Published:Updated:

இனி என்ன தயக்கம்?

பெண்களுக்கான முதலீட்டு ரகசியங்கள்!

இனி என்ன தயக்கம்?

பெண்களுக்கான முதலீட்டு ரகசியங்கள்!

Published:Updated:
##~##

சில நாட்களுக்கு முன்பு டி.எஸ்.பி. பிளாக்ராக் ஒரு சர்வே முடிவை வெளியிட்டது.  வேலைக்குச் செல்லும் பெண்களில் 23 சதவிகிதத்தினர் மட்டுமே தங்களின் முதலீடு சார்ந்த முடிவுகளை எடுக்கிறார்கள் என்கிற அதிர்ச்சிகரமான உண்மையை எடுத்துச் சொன்னது அந்த சர்வே.

ஆனால், காலம் காலமாக நம் வீடுகளில் சேமிப்பதில் பெரும் பங்கு வகிப்பவர்கள் பெண்கள்தான். பாட்டி காலம் முதல் இன்றைக்கு வரை இதுதான் உண்மை. சேமிப்பில் சிகரங்களாக இருக்கும் பெண்கள், முதலீட்டு விஷயத்தில் மட்டும் கோட்டை விடுவது ஏன், அதை எப்படி சரிசெய்துகொள்வது என விளக்கமாகப் பார்ப்போம்.

ஒட்டுமொத்த விகடனுக்கும் ஒரே ஷார்ட்கட்!

மாறிவரும் பெண்கள்!

''நம் பாட்டிமார்கள் சேமிக்கும் காசும் பணமும் பெரும்பாலும் அஞ்சறைப் பெட்டியில்தான் இருக்கும். இந்தப் பணத்தை வைத்துக்கொண்டு கொஞ்சம் கொஞ்சமாக தங்கம் வாங்குவார்கள். அல்லது அக்கம்பக்கத்தில் உள்ளவர்களுக்கு வட்டிக்கு கடன் தந்து பணத்தைப் பெருக்குவார்கள். இவைதான் நம் பெண்களுக்கு நன்கு தெரிந்த முதலீடு.

முந்தைய காலத்தில்  வெளியில் சென்று வேலை பார்க்கிற வழக்கம் பெண்களிடம் இல்லை. எனவே, அவர்களுக்கென்று தனியாக வருமானம் எதுவும் இருக்காது. கணவர் வெளியே சென்று வேலை பார்த்து சம்பாதித்து தரும் பணத்தை சிக்கனமாக செலவு செய்து இப்படி சேமிப்பார்கள்.

இனி என்ன தயக்கம்?

ஆனால், இன்று பெரும்பாலான பெண்கள் படித்து முடித்துவிட்டு வேலைக்குப் போவதோடு, ஆண்களுக்கு நிகராக சம்பாதிக்கவும் செய்கிறார்கள். மிகப் பெரிய நிறுவனங்களில் சி.இ.ஓ., சி.எஃப்.ஓ. பதவிகளைக்கூட வகிக்கிறார்கள். இவர்களில் சில பெண்கள் சம்பளம் வாங்குவதோடு சரி, அடுத்து அந்தப் பணத்தை என்ன செய்வது என்று யோசிப்பதில்லை. பல பெண்கள் தங்களின் கைசெலவுக்குப் போக மீதமுள்ள பணத்தைக் குடும்பத்திற்காக மட்டுமே செலவழிக்கிறார்கள். இதில் சிலர் தங்கள் கணவரிடம் அல்லது தந்தையிடம் கொடுத்துவிட்டு அந்தப் பணத்திற்கும் தனக்கும் எந்த சம்பந்தமும் இல்லை என்பதுபோல் அமைதியாக இருந்துவிடுகிறார்கள். அந்தப் பணத்தை எதில் முதலீடு செய்கிறார்கள், அதன் வளர்ச்சி எப்படி இருக்கும் என்பதைப் பற்றி எல்லாம் அவர்கள் கவலைப்படுவதே இல்லை. அது பற்றிய தகவல்களைக்கூட தெரிந்துகொள்ள அவர்கள் ஆர்வம் காட்டுவதில்லை. இதெல்லாம் நம் வேலை இல்லை என்றே பல பெண்களும் நினைக்கிறார்கள்.

ரிஸ்க் எடுக்கத் தயங்குவார்கள்!

முதலீடு என்பது பெண்களின் வேலை இல்லை என்ற மனநிலையிலே இந்த சமூகம் அவர்களை வளர்க்கிறது. மேலும், எந்த முடிவு எடுத்தாலும் அதைக் கணவரிடம் அல்லது அப்பாவிடம் கட்டாயம் தெரிவிக்க வேண்டும் என்ற நிர்ப்பந்தம் இருப்பதால், முதலீடு என்பது பெண்களுக்கு தேவை இல்லாத வேலை என்றும் நினைக்கிறார்கள். பெண்கள் எடுக்கும் முடிவில் ஏதாவது தவறு நிகழ்ந்தால் அல்லது அதிக நஷ்டம் வந்தால் ஆண்களுக்கு பதில் சொல்லவேண்டுமே என்று யோசிப்பதாலேயே முதலீட்டு விஷயங்களில் அவர்கள் ஈடுபட விரும்புவதில்லை.  

பெண்கள் சாதாரணமாகவே ரிஸ்க் எடுக்கத் தயங்குவார்கள். அவர்களுக்கு குடும்பத்தின் வரவு, செலவு என்ன, ஒவ்வொரு மாதமும் எவ்வளவு பணம் தேவை, எதிர்காலத்தில் என்னென்ன தேவை இருக்கும், அதற்கு எவ்வளவு பணம் தேவைப்படும் என்பதை எல்லா பெண்களும் முன்கூட்டியே கணித்து வைத்திருப்பார்கள். அதனால் நஷ்டத்தைப் பற்றி ஒருபோதும் யோசிக்கமாட்டார்கள். மேலும், இவர்களின் சேமிப்பு என்பது குழந்தைகளின் எதிர்கால படிப்பு, திருமணத்திற்காகவே இருக்கும். இது சென்டிமென்ட் சார்ந்த விஷயம் என்பதால் இதில் ரிஸ்க் எடுக்க அதிக தயக்கம் காட்டுவார்கள்.

சிக்கனப் பேர்வழிகள்!

செலவுகளைக் குறைப்பதில் பெண்கள் மிகுந்த கவனத்துடன் இருப்பார்கள். இன்ஷூரன்ஸ் பிரீமியத்தை எப்போது கட்டவேண்டும், எப்படிக் கட்டினால் பணம் மிச்சமாகும்  என்பது பற்றியெல்லாம் பலரிடம் விசாரித்து அதன்படி நடப்பார்கள். இப்படி ஒவ்வொரு விஷயத்தையும் விசாரித்து நடப்பதால் பெண்களால் முதலீடு சம்பந்தப்பட்ட விஷயங் களையும் எளிதாக கற்றுக்கொண்டு செய்ய முடியும். ஆனால், பெரும்பாலான ஆண்கள் முதலீடு சம்பந்தமான தகவல்களை தங்கள் மனைவிடம் பகிர்ந்துகொள்வதில்லை.  

முதலீடு எளிது!

இனி என்ன தயக்கம்?

முதலீடு சார்ந்த விஷயங்களை பெண்கள் கற்றுக்கொண்டாலே போதும், இந்தப் பிரச்னைகளிலிருந்து எளிதாக வெளியே வந்துவிடலாம். முதலீடு தொடர்பாக ஏதாவது சந்தேகம் இருந்தால் அதை தன் கணவரிடம் கேட்டு தெரிந்துகொள்ளலாம். இப்படி தெரிந்துகொள்வது அவசர காலத்தில் நிச்சயம் கைதரும். மேலும் தொலைக்காட்சி, பத்திரிகைகள் பலவும் முதலீடு சார்ந்த விஷயங்களைச் சொல்லி தருகின்றன. இன்ஷூரன்ஸ் நிறுவனங்கள், புரோக்கிங் நிறுவனங்கள் முதலீடு சார்ந்த கருத்தரங்கங்களை அடிக்கடி நடத்துகின்றன. இதில் கலந்துகொள்வதன் மூலம் முதலீடு பற்றிய அடிப்படை தகவல்களை எளிதாக புரிந்துகொள்ளலாம்.  

எப்படி முதலீடு செய்வது?

குடும்ப உறுப்பினர்கள் அனைவருக்கும் சேர்த்து ஒரு மெடிக்கல் இன்ஷூரன்ஸ் பாலிசி கட்டாயம் எடுத்துவையுங்கள். இல்லையெனில் எதிர்பாராதவிதமாக நிகழும் மருத்துவ செலவுகளுக்கு கையில் இருக்கும் பணத்தைச் செலவழிக்கவேண்டியிருக்கும். குறைந்தபட்ச ஆயுள் காப்பீட்டு பாலிசியை எடுத்துவைப்பது அவசியம்.

முதலீடு என்பது பலவிதங்களில் இருக்க வேண்டும். தங்கம், மியூச்சுவல் ஃபண்டு, ஃபிக்ஸட் டெபாசிட், ரியல் எஸ்டேட் என பிரித்து வையுங்கள்.  

குடும்ப செலவுகளை முன்கூட்டியே திட்டமிட்டு அதற்கேற்ப செலவழிக்க பழகுங்கள். சம்பளம் வந்தவுடனே எதிர்கால திட்டங்களுக்கான சேமிப்பினை எடுத்து வைத்துவிட்டு, அதன்பிறகு செலவழிக்க பழகிக் கொள்ளுங்கள்.

கட்டாயம் கவனிக்கவேண்டியவை!  

எங்கு முதலீடு செய்கிறீர்கள், அதன் எதிர்காலம் எப்படி இருக்கும், அந்த முதலீட்டில் என்னென்ன ரிஸ்க் உள்ளது என்பதையும் கவனிக்கவேண்டும். அந்த முதலீட்டில் எவ்வளவு வருமானம் கிடைக்கும் என்பதையும் தெரிந்துகொள்வது அவசியம்.

உங்களின் முதலீடு எளிதில் பணமாக்கக் கூடியதாக இருக்கவேண்டும். முதலீடு செய்யும் போது ஏஜென்ட் கமிஷன் எவ்வளவு, நிர்வாக செலவுபோக நம்முடைய முதலீடு எவ்வளவு இருக்கும் என்பதைப் பார்ப்பது அவசியம்.

இந்த விஷயங்களை எல்லாம் தெரிந்து கொண்டால் போதும், இனி பெண்களே தங்களுக்கான முதலீடுகளைத் தாங்களே தைரியமாக செய்துகொள்ளலாம்.

இனி என்ன தயக்கம்? முதலீட்டு உலகில் பெண்கள் துணிந்து இறங்கவேண்டியதுதானே!

- தொகுப்பு. இரா.ரூபாவதி.

 சர்வே முடிவு சொல்வது என்ன..?

டி.எஸ்.பி. பிளாக்ராக் வெளியிட்ட சர்வே முடிவின் படி, வேலைக்குச் செல்லும் பெண்களில் 23%பேர்தான் முதலீடு சார்ந்த முடிவுகளை எடுக்கிறார்கள். அதிலும் 18% பேர் தனியாக வாழும் பணிபுரியும் பெண்கள். நான்கில் ஒருவரே முதலீடு சம்பந்தமான முடிவுகளை தன்னிச்சையாக எடுக்கிறார்.

இந்த சர்வே 14 நகரங்களில் 21 - 60 வயது வரையிலான 4,750 பெண்களிடம் நடத்தப்பட்டுள்ளது.  மேலும், 92% பெண்கள் முதலீடு  சார்ந்த ஆலோசனை கூட்டங்களில் கலந்துகொள்வதாகவும், 70% பெண்கள் கணவருடன் சேர்த்து முதலீட்டு முடிவுகளை எடுப்பதாகவும், 50% பெண்கள் முதலீடு செய்ய தெரியும் என தெரிவித்ததாகவும் இந்த சர்வே முடிவுகள் சொல்கிறது.

நகரங்களில் 24% பெண்களும், கிராமப்புறங்களில் 20% பெண்களும் முதலீடு சார்ந்த முடிவுகளை சுயமாக எடுக்கிறார்களாம்!