Published:Updated:

என்.சி.டி. A to Z

கொஞ்சம் ரிஸ்க் நிறைய வருமானம்!கடன் பத்திரங்கள்

பிரீமியம் ஸ்டோரி
என்.சி.டி.  A to Z

ல்வேறு கார்ப்பரேட் நிறுவனங்கள் சுமார் 20,000 கோடி ரூபாய் அளவுக்கு என்.சி.டி. என சுருக்கமாக அழைக்கப்படுகிற 'நான் கன்வெர்ட்டபிள் டிபென்சர்’களை வெளியிடப் போகிறது. இதில் முதலீடு செய்யலாமா, முதலீடு செய்யும்முன் கவனிக்கவேண்டிய விஷயங்கள் என்னென்ன என்பது பற்றி விளக்கமாகப் பார்ப்போம்.

என்.சி.டி.  A to Z

முதலீட்டு வாய்ப்புகள் அதிகமுள்ள இன்றைய காலத்தில் வங்கிகள் தரும் வட்டியைவிட சற்று கூடுதல் வட்டி, பணம் தேவைப்படும்போது எளிதில் கிடைக்க, முதலீடு செய்த பணத்திற்குக் கிடைக்கும் வருமானத்திற்கு வரிப் பிடித்தம் (டி.டி.எஸ்.) கிடையாது போன்ற பல சிறப்பு அம்சங்கள் கொண்டவை என்.சி.டி.கள் (Non Convertible Debenture).

என்.சி.டி. என்றால்..?

நிறுவனங்கள் தங்களது வளர்ச்சிக்காகத் தேவைப்படும் நிதியை பொதுமக்களிடமிருந்து பெறுவதற்கு வெளியிடப்படும் கடன் பத்திரங்கள் 'டிபென்சர்கள்’ எனப்படும். இவ்வகை கடன் பத்திரத்திற்கு நிலையான வட்டி மற்றும் குறிப்பிட்ட காலம் கொண்டதாக இருக்கும். இதில் முதலீடு செய்பவர்களுக்கு அவர்கள் முதலீடு செய்த பணத்திற்கான வட்டியை காலாண்டு/ அரையாண்டு / ஆண்டுக்கு ஒருமுறை என நிறுவனம் வழங்கும். முதலீட்டு காலம் முடிந்த பிறகு முதலீட்டாளர்களுக்கு முதலீடு செய்த பணத்தைத் திரும்ப வழங்கிவிடும்.

இந்தக் கடன் பத்திரங்கள் இருவகைப்படும். 1. கன்வெர்ட்டபிள் டிபென்சர் (Convertible
Debenture), 2. நான் கன்வெர்ட்டபிள் டிபென்சர் (Non Convertible Debenture).

கன்வெர்ட்டபிள் டிபென்சர்!

முதலீடு காலம் முடிவடைந்தபிறகு, முதலீட்டாளர்களுக்கு முதலீடு செய்த பணத்தைத் திரும்ப வழங்குவதற்குப் பதிலாக அந்த நிறுவனத்தின் பங்குகளைத் தருவது கன்வெர்ட்டபிள் டிபென்சர்.

நான்கன்வெர்ட்டபிள் டிபென்சர்!

இதில் முதலீடு காலம் முடிவடைந்தபிறகு முதலீடு செய்த பணத்தை நிறுவனத்தின் பங்குகளாக மாற்ற இயலாது. முதலீட்டாளர் களுக்கு முதலீடு செய்த பணம்தான் திரும்ப கிடைக்கும்.

இந்த என்.சி.டி. இரு வகைப்படும். 1. செக்யூர்ட் என்.சி.டி., 2. அன்செக்யூர்ட் என்.சி.டி.

1. செக்யூர்ட் என்.சி.டி.!

நிறுவனங்கள் திரட்டும் நிதிக்குச் சமமாக அந்நிறுவனத் தின் சொத்துகள் ஜாமீன் (Collateral) ஆக இருக்கும். எதிர்பாராதவிதமாக நிறுவனத் தால் திரட்டிய நிதியைத் திரும்பச் செலுத்த முடியாத சூழ்நிலையில் நிறுவனம் அந்தச் சொத்துகளை விற்று முதலீட்டாளர்களுக்கு பணத்தைத் திரும்பத் தந்து விடும். முதலீட்டாளர்கள் முதலீடு செய்த பணத்தை இழப்பதற்கான வாய்ப்புகள் இதில் கிடையாது. ஆனால், இதில் கிடைக்கும் வட்டியானது 'அன்செக்யூர்ட் என்.சி.டி’யைவிட குறைவாகவே  இருக்கும்.

2. அன்செக்யூர்ட் என்.சி.டி.!

இவ்வகை என்.சி.டி.யில் நிறுவனம் திரட்டும் நிதிக்கு எந்த ஒரு பாதுகாப்பும் கிடையாது. எதிர்பாராதவிதமாக நிறுவனத்தால் திரட்டிய நிதியைத் திரும்பச் செலுத்த முடியாமல் போனால், இதில் முதலீடு செய்த பணம்  முதலீட்டாளர்களுக்குத் திரும்ப கிடைக்காமலே போகும். 'அன்செக்யூர்ட் என்.சி.டி.’யில் ரிஸ்க் அதிகம் உள்ளதால் அதில் கிடைக்கும் வட்டியும் செக்யூர்ட் என்.சி.டி.யைவிட கூடுதலாக இருக்கும்.

என்.சி.டி.  A to Z

என்.சி.டி.யின் சிறப்பு!

என்.சி.டி.க்கு பல சிறப்பம்சங்கள் உள்ளன. மற்ற ஃபிக்ஸட் டெபாசிட் வட்டி விகித முதலீட்டைவிட வட்டி வருமானம் சற்று அதிகமாக இருக்கும். நிலையான / நிரந்தரமான வருமானம் கிடைக்கும்.  வழங்கப்படும் வட்டிக்கு வரிப் பிடித்தம் ஏதும் கிடையாது. என்.சி.டி. பங்குச் சந்தையில் பட்டியலிடுவதால் எப்போது வேண்டுமானாலும் விற்கலாம். பாண்டின் காலம் முடிவடையும் வரை வைத்திருக்க வேண்டிய அவசியமில்லை. ஆனால், என்.சி.டி.யில் முதலீடு செய்ய டீமேட் கணக்கு அவசியம் வேண்டும்.

முதலீடு செய்யும் முன் கவனிக்க..!

1. என்.சி.டி. வெளியீட்டில் பொதுவாக வட்டி அதிகமாகக் கிடைக்கும். அதிக வட்டி கிடைக்கிறதே என்கிற ஒரே காரணத்திற்காக மட்டும் நாம் ஒரு என்.சி.டி.யைத் தேர்வு செய்யக்கூடாது. என்.சி.டி. வெளியிடும் நிறுவனத்தைப் பற்றியும், அந்நிறுவனம் இதற்கு முன் வேறு ஏதாவது என்.சி.டி. வெளியிட்டுள்ளதா, அப்படி இருந்தால் தற்போது அதன் செயல்பாடு எப்படி உள்ளது என்று பார்க்க வேண்டும்.

2. என்.சி.டி. வெளியீட்டில் புட் ஆப்ஷன், கால் ஆப்ஷன் ஏதாவது உள்ளதா என்று பார்க்கவும். புட் ஆப்ஷன் என்பது நாம் முதலீடு செய்த காலத்திற்கு முன்னதாக பாண்டை சரண்டர் செய்து பணத்தைத் திரும்பப்பெற வாய்ப்பு அளிப்பது. இந்த ஆப்ஷனை முதலீட்டாளர் கள்தான் பயன்படுத்த முடியும்.

கால் ஆப்ஷன் என்பது முதலீட்டுக் காலம் முடிவடைவதற்குள் நிறுவனம் முதலீட்டாளர் களிடமிருந்து பாண்டை திரும்பப் பெற்று பணத்தைத் திருப்பித் தருவதாகும். இந்த ஆப்ஷனை நிறுவனங்கள்தான் பயன்படுத்த முடியும்.

3. அடுத்து, என்.சி.டி. வெளியிடும் நிறுவனத்தின் வாராக்கடன் (என்.பி.ஏ) எவ்வளவு உள்ளது என பார்க்கவும். என்.பி.ஏ. அதிகமுள்ள என்.சி.டி. வெளியீடுகளில் முதலீட்டைத் தவிர்க்கலாம்.

4. ஆர்.பி.ஐ. விதிப்படி, ஒரு நிறுவனம் என்.சி.டி. வெளியிடும்போது ஏதாவது ஒரு தரக் குறியீடு ஏஜென்சியிடமிருந்து தரச்சான்றிதழ் பெறவேண்டும். முதலீட்டாளர்கள் முதலீடு செய்யும்போது அந்த வெளியீடுக்கான தரக் குறியீடு என்ன என்பதைப் பார்க்க வேண்டும். 'ஏஏஏ’ சான்றிதழ் இருந்தால் முதலீட்டிற்கு அதிக பாதுகாப்பு. மைனஸ் விகிதங்கள் உள்ள வெளியீட்டில் முதலீடு வேண்டாம்!

5. இந்த என்.சி.டி.கள் பங்குச் சந்தையில் பட்டியல் இடப்படும். இதனால் நாம் எளிதாக நமது பாண்டை விற்க முடியும். ஆனால், சில நேரங்களில் நாம் முதலீடு செய்துள்ள பாண்ட்கள் மீது வர்த்தகம் குறைவாக இருந்தால் அது தள்ளுபடி விலையில் விற்க நேரிடலாம். இதையும் கவனிக்க வேண்டும்.

6. மொத்த பணத்தையும் ஒரே என்.சி.டி. வெளியீட்டில் முதலீடு செய்யக்கூடாது. இரண்டு அல்லது மூன்று என்.சி.டி. வெளியீட்டில் பிரித்து முதலீடு செய்வது நல்லது. இதன்மூலம் ரிஸ்க்கைக் குறைக்க முடியும்.

7. வட்டி குறைவாக இருந்தாலும் 'செக்யூர்ட் என்.சி.டி.’யில் முதலீடு செய்வது நல்லது. எதிர்பாராமல் நிறுவனத்தால் பணத்தைத் திரும்பத் தர இயலவில்லை எனில், நிறுவனம் ஜாமீனாக வைத்துள்ள சொத்துக்களை விற்று முதலீட்டாளர்களுக்கு முதலீட்டு தொகை திருப்பித் தரப்படும். அதனால் அசல் திரும்பக் கிடைத்துவிடும்.

8. என்.சி.டி. முதலீட்டிலிருந்து கிடைக்கும் வட்டியை வருமானமாகக் கணக்கிட்டு முதலீட்டாளர் எந்த வருமான வரி வரம்பிற்குள் வருகிறாரோ அதற்கேற்றாற்போல வருமான வரி செலுத்த வேண்டும். நிறுவனம் வட்டிக்கான வரிப் பிடித்தம் செய்யாது. அதனால் வரிக்குப் பின் என்ன வருமானம் கிடைக்கிறது என்பதையும் பார்க்க வேண்டும். (பார்க்க பெட்டிச் செய்தி!)

9. என்.சி.டி. முதலீட்டுக்கு வரிச் சலுகை கிடையாது. வங்கி 5 ஆண்டு வரிச் சேமிப்பு ஃபிக்ஸட் டெபாசிட்டில் முதலீடு செய்தால் அதற்கு 80சி-யின் கீழ் வரிச் சலுகை கிடைக்கும். வரிச் சலுகை தேவைப்படுபவர்கள் என்.சி.டிக்கு பதில் வங்கி ஃபிக்ஸட் டெபாசிட்டில் முதலீடு செய்யலாம்.

10. பாண்ட் காலம் முடிவடைவதற்குள் பாண்டை பங்குச் சந்தை மூலம் விற்றால் அதற்கு மூலதன ஆதாய வரிச் செலுத்த வேண்டும். பாண்ட் வாங்கி ஒரு வருடத்திற்குள் விற்றால் கிடைக்கும் ஆதாயத்தை ஒருவருடைய மற்ற வருமானத்துடன் சேர்த்து, எந்த வருமான வரி வரம்புக்குள் வருகிறாரோ, அதற்கேற்ற வரிச் செலுத்த வேண்டும். ஓராண்டுக்குமேல் விற்றால் பணவீக்க விகித சரிக்கட்டல் இல்லாமல் மூலதன ஆதாய வரி 10.3% பணவீக்க விகித சரிக்கட்டலுக்குப் பிறகு 20.6% வரிச் செலுத்த வேண்டும்.

என்.சி.டி. யாருக்கு?

என்.சி.டி. முதலீட்டில் நிலையான வருமானம் மற்றும் எளிதில் பணமாக்க முடிந்தாலும் அது வங்கி, அஞ்சலக முதலீட்டைவிட சற்று ரிஸ்க் கூடுதல் உள்ள முதலீடாகும். ஆகவே, சற்று ரிஸ்க் எடுக்க விரும்பும் முதலீட்டாளர்களும், தங்களது போர்ட்ஃபோலியோவை பரவலாக்க விரும்பும் முதலீட்டாளர்களுக்கும் ஏற்றது.

குறைந்த வருமான வரி வரம்புக்குள் வரும் முதலீட்டாளர்களுக்கு வங்கி எஃப்.டி- யைவிட அஞ்சலகச் சேமிப்பில் வரிக்குப் பிந்தைய நிலையில் அதிக லாபம் கிடைப்பதால் இது அவர்களுக்கு ஏற்ற முதலீடு.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு