Published:Updated:

க்ளைம் செய்யாத டிவிடெண்ட்... திரும்பப் பெறலாம் !

- இரா.ரூபாவதி. படம்: சொ.பாலசுப்ரமணியன்.

க்ளைம் செய்யாத டிவிடெண்ட்... திரும்பப் பெறலாம் !

- இரா.ரூபாவதி. படம்: சொ.பாலசுப்ரமணியன்.

Published:Updated:
##~##

பங்குச் சந்தையில் பட்டியலிடப்பட்ட நிறுவனங்கள் வழங்கிய டிவிடெண்டை க்ளைம் செய்யாமல் இருக்கும் தொகை மட்டுமே 1,101 கோடி ரூபாய் என்கிற தகவலை அண்மையில் மத்திய அரசு வெளியிட்டது. கிட்டத்தட்ட 1,405 கம்பெனிகளில் இத்தனை கோடி ரூபாய் க்ளைம் செய்யப்படாமல் இன்னும் கிடக்கிறது. பல ஆண்டுகாலமாக வாங்காமல்விட்ட இந்த டிவிடெண்ட் கொஞ்சம் முயற்சி செய்தால் திரும்பப் பெறமுடியும் என்கிற விவரம் பலருக்கும் தெரிவதில்லை. இந்த டிவிடெண்ட் தொகையை எப்படி திரும்பப் பெறலாம் என்பது குறித்து நிதி ஆலோசகர் விவேக் கார்வாவிடம் கேட்டோம். விளக்கமாக எடுத்துச் சொன்னார் அவர்.  

''லாபத்தில் இயங்கும் நிறுவனங்கள் தொடர்ந்து முதலீட்டாளர்களுக்கு டிவிடெண்ட் தரும். இப்படி தரும் பணத்தை முதலீட்டாளர்கள் க்ளைம் செய்யாமல் விடுவதற்கு பல காரணங்கள் உண்டு. ஒரு நிறுவனம்  டிவிடெண்ட் அறிவித்தவுடன்  முதலீட்டாளர்களின்  முகவரிக்கு காசோலையாக அனுப்பும். அல்லது,  வங்கிக் கணக்கில் டிவிடெண்ட் தொகையை வரவு வைக்கும். சிலர் வங்கிக் கணக்கை சரியாக பராமரிக்காத காரணத்தினால், அந்தக் கணக்கு செயல்படாமல் முடங்கிப் போய் விடுகிறது. இதனால் டிவிடெண்ட் பணம் முதலீட்டாளருக்கு கிடைக்காமல், மீண்டும் நிறுவனத்திற்கே சென்றுவிடுகிறது.

ஒட்டுமொத்த விகடனுக்கும் ஒரே ஷார்ட்கட்!

வேறு சிலர், தற்செயலாக பங்குகளில் முதலீடு செய்திருப்பார்கள். அப்போது, அடிக்கடி பயன்படுத்தாத ஏதோ ஒரு வங்கிக் கணக்கை தந்து, அதை கவனிக்காமலே விட்டிருப்பார்கள். இன்னும் சிலர், ஏற்கெனவே வைத்திருந்த வங்கிக் கணக்கை ரத்து செய்துவிட்டு, புதிய வங்கிக் கணக்கு தொடங்கிய விவரத்தை டீமேட் கணக்கை நிர்வகிக்கும் என்.எஸ்.டி.எல். மற்றும் சி.டி.எஸ்.எல். நிறுவனங்களுக்கு தெரிவிக்காமல் விட்டிருப்பார்கள். இதனால் நிறுவனம் தரும் டிவிடெண்ட் முதலீட்டாளர்களுக்கு கிடைக்காமலே போகிறது.  

க்ளைம் செய்யாத டிவிடெண்ட்... திரும்பப் பெறலாம் !

சிலர், பல நிறுவனப் பங்குகளை ஒன்றிரண்டு வாங்கி வைத்திருப்பார்கள். டிவிடெண்ட் தொகை ஒரு ரூபாய், பத்து ரூபாய் என குறைந்தபட்ச தொகை யாக இருக்கும்போது அதை அவர்கள் பெரும்பாலும் க்ளைம் செய்வதில்லை.

இதெல்லாம் டீமேட் வசதி வந்தபிறகு நடக்கும் சமாசாரங்கள். டீமேட் வருவதற்கு முன்பு இருந்த நடைமுறை வேறு மாதிரியானவை. அப்போது காகித வடிவில் பங்கு வாங்கியவர்கள், அதை டீமேட் வடிவில் மாற்றவில்லை என்றால் அவர்களுக்கு நேரடியாக டிவிடெண்ட் தொகை காசோலையாக அனுப்பப்படும். இந்த டிவிடெண்ட் தொகையையும் சிலர் க்ளைம் செய்யாமலே விட்டுவிடுகின்றனர்.

க்ளைம் செய்யாத டிவிடெண்ட்... திரும்பப் பெறலாம் !

இப்படி பல லட்சம் முதலீட்டாளர்கள் க்ளைம் செய்யாத லட்சக்கணக்கான ரூபாய், இன்று ஆயிரக்கணக்கான கோடியாக மாறியுள்ளது'' என்றவர், டிவிடெண்ட் வழங்கும் நடைமுறை பற்றி விளக்கினார்.

''டிவிடெண்ட் அறிவிக்கப்பட்டவுடன் நிறுவனம், அனைத்து முதலீட்டாளர்களுக்கும் அந்தப் பணத்தை காசோலையாக அல்லது வங்கிக் கணக்கிற்கு அனுப்பும். இப்படி அனுப்பும்போது சில காரணங்களால் அந்தப் பணம் திரும்பவும் நிறுவனத்திற்கு சென்றுவிடுகிறது. ஒரு நிறுவனம் டிவிடெண்ட் அறிவித்த ஏழு நாட்களுக்குள் முதலீட்டாளர்களுக்கு, அந்த டிவிடெண்ட் தொகையைத் தந்துவிடவேண்டும். ஏதோ ஒரு காரணத்தினால் நிறுவனத்திற்கே திரும்பவரும் டிவிடெண்ட் தொகையை அடுத்த முப்பது நாட்களுக்குள் 'அந்த வருடத்துக்கான க்ளைம் செய்யாத டிவிடெண்ட் தொகை’ என தனியாக ஒரு வங்கிக் கணக்கு ஆரம்பித்து, அதில் டெபாசிட் செய்யவேண்டும். இந்தத் தொகை ஏழு ஆண்டுகள் வரை அந்தக் கணக்கில் இருக்கும். அதன்பிறகு மத்திய அரசின் கட்டுப்பாட்டின் கீழ் இயங்கும் ஐ.இ.பி.எஃப். (Investor Education Protection Fund) என்ற அமைப் பிற்கு சென்றுவிடும். இந்தப் பணம் பங்குச் சந்தை பற்றி முதலீட்டாளர்களிடம் விழிப்பு உணர்வு மற்றும் பாதுகாப்பு ஏற்படுத்துவதற்கு பயன்படுத்தப்படும்'' என்றவர், க்ளைம் செய்யத் தவறிய டிவிடெண்ட் பணத்தை முதலீட்டாளர்கள் எப்படி திரும்பப் பெறலாம் என்பதற்கான வழிகளையும் சொன்னார்.

''டிவிடெண்ட் வழங்கிய நிறுவனம், முதலீட்டாளர்களுக்குப் போய் சேராத டிவிடெண்ட் தொகையை  ஐ.இ.பி.எஃப். கணக்கிற்கு மாற்றுவதற்கு முன், டிவிடெண்ட் க்ளைம் செய்யாத முதலீட்டாளர்களுக்கு மீண்டும் ஒரு கடிதத்தை அனுப்பும். இதில் எந்த வருடத்துக்கான டிவிடெண்ட் க்ளைம் செய்யவில்லை, க்ளைம் செய்யாத தொகை எவ்வளவு என்பது குறிப்பிடப்பட்டு இருக்கும். இந்தக் கடிதம் அனுப்பிய 15 நாட்களுக்குப் பிறகும் டிவிடெண்ட் தொகையை ஒரு முதலீட்டாளர் க்ளைம் செய்யவில்லை என்றால் அது ஐ.இ.பி.எஃப். கணக்கிற்கு மாற்றப்படும்.  

க்ளைம் செய்யாத டிவிடெண்ட்... திரும்பப் பெறலாம் !

இப்படி க்ளைம் செய்யப்படாத டிவிடெண்ட் தொகை யாருடையது, எவ்வளவு தொகை க்ளைம் செய்யாமல் உள்ளது, அது எந்த ஆண்டுக்கான டிவிடெண்ட் போன்ற தகவல்களை அந்த நிறுவனத்தின் இணையதளத்திலும், ஐ.இ.பி.எஃப். இணையதளத்திலும் வெளியிடவேண்டும் என மத்திய அரசு அறிவித்துள்ளது. இதன்படி ஒவ்வொரு நிறுவனத்தின் இணையதளத்திலும் இந்தத் தகவல்கள் உள்ளன.

நிறுவனத்தின் இணையதளத்திலும் டிவிடெண்டை க்ளைம் செய்வது எப்படி என்பது குறித்த தகவல்களும் அதற்கான விண்ணப்பமும் இருக்கும். இதனை டவுண்லோடு செய்து, அந்த விண்ணப்பத்தைப் பூர்த்தி செய்து, விண்ணப்பத்தில் குறிப்பிடப்பட்டு இருக்கும் முகவரிக்கு அனுப்பி டிவிடெண்ட் தொகையை க்ளைம் செய்யலாம். அதில் உங்களின் டிவிடெண்ட் தொகை, ஃபோலியோ எண், எந்த வருடத்திற்கான டிவிடெண்ட், டிவிடெண்ட் வாரன்ட் எண் ஆகியவற்றைக் கொடுக்கவேண்டும்.

அப்படி செய்யும்போது, 'நீங்கள் டிவிடெண்ட் க்ளைம் செய்தபிறகு, வேறு யாராவது அதற்கு உரிமை கொண்டாடினால், அதனால் நிறுவனத்திற்கு ஏற்படும் நஷ்டஈட்டை நான் தருகிறேன்’ என்று உறுதி அளிக்கவேண்டும். இதற்கான பத்திரத்தில் இதை எழுதிக் கொடுக்க வேண்டி இருக்கும். உங்களின் டிவிடெண்ட் தொகை குறிப்பிட்ட அளவிற்கு மேலே போகும் போதுதான் இந்தப் பத்திரத்தைக் கேட்பார்கள்.   இந்தத் தொகையானது நிறுவனத்திற்கு நிறுவனம் மாறுபடும்'' என்றார்.

டிவிடெண்ட் என்பது உங்கள் முதலீட்டுக்கான வருமானம் என்பதால் கவனத்தோடு இனிமேலாவது டிவிடெண்டை சரியாக க்ளைம் செய்யுங்கள்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism