Published:Updated:

நிதி ஆண்டு தொடக்கத்தில் நிதியைத் திட்டமிட 5 யோசனைகள்!

நிதி ஆண்டின் தொடக்கத்தின் போதும், நம்முடைய வரவையும் செலவையும் திட்டமிட்டு எதிர்காலத் தேவைகளுக்கான தீர்மானங்களைப் பட்டியலிடுவது அவசியம். நிதித் திட்டமிடலில் பட்ஜெட்தான் முதல் பாகம். எனவே...

நிதி ஆண்டு தொடக்கத்தில் நிதியைத் திட்டமிட 5 யோசனைகள்!
நிதி ஆண்டு தொடக்கத்தில் நிதியைத் திட்டமிட 5 யோசனைகள்!

போரில் மட்டுமல்ல, பொருளாதாரத்திலும் நம்மைப் பாதுகாத்துக்கொள்வது மிக முக்கியம். ஆங்கிலப் புத்தாண்டுதோறும், இனிப் புகைக்கக் கூடாது, மது அருந்தக் கூடாது, தொடர்ந்து ஜிம் போக வேண்டும் என்றெல்லாம் தீர்மானங்களை எடுப்போம். அதுபோலத்தான், ஒவ்வொரு நிதி ஆண்டின் தொடக்கத்தின்போதும், நம்முடைய வரவையும் செலவையும் திட்டமிட்டு எதிர்காலத் தேவைகளுக்கான தீர்மானங்களைப் பட்டியலிடுவது அவசியம். நிதித் திட்டமிடலில் பட்ஜெட்தான் முதல் பாகம். எனவே, முதலில் நம்மைப் பொருளாதாரரீதியில் பாதுகாத்துக்கொள்ள நமக்கு வரும் வருமானத்தை, நிதி ஆண்டின் தொடக்கத்திலேயே கணக்கிட்டு, சிறிய அளவில் பட்ஜெட் தயார்செய்யுங்கள். இந்த பட்ஜெட்டில் வருங்காலத்தில் உங்களுக்கு வரப்போகும் கூடுதல் கமிஷன், சம்பள உயர்வு, ஊக்குவிப்புத் தொகை போன்றவற்றைக் கணக்கில் எடுத்துக்கொள்ளாதீர்கள்.

ஜாயின்ட் அக்கவுன்ட் தொடங்குங்கள்!

மாதச் சம்பளத்தில், அடுத்த ஒரு வருடத்துக்குத் தவிர்க்க இயலாத செலவுகளான காலாண்டு, அரையாண்டு மற்றும் முழு ஆண்டு கல்விக் கட்டணங்கள், இன்ஷூரன்ஸ் ப்ரீமியம், வங்கிக்குச் செலுத்தும் இ.எம்.ஐ-யில் 25 - 30 சதவிகிதம், ஆண்டின் இறுதியில் செலுத்தவேண்டிய வரிகள் போன்றவற்றை கணவன்-மனைவி இருவரின் பெயரிலும் ஒரு ஜாயின்ட் அக்கவுன்ட் தொடங்கி, அதில் பணத்தைச் செலுத்துங்கள். இந்தப் பணம் எந்தச் செலவுகளுக்காகக் கணக்கில் இருக்கிறதோ, அந்தச் செலவுகளுக்கு மட்டுமே பயன்படுத்தப்பட வேண்டும் என்பதில் உறுதியாக இருங்கள்.

அவசியம் தேவை எமர்ஜென்சி ஃபண்டு! 

2019 ஏப்ரல் மாதம் தொடங்கி, 2020 மார்ச் வரையிலான ஒரு வருட இறுதியில் உங்கள் கையில் ரூபாய் 50,000 - 2,50,000 வரை எமர்ஜென்சி ஃபண்டாகக் கட்டாயம் இருக்க வேண்டும். இதற்குத் தகுந்தாற்போல் மாதாமாதம் ஒரு சிறு தொகையை ஆர்.டி-யில் செலுத்தலாம் அல்லது லிக்விட் ஃபண்டுகளில் முதலீடு செய்யலாம். உங்கள் முதலீடு, ஃபிக்ஸட் டெபாசிட்டுக்கு இணையாக வருமானத்தை ஈட்டும். அதுமட்டுமன்றி எப்போது வேண்டுமானாலும் உங்கள் பணத்தை எடுத்துக்கொள்ளலாம். எஃப்.டி-யைப்போல் குறிப்பிட்ட முதலீட்டுக்காலம் வரை வைத்திருக்க வேண்டும் என்று எந்தக் கட்டாயமும் இல்லை. இப்படி பட்ஜெட் போட்டுச் சேமிப்பது முதலில் கடினமாகத்தான் இருக்கும். ஆனால், இந்தப் பழக்கத்தைத் தொடரும்போது, அடுத்த மூன்று ஆண்டுகளில் பொருளாதாரரீதியான அனைத்து விஷயங்களும் முறையாக இருக்கும்.

செலவுகளைச் சிக்கனப்படுத்துங்கள்!

நாம் அன்றாடம் செய்யும் செலவுகளான உணவு, உடை, எரிபொருள், லைஃப்ஸ்டைல் பொருள்கள் போன்றவற்றில் நாம் செலவுகளை நிச்சயமாகக் கட்டுப்படுத்த முடியும். வாரம் இரண்டுமுறை அசைவ உணவு உண்பவர்கள், ஒருமுறையாகக் குறைத்துக்கொள்ளலாம். ஒரு சட்டையை 3,000 ரூபாய்க்கு இறக்குமதி செய்யப்பட்ட ஒரு பெரிய பிராண்டில் எடுப்பதற்குப் பதில், பாதி விலையில் ஒரு நல்ல இந்திய பிராண்டின் சட்டையை வாங்கலாம். தெருமுனையில் இருக்கும் கடைக்குச் செல்வதற்குக்கூட இரு சக்கர வாகனத்தை எடுப்பதற்குப் பதில், நடக்கலாம். இதனால் மருத்துவனைக்கு ஆகும் செலவும் எரிபொருளுக்குச் செய்யும் செலவும் மிச்சம். `இப்படியெல்லாம் மிச்சம் செய்தால், கோடி ரூபாயா மிச்சப்படுத்த முடியும்?' என்று நீங்கள் கேட்கலாம். இப்படி நமக்குத் தெரிந்த வழிகளில் பணத்தைச் சிறுகச் சிறுகச் சேமித்தாலே அது எதிர்காலத்தில் ஒரு பெரிய தொகையாகக் கிடைக்கும். எனவே, நம்பிக்கையோடு மிச்சப்படுத்துங்கள்.

எதிர்காலத் தேவைகளில் தெளிவு!

நம்மில் பலர் எது இலக்கு, எது தேவை என்பதே தெரியாமல் இருக்கிறார்கள். உதாரணமாக, உங்கள் தாய், தந்தைக்கு மருத்துவச் சிகிச்சை, குழந்தைகளின் கல்வி, திருமணம், உங்கள் ஓய்வுக்காலத்துக்குத் தேவையான பணத்தைச் சேமிப்பது போன்றவை உங்கள் கடமைகள். இவற்றைக் குறிப்பிட்ட காலத்தில் செய்து முடித்தே ஆகவேண்டும். இவற்றை `தேவை' என்று சொல்ல வேண்டும். ஆனால், சொந்த வீடு வாங்க விரும்புவது, இமயமலைக்கு யாத்திரை செல்ல விரும்புவது, வாழ்வில் ஒருமுறையாவது வெளிநாட்டுக்குச் சுற்றுப்பயணம் செல்லவேண்டும், ஆடி காரை வாங்க விரும்புவது போன்றவை எல்லாம் உங்கள் இலக்குகள். இவற்றை நீங்கள் நிறைவேற்றியே ஆகவேண்டும் என்று எந்தக் கட்டாயமும் இல்லை. குறிப்பிட்ட காலவரம்பும் இல்லை.

இவற்றில் எது முக்கியம், முக்கியமான இலக்குகளை நிறைவேற்ற எவ்வளவு செலவாகும் என்பதைப் பட்டியலிடுங்கள். அதற்குத் தகுந்தாற்போல் உங்கள் முதலீடுகளைச் செய்யுங்கள்.

உடனே டேர்ம் இன்ஷூரன்ஸ் எடுங்கள்!

எந்தச் சூழ்நிலையிலும் பி.எஃப் தொகையை நீங்கள் ஓய்வுபெறுவதற்கு முன் பயன்படுத்தாதீர்கள். நீங்கள் வேறு நிறுவனத்தில் பணிக்குச் சேர்ந்தால்கூட, பழைய நிறுவனத்தின் மூலம் கிடைத்த பி.எஃப் தொகையை அந்தப் புதிய கணக்கோடு இணைத்துக்கொள்ளுங்கள். இந்தத் தொகை மட்டும்தான் உங்களுக்குத் தெரியாமல் பிற்காலத்தில் பெரிய தொகையாகக் கிடைக்கும். `நான் சம்பாதிப்பதை நிறுத்திவிட்டால் என் குடும்பம் அவ்வளவுதான்; என்னை நம்பித்தான் குடும்பம் இருக்கிறது என்றால் வேலைக்குப் போகத் தொடங்கியதிலிருந்தே ஒரு நல்ல தொகைக்கு டேர்ம் இன்ஷூரன்ஸ்  பாலிசியை எடுத்துக்கொள்ளுங்கள். வேலைக்குச் சேர்ந்த அன்று எடுத்துக்கொள்ளவில்லை என்றாலும், இப்போது உடனடியாக எடுத்துக்கொள்ளுங்கள். உங்களுக்குத் தேவையானதை நீங்களே செய்துகொண்டால்தான் உங்களுக்கும் உங்களைச் சார்ந்துள்ளவர்களுக்கும் நல்லது.