Published:Updated:

ஏற்றத்தில் இன்ஃபோசிஸ்... இனியும் தொடருமா?

- சி.சரவணன்.

ஏற்றத்தில் இன்ஃபோசிஸ்... இனியும் தொடருமா?

- சி.சரவணன்.

Published:Updated:
##~##

இந்திய பங்குச் சந்தையைப் பொறுத்தவரை, இன்ஃபோசிஸ் நிறுவனத்தின் காலாண்டு முடிவுகள் எப்போதும் பரபரப்புக்கு உள்ளாகும். கடந்த வாரம் வெளியான ஜூன் காலாண்டு முடிவும் பரபரப்புக்கு உள்ளானது.

பெங்களூருவைச் சேர்ந்த முன்னணி ஐ.டி. நிறுவனமான இன்ஃபோசிஸ், ஜூன் காலாண்டின் அடிப்படையில்

ஒட்டுமொத்த விகடனுக்கும் ஒரே ஷார்ட்கட்!

4.1 சதவிகிதமும், கரன்சியின் அடிப்படையில் 2.7 சதவிகிதமும் வளர்ச்சி கண்டுள்ளது. இது பரவலான எதிர்பார்ப்பைவிட அதிகம் என்பதால், பங்குச் சந்தை இதை வெகுவாக வரவேற்றுள்ளது. இதனால் பங்குச் சந்தை உயர்ந்துள்ள நிலையில் இந்நிறுவனப் பங்கின் விலையும் கிட்டத்தட்ட 10.9% உயர்ந்துள்ளது. மேலும், வரும் காலாண்டுக்கான கைடன்ஸையும் உயர்த்தி உள்ளது. இன்ஃபோசிஸின் இந்த மேம்பாட்டுக்கு என்.ஆர்.நாராயணமூர்த்திதான் காரணம் என்ற பேச்சு அடிபடுகிறது.

இன்ஃபோசிஸின் வளர்ச்சிப் பாதை மாறியது பற்றி கோட்டக் செக்யூரிட்டீஸ் நிறுவனத்தின் தலைவர் (பிரைவேட் கிளையன்ட் குரூப் ரிசர்ச்) திபென் ஷாவிடம் கருத்துக் கேட்டோம். ''இரு மாதங்களுக்கு முன்புதான் என்.ஆர்.நாராயணமூர்த்தி இன்ஃபோசிஸ் நிறுவனத்தின் நிர்வாக சேர்மனாக இணைந்துள்ளார். அவர் தலைமையில் பணியாளர்கள் மேலும் சிறப்பாக பணிபுரிவார்கள் என எதிர்பார்க்கிறோம். இதனால், நிறுவனத்தின் உற்பத்தித் திறன் மேம்பட்டு வருமானம் மற்றும் லாப விகிதம் அடுத்த காலாண்டுகளில் அதிகரிக்கும் என எதிர்பார்க்கிறோம்'' என்றார்.  

ஏற்றத்தில் இன்ஃபோசிஸ்... இனியும் தொடருமா?

நாராயணமூர்த்தி ஒரு டார்கெட்டை நிர்ணயம் செய்யும் போதே,  அதனை எப்போது நிறைவேற்றி முடிக்க வேண்டும் என்பதையும் முடிவு செய்து அதனை நிறைவேற்ற தீவிர நடவடிக்கை எடுப்பார் என இன்ஃபோசிஸ் இணை நிறுவனர் மற்றும் தேசிய அடையாள அட்டை திட்டத்தின் தலைவருமான நந்தன் நிலகேனி ஒருமுறை குறிப்பிட்டுள்ளார். அது, இன்ஃபோசிஸ் நிறுவனத்தில் மீண்டும் நடக்கும் என்பது பலரின் எதிர்பார்ப்பாக இருக்கிறது.

ஏற்றத்தில் இன்ஃபோசிஸ்... இனியும் தொடருமா?

இன்ஃபோசிஸ் வட்டாரத்தில் நாராயணமூர்த்தி பற்றி விசாரித்தபோது, அவர் மேனேஜர்களிடம் கலந்து ஆலோசிப்பது மற்றும் ஆலோசனை வழங்குவதில் பிஸியாக இருப்பதாகத் தகவல். இதன் விளைவு அடுத்த காலாண்டில் இன்னும் பெரிதாக வெளிப்படும் என்கிறார்கள். மேலும், நாராயணமூர்த்தி பதவி ஏற்றவுடன் சம்பளத்தை உயர்த்தினார். இதனால் இன்ஃபோசிஸிலிருந்து வேலையைவிட்டு செல்பவர்களின் எண்ணிக்கை கணிசமாக குறையும் என எதிர்பார்க்கப்படுகிறது. இதனால் இந்நிறுவனத்தின் லாபம் நிலையாக அதிகரிக்கும் என மதிப்பிடப்பட்டுள்ளது.  

ஆனால், இப்போது வந்திருக்கிற மாதிரி அடுத்த காலாண்டிலும் முடிவுகள் வருமா என்கிற சந்தேகத்தை எழுப்பினார் ஏஞ்சல் புரோக்கிங்-ன் ரிசர்ச் அனலிஸ்ட் (ஐ.டி. மற்றும் டெலிகாம்) அன்கிடா சோமானி.

ஏற்றத்தில் இன்ஃபோசிஸ்... இனியும் தொடருமா?

''முதல் காலாண்டில் இன்ஃபோசிஸ் நிறுவனத்தின் வருமானம் டாலரின் அடிப்படையில் மைனஸ் 1.5 சதவிகிதமாக இருக்கும் என எதிர்பார்க்கப்பட்டது. ஆனால், டாலர் அடிப்படையிலான வருமானம் 2.7 சதவிகிதம் அதிகரித்திருப்பது ஆரோக்கியமான விஷயம். மேலும், ஐந்து காலாண்டுகளாகச் செயல்பாட்டு லாப வரம்பு குறைந்துவந்த நிலையில், முதல் காலாண்டில் அது 0.9 சதவிகிதமாக அதிகரித்து 23.6 சதவிகிதமாக உயர்ந்துள்ளது. ஆனால், இது தொடரும் என்பதற்கான எந்த உத்தரவாதமும் இல்லை. வரும் காலாண்டில் பணியாளர் சம்பள உயர்வால், செயல்பாட்டு லாப வரம்பு குறையவே வாய்ப்புண்டு. ஆனால், டாலர் அடிப்படையிலான வருமானம் 6 முதல் 10 சதவிகிதமாக இருக்கும் என இன்ஃபோசிஸ் கைடன்ஸ் கொடுத்திருப்பதும் பாசிட்டிவ் ஆன விஷயமாக இருக்கிறது'' என்றார்.      

பங்குச் சந்தை நிபுணர் வி.நாகப்பனிடம் இதுபற்றி பேசினோம். ''நாராயணமூர்த்தி, இன்ஃபோசிஸில் மீண்டும் நுழைந்து குறுகியகாலம்தான் ஆகிறது. அதனால், இப்போதைய இன்ஃபோசிஸ் நிறுவனத்தின் வளர்ச்சிக்கு நாராயணமூர்த்தி காரணம் என்று சொல்ல முடியாது. அமெரிக்காவில்

ஏற்றத்தில் இன்ஃபோசிஸ்... இனியும் தொடருமா?

வேலை வாய்ப்பு மற்றும் தொழில் உற்பத்தி அதிகரித்துள்ளது. இதனால் இன்ஃபோசிஸ் போன்ற இந்திய ஐ.டி. கம்பெனிகளுக்கு அதிக ஆர்டர் கிடைக்கும் சூழ்நிலை ஏற்பட்டுள்ளது.

மேலும், அமெரிக்க டாலருக்கு நிகரான இந்திய ரூபாயின் வெளிமதிப்பு 60 ரூபாய் அளவில் இருப்பதும் இன்ஃபோசிஸ் நிறுவனத்துக்கு அதிக ஆதாயத்தை அளிக்கும் விஷயம். கடந்த காலாண்டில் டாலர் - ரூபாய் உயர்வை ஹெட்ஜிங் செய்திருப்பார்கள் என்பதால் இன்ஃபோசிஸுக்கு டாலர் மதிப்பு உயர்வால் லாபம் கிடைத்திருக்காது. இனிவரும் சில காலாண்டுகளில் அமெரிக்க பொருளாதார வளர்ச்சி, டாலர் மதிப்பு போன்றவற்றால் இன்ஃபோசிஸ் லாபம் நிச்சயம் அதிகரிக்கும். அந்த வகையில், நாராயணமூர்த்தி பெரிய அளவில் எதுவும் செய்யவில்லை என்றாலும், சில காலாண்டுகளுக்கு இன்ஃபோசிஸ் சிக்கல் இல்லாமல் சென்றுவிடும். அதன்பிறகான வளர்ச்சிதான் நாராயணமூர்த்தியின் கையில் இருக்கிறது'' என்றார்.    

இன்ஃபோசிஸ் மீண்டும் பழைய மவுசை பெறுமா என்பது அமெரிக்கப் பொருளாதாரச் சூழ்நிலை மற்றும் நாராயணமூர்த்தியின் செயல்பாட்டில்தான் இருக்கிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism