Published:Updated:

வீட்டு உபயோகப் பொருள்கள்...

Appliances
பிரீமியம் ஸ்டோரி
News
Appliances

திட்டமிட்டு வாங்கினால் லாபம்தான்!இரா.ரூபாவதி படங்கள்: தே.தீட்ஷித்.

ஃபிரிட்ஜ், வாஷிங்மெஷின், மிக்ஸி, கிரைண்டர், டிவி, ஏசி போன்ற வீட்டு உபயோகப் பொருள்களை இன்றைக்குப் பெரும்பாலான வீடுகளில் கடன் வாங்கியாவது வாங்கிவிடுகி றார்கள். இந்தப் பொருள்கள் எல்லாம் வீட்டில் இருந்தால்தான் பலரும் கெளரவமாக நினைக்கிறார்கள். இன்னும் சிலர் புதிய மாடல்கள் சந்தைக்கு வரும்போதெல்லாம் பழைய ஃபிரிட்ஜ் போன்றவற்றைக் குறைந்த விலைக்கு விற்றுவிட்டு, புது மாடல் ஃபிரிட்ஜை அதிக விலை கொடுத்து வாங்கத் தவறுவதில்லை.  எந்த வகையிலும் திட்டமிடாமல் நினைக்கிற நேரத்தில் எல்லாம் விரும்புகிற பொருளை வாங்குவதை ‘கம்பல்ஸிவ் பையிங்’ என்பார்கள். நம் வீட்டுக்குத் தேவையான பொருளை வாங்க வேண்டும் எனில் எப்படி திட்டமிட வேண்டும், இந்தச் செலவுகளை எப்படியெல்லாம் குறைக்கலாம் என்பது குறித்து விளக்குகிறார் நிதிஆலோசகர் அனிதா ஆர் பட்.

“வீட்டு உபயோகப் பொருள்களின் தேவையை எப்போதுமே தவிர்க்க முடியாது, அந்தத் தேவையை வேண்டுமானால் குறைக்கலாம். சில பொருள்கள் கட்டாயம் தேவைப்படும். அதாவது, இருவரும் வேலைக்குப் போகும் வீடுகளில், இந்தப் பொருள்களின் எண்ணிக்கை கூடுதலாகவே இருக்கும்.

வேலையைக் குறைக்கும் என நினைத்து பலரும் பல பொருள்களை வாங்கியிருப்பார்கள். சில பொருள்கள் அவசியம் தேவைப்படும். அதுபோன்ற பொருள்களை வாங்குவதில் தவறில்லை. ஆனால், சிலர் போனஸ், நிலுவை தொகை, ஊதிய உயர்வு என எப்போது கூடுதல் வருமானம் கிடைத்தாலும் அதை இதுபோன்ற பொருள்கள் வாங்குவதற்குப் பயன்படுத்திக் கொள்வார்கள்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
வீட்டு உபயோகப் பொருள்கள்...

சில நுகர்வோர் கடன் வாங்கி இந்தப் பொருள்களை வாங்க முயற்சிப்பார்கள். இந்தக் கடனுக்கான வட்டி விகிதம் என்பது 16-18% இருக்கும். ஆனால், தனி மனிதர்களிடம் அதிகமான வட்டிக்கு கடன் வாங்கி, அதன்மூலம் வீட்டு உபயோக பொருள்களை வாங்குவது முற்றிலும் தவறு. ஏனெனில், வீட்டு உபயோகப் பொருள்களினால் எந்தவிதமான வருமானமும் கிடைக்காது. தவிர, வாங்கியப் பொருளில் ஏதாவது பிரச்னை அல்லது மாடல் பிடிக்கவில்லை என்றால் மிகக் குறைந்த விலைக்குதான் மறுவிற்பனை செய்ய முடியும். எலெக்ட்ரானிக் பொருள்கள் பழுதடைந்துவிட்டால் சரிசெய்து பயன்படுத்துவதும் ரிஸ்க்கான விஷயம்தான். இதுபோன்ற பல சிக்கல்கள் இந்த வீட்டு உபயோகப் பொருள்களில் உள்ளது. இதற்கு எப்படிச் சேமிக்க வேண்டும் என்பதைப் பார்ப்போம்.

அடிப்படை பொருள்கள் இல்லாமல் அன்றாடத் தேவை களை நிறைவேற்றிக்கொள்ள முடியாது என்கிற நிலைமையில் நாம் இருப்பதால் இந்தப் பொருள்களை வாங்க அவசியம் திட்டமிட வேண்டும். அதாவது, ஒவ்வொரு மாதமும் ரூ.2000  அல்லது அவரவர் தேவையைப் பொறுத்து குறிப்பிட்ட தொகையை ஆர்டி மூலமாக அல்லது மியூச்சுவல் ஃபண்டுகள் மூலமாகச் சேமிக்கலாம்.

வீட்டு உபயோகப் பொருள்கள்...

இப்படிச் சேமிக்கும்போது கடன் வாங்க வேண்டிய சூழ்நிலை இருக்காது. சிலர் இஎம்ஐயில் ஜீரோ பெர்சன்ட் வட்டி என்றதும் உடனே வாங்கிவிடுகிறார்கள். ஜீரோ பெர்சன்ட் என்பது, நாம் பொருளை வாங்குவதற்காக செய்யப்படும் கவர்ச்சிகரமான விளம்பரமே தவிர, உண்மையில் அதுமாதிரி எதுவும் கிடையாது. ஜீரோ பெர்சன்ட் வட்டி என்று சொல்லிவிட்டு, பிராசஸிங் சார்ஜ் என்கிற வகையில் நம்மிடம் பணம் வசூலிப்பார்கள். அதுபோக, நம்மால் கண்டுபிடிக்க முடியாதபடி வேறு சில மறைமுகக் கட்டணங்களும் அதில் இருக்கலாம். இஎம்ஐயில் வாங்கும் பொருளுக்கு இப்படி கூடுதல் தொகையைத் தருவதைவிட, பணத்தை சேமித்து வாங்குவதன்மூலம் நான்கு பொருள் வாங்கும் இடத்தில் ஐந்து பொருளை நம்மால் வாங்க முடியும்.

தவிர, எலெக்ட்ரானிக் பொருள்கள் சின்னச் சின்ன மாற்றங்களுடன் புதிது புதிதாக அறிமுகமாகிக்கொண்டே இருக்கும். ஒவ்வொருமுறையும் ஒரு மாற்றத்துடன் பொருள்கள் வரும்போது அட, இது நம்மிடம் இல்லை, அது நம்மிடம் இல்லையே என்று ஏங்கித் தவிக்கக் கூடாது. நம் குடும்ப சூழலுக்கு என்ன பொருள்கள் நமக்கு அவசியம் தேவையோ அந்தப் பொருள்கள் நம்மிடம் இருக்கிறதா என்று பார்த்து வாங்கினாலே நம் வீட்டில் தேவையில்லாமல் பொருள்கள் சேர்வது நின்றுவிடும்.

வீட்டு உபயோகப் பொருள்கள்...

செலவைக் குறைப்பது எப்படி?

எலெக்ட்ரானிக் பொருள்களைப் பொறுத்தவரை, சின்னச் சின்னப் பிரச்னைகள் இருந்தால் அதைச் சரிசெய்து பயன்படுத்தலாம். பெரிதாகப் பிரச்னை இருந்தால், அதை விற்றுவிட்டு புதிதாக வாங்குவதே சிறப்பு. வீட்டில் உள்ள மெத்தை, சோபா போன்ற பொருள்கள் பழுதானால் அவற்றை சரிசெய்து பயன்படுத்தினால் பாதி செலவை குறைக்க முடியும். சோபாவின் விலை 20 ஆயிரம் எனில், அதை ரிப்பேர் செய்யும்போது 8 - 9 ஆயிரம் வரைதான் செலவு இருக்கும். இதனால் உங்களுக்கு 10,000 ரூபாய் மிச்சமாகும்.

எப்படி வாங்குவது?

வீட்டு உபயோகப் பொருள்கள்...

முதல்முறையாகப் பொருளை வாங்கும்போது, அவசரப்படாமல் நிதானமாக ஒரு கடைக்குப் பல கடை களில் விசாரித்து வாங்குவதே சிறப்பாக இருக்கும். வாங்கும் பொருளை குறைந்த பட்சம் 5-லிருந்து 7 வருடத்துக்காவது பயன்படுத்தும் வகையில் பார்த்து வாங்குவது நல்லது. மேலும், எதிர்காலத்தில் தேவை அதிகரிக்குமா என்பதையெல்லாம் யோசித்து வாங்குவது நல்லது.

உதாரணமாக, திருமணமான புதிதில் வாஷிங்மெஷின் வாங்குகிறீர்கள் என வைத்துக் கொள்வோம். அப்போது கணவன், மனைவி துணிகளை மட்டும் துவைக்கும் கொள்ளவு கொண்ட மெஷினை வாங்கினால் அது வீண்தான். எதிர்காலத்தில் குடும்ப உறுப்பினர்களின் எண்ணிக்கை அதிகரிக்கும் என்பதையும் கவனத்தில் கொள்வது நல்லது. விலை குறைவாக உள்ளது என்பதற்காக இன்றைய தேவையை மட்டும் நிறைவேற்றினால் போதும் என நினைக்கக் கூடாது’’ என்று முடித்தார். எந்தச் சூழ்நிலையிலும் வீட்டு உபயோக பொருள்களைக் கடன் வாங்கி கொள்முதல் செய்வது நல்லதல்ல.