Published:Updated:

எந்த வட்டி விகிதம் லாபம்?

எந்த வட்டி விகிதம் லாபம்?

பிரீமியம் ஸ்டோரி
எந்த வட்டி விகிதம் லாபம்?

வீட்டுக் கடன் வாங்கும்போது கவனிக்க வேண்டிய சில முக்கிய விஷயங்களை இங்கு பார்ப்போம்.

இ.எம்.ஐ.!

##~##
வீட்டுக் கடனை குறைந்தது 5 ஆண்டு முதல் 30 ஆண்டு வரையிலும் கட்டலாம். இந்த காலம் கடன் தொகை மற்றும் கடன் வாங்குபவரின் வயதைப் பொறுத்து நிர்ணயிக்கப்படுகிறது. வீட்டுக் கடனை அதிக ஆண்டுகளுக்குக் கட்டினால் மாதத் தவணை குறைவாக இருக்கும். குறுகிய காலத்தில் கட்டி முடிக்க வேண்டுமெனில் அதிக மாதத் தவணை கட்ட வேண்டியிருக்கும். உங்களால் எவ்வளவு  இ.எம்.ஐ. கட்ட முடியும் என்பதை ஆராய்ந்து முடிவு செய்யவும்.

உதாரணமாக, உங்களால் 30,000 ரூபாய் கட்ட முடியும் என்றாலும் இ.எம்.ஐ.யை 25,000 ரூபாயாக நிர்ணயித்துக்கொள்வது நல்லது. பெரும்பாலான பொதுத்துறை வங்கிகள் இந்த 25,000 ரூபாயைவிட கூடுதலாக கட்ட அனுமதிக்கின்றன. அதாவது, இ.எம்.ஐ. 25,000 ரூபாய் என்றாலும் 30,000 ரூபாய் கட்ட அனுமதிக்கின்றன. ஒரு மாதம் திடீர் செலவு, உங்களால் 30,000 ரூபாய் கட்ட முடியவில்லை எனில் வங்கிகள் உங்களுக்கு அபராதம் எதையும் விதிக்காது.  

எந்த வட்டி விகிதம்?

வீட்டுக் கடனுக்கான வட்டி விகிதம்  நிலையான வட்டி (Fixed interest rate),  மாறுபடும் வட்டி விகிதம் (Floating interest rate) - என இரண்டு விதமாக இருக்கிறது. நிலையான வட்டியில் குறிப்பிட்ட காலத்துக்கு வட்டி விகிதம் மாறாமல் இருக்கும். 3 அல்லது 5 ஆண்டுகளுக்குப் பிறகு மாற்றப்படும். வட்டி உயர்வை உடனடியாகச் சமாளிக்க முடியாது என்பவர்களுக்கு ஏற்றது இது. கடன் காலம் முழுக்க வட்டி மாறாமல்  இருக்கும்படியான திட்டங்களையும் சில வங்கிகள் மற்றும் வீட்டு வசதி நிறுவனங்கள் தருகின்றன.  

மாறுபடும் வட்டி விகிதத்தில் கடன்  சந்தையில் வட்டி உயர்ந்தால் இதிலும் வட்டி அதிகரிக்கும்.. அதேபோல், கடன் சந்தையில் வட்டி குறைந்தால் வட்டி குறையும். வட்டி விகித உயர்வால் மாதத் தவணை அதிகரித்து, அதனால் ஏற்படும் பாதிப்பை சமாளிக்க முடியும் என்பவர்கள் ஃப்ளோட்டிங்  வட்டி விகிதத்தை தேர்வு செய்யலாம்.

பொதுவாக, ஃபிக்ஸட் வட்டி விகிதத்தைவிட ஃப்ளோட்டிங் வட்டி விகிதம் ஓரிரு சதவிகிதம் குறைவாக இருக்கிறது என்பதால் வீட்டுக் கடன் வாங்கியவர்களில் பெரும்பாலானவர்கள் ஃப்ளோட்டிங் வட்டி விகித்ததையே தேர்வு செய்கின்றனர்.  

தெரிந்தோ, தெரியாமலோ நிலையான வட்டியைத் தேர்வு செய்தவர்கள் ஒரு விண்ணப்பக் கடிதம் தந்து, சிறிய தொகையைக் கட்டுவதன் மூலம் ஃப்ளோட்டிங் வட்டிக்கு மாற முடியும்.  

வீட்டுக் கடனை திரும்பச் செலுத்தும் தகுதி உங்களுக்கு அதிகமாக இருந்தால், அதிக சொத்து மதிப்புக்குக் குறைவாக கடன் வாங்கினால், முன்னணி நிறுவனத்தில் பணிபுரிந்தால் உங்களுக்கான வட்டியில் 0.25% தொடங்கி 1% வரை வங்கிகளும் வீட்டு வசதி நிறுவனங்களும் சலுகை அளிக்கும். இதை பேரம் பேசி வாங்குவதில்தான் உங்கள் திறமை இருக்கிறது.

எந்த வட்டி விகிதம் லாபம்?

எப்போது எந்த வட்டி?

பொதுவாக, எதிர்காலத்தில் வட்டி விகிதம் அதிகரிக்கும் சூழ்நிலை நிலவினால் நிலையான வட்டி விகிதத்தைத் தேர்ந்தெடுக்க வேண்டும். வருங்காலத்தில் வட்டி விகிதம் குறைவதற்கான வாய்ப்பு அதிகமாக இருந்தால் ஃப்ளோட்டிங் வட்டி விகிதத்தைத் தேர்வு செய்வது லாபகரமாக இருக்கும்.

வீட்டு வசதி நிறுவனங்களுக்கு கடன் வழங்கிவரும் தேசிய வீட்டு வசதி வங்கி, அது வழங்கும் கடனுக்கான வட்டியில் 0.5 சதவிகிதத்தை தற்போது குறைத்துள்ளது. இதனால் கூடிய விரைவில் ஹெச்.டி.எஃப்.சி., எல்.ஐ.சி. ஹவுஸிங் ஃபைனான்ஸ் நிறுவனங்கள் வீட்டுக் கடனுக்கான வட்டியை கொஞ்சம் குறைக்க வாய்ப்புண்டு. தற்போதைய நிலையில் விரைவில் வட்டி விகிதம் குறையக் கூடும் என்பதால் ஃப்ளோட்டிங் விகிதத்தைத் தேர்வு செய்வது நல்லது.

கடன் தொகை எவ்வளவு என்று முடிவு செய்கிற அதே நேரத்தில் மாதத் தவணை எவ்வளவு, எந்த வட்டி விகிதம் சரியாக இருக்கும் என்று யோசித்து தேர்வு செய்தால் வீட்டுக் கடனை சுலபமாகச் செலுத்தி வீட்டை சொந்தமாக்கிக் கொள்ள முடியும்.

- சி.சரவணன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு