இந்த பாலிசிக்கு வயது நூறு!

பாதுகாப்பு .

உ ங்கள் குடும்பத்துக்கு நீங்கள் எவ்வளவு முக்கியமானவர் என்று எப்போதாவது யோசித்துப் பார்த்திருக்கிறீர்களா? வயதான காலத்தில் உங்களது மறைவுக்குப் பிறகு குடும்பத்தினரின் நிலை என்னவாக இருக்கும் என்று சிந்தித்திருக்கிறீர்களா? இந்நிலையில், உங்களுக்கு முழு ஆயுளுக்கான காப்பீடு ( Whole-life Insurance ) திட்டம் மிகவும் பொருத்தமானதாக இருக்கும்.

பொதுவாக ஆயுள் காப்பீடு என்றால் 65 வயதுவரையில்தான் கொடுக்கப்படும். ஆனால், இதில் அதிகபட்சமாக 100 வயதுவரைகூட இந்த பாலிசி மூலம் காப்பீடு பெறமுடியும். இதற்கான பாலிசித் தொகை வழக்கமான பாலிசிகளின் பிரீமியத்தில் பாதியளவுதான் இருக்கும்.

யாருக்கெல்லாம் ஏற்ற திட்டமிது என்று எல்.ஐ.சி\யின் சீனியர் டிவிஷனல் மேனேஜர் பொன்.அண்ணாதுரை விளக்கினார்.

. ‘‘ரத்னச் சுருக்கமாகச் சொல்வது என்றால், தனக்குப் பிறகு வாரிசுகளுக்குச் சரியான பாதுகாப்பை ஏற்படுத்துவதே இந்த பாலிசியின் முக்கிய அம்சம். பணி ஓய்வுக்காலத்தில் குறைவான வருமானம்தான் இருக்கும் என எதிர்பார்ப்பவர்கள், தனக்குப் பிறகு மனைவி அல்லது மகன் குடும்பத்தினர் பொருளாதாரப் பிரச்னையைச் சந்திக்கக் கூடாது என்று நினைப்பவர்கள் இந்தத் திட்டத்தைத் தேர்ந்தெடுக்கலாம். திருமண வாழ்க்கையைத் தாமதமாகத் தொடங்கியவர்கள் அல்லது தங்களின் 40, 50 வயதில் திடீரென சில பாசத்துக்குரியவர்களைப் பாதுகாக்க வேண்டிய சூழ்நிலை ஏற்பட்டவர்களுக்கு ஏற்ற திட்டமிது!

உதாரணத்துக்கு, விபத்து ஒன்றில் தாய், தந்தையை இழந்துவிட்ட பேரன் மற்றும் பேத்திகள் தாத்தா, பாட்டி பராமரிப்பில் வளர்கிறார்கள் என்று வைத்துக் கொள்வோம். இந்நிலையில் தாத்தா, சாதாரண இன்ஷூரன்ஸ் பாலிசி எடுத்தால் அது 65 வயதோடு முடிந்துவிடும். முழு ஆயுளுக்கான பாலிசியை தாத்தா எடுத்துக்கொள்வது மூலம் தன்னை நம்பி இருக்கும் பேரன், பேத்திகளை தனக்குப் பிறகு பணப் பிரச்னையிலிருந்து காப்பாற்ற முடியும். தன் வயதான காலத்தில், தன்னைச் சார்ந்திருக்கும் மனைவி மற்றும் குடும்பத்தினர் (மகன், மகள், பேரன், பேத்தி) பணப் பிரச்னையில் சிக்கக் கூடாது என்று நினைப்பவர்களும் இந்த பாலிசியை எடுத்துக் கொள்ளலாம்’’ என்றார்.

அப்படிப்பட்ட ஒருவர்தான் சென்னை அசோக் நகரைச் சேர்ந்த தசரத் நாயுடு. தன்னுடைய நாற்பத்தெட்டாவது வயதில் இவர் எல்.ஐ.சி\யின் முழு ஆயுளுக்கான காப்பீட்டை மூன்று லட்சம் ரூபாய்க்கு எடுத்திருக்கிறார்.

‘‘60\65 வயது வரை உடலில் தெம்பு இருக்கும். அதுவரைக்கும் சம்பாதித்து செலவிட்டுக் கொள்ளலாம். மேலும், இதில் மிச்சமாகும் தொகையைக் கொண்டு 80 வயது வரை வாழ்க்கையை பொருளாதாரப் பிரச்னை இல்லாமல் ஓட்டி விடலாம். அதன் பிறகு மருத்துவச் செலவு உள்ளிட்டவைகளை ஈடு செய்ய பணம் வேண்டாமா? எனக்குப் பிறகும் என் மனைவி, மகள், மகன்கள், பேரன், பேத்தி களுக்குப் பயன்படும் விதமாகத்தான் இந்த பாலிசியை எடுத்திருக்கிறேன்’’ என்றார் அவர்.

முழு ஆயுளுக்கான திட்டம் 80\வது வயதில் முதிர்வடைகிறது என்றால் அப்போது பாலிசி தொகை கிடைக்கும். அதற்கு முன் மரணம் ஏற்பட்டால், குடும்பத்துக்கு இழப்பீட்டுத் தொகை போய் சேரும். பணி ஓய்வுபெறும் 60 வயதுக்கு மேல் பிரீமியம் கட்டுவதில் பலருக்கும் சிரமம் இருக்கும். அது போன்றவர்கள், பின்னால் கட்டவேண்டிய பிரீமியத்தை இத்திட்டத்துக்கு அறிவிக்கப்படும் போனஸ் தொகையைக் கொண்டு கட்டிக்கொள்ள, மேக்ஸ் நியூயார்க் லைஃப் நிறுவனத்தின் ஹோல் லைஃப் திட்டத்தில் அனுமதி இருக்கிறது.

மெட் லைஃப் நிறுவனத்தின் மெட் ஸ்மார்ட் பிளஸ் திட்டத்தில் குறைந்தபட்சம் மூன்றாண்டு, அதிகபட்சம் பத்தாண்டு பிரீமியம் கட்டும் வசதி இருக்கிறது. அந்தக் குறிப்பிட்ட காலத்துக்குப் பிறகு பிரீமியம் கட்டத் தேவையில்லை. முதிர்வு காலத்தின் போதோ அல்லது பாலிசிதாரர் மறைவுக்குப் பிறகு அவருடைய வாரிசுகளுக்கோ, பாலிசித் தொகை கிடைக்கும்.

.

நீண்டகாலத் திட்டம் என்பதால் எல்லா ஆயுள் காப்பீட்டு நிறுவனங்களிலுமே இதர திட்டங்களை விட முழு ஆயுளுக்கான திட்டத்தில், அதிக போனஸ் அளிக்கப்படுகிறது. போனஸ் மற்றும் முதிர்வுத் தொகைக்கு வருமான வரி கிடையாது. இந்த பாலிசிக்கு கட்டப்படும் பிரீமியத்துக்கு வருமான வரிச் சட்டம் 80சி-ன் கீழ் தள்ளுபடி பெறமுடியும் என்பது கூடுதல் சலுகை.

எல்.ஐ.சி\யில் முழு ஆயுளுக்கான பாலிசி என்பது, பாலிசி எடுக்கும் வயதைப் பொறுத்து 80, 85, 90 என மூன்று பிரிவாகவும், ஐ.என்.ஜி. வைஸ்யாவில் 85 வயதாகவும், மேக்ஸ் நியூயார்க் லைஃப் மற்றும் மெட் லைஃப், பிர்லா சன் லைஃப்\ல் 100 வயதாகவும் இருக்கிறது.

நூறாண்டு காலம் வாழலாம்... நமக்குப் பிறகும் வாரிசுகளுக்கு வாழ்க்கை கிடைக்கும் என்ற நம்பிக்கையோடு!

இந்த பாலிசிக்கு வயது நூறு!

Vikatan Correspondent