Published:Updated:

ஆர்.பி.ஐ.-ன் தங்கத் திட்டங்கள்...

எல்லாமே 'பொன்சி'தான்!

ஆர்.பி.ஐ.-ன் தங்கத் திட்டங்கள்...

எல்லாமே 'பொன்சி'தான்!

Published:Updated:

ங்கத்தின் விலை அதிகரிக்க அதிகரிக்க, அதை மக்கள் இன்னும் அதிகமாகத்தான் வாங்குகிறார்கள். 2012-ம் நிதியாண்டில் மட்டும் தங்க இறக்குமதி 39 சதவிகிதம் அதிகரித்துள்ளது. அதிகளவில் தங்கத்தை இறக்குமதி செய்யும்போது டாலரை அதிகம் கொடுக்க வேண்டி வருகிறது.

இதனால் நம் நாட்டின் நடப்புக்கணக்கு பற்றாக்குறை அதிகரித்திருக்கிறது. 2012-ம் நிதியாண்டில் நிதிப் பற்றாக்குறை நம் நாட்டின் மொத்த உள்நாட்டு உற்பத்தியில் 4.2 சதவிகிதமாகும்.  இது பண மதிப்பில் சுமார் 80 பில்லியன் டாலராகும்.

ஆர்.பி.ஐ.-ன் தங்கத் திட்டங்கள்...

ஒட்டுமொத்த விகடனுக்கும் ஒரே ஷார்ட்கட்!

ரிசர்வ் பேங்க் ஆஃப் இந்தியாவின் துணை கவர்னர் சுபிர் கோகர்ன் சமீபத்தில் இந்த  பற்றாக்குறை பற்றி பேசும்போது, உலகளவில் மொத்த தங்க சப்ளையான 4,000 டன்னில் நான்கில் ஒரு பங்கை இந்தியா இறக்குமதி செய்கிறது. இந்தளவிற்கு தங்கத்தை இறக்குமதி செய்யும்போது பொருளாதாரத்தில் அதிக பாதிப்பு ஏற்படும்'' என்று சொல்லி இருக்கிறார்.

இந்தியர்கள் தங்கத்தில் முதலீடு செய்வதற்கு பல காரணங்கள் இருக்கிறது. பணவீக்கத்தை எதிர்த்து வருமானம் கொடுப்பதில் தங்கம் சிறந்த முதலீடாகத் திகழ்கிறது. கடந்த மூன்று வருடங்களில் தங்கம் 70 சதவிகித வருமானத்தைத் தந்திருக்கிறது. கடந்த சில வருடங்களாக நிஃப்டி, ஒரு வருட வங்கி டெபாசிட், பத்து வருட அரசாங்க பாண்டுகள் கொடுக்காத வருமானத்தை, தங்க முதலீடு கொடுத்திருக்கிறது. இதனால், மக்கள் தங்கத்தில் முதலீடு செய்வதை நிறுத்த வாய்ப்பு இல்லை.

''இந்த சிக்கலைத் தவிர்க்க, தங்கம் சம்பந்தப்பட்ட முதலீடுகளை அதிகரிக்கும் அதேவேளையில் பிஸிக்கலாக தங்கம் வாங்குவதைத் தவிர்க்கும் திட்டங்களை அதிகரிக்க வேண்டும். இதற்கு என்ன செய்யலாம் என  ஆர்.பி.ஐ. பரிசீலித்து வருவதாக'' சுபிர் கோகர்ன் சொன்னதோடு,

இது தொடர்பாக பொதுமக்களும் தங்களது கருத்துகளைத் தெரிவிக்கலாம் என்றும் கூறியிருக்கிறார்.

ஆர்.பி.ஐ.-ன் தங்கத் திட்டங்கள்...

தங்கத்தை பிஸிக்கலாக வாங்காமல், அதே நேரத்தில், தங்கத்தில் முதலீடு செய்யும் வேறு

ஆர்.பி.ஐ.-ன் தங்கத் திட்டங்கள்...

நான்கு  திட்டங்களை ஆர்.பி.ஐ. பரிசீலித்து வருகிறது. கோல்டு டெபாசிட் ஸ்கீம், கோல்டு லிங்க்டு அக்கவுன்ட், கோல்டு அக்குமுலேஷன் பிளான், கோல்டு பென்ஷன் பிளான் உள்ளிட்ட நான்கு வகை திட்டங்களை கொண்டுவர திட்டமிட்டு வருகிறது ஆர்.பி.ஐ. இந்தத் திட்டங்கள் பற்றி இனி சுருக்கமாகப் பார்ப்போம்.

கோல்டு டெபாசிட் ஸ்கீம்!

இந்தத் திட்டத்தின்படி, பிஸிக்கல் தங்கம் வங்கிகள் மூலம் டெபாசிட் செய்து வைக்கப்படும். முதலீட்டாளர்கள் இந்த திட்டத்தின் மூலம் முதலீடு செய்யும்போது குறிப்பிட்ட காலத்திற்குபிறகு தங்கத்தின் விலை உயர்வை கணக்கிட்டு வட்டி வழங்கப்படும். ஆனால், முதிர்வுக் காலத்தில் தங்கமாக வழங்கப்படமாட்டாது. இந்த வகை திட்டம் நடுத்தர மக்களுக்கு வசதியாக இருக்குமென அரசு பரிசீலித்து வருகிறது.

கோல்டு லிங்க்டு அக்கவுன்ட்!

இத்திட்டத்தின் மூலம் வட்டி தரப்படமாட்டாது. தங்கத்தை வெளிநாட்டில் ஹெட்ஜ் செய்து வைப்பார்கள். இத்திட்டத்தில் முதலீடு செய்த முதலீட்டாளர்களுக்கு முதிர்வுக் காலம் வரும்போது தங்கத்தை விற்று அதற்கு நிகரான பணம் தரப்படும். இந்த கோல்டு லிங்க்டு அக்கவுன்ட் திட்டத்தில் முதலீட்டாளர்கள் சுலபமாக நுழையவும், வெளியேறவும் முடியும். எனினும், இந்த திட்டத்தில் தங்கம் இந்தியாவிற்குள் வருவது தவிர்க்கப்படும்.

கோல்டு அக்குமுலேஷன் பிளான்!

இத்திட்டம் மியூச்சுவல் ஃபண்ட் திட்டங்களில் எஸ்.ஐ.பி. முறையில் முதலீடு செய்வதுபோல் முதலீடு செய்வது. குறிப்பிட்ட காலத்திற்குள் தங்கத்தைக் குறைந்தளவில் வாங்கிச் சேர்ப்பது. தங்கத்தின் ஏற்ற, இறக்கம் மூலம் இதன் வருமானம் இருக்கும். தங்கம் பிஸிக்கலாக டெலிவரி கொடுக்கப்படும். எனினும், இந்த திட்டத்தில் குறைந்தளவிற்கு தங்கம் டெலிவரி எடுக்கப்படும் என கருதப்படுகிறது.

கோல்டு பென்ஷன் பிளான்!

இத்திட்டம் ஏற்கெனவே வங்கிகளில் அமலில் இருக்கும் ரிவர்ஸ் மார்ட்கேஜ் போன்றது. அதாவது, வீட்டின் உரிமையாளர் தன் வீட்டை அடமானம் வைப்பதன் மூலம் வீட்டின் மதிப்பிற்கு ஏற்றாற்போல் மாதாமாதம் ஒரு தொகையை வங்கியிலிருந்து பெற்றுக்கொள்வது. அந்த உரிமையாளர் இறக்கும் வரை அந்த கடனைத் திரும்பக் கட்டத் தேவையில்லை. கடன் வாங்கிய நபரின் வாரிசுதாரர் அந்தக் கடனை கட்டி வீட்டை மீட்டுக்கொள்ளலாம். இதுபோன்று மூத்த குடிமக்களுக்காக இன்ஷூரன்ஸ் நிறுவனத்துடன் வங்கிகள் இணைந்து ஆனுட்டி பிளானை ஆரம்பிப்பதுதான் இந்த திட்டம். மூத்த குடிமக்கள் தங்களிடமிருக்கும் தங்கத்தை வங்கியில் கொடுத்து அதன் மதிப்பிற்குத் தகுந்த வருமானத்தைப் பெறலாம். திரும்பவும் தங்கம் கிடைக்காது.

ஆர்.பி.ஐ.-ன் தங்கத் திட்டங்கள்...

ஆர்.பி.ஐ. பரிசீலித்துவரும் இந்த கோல்டு திட்டங்கள் குறித்து பெஞ்ச்மார்க் அட்வைஸரி சர்வீஸஸ் நிறுவனத்தின் இயக்குநர் சண்முகநாதன் நாகசுந்தரத்துடன் பேசினோம்.

''இது மாதிரியான புதிய திட்டங்களை கொண்டுவருவதன் மூலம் ஆர்.பி.ஐ. மக்களை ஏமாற்றவே முயற்சிக்கிறது. தற்போது பரிசீலித்துவரும் திட்டங்கள் அனைத்தும் எந்தளவுக்கு சாத்தியப்படும் என்று தெரியவில்லை. தங்க இறக்குமதியைத் தடுக்க  நிரந்தர தீர்வு எடுக்காமல் தற்காலிகத் தீர்வை எடுக்கவே நினைக்கிறார்கள்.

உலகளவில் இருக்கும் மொத்த தங்கமே ஆறு பில்லியன் அவுன்ஸ்தான். ஆனால், தங்கத்தின் மீதான வர்த்தகமோ இதிலிருந்து நூறு மடங்கு அளவில் நடக்கிறது. கோல்டு இ.டி.எஃப். அல்லது மற்றவகை பேப்பர் தங்கம் மூலம் தங்கத்தைச் சேமிக்க சொல்கிறார்கள். இது எப்படி தங்க இறக்குமதியைக் குறைக்கும் என்று தெரியவில்லை.

இ.டி.எஃப்.-ல் முதலீடு செய்தாலும் அந்த பணத்தைக்கொண்டு நூறு சதவிகித தங்கமும் வாங்கி வைத்திருப்பார்கள் என்பதற்கு என்ன உத்தரவாதம்? முதலீடு செய்திருக்கும் அனைவரும் ஒரேநாளில் தங்கத்தைக் கொடுங்கள் எனக் கேட்டால் யாராலும் கொடுக்க முடியாது. கையிருப்பு குறைந்தளவில் வைத்துக்கொண்டு அதிகளவில் வர்த்தகம் நடைபெறுவது கடைசியில் மிகப் பெரிய பொருளாதார பாதிப்பை ஏற்படுத்தும். என்னைக் கேட்டால், ஆர்.பி.ஐ. கொண்டுவர இருக்கும் இந்த திட்டங்கள் அனைத்தும் பொன்சி (மோசடி) திட்டங்கள்தான் என்று சொல்வேன்'' என்றார்.

பொன்சி திட்டங்களை ஒழிக்க வேண்டியது ஆர்.பி.ஐ.-ன் கடமையாக இருக்கும்போது அதுவே உத்தரவாதம் இல்லாதத் திட்டங்களை நடத்தலாமா?  

- பானுமதி அருணாசலம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism