Published:Updated:

குறைந்தது வட்டி விகிதம்: பெருகுமா வளர்ச்சி?

எதிர்பார்ப்பு

பிரீமியம் ஸ்டோரி
குறைந்தது வட்டி விகிதம்: பெருகுமா வளர்ச்சி?

தொடர்ச்சியாக உயர்ந்து வந்த பணவீக்கத்தின் காரணமாக மார்ச் 2010 முதல் அக்டோபர் 2011 வரை ரிசர்வ் வங்கி 13 முறை வட்டி விகிதத்தை உயர்த்தியது. தற்போது பணவீக்கம் ஓரளவுக்கு குறைந்ததன் காரணமாக வட்டி விகிதத்தை 0.50 சதவிகிதம் அளவுக்கு குறைத்திருக்கிறது ஆர்.பி.ஐ. எல்லோரும் 0.25 சதவிகிதம் அளவுக்கே வட்டி விகிதம் குறைக்கப்படும் என்று எதிர்பார்த்திருக்க, 0.50 சதவிகிதம் வரை குறைத்து இன்ப அதிர்ச்சி தந்தார் ஆர்.பி.ஐ. கவர்னர் சுப்பாராவ்.

##~##
ந்த வட்டிவிகிதம் குறைக்கப்பட்டதன் பின்னணியையும், இதன் விளைவுகள் என்னவாக இருக்கும் என்பது பற்றியும் சென்னை பல்கலைக்கழகத்தின் பொருளாதாரப் பேராசிரியர் ஸ்ரீனிவாசனிடம் பேசினோம். விரிவான விளக்கங்களுடன் நமக்கு பதில் அளித்தார்.

''ஒரு பொருளாதாரம் தொடர்ந்து வளர வேண்டு மெனில் சீரான பணவீக்கம் அவசியம். குறைவான பணவீக்கமும், அதிகமான பணவீக்கமும் நாட்டின் பொருளாதாரத்துக்கு ஆபத்து.

சில வருடங்களுக்கு முன்பு 5 முதல் 6 சதவிகித பணவீக்கம் என்பது தேவையானதாக இருந்தது. இப்போது 7 சதவிகித பணவீக்கம் சரியானதாக இருக்கும் என்று ரிசர்வ் வங்கி நினைக்கிறது. தற்போதைய நிலையில் 7 சதவிகிதத்தைவிடவும் பண வீக்கம் குறைவாக இருப்ப தாலேயே வட்டி விகிதத்தைக் குறைத்துள்ளது ஆர்.பி.ஐ.

ஆனால், இனி பணவீக்கம் குறைவதற்கான வாய்ப்பு இருப்பதுபோல தெரியவில்லை. இதற்கு பல காரணங்கள். முதலாவது, கச்சா எண்ணெய் விலை. தற்போதைய நிலையில், இதன் விலை குறைகிற மாதிரி தெரியவில்லை. ஒருவேளை கச்சா எண்ணெய் விலை நிலையாக இருந்தாலும், ரூபாயின் மதிப்பு குறைந்துகொண்டே போவதும் மறைமுகமாக பணவீக்கத்தை அதிகரிக்கும்.

கடந்த 15 மாதத்தில் 15 சதவிகித அளவுக்கு ரூபாய் சரிந்திருக்கிறது. ஆனால், ரூபாயின் மதிப்பு இன்னும்கூட சரிவதற்கு வாய்ப்பிருப்பதாகச் சொல்கிறார்கள். அது உண்மை யாக இருக்கும் பட்சத்தில் ரூபாயை சரியவிடாமல் தடுத்தால் ஏற்றுமதியின் மூலம் கிடைக்கும் வருமானம் குறைய வாய்ப்பிருக்கிறது. அதனால் ரூபாயின் மதிப்பு உயருமா, குறையுமா என்பதைப் பொறுத்தே கச்சா எண்ணெய்யின் விலை நிலவரம் மாறும். தவிர, கச்சா எண்ணெய்யின் விலையும் இனிவரும் நாட்களில் உயர வாய்ப்பிருக்கிறது என்பதை மறந்துவிடக்கூடாது.

குறைந்தது வட்டி விகிதம்: பெருகுமா வளர்ச்சி?

பணத்தின் மதிப்பைக் குறையாமல் பார்த்துக் கொள்ள வேண்டும், பணவீக்கத்தைக் கட்டுப்படுத்த வேண்டும், வளர்ச்சியை அதிகப்படுத்த வேண்டும். இந்தியா மட்டும் அல்லாமல் அனைத்து நாடு களின் நோக்கமும் இந்த மூன்றுதான். இதில் ஏதேனும் இரண்டு விஷயங்களை மட்டும் தான் எந்த ஒரு மத்திய வங்கி யாலும் செயல்படுத்த முடியும். மூன்று விஷயங்களையும் ஒரே நேரத்தில் நிறைவேற்ற நினைத்தால் முடியாது.

தற்போது வட்டி விகிதம் குறைக்கப்பட்டிருப்பதாலேயே வளர்ச்சியை உண்டாக்கிவிடும் என்று நம்புவது தவறு. அதிகளவு இறக்குமதி காரணமாக வர்த்தகப் பற்றாக்குறை அதிகரித்து இருக்கிறது.

நடப்புக் கணக்கில் இதை சமாளிக்க அதிகளவு கடன் வாங்க வேண்டி இருப்பதால் அந்த பற்றாக்குறை அதிகரித்துக் கொண்டே இருக்கிறது. அதிகளவு கடன் வாங்கும்போது வளர்ச்சி என்பது சாத்தியமில்லை.

மேலும், ரெபோ விகிதத்துக் கான வட்டி விகிதத்தைக் குறைப்பது மட்டும் வளர்ச்சியை உருவாக்காது. நாள் ஒன்றுக்கு இந்திய வங்கிகளுக்கு 95,000 கோடி ரூபாய் தேவைப்படுகிறது.

இதில் ரிசர்வ் வங்கியில் (ரெபோ வட்டி விகிதத்தில்) 15,000 கோடி அளவுக்குதான் கிடைக்கிறது. மீதித் தொகையை வேறு வழிகளில் 0.50% கூடுதலாக வட்டி தந்து வங்கிகள் வாங்கு கின்றன.  இதனால், வங்கிகள் கொடுக்கும் கடனுக்கான வட்டி விகிதத்தில் மாற்றம் இருக்க வாய்ப்பில்லை.

மேலும், வங்கிகள் தங்களுக்கு வரும் டெபாசிட்களில் 24.5% விகிதம் எஸ்.எல்.ஆர். என்கிற பெயரில் அரசாங்க பத்திரங் களில் முதலீடு செய்தாக வேண்டும்; 4.75 சதவிகிதத்தை ரொக்கமாக கையில் வைத்திருக்க வேண்டும்;  முன்னுரிமை கடன்கள் என்று 40 சதவிகித அளவுக்கு கடன் கொடுக்க வேண்டும். அப்படி பார்த்தால், மீதமுள்ள 30 சதவிகித டெபாசிட்களைத்தான் வங்கிகள் தங்கள் இஷ்டத்துக்கு கடன் கொடுக்க முடியும். இந்த நிலையில் ரெபோ விகிதத்தைக் குறைப்பது மட்டும் வளர்ச்சியை உருவாக்காது.

அதற்காக வட்டி விகிதத்தைக் குறைத்தது தவறு என்று சொல்லவில்லை. வட்டி விகிதத்தைக் குறைத்தது சரியான முடிவு என்றாலும், அதற்கு இவ்வளவு முக்கியத்துவம் கொடுத்து கொண்டாடத் தேவை இல்லை'' என்றார்.

ஆக, ஆர்.பி.ஐ.யின் இந்த நடவடிக்கையால் பெரிய மாற்றம் ஏற்பட வாய்ப்பில்லை என்பது மட்டும் தெரிகிறது.

-வா.கார்த்திகேயன்.
படம்: ஆ.முத்துக்குமார்.

குறைந்தது வட்டி விகிதம்: பெருகுமா வளர்ச்சி?
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு