Published:Updated:

எந்த ஊரில் என்ன வாங்கலாம்?

இந்த வாரம் போடிநாயக்கனூர்

எந்த ஊரில் என்ன வாங்கலாம்?

இந்த வாரம் போடிநாயக்கனூர்

Published:Updated:
எந்த ஊரில் என்ன வாங்கலாம்?
எந்த ஊரில் என்ன வாங்கலாம்?

ப்பேர்ப்பட்ட சுவைகொண்ட உணவுப் பதார்த்தம் என்றாலும், ஒரே ஒரு ஏலக்காயை நசுக்கிப் போட்டால் அதன் சுவை இன்னும் பல மடங்கு பெருகிவிடும். அந்த அளவுக்கு ஆளையே சுண்டி இழுக்கும் மணம்கொண்டது ஏலக்காய்.

ஒட்டுமொத்த விகடனுக்கும் ஒரே ஷார்ட்கட்!

நமது நாட்டில் விளையும் முக்கிய பணப் பயிர்களில் ஒன்று, ஏலக்காய். நமது முன்னோர்களின் பழங்கால வணிகங்களில்கூட ஏலக்காய் வியாபாரம் கொடிகட்டி பறந்திருக்கிறது. ஆங்கிலேயர் ஆட்சிக் காலங்களில் கப்பல் கப்பலாக ஏலக்காய்களை ஏற்றி, தங்கள் நாடுகளுக்குக் கொண்டு சென்றிருக்கிறார்கள். அந்த அளவுக்குப் புகழும் மணமும் கொண்டவை ஏலக்காய்கள். அதிலும் தமிழக, கேரள எல்லைப்பகுதிகளில் விளையும் ஏலக்காய்க்கு உலக அளவில் கடும் கிராக்கிதான்.

##~##
உலகத்தில் பல்வேறு நாடுகளில் ஏலக்காய் பயிரிடப்பட்டாலும், தேனி மாவட்டத்தில் கம்பம், போடி, பூம்பாறை, காந்தம்பாறை, புளியம்பாறை பகுதிகளில் விளையும் ஏலக்காய்கள் தரமானதாக கருதப்படுகிறது. உலக அளவில் தரவரிசையில் முதலிடம், போடிப் பகுதியில் விளையும் ஏலக்காய்க்குத்தான் என்கிறார்கள் விவசாயிகள்.

தேனி மாவட்ட மலைப் பகுதிகளில் சுமார் 1.5 லட்சம் ஹெக்டேர் பரப்பளவில் ஏலக்காய்  பயிரிடப்பட்டு வளர்க்கப்படுகிறது. ஆண்டிற்கு எட்டு மாதங்கள் வரை விளைச்சலை அறுவடை செய்கிறார்கள் விவசாயிகள். குறிப்பாக, ஆடி மாதம் முதல் தை மாதம் வரை ஏலக்காய் சீஸன் வெகு ஜோராக நடக்கிறது. மத்திய அரசின் ஸ்பைசஸ் போர்டு கட்டுப்பாட்டில் ஏலக்காய் வியாபாரம் மையப்படுத்தப்பட்டாலும், ஏலக்காயின் அளவு, தரத்தைப் பொறுத்து மதிப்பீடு செய்து தனித்தனியாக தரம் பிரிக்கப்பட்டு கமிஷன் வியாபாரம் நடக்கிறது.

பொதுவாக ஏலமுறையில்தான் இந்த வியாபாரம் செய்யப்படுகிறது. 2009-க்கு முன்பு வரை கூவிக்கூவி ஏலம் விடப்பட்ட முறையை மாற்றி, இப்போது ஆன்லைன் மூலமும் ஏலம் விடப்படுகிறது. கேரளாவில் நான்கு இடத்திலும், தமிழகத்தில் நான்கு இடத்திலும் ஏலம் விடப்பட்டாலும், இதில் போடி முக்கிய பங்கு வகிக்கிறது. நாள் ஒன்றுக்கு சுமார் 35 ஆயிரம் கிலோ வரை ஏலம் விடப்படுகிறது. பொதுவாக நேரடி வர்த்தகம், சில்லரை வர்த்தகம், மொத்த வர்த்தகம், ஆன்லைன் வர்த்தகம் என அனைத்து வகையிலும் சக்கை போடு போடுகிறது ஏலக்காய் வர்த்தகம்.

ஏலக்காயைப் பொறுத்தவரை, 5 முதல் 6 மில்லி மீட்டர் கொண்டவை ஒரு தரமும், 6 முதல் 7 மில்லி மீட்டர் வரை ஒரு தரமும், 7 முதல் 8 மில்லி மீட்டர் வரை உள்ளவை இன்னொரு தரமுமாகப் பிரிக்கப்பட்டு, பான்விலா, மீடியம், போல்டு என்று ஆறு வகையான ரகங்களாகப் பிரிக்கப்பட்டு வியாபாரம் செய்யப்படுகிறது. போடி மார்க்கெட்டில் சென்ற ஆண்டு மட்டும் 18 ஆயிரம் மெட்ரிக் டன் ஏலக்காய் விற்பனை செய்யப்பட்டுள்ளது என்கிறார்கள் தேனி மாவட்ட ஏலக்காய் வியாபாரிகள் சங்கத்தினர்.  

எந்த ஊரில் என்ன வாங்கலாம்?

ஏலக்காயை மலைப்பகுதியிலிருந்து பறித்து வந்ததும், சந்தைக்கு விற்பனைக்காக கொண்டு வருவதில்லை. அவற்றை இருட்டறையில் 40 டிகிரி வெப்பநிலையில் 24 மணிநேரம் உலரவைத்து பதப்படுத்தி, சலித்து தரம் பிரித்து மார்க்கெட்டுக்குக் கொண்டு வருகிறார்கள். காற்று, ஈரம்,  வெளிச்சம் இல்லாமல் பதப்படுத்தினால்தான் ஆறு மாதங்கள் வரை கெட்டுப் போகாமல் இருக்கும் என்கிறார்கள் இந்த தொழிலில் இருப்பவர்கள்.  

வாதம், சளி, இருமல், பித்தம் போன்ற 36 வகையான நோய்களை கட்டுப்படுத்தும் மருத்துவக் குணம் கொண்டது ஏலக்காய். ஏலக்காய் வியாபாரமும், விலையும் மையப்படுத்தப்பட்டது என்றாலும், மற்ற ஊர்களைவிட இங்கு கிலோ ஒன்றுக்கு 650 முதல் 1,200 வரை பல்வேறு விலைகளில் வாங்கலாம் என்பது முக்கியமானது. இதனை பயன்படுத்தி பல சில்லரை வியாபாரிகள் ஐந்து கிலோ, பத்து கிலோ என்று வாங்கிச் செல்வதும் உண்டு.

''ஏலக்காயை பொறுத்தவரை, கழிவு என்பது கிடையாது. எல்லாமே பயன்பாட்டிற்குச் சென்று விடும். தேனி மாவட்டம் சுற்றுலாப் பகுதி என்பதால், தேனியிலிருந்து, மூணாறுக்குச் செல்லும் வழியில் எட்டு கி.மீ தூரத்தில் உள்ள போடிநாயக்கனூரில் இறங்கி சுற்றுலா பயணிகள், சில்லரை வியாபாரிகளிடம் 50 கிராம் முதல் 1 கிலோ வரை தேவைக்கேற்ப வாங்கிச் செல்வதைக் கண்கூடாக பார்க்கலாம்'' என்கிறார் வியாபாரி சிதம்பரம்.

வைகை அணை, சுருளி அருவி, தேக்கடி என்று சுற்றுலாச் செல்லும் பயணிகள் நம்மூர் ஏலக்காயை வாங்கி வரலாம். தரமும், மருத்துவக் குணமும் கொண்ட ஏலக்காய்கள் நேரடியாகவே குறைந்த விலைக்கு வாங்குவது மணமான விஷயம்தானே..!

- சண்.சரவணக்குமார்,
படங்கள்: வி.சக்திஅருணகிரி.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism