Published:Updated:

தடதடக்கும் தங்க அடகு நிறுவனங்கள் !

தடதடக்கும் தங்க அடகு நிறுவனங்கள் !

தடதடக்கும் தங்க அடகு நிறுவனங்கள் !

தடதடக்கும் தங்க அடகு நிறுவனங்கள் !

Published:Updated:
##~##

'நாளை வெள்ளிக்கிழமை ராமநவமி என்பதால் சந்தை கிடையாது. எனவே, மதியச் சாப்பாடு உம்மோடுதான்'' என்று செல்லில் மெசேஜ் விட்டிருந்தார் ஷேர்லக். ஒரு மணிக்கு நம் அலுவலகத்துக்கு வந்தவர், ''சாப்பிட்டுக்கொண்டே பேசுவோமா?'' என்றார். ''ஓ'' என்றபடி அவரை மொட்டை மாடிக்கு அழைத்துக்கொண்டு போனோம். சாம்பார் சாதத்தை ரசித்தபடியே பேச ஆரம்பித்தார்.

''தங்கம் விலை என்னவாகும் என்பது சாதாரண மனிதர்களின் கவலையாக இருக்கிறது. ஆனால், தங்கத்தை வாங்கி, கடன் தரும் பிஸினஸ் செய்யும் சில நிறுவனங்கள் என்னவாகும் என்று கவலைப்படுகிறார்கள் முதலீட்டாளர்கள். தங்கத்துக்கு அடமானக் கடன் கொடுக்கும் முத்தூட் மற்றும் மணப்புரம் நிறுவனங்கள் இப்போது பிரச்னையில் மாட்டி இருப்பதாகச் சொல்கிறார்கள் சிலர். ஒரு கிராமுக்கு அதிகபட்சம் 2,000 ரூபாய் வரைக்கும் இந்த நிறுவனங்கள் கடன் தந்திருக்கிறதாம்.

ஒட்டுமொத்த விகடனுக்கும் ஒரே ஷார்ட்கட்!

தடதடக்கும் தங்க அடகு நிறுவனங்கள் !

ஆனால், இப்போது ஒரு கிராம் தங்கம் 2,400 ரூபாய்க்கு சரிந்துவிட்டது.  தொடர்ந்து குறையும்பட்சத்தில், கடன் பணத்தை வசூல் செய்யவேண்டிய கட்டாயம் இந்த நிறுவனங்களுக்கு ஏற்படும். கஷ்டத்தில் அடமானம் வைத்தவர்களிடம் போய் பணத்தைக் கேட்டால், அசலும் கிடைக்காமல் வட்டி கட்டுவதையும் நிறுத்திவிடுவார்கள். இன்னும் குறைந்த விலைக்கு புதுத் தங்கத்தையே வாங்கிக்கொள்ளலாம் என்று நினைப்பார்கள். கையிலிருக்கும் தங்கத்தை விற்றுத்தான் இந்த நிறுவனங்கள் கடனை சரிக்கட்ட வேண்டியிருக்கும். தவிர, பழைய நகைகளுக்கு 75 சதவிகித விலைதான் கிடைக்கும். ஆக, எப்படிப் பார்த்தாலும் இந்நிறுவனங்களுக்கு  பெரிய நஷ்டம் காத்திருக்கிறது. எனவே, இந்த நிறுவனங்களின் பங்கு விலை குறைவாக இருந்தாலும் ஏறெடுத்தும் பார்க்கவேண்டாம்.

மாறாக, தங்கத்தை விற்பனை செய்யும் டைட்டன், பி.சி.ஜுவல்லரி உள்ளிட்ட நிறுவனங் களில் விற்பனை அதிகரித்திருப்பதாக தெரிகிறது. அதனால் ஒரு சிறிய ராலி இருக்கலாம். ஆனாலும், இனி கொஞ்சம் சரிந்தாலும் அந்த நிறுவனங்களின் விற்பனை பலமாகச் சரிய வாய்ப்பு இருக்கிறது, ஜாக்கிரதை'' என்றார்  மோர் மிளகாயைக் கொஞ்சம் கடித்தபடி.

''காலாண்டு முடிவுகள் வந்தவண்ணம் இருக்கிறதே?'' என்றோம்.

''ரிலையன்ஸ் மற்றும் இன்ஃபோசிஸ் தவிர மற்ற அனைத்தும் ஓரளவுக்கு நன்றாகவே வந்திருக்கிறது. ஆனால், ரிலையன்ஸ் பங்கு இனி ஒவ்வொரு முறையும் சரியும்போது வாங்கலாம் என்பதே பெரும்பாலான அனலிஸ்ட்களின் கருத்தாக இருக்கிறது. இத்தனைக்கும் இப்போதைக்கு டெக்னிக்கலாக ஒரு சரிவு இருக்கிறது. தவிர, ரிலையன்ஸ்-ன் ரீடெய்ல் பிஸினஸ் இப்போது லாபப் பாதைக்குத் திரும்பி இருக்கிறது. இன்னும் சில விஷயங்கள் அந்தப் பங்கினை உயர்த்த வாய்ப்பு இருப்பதுபோல தெரிகிறது!'' என்றார் தண்ணீர் குடித்தபடி.

''உங்கள் வங்கியிலிருந்து இன்னும் சில தினங்களில் உங்களின் பெயர், முகவரிக்கான ஆதாரத்தை தரும்படி கேட்டால் ஆச்சரியம் வேண்டாம். ஆர்.பி.ஐ. இதை வாங்கச் சொல்லி இருக்கிறது. தனியார் வங்கிகளான ஐ.சி.ஐ.சி.ஐ., ஹெச்.டி.எஃப்.சி., ஆக்ஸிஸ் வங்கிகளில் ஏற்பட்ட கே.ஒய்.சி. குளறுபடியின் விளைவுதான் இது. போன வாரமே, இந்த விவகாரத்தில் தனியார் வங்கிகள் மீது நடவடிக்கை இருக்கும் என ஆர்.பி.ஐ. சொன்னது. ஆனால், வங்கிகள் மீது நடவடிக்கை எடுக்காமல், வங்கி வாடிக்கையாளர்கள் சுமையை ஏற்றுவது சரியா?'' என்றார் ரசத்தை ஊற்றிச் சாப்பிட்டபடி.

''ஆர்.பி.ஐ. மீட்டிங் மே 3-ம் தேதி நடக்கப் போகிறதே! வட்டியைக் குறைக்க வாய்ப் பிருக்கிறதா?'' என்று விசாரித்தோம்.

''பணவீக்க விகிதம் குறைந்திருப்பதால் பலரும் இந்த வட்டி விகிதம் குறையும் என்று எதிர்பார்க்க ஆரம்பித்திருக்கிறார்கள். 0.25 சதவிகிதமாவது வட்டி குறையும் என்கிறார்கள். பார்ப்போம், என்ன நடக்கிறதென்று!'' என்றவர், பாக்கெட்டில் இருந்த பாயசத்தை இலையில் ஊற்றி அதை அப்பளத்துடன் கலந்து சாப்பிட்டார்.  

''ஃப்யூச்சர்ஸ் அண்ட் ஆப்ஷன்ஸ் பிரிவிலிருந்து முன்னணி இன்ஃப்ரா நிறுவனமான ஐ.வி.ஆர்.சி.எல்.-ன் பங்கை என்.எஸ்.இ. நீக்கப் போகிறதாமே!'' என்று கேட்டோம்.

''இது ஜூன் 28 முதல் நடைமுறைக்கு வருகிறது. எஃப். அண்ட் ஓ.வில் ஒரு பங்கு மீது குறைந்தபட்சம் 10 லட்ச ரூபாய்க்கு வர்த்தகம் நடக்க வேண்டும். அப்போதுதான் வர்த்தகத்தில் நீடிக்க முடியும். ஐ.வி.ஆர்.சி.எல். பங்கு இதை நிறைவேற்றத் தவறியதால் நீக்கப்படுகிறது'' என்றார்.

தடதடக்கும் தங்க அடகு நிறுவனங்கள் !

''செபி அமைப்பு, பங்குகளின் டெலிவரி காலத்தைக் குறைக்கத் திட்டமிட்டுள்ளதாமே?'' என்றோம்.

''ஆமாம், சாதாரணமாக திங்கட்கிழமை பங்கு வாங்கினால், புதன்கிழமைதான் டீமேட் கணக்குக்கு பங்கு வந்துசேரும். செவ்வாய்க்கிழமையே பங்கை டெலிவரி செய்யவைப்பதன் மூலம் முதலீட்டாளர்களின் ரிஸ்க் குறைவதோடு, அவர்களின் முதலீட்டுக்கான செலவும் குறையும். மேலும், பங்குகளை டெலிவரி எடுக்க சில புரோக்கர்கள் 20% வட்டியில்  நிதி உதவி செய்கிறார்கள். தற்போது மூன்று நாட்களுக்கான வட்டி, இனி ஒரு நாளைக்கான வட்டி என்கிற நிலை உருவாகும். இப்ப புரிந்ததா?'' தயிர் சாதம் சாப்பிட்டபடி கேட்டவரிடம் ''ஜோரா'' என்றோம்.

கடந்த வாரம் ஒரு பொருளாதார பேராசிரியரிடம் சீனாவைப் பற்றி பேசிக் கொண்டிருந்தேன். அவர், ''நீங்கள் அனைவரும் சிலாகிக்கும் அளவுக்கு சீனாவைப் பற்றி சொல்வதற்கு ஒன்றும் இல்லை. அவர்கள் கொடுக்கும் தகவல்களில் பொருளாதார வல்லுநர்களுக்கு சந்தேகம் இருக்கிறது.  சீனா தன்னுடைய கரன்சியை நிலையாக வைத்துக்கொண்டு ஏற்றுமதியை ஊக்கு விக்கிறது. மேலும் சீனாவின் கடற்கரை நகரங்கள் மட்டும்தான் நமக்குத் தெரியும். ஆனால், சீனாவின் மைய பகுதியில் என்ன நடக்கிறது என்று யாருக்காவது தெரியுமா?'' என்று பொறிந்து தள்ளிவிட்டார்.  

அதேசமயம்,  லண்டனின் முக்கிய பத்திரிகையான ஃபைனான்ஷியல் டைம்ஸில் சீனாவின் மூத்த ஆடிட்டர் ஒருவர், சீனாவின் கடன் எல்லை மீறி போய்க்கொண்டிருப்பதாகவும், அமெரிக்காவின் சப் பிரைம் கிரைஸிஸைவிட பெரிய சிக்கலில் மாட்டலாம் என்றும் கருத்து தெரிவித்திருக்கிறார். சீன மார்க்கெட் சரிந்தால் அது நம் சந்தையையும் பாதிக்கும். எதற்கும் அங்கு நடப்பதை ஃபாலோ செய்வது நல்லது'' என்று சொல்லிவிட்டு, கை கழுவச் சென்றார்.

சாப்பிட்டு முடித்தவரிடம், ''இந்த வாரம் ஷேர் டிப்ஸ் உண்டா?'' என்று கேட்டோம். ''சந்தை இன்னும் நிலையான வர்த்தகத்துக்குள் வரவில்லை! தவிர, எஃப். அண்ட் ஓ எக்ஸ்பைரி வேறு வருகிறது! இந்த வாரம் வேண்டாமே!'' என்றார் கெஞ்சலாக. அவர் சொன்னால் சரியாகத்தானே இருக்கும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism