த எட்டு ஆண்டுகளுக்கும் மேலாக ரிலையன்ஸ் நிறுவனப் பங்கின் விலை நன்றாக செயல்படாமல் இருந்தது. ஆகையால், இனிமேல் ரிலையன்ஸ் நிறுவனப் பங்கின் விலை அதிகரிக்கும். தற்போதைய விலையில் (ரூ.1,280) பங்குகளை வாங்கலாம். ஒரு ஆண்டு காலத்துக்குள் 1,800 ரூபாயைத் தொடும்” என்று முடித்தார்.

ரிலையன்ஸுக்கு வந்திருக்கும் இந்த அதிர்ச்சி சோதனை விரைவில் விலகுமா எனப் பொறுத்திருந்து பார்ப்போம்.

ரிலையன்ஸுக்குத் தடை... முதலீட்டாளர்கள் என்ன செய்ய வேண்டும்?

விகடன் விமர்சனக்குழு