Published:Updated:

50 ஏக்கரில்... உலக மஞ்சள் மார்க்கெட்!

நேரடி ரவுண்டுஅப் செ.கார்த்திகேயன், படங்கள்: க.தனசேகரன்.

50 ஏக்கரில்... உலக மஞ்சள் மார்க்கெட்!

நேரடி ரவுண்டுஅப் செ.கார்த்திகேயன், படங்கள்: க.தனசேகரன்.

Published:Updated:

ஸ்பாட் விசிட்

##~##

மஞ்சள் மங்களகரமான பொருள். 'ஏழைகளின் குங்குமப்பூ’ என்றும் இதனை அழைப்பார்கள். மருத்துவச் சிறப்பு மிக்க மஞ்சளை உற்பத்தி செய்வதில் இந்தியா முன்னணி நாடாகத் திகழ்கிறது. உலக மஞ்சள் உற்பத்தியில் 80 சதவிகிதத்திற்கு மேல் இந்தியாவின் பங்களிப்புதான். அதிலும், தமிழகம்தான் மஞ்சள் உற்பத்தியில் உலகின் நம்பர் ஒன். தமிழகம் தவிர, ஆந்திரா, கர்நாடகா, மஹாராஷ்ட்ரா, ஒடிஷா, மேற்கு வங்காளம் ஆகிய மாநிலங்களிலும் மஞ்சள் விளைவிக்கப்படுகிறது.

ஒட்டுமொத்த விகடனுக்கும் ஒரே ஷார்ட்கட்!

தமிழ்நாட்டின் 'மஞ்சள் நகரம்’ என்று அழைக்கப்படுகிறது ஈரோடு.  அதைச் சுற்றியுள்ள கோயம்புத்தூர், சேலம், தர்மபுரி, கொடுமுடி, கோபிசெட்டிபாளையம், சத்தியமங்கலம், அந்தியூர், பவானி மற்றும் தாளவாடி போன்ற இடங்களில்தான் மஞ்சள் அதிகம் உற்பத்தியாகிறது.  இதனால், ஈரோடு மாவட்டத்தில்தான் உலகளாவிய மஞ்சள் கமாடிட்டி சந்தை இயங்கி வருகிறது. இந்த மஞ்சள் மார்க்கெட்டில், மஞ்சள் எப்படி ஏலம் விடப்படுகிறது? மஞ்சள் விலையை யார் நிர்ணயிக்கிறார்கள்? எந்தமாதிரியான ஏலமுறை இந்த மார்க்கெட்டில் பின்பற்றப்படுகிறது? மஞ்சள் மார்க்கெட் சார்ந்த மற்ற விவரங்கள் என்ன என்பதைத் தெரிந்துகொள்ளும் ஆர்வத்துடன் அங்கு சென்றோம்.  

நான்கு மார்க்கெட்கள் !

செம்மாபாளையத்தில் உள்ள ஒருங்கிணைந்த மஞ்சள் வளாகத்தில் (ஈரோடு மஞ்சள் வணிகர்கள் மற்றும் கிடங்கு உரிமையாளர்கள் சங்கம்) காலையில் ஒன்பது மணிக்கெல்லாம் கூட்டம் அலைமோதத் தொடங்கிவிடுகிறது. மார்க்கெட் ஆரம்பிக்க ஒருமணி நேரத்திற்கு முன்னரே விவசாயிகள், வியாபாரிகள், கிடங்கு உரிமையாளர்கள் என பலரும் மஞ்சள் ஏலமிடும் வளாகத்தில் பரபரப்பாக இயங்க ஆரம்பித்துவிடுகிறார்கள். தினந்தோறும் தொடங்கும் முதல் சந்தை இது என்பதால்தான் இந்த பரபரப்பு. இங்கு சந்தை முடிந்த பின்னரே அடுத்தடுத்து சுண்ணாம்பு ஓடையில் இருக்கும் ஈரோடு அரசு ஒழுங்குமுறை விற்பனைக் கூடம், ஈரோடு கூட்டுறவு விற்பனை சங்கம் மற்றும் கோபி கூட்டுறவு விற்பனை சங்க மார்க்கெட்டில் ஏலம் நடக்கும்.

50 ஏக்கரில்... உலக மஞ்சள் மார்க்கெட்!

அனைத்து சந்தைகளும் அன்றைய மஞ்சள் வரத்தைப் பொறுத்தே முடிகிறது. சந்தைக்கு மஞ்சள் வரத்து குறைவாக இருக்கும்போது சீக்கிரமாகவும், அதிக வரத்து இருக்கும்போது சிறிது நேரம் கழித்தும் சந்தை முடிகிறது.

மஞ்சள் வளாகம் !

சந்தை பரபரப்பு ஓய்ந்ததும், ஈரோடு மஞ்சள் வணிகர்கள் மற்றும் கிடங்கு உரிமையாளர்கள் சங்கத்தின் தலைவர் கே.வி.ரவிசங்கரிடம் பேசினோம்.

''புது மஞ்சள் வரத்து சந்தைக்கு பிப்ரவரி முதல் மே வரை அதிகம் வரும். ஒரு நாளைக்கு சுமார் 15,000 பைகள் முதல் 20,000 பைகள் (விவசாயிகள் சந்தைக்கு கொண்டுவரும் பை என்பது 85 கிலோ) வரை வரத்து இருக் கும். ஆனால், இந்த வருடம் வரத்து நிலவரம் குறைவாகவே இருக்கிறது.  

விவசாயிகள்  உற்பத்தி செய்யும் மஞ்சளை குறைந்தபட்சம் ஒரு வருடம் பாதுகாத்து வைக்கலாம். அதிகபட்சம் பாதுகாத்து வைத்திருப்பது அவரவரின் விற்பனைத் திறமை, மார்க்கெட் நிலவரத்தைப் பொறுத்தது.  

50 ஏக்கரில்... உலக மஞ்சள் மார்க்கெட்!

தற்போது இருக்கும் மஞ்சள் வளாகத்தின் மொத்த பரப்பளவு ஐம்பது ஏக்கர்.  சந்தை வளாகத்திற்கு உள்ளேயே தற்போது 80 குடோன்கள் (மண்டிகள்) இருக்கின்றன. இதன் சராசரி கொள்ளளவு  எட்டு லட்சம் பைகள் (ஒரு பை என்பது 65 கிலோ). மொத்தம் 194 குடோன்கள் கட்டும் அளவிற்கு மஞ்சள் வளாகத்திற்குள் போதுமான அளவு இடவசதி இருக்கிறது. இன்னும் ஏராளமான குடோன்கள் கட்டப்பட்டு வருகின்றன. முழுமையாக அனைத்து குடோன்களும் கட்டப்பட்டுவிட்டால் மொத்த குடோன்களின் கொள்ளவு 13 லட்சம் பைகள். இவை அனைத்தும் விவசாயிகளின் நலனுக்காகச் செய்து தரப்பட்டிருக்கிறது.

மழைப் பொழிவு, மார்க்கெட் சென்டிமென்ட் என்கிற வழக்கமான காரணங்கள்போக, திருமணம், பொங்கல், தீபாவளி உள்ளிட்ட பண்டிகைகள் அவற்றை ஒட்டிய தேவைகள், விளைநிலத்தின் அளவில் மாற்றங்கள் ஆகியவை விலைமாற்ற காரணிகளாக அமைகின்றன.  

ஈரோட்டிலிருந்து 60% !

மஞ்சள் சந்தைக்கு ஈரோடு மாவட்டத்தில் இருந்து, சுமார் 60 சதவிகித மஞ்சளும், கர்நாடகா, திருவண்ணாமலை, சேலம், தர்மபுரி, வேலூர் போன்ற பகுதிகளில் இருந்து, சுமார் 40 சதவிகித மஞ்சளும் கொண்டு வரப்படுகிறது. ஈரோடு மாவட்டத்தில் மைசூர் சம்பா, 8-ம் நம்பர், 10-ம் நம்பர், பி.எஸ்.ஆர். உள்ளிட்ட ரகங்கள், அதிகளவில் பயிரிடப்படுகின்றன. எட்டாம் நம்பர் மஞ்சள் டிசம்பர் மாதத்தில் அறுவடை பணி துவங்கி, ஜனவரி மாதத்தில் சந்தைக்கு கொண்டு வரப்படும்.

50 ஏக்கரில்... உலக மஞ்சள் மார்க்கெட்!

கர்நாடகா, சேலம், ஆத்தூர், தர்மபுரி, கிருஷ்ணகிரி, ஓசூர், திருவண்ணாமலை, வேலூர் பகுதிகளில் இருந்து வழக்கமாக பிப்ரவரி, 15-ம் தேதிக்கு மேல் புதிய மஞ்சள் வரத்தாகும். அதற்கு பின் புதிய மஞ்சள் வரத்து அதிகரிக்கும். மைசூர் சம்பா, 10-ம் நம்பர் ஆகிய ரகங்கள் பிப்ரவரி, மார்ச் மாதங்களில் அறுவடைக்கு வரும். கடந்த, 2001-2012-ம் ஆண்டு காலஅளவில் ஒரு குவிண்டால் மஞ்சளின் அதிகபட்ச விலை 18,000 ரூபாய்; குறைந்தபட்ச விலை 1,500 ரூபாய்.

ஈரோடு சுற்றுவட்டாரத்தையும் சேர்த்து சுமார் 70,000 ஏக்கர் நிலத்தில் மஞ்சள் சாகுபடி செய்யப்படுகிறது. இந்த வருடம் மழை இல்லாததால் சாகுபடி பரப்பு கணிசமாக குறைந்து காணப்படுகிறது. சென்ற வருடம் இதே காலகட்டத்தில் உற்பத்தி செய்த மஞ்சளின் அளவு 50 லட்சம் மூட்டைகள் (ஒரு மூட்டை என்பது 85 கிலோ). ஆனால், இந்த வருடம் மழை இல்லாததால் உற்பத்தியாகி இருக்கும் மஞ்சளின் அளவு 15 லட்சம் மூட்டைகள் மட்டுமே!

மார்க்கெட் சிஸ்டம் !

குளோஸ்டு டென்டர் சிஸ்டம் முறையைப் பின்பற்றிதான் சந்தையில் மஞ்சள் ஏலம் விடப்படுகிறது. அதாவது, விவசாயிகள் அவர்களின் சேம்பிள் மஞ்சளை ஏலம் விடப்படும் வளாகத்திற்குள் வியாபாரிகளின் பார்வைக்கு வைத்துவிடுவார்கள். வியாபாரிகள், விவசாயிகளின் மஞ்சளைப் பார்த்து அதன் தரத்திற்கு தகுந்தாற்போல விலையை கமிட்டியினரால்  தரப்பட்டுள்ள படிவத்தில் (டென்டர் ஃபார்ம்) எழுதி சமர்ப்பித்துவிடுவார்கள். ஒரு நாளைக்கு வரத்தைப் பொறுத்து விவசாயி களின் எண்ணிக்கையும், வியாபாரிகளின் எண்ணிக்கையும் அமையும். வியாபாரிகள் எழுதி சமர்ப்பித்த விலையை விவசாயிகளுக்குத் தெரியப்படுத்தி ஏலம் விடப்படும். ஏலம் விடப்படும் விலை திருப்தியாக இருந்தால் விவசாயிகளுக்கும், வியாபாரிகளுக்கும் இடையே கான்ட்ராக்ட் புக் செய்யப்பட்டு விற்பனை சுமுகமாக நடைபெறும்.

50 ஏக்கரில்... உலக மஞ்சள் மார்க்கெட்!

மஞ்சள் விலையை நிர்ணயம் செய்வது வியாபாரியோ, விவசாயியோ அல்ல; டிமாண்டும் சப்ளையும்தான். விவசாயிகள் மஞ்சளை சந்தைக்குக் கொண்டுவரும்முன் அதை சுத்தப்படுத்தி கொண்டுவருவது நல்லது. இதனால்

மஞ்சள் நல்ல விலைக்குப் போகும். வாங்க வந்திருப்பவர்களுக்கும் மஞ்சளை தேர்வு செய்ய சிரமம் இருக்காது!'' என்றார் கே.ரவிசங்கர்.

கிழங்கும் விரலியும் !

பொதுவாக, மஞ்சளை அதன் அளவு, நிறம், வத்தல் போன்ற குணநலன்களை வைத்துதான் தரம் பிரிப்பார்கள். ஒரு மஞ்சள் செடியில் கிழங்கு, விரலி என்ற இரண்டு வகையான மஞ்சள்களும் சேர்ந்தே பயிராகும். அதை தனியாகப் பிரித்தெடுத்து விற்பனைக்கு கொண்டுவருவார்கள். ஒரு ஏக்கர் நிலத்திற்கு 3:1 என்கிற விகிதத்தில்தான் (கிழங்கு ஒரு பங்கு, விரலி மூன்று பங்கு) விரலி மற்றும் கிழங்கு மஞ்சள் கிடைக்கும். இதில், ஈரோடு விரலி மஞ்சள் பிரபலமான வகை. கிழங்கு மஞ்சளைவிட விரலி மஞ்சள் அதிக விலைக்கு ஏலம் போகும்.

மஞ்சளில் குர்க்குமின் !

மஞ்சளில் குர்க்குமின்(Curcumin)எனும் வேதிப்பொருள் உண்டு. இது மஞ்சளுக்கு நிறத்தைத் தருவதுடன், மஞ்சளால் அடையக்கூடிய பல்வேறுபட்ட பயன்களைத் தரும் பொருளாக உள்ளது. இந்த உட்பொருள் மூளைக்கு அமிலத்தன்மை பரவாமல் தடுக்கிறது. ஞாபக சக்தியை அதிகரிக்கும். ஒவ்வொரு வகையான மஞ்சளிலும் வெவ்வேறு அளவில் குர்க்குமின் இருக்கிறது. இந்த குர்க்குமின்தான் மஞ்சளுக்கு சுவையையும் தருகிறது.

ஈரோடு மஞ்சள் மார்க்கெட்டில் வர்த்தகம் மற்றும் கிடங்கு உரிமையாளராக இருக்கும் எஸ்.சுப்ரமணியனைச் சந்தித்தோம். ''இந்த மஞ்சள் வளாகத்திற்கு சீஸன் நேரங்களில் நாள் ஒன்றுக்கு குறைந்தபட்சம் 15,000 பைகள் வரும். நல்ல நல்ல ரகங்களைச் சேர்ந்த புது வரத்து மஞ்சள்கள் சீஸன் நேரங்களில் கிடைக்கும். இன்றையச் சூழ்நிலையைப் பொறுத்தவரை, மற்ற மஞ்சள் மார்க்கெட் விலை நிலவரத்தைவிட ஈரோடு மஞ்சள் மார்க்கெட்டின் விலை கூடுதலாக விற்பனையாகி வருகிறது. அதனால் வட இந்தியாவில் இருந்தும், ஆந்திர மாநிலத்தில் இருந்தும் அதிகமாக வரத்து வர ஆரம்பித்துள்ளன. எனினும், மஞ்சள் கெட்டுபோகாதபடி பாதுகாப்பாக வைத்திருக்க குளிர்பாதுகாப்புக் கிடங்கை அரசாங்கம் அமைத்துத் தந்தால் அனைவருக்கும் உதவியாக இருக்கும்.

50 ஏக்கரில்... உலக மஞ்சள் மார்க்கெட்!

மஞ்சள் வாங்கும் அளவில் எந்தவொரு நிபந்தனையும் கிடையாது என்பதால், அவரவர்  நிதி வசதிக்கேற்ப வர்த்தகம் செய்யலாம். ஜனவரி முதல் மே வரை அதிகமான சப்ளை கிடைக்கும்.'' என்றார்.

கிடங்கு உரிமையாளர் எல்.கிருஷ்ணனுடன் பேசினோம். ''நான் 26 வருடங்களாக ஈரோடு அக்ரஹார வீதியில் கிடங்கு வைத்திருக்கிறேன். 2,000 சதுர அடி கொண்ட கிடங்கின் மூட்டை கொள்ளளவு 1,000 முதல் 1,500 மூட்டைகள் (ஒரு மூட்டை என்பது 65 கிலோ). பல நாட்களாக குடோன்களில் இருப்பு வைத்திருக்கும் மஞ்சளை எடுத்து விவசாயிகள், வர்த்தகர்கள் விற்பனை செய்யும்போது மொத்த விற்பனையில் 2-3% சேவை கட்டணமாக வசூலிக்கப்படுகிறது'' என்றார்.

மஞ்சள் வளாகம் குறித்து விவசாயிகள் திருப்தியாக இருக்கிறார்களா என்பதைத் தெரிந்துகொள்ள, மஞ்சள் உற்பத்தி செய்யும் விவசாயி என்.சுப்ரமணியைச் சந்தித்தோம்.

''எனக்கு இருக்கும் நான்கு ஏக்கர் நிலத்தில் 25 வருடங்களாக விவசாயம் செய்து வருகிறேன். சென்ற ஆண்டு மழை இருந்ததால் மஞ்சள் பயிர் சாகுபடி நன்றாக இருந்தது. இந்த வருடம் மழை பொய்த்ததின் காரணமாக மஞ்சள் பயிர் சாகுபடி குறைந்துள்ளது. சென்ற வருடம் இருப்பு வைத்திருந்த மஞ்சளை இன்றைக்கு விற்பனைக்கு கொண்டுவந்திருக்கிறேன். இந்த மார்க்கெட்டில் நன்றாக விற்பனை செய்ய முடிகிறது. மஞ்சளை பாதுகாத்து இருப்பு வைக்க வசதியாக குடோன்கள் மஞ்சள் வளாகத்தில் அமைந்திருப்பது விவசாயிகளுக்கு சாதமான விஷயம். அரசு, மஞ்சள் பயிர் செய்ய தேவையான உரங்களுக்கு மானியம் வழங்கவேண்டும். மின்சாரம் மற்றும் தண்ணீர் பிரச்னைக்கு விரைவில் தீர்வு காணவேண்டும்'' என்று முடித்தார்.

50 ஏக்கரில்... உலக மஞ்சள் மார்க்கெட்!

கர்நாடகா ஹெச்.டி.கோட்டையில் இருந்து மஞ்சளை விற்பனைக்கு கொண்டுவந்திருந்த விவசாயி கே.எஸ்.விஜேந்திராவையும் கேட்டோம். ''இந்த மஞ்சள் வளாகம் சிட்டியில் இருந்து வெளியில் அமைந்திருப்பதால் போக்குவரத்து வசதி சிறப்பானதாக இருக்கிறது. கர்நாடகாவில் இருந்து கொண்டுவரும் மஞ்சளை விற்பனை செய்யும்போது விலை கட்டுபடியாகவில்லை என்றால், அதை இங்கேயே இருப்பு வைக்கும் வசதி இருக்கிறது. இது எங்களைப் போன்ற வெளிமாநில விவசாயிகளுக்கு சாதகமான விஷயம்'' என்றார்.

டிஜிட்டல் போர்டு வசதி !

சுண்ணாம்பு ஓடையில் இருக்கும் ஈரோடு அரசு ஒழுங்குமுறை விற்பனை கூடத்தின் மேற்பார்வையாளர் கே.கிருஷ்ணசாமியைச் சந்தித்தோம்.  

''சுமார் 50 வருடங்களாக இந்த ஈரோடு அரசு விற்பனை கூடம் இயங்கி வருகிறது. இன்றுவரை வாடகை கட்டடத்தில் இயங்கி வரும் இந்த விற்பனை கூடம், பெருந்துறையில் 10 ஏக்கர் நிலத்தில் அமைவதற்கான நடவடிக்கை எடுக்கப்பட்டு வருகிறது. இந்த கமாடிட்டி சந்தையில் தினசரி 2,000 - 3,000 மூட்டைகள் பரிவர்த்தனை செய்யப்படுகின்றன. இருப்பு வைப்பதற்கான வசதி வாய்ப்புகள் இல்லை. தினசரி சந்தைக்கு வரும் மஞ்சள் மூட்டையை அன்றைக்கே விற்பனை செய்தால்தான் அடுத்த நாட்களுக்கான பரிவர்த்தனை நடத்த முடியும்.

50 ஏக்கரில்... உலக மஞ்சள் மார்க்கெட்!

இங்கு வர்த்தகம் செய்யும் விவசாயிகளுக்கு எந்த கட்டணமும் கிடையாது. மூட்டையை ஏற்ற, இறக்க தரும் கூலிதான் செலவு.  விவசாயிகளின் வசதிக்காக சமீபத்தில் சந்தை கட்டடத்திற்கு முன்பாக டிஜிட்டல் போர்டு வைத்து ஏல விலையை உடனுக்குடன் டிஜிட்டல் போர்டில் காண்பிக்கப்படுகிறது. விரைவில் ஆன்லைன் மூலம் உடனுக்குடன் விவசாயிகள் தெரிந்துகொள்ள நடவடிக்கைகள் எடுத்து வருகிறோம்'' என்றார்.

மஞ்சளுக்கு ஈரோட்டில் ஐம்பது ஏக்கர் பரப்பளவில் சந்தை அமைந்திருப்பது தமிழகத்திற்கு நிச்சயம் பெருமைதான்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism